Samtang nakadto ha Judea, ginkarawat ni Jesus an imbitasyon han usa nga Pariseo para ha pangaon. Posible nga durante adto ha adlaw, diri ha gab-i. (Lucas 11:37, 38; itanding an Lucas 14:12.) Antes mangaon, an mga Pariseo naghunaw tubtob ha siko sugad nga pagsunod ha tradisyon. Pero waray ito buhata ni Jesus. (Mateo 15:1, 2) Diri pagtalapas ha Balaud han Dios an sugad nga paghunaw, pero diri ito gin-oobligar han Dios.

Nahipausa an mga Pariseo nga waray sunda ni Jesus ito nga tradisyon. Inabat ito ni Jesus salit hiya nagsiring: “Kamo nga mga Pariseo, ginhuhugasan niyo an gawas han tasa ngan yahong, pero an iyo kasingkasing puno hin kahakog ngan karaotan. Diri kamo makatadunganon! An naghimo han gawas amo liwat an naghimo han sulod, diri ba?”—Lucas 11:39, 40.

An isyu diri amo an pagkaada limpyo nga kamot antes kumaon, kondi an ira pagkahipokrito. An mga Pariseo ngan an iba nga naghunaw uyon han tradisyon waray maglimpyo han ira kasingkasing tikang ha karaotan. Salit ginsagdonan hira ni Jesus: “Ighatag sugad nga mga hatag tungod ha kalooy an mga butang nga aada ha sulod han iyo kasingkasing, ngan magigin limpyo an ngatanan nga butang mahitungod ha iyo.” (Lucas 11:41) Tinuod gud ito! An paghatag sadang magtikang ha kasingkasing nga mahigugmaon, diri ha hingyap nga magpabilib pinaagi ha pagpakunokuno nga matadong.

Diri ito nagpapasabot nga ini nga mga tawo diri nahatag. Hi Jesus nagpatin-aw: “Iginhahatag niyo an ikanapulo nga bahin han herbabuena ngan ruda ngan han iba pa nga klase hin utanon, pero ginbabalewaray niyo an hustisya ngan gugma han Dios! Obligado kamo nga buhaton ini, pero diri niyo sadang igbalewaray an iba nga butang.” (Lucas 11:42) Igin-oobligar han Balaud han Dios an paghatag han ikanapulo nga bahin han mga inani. (Deuteronomio 14:22) Nag-uupod ito han herbabuena ngan ruda, herba o tanom nga ginagamit ha pagparasa hin pagkaon. Diri gud ginkakalimtan han mga Pariseo an paghatag han ikanapulo nga bahin hini nga mga herba, pero kumusta man an mas importante nga gin-oobligar han Balaud, sugad han pagpakita hin hustisya ngan pagin mapainubsanon ha atubangan han Dios?—Mika 6:8.

Hi Jesus nagpadayon: “Kairo niyo nga mga Pariseo, kay karuyag niyo lumingkod ha prente nga mga lingkoran ha sinagoga ngan hatagan hin katalahoran han mga tawo ha mga merkado! Kairo niyo, kay pariho kamo han mga lubnganan nga diri nakikita, salit natatamakan ito han mga tawo pero diri hira maaram!” (Lucas 11:43, 44) Oo, bangin matamakan han mga tawo an sugad nga mga lubnganan ngan magin mahugaw hira. Ginamit ni Jesus ini nga kamatuoran basi pabug-atan nga diri nakikita an kahugaw han mga Pariseo.—Mateo 23:27.

Usa nga tawo nga maaram gud ha Balaud han Dios an nagreklamo: “Magturutdo, tungod hini nga imo ginsiring, gin-iinsulto mo liwat kami.” Pero kinahanglan masantop han sugad nga kalalakin-an nga napakyas hira ha pagbulig ha mga tawo. Hi Jesus nagsiring: “Kairo liwat niyo nga mga eksperto ha Balaud, kay ginpapapas-an niyo an mga tawo hin paras-anon nga makuri dad-on, pero kamo mismo diri naruruyag bisan pagbantad hito han iyo tudlo! Kairo niyo, kay naghihimo kamo hin mga lubnganan han mga propeta, pero an iyo kaapoy-apoyan an nagpatay ha ira!”—Lucas 11:45-47.

An gin-uunabi ni Jesus nga paras-anon amo an yinakan nga mga tradisyon ngan an interpretasyon han mga Pariseo ha Balaud. Ginpapakuri hini nga kalalakin-an an kinabuhi han mga tawo tungod kay nag-iinsister hira nga kinahanglan tumanon han ngatanan ito nga nakakapabug-at nga mga pinas-an. Ginpatay han ira mga kaapoy-apoyan an mga propeta han Dios, tikang kan Abel. Yana sugad hin ginpapasidunggan nira an mga propeta pinaagi ha paghimo hin mga lubnganan para ha ira, ginsusubad nira an disposisyon ngan mga buhat han ira mga kaapoy-apoyan. Gin-iikaparatay pa ngani nira an nangunguna nga Propeta han Dios. Hi Jesus nagsiring nga sisirotan han Dios ini nga henerasyon. Ngan natuman ito paglabay hin mga 38 ka tuig, han 70 C.E.

Hi Jesus nagpadayon: “Kairo niyo nga mga eksperto ha Balaud, kay ginkuha niyo an yawi han kahibaro; kamo mismo diri nasulod, ngan an mga nasulod iyo ginpupugngan!” (Lucas 11:52) Ini nga kalalakin-an nga nagtututdo unta han kahulogan han Pulong han Dios amo lugod an nagkukuha han higayon nga hibaroan ngan masabtan ito han mga tawo.

Ano an reaksyon han mga Pariseo ngan eskriba? Han tibaya na hi Jesus, nasisina nga ginkontra nira hiya ngan ginpauranan hin pakiana. Nagpapakiana hira diri tungod kay karuyag nira mahibaro. Lugod, karuyag nira mabitik hi Jesus basi may maiyakan hiya nga magagamit nira pag-aresto ha iya.