Samtang nagpapadayon hi Jesus pagtutdo ha Judea, may gin-unabi hiya nga pamilyar ha iya mga mamarati—an mga karnero ngan an mga toril han mga karnero. Pero diri ito literal. Bangin nahinumdoman han mga Judio an ginsiring ni David: “Hi Jehova amo an akon magbarantay; diri magkukulang ha akon. Iya ako ginpapahigda ha mga hilaw nga sabsaban.” (Salmo 23:1, 2) Ha usa pa nga salmo ni David, ginsagda niya an nasud: “Pagluhod kita ha atubangan ni Jehova nga aton Magburuhat. Kay hiya amo an aton Dios, ngan hi kita an mga tawo han iya panabsaban.” (Salmo 95:6, 7) Oo, an mga Israelita nga ilarom ha Balaud maiha na nga iginpariho ha panon han kakarnerohan.

Ini nga “mga karnero” nakada ha sulod han “toril han mga karnero” kay natawo hira ilarom ha kasabotan nga Mosaiko nga Balaud. An Balaud sugad hin alad nga nagbubulag ha ira tikang ha nakakadaot nga mga buhat han mga tawo nga diri sakop hini nga kahikayan. Pero ginmaltrato han iba nga Israelita an panon han Dios. Hi Jesus nagsiring: “Ha pagkamatuod susumatan ko kamo, An nasulod ha toril han mga karnero nga diri naagi ha purtahan kondi nasaka ha iba nga maaagian, usa nga kawatan ngan tikasan. Pero an naagi ha purtahan amo an paraataman han mga karnero.”—Juan 10:1, 2.

Bangin mahunahuna han mga tawo adton mga nag-aangkon nga Mesias, o Kristo. Pariho hira hin mga kawatan ngan tikasan. Diri angay sundon han mga tawo ini nga mga impostor. Lugod, sadang nira sundon “an paraataman han mga karnero,” nga ginhihisgotan ni Jesus:

“Inaabrihan hiya han gwardya ha purtahan, ngan namamati ha iya tingog an mga karnero. Tinatawag niya ha ngaran an iya mga karnero ngan nasunod hira ha iya tipagawas. Kon napagawas na niya an ngatanan nga iya karnero, nag-uuna hiya ha ira ngan nasunod ha iya an mga karnero, kay nakilala hira ha iya tingog. Diri gud hira nasunod ha estranghero lugod napalagiw tikang ha iya, kay diri nira kilala an tingog han mga estranghero.”—Juan 10:3-5.

Han naglabay, hi Juan nga Parabaptis nga pariho hin gwardya ha purtahan nagpakilala kan Jesus sugad nga angay sundon hadton simboliko nga mga karnero nga ilarom han Balaud. Ngan an pipira nga karnero, ha Galilea ngan dinhi mismo ha Judea, nakakilala ha tingog ni Jesus. Ngain niya hira tutugwayan? Ngan ano an magigin resulta han ira pagsunod ha iya? Bangin nahipausa an iba nga nakabati hini nga ilustrasyon, kay “waray nira masabti an kahulogan han iya iginsasaysay ha ira.”—Juan 10:6.

Hi Jesus nagsaysay: “Ha pagkamatuod susumatan ko kamo, Ako an purtahan han mga karnero. An ngatanan nga nasiring nga hira an tinuod nga paraataman, mga kawatan ngan tikasan; pero an mga karnero diri namamati ha ira. Ako an purtahan; bisan hin-o nga nasulod pinaagi ha akon matatalwas. Masulod ngan magawas hiya ngan makakaagi hin panabsaban.”—Juan 10:7-9.

Matin-aw nga may bag-o nga ginhihisgotan hi Jesus. Maaram an iya mga mamarati nga diri hiya an purtahan ngadto ha Balaud nga kasabotan, nga maiha na nga naeksister. Salit iginpapasabot niya nga an mga karnero nga iya gintutugwayan masulod ha iba nga toril. Ano an resulta?

Basi isaysay hin dugang an iya papel, hi Jesus nagsiring: “Kinanhi ako basi an mga karnero magkaada hin kinabuhi nga waray kataposan. Ako an maopay nga paraataman; iginhahatag han maopay nga paraataman an iya kalag para ha mga karnero.” (Juan 10:10, 11) Diri pa la maiha, ginliaw ni Jesus an iya mga disipulo, ha pagsiring: “Ayaw kahadlok, gutiay nga panon, kay an Ginhadian iginhatag ha iyo han iyo Amay.” (Lucas 12:32) Oo, an magkukompwesto han “gutiay nga panon” amo an tutugwayan ni Jesus ngadto ha bag-o nga toril basi “magkaada hin kinabuhi nga waray kataposan.” Bendisyon gud nga magin bahin hini nga panon!

Pero diri la ito an iginsumat ni Jesus. Hiya nagsiring: “May-ada ako iba nga mga karnero nga waray dinhi hini nga toril; kinahanglan dad-on ko liwat hira, ngan mamamati hira han akon tingog. Hira ngatanan magigin usa nga panon nga may usa nga paraataman.” (Juan 10:16) Inin ‘iba nga mga karnero waray dinhi hini nga toril.’ Salit, aadto hira ha lain nga toril, nga iba ha toril han “gutiay nga panon” nga makakapanunod han Ginhadian. Magkaiba an hingangadtoan hinin duha nga toril, o grupo han mga karnero. Pero an mga karnero ha duha nga toril pariho makakapahimulos han papel ni Jesus. Hiya nagsiring: “Hinigugma ako han Amay, kay iginhahatag ko an akon kalag.”—Juan 10:17.

Damu an nagsiring: “May demonyo hiya ngan nalulurong na.” Pero iginpakita han iba nga interesado hira mamati ngan karuyag nira sumunod ha Maopay nga Paraataman. Hira nagsiring: “Diri sugad hito magyakan an tawo nga may demonyo. Diri mapupukrat han demonyo an mga mata han mga tawo nga buta, diri ba?” (Juan 10:20, 21) Matin-aw nga an gin-uunabi nira amo an pagtambal pa la ni Jesus ha lalaki nga natawo nga buta.