Igintagna han Biblia nga ha kamatay han Kristo, mabangon ha siyahan-siglo nga mga Kristiano an buwa nga mga magturutdo ngan babalikoon nira an kamatuoran nga ginsisiring han Biblia. (Buhat 20:29, 30) Pag-abot hito nga panahon, ito an nahitabo. Ira ginsalaktan an katutdoan ni Jesus hin pagano nga mga ideya, salit naporma an peke nga klase hin Kristianidad. (2 Timoteo 4:3, 4) Paonan-o kita makakasiguro nga husto an aton pagsabot yana ha kon ano gud an igintututdo han Biblia?

Inabot an panahon han pagbuhayhag ni Jehova han kamatuoran. Iya igintagna nga durante han ‘panahon han kataposan, an [tinuod nga] kahibaro magdudugang.’ (Daniel 12:4) Han 1870, hinbaroan han gutiay nga grupo nga namimiling han kamatuoran nga damu han doktrina han singbahan an diri uyon ha Kasuratan. Salit nangalimbasog hira nga hisabtan an orihinal nga katutdoan han Biblia, ngan ginbuligan hira ni Jehova nga hisabtan ito.

Gin-adman hin maopay han sinsero nga kalalakin-an an Biblia. An sinsero nga mga Estudyante han Biblia nga nauna ha amon naggamit hin paagi han pag-aram nga ginagamit pa namon tubtob yana. Naghihisgot hira han Biblia sumala ha tagsa nga topiko. Kon may nakikita hira nga teksto nga makuri hisabtan, namimiling hira hin iba nga teksto nga magsasaysay hito. Kon nagkakaada hira konklusyon nga uyon ha ngatanan nga bahin han Biblia, iginsusurat nira ito. Pinaagi ha pag-aram hin iba-iba nga bersikulo mahitungod ha usa nga topiko, hinbaroan nira an kamatuoran mahitungod han ngaran han Dios ngan han Ginhadian, han iya katuyoan ha katawohan ngan ha tuna, han kahimtang han mga patay, ngan han paglaom nga pagkabanhaw. Nagkaada liwat hira kagawasan tikang ha damu nga buwa nga katutdoan ngan kustomre.—Juan 8:31, 32.

Han 1879 nasabtan han mga Estudyante han Biblia nga inabot na an panahon basi ipasamwak an kamatuoran. Salit hito nga tuig, nagtikang hira paghimo han magasin nga iginpupublikar pa namon tubtob yana, an The Watchtower Announcing Jehovah’s Kingdom. Yana iginsasangyaw namon an kamatuoran han Biblia ha sobra 239 nga nasud ngan ha sobra 700 nga yinaknan. Kalyap na gud an tinuod nga kahibaro ha Biblia!

• Han mamatay an Kristo, ano an nahitabo ha kamatuoran han Biblia?

• Paonan-o namon hinbaroan an kamatuoran ha Pulong han Dios?