Waray pag-iha katapos maghisgot mahitungod han pagpasaylo didto ha balay ni Simon nga Pariseo, gintikangan ni Jesus an iya ikaduha nga pagsangyaw ha bug-os nga Galilea. Ito an ikaduha ka tuig han iya pagministeryo, ngan diri hiya nag-uusahan. Kaupod niya an 12 nga apostol, ngan an pipira nga babaye nga iya “gintalwas tikang ha magraot nga espiritu ngan gintambal an mga sakit.” (Lucas 8:2) Upod ha ira hira Maria Magdalena, Susana, ngan hi Juana nga an bana opisyal ni Hadi Herodes Antipas.

Samtang nagtitikadamu an nahibabaro mahitungod kan Jesus, nagtitikaduro an pagdiskusyon mahitungod han iya buruhaton. Nahitabo ito han an usa nga lalaki nga buta ngan ngula nga ginsaniban hin demonyo, gindara kan Jesus ngan iya gintambal. Yana ito nga lalaki diri na kontrolado han demonyo, nakakakita na hiya ngan nakakayakan. Nahipausa hito an mga tawo ngan nagsiring mahitungod kan Jesus: “Posible ba nga hiya an Anak ni David?”—Mateo 12:23.

Damu hinduro an nagtirirok ha balay nga gin-uukyan ni Jesus salit hiya ngan an iya mga disipulo waray na ngani makakaon. Pero diri ngatanan naghuhunahuna nga hiya an iginsaad nga “Anak ni David.” An pipira nga eskriba ngan Pariseo nga tikang pa ha Jerusalem kinadto kan Jesus—pero diri basi mahibaro o sumuporta ha iya. Nasiring hira ha mga tawo: “Aada ha iya hi Beelsebub” salit kabulig hiya han “magmarando han mga demonyo.” (Marcos 3:22) Han hinbatian han mga paryente ni Jesus an mahitungod han kasamok, kinadto hira kan Jesus basi dakpon hiya. Kay ano?

Aw, hini nga panahon, an kabugtoan ni Jesus diri natoo nga hiya an Anak han Dios. (Juan 7:5) An Jesus nga baga hin amo an hinungdan han kasamok han mga tawo iba na gud ha Jesus nga ira kilala nga nagtubo kaupod nira ha Nazaret. Para ha ira may diperensya hi Jesus ha hunahuna, salit hira nagsiring: “Nalulurong na hiya.”—Marcos 3:21.

Pero ano an iginpapakita han mga ebidensya? Gintambal pa la ni Jesus an tawo nga ginsaniban, nga yana nakakakita ngan nakakayakan na. Waray makakagnigar hini. Salit an mga eskriba ngan mga Pariseo nangalimbasog pagpakaraot kan Jesus pinaagi hin buwa nga akusasyon. Hira nagsiring: “Ini nga tawo nagpapagawas hin mga demonyo pinaagi kan Beelsebub, an magmarando han mga demonyo.”—Mateo 12:24.

Maaram hi Jesus han ginhuhunahuna han mga eskriba ngan Pariseo, salit hiya nagsiring: “An tagsa nga ginhadian nga nagkakabahinbahin mabubungkag, ngan an tagsa nga syudad o panimalay nga nagkakabahinbahin diri matindog. Sugad man, kon hi Satanas an nagpapagawas kan Satanas, hiya mismo nababahin. Salit paonan-o matindog an iya ginhadian?”—Mateo 12:25, 26.

Maopay gud ito nga pangatadongan! Maaram an mga Pariseo nga an pipira nga Judio nagpapagawas hin mga demonyo. (Buhat 19:13) Salit hi Jesus nagpakiana: “Kon nagpapagawas ako hin mga demonyo pinaagi kan Beelsebub, pinaagi kan kanay ginpapagawas hira han iyo mga anak?” Ha iba nga pagkayakan, an ira akusasyon angay liwat ig-akusar ha ira. Katapos, hi Jesus nagdugang: “Pero kon nagpapagawas ako hin mga demonyo pinaagi han espiritu han Dios, waray kamo mahibaro nga an Ginhadian han Dios inabot na.”—Mateo 12:27, 28.

Basi iilustrar nga an iya pagpagawas hin mga demonyo pamatuod nga mas gamhanan hiya kan Satanas, hi Jesus nagsiring: “Paonan-o an usa makakasulod ha balay han makusog nga tawo basi pangawaton an iya mga panag-iya, kon diri anay niya gapuson ito nga makusog nga tawo? Katapos, makakapangawat na hiya hito nga balay. An diri nadapig ha akon nakontra ha akon, ngan an diri nabulig pagtirok han mga tawo ngadi ha akon nagtatabog ha ira pahirayo ha akon.” (Mateo 12:29, 30) Sigurado nga an mga eskriba ngan Pariseo nakontra kan Jesus, salit pamatuod ito nga ginagamit hira ni Satanas. Ginpapahirayo nira an mga tawo tikang ha Anak han Dios, nga nagbubuhat pinaagi ha bulig ni Jehova.

Ginpahamangnoan ni Jesus ini nga mga parakontra nga dapig kan Satanas: “Papasayloon an ngatanan nga sala nga ginbuhat han mga tawo ngan an pagpasipara nga ira ginyakan. Kondi an bisan hin-o nga nagpapasipara ha baraan nga espiritu diri na gud mapapasaylo, ngan magpapadayon hiya nga salaan.” (Marcos 3:28, 29) Ginpaiwas ni Jesus an mga demonyo pinaagi han baraan nga espiritu han Dios, pero nasiring an mga parakontra nga ginhimo niya ito pinaagi ha gahum ni Satanas. Hunahunaa la kon ano an magigin resulta hini para ha mga parakontra ni Jesus.