An amon organisasyon waray sweldado nga klero. Lugod, pariho ha siyahan nga Kristiano nga kongregasyon, may kwalipikado nga mga paramangno nga igintoka ha ‘pag-ataman han kongregasyon han Dios.’ (Buhat 20:28) Inin hamtong ha espirituwal nga mga tigurang nangunguna ngan nagmamangno han kongregasyon, ‘diri ha linugos, kondi ha kinaburut-on sumala ha kaburut-on han Dios, diri tungod ha mahugaw nga salapi,’ kondi ha hingyap nga magserbi. (1 Pedro 5:1-3) Ano an ira ginbubuhat para ha amon?

Nag-aataman ngan nagpapanalipod ha amon. An mga tigurang nagtatagana hin giya tikang ha Biblia ngan nabulig ha kongregasyon nga magpabilin nga duok kan Jehova. Tungod kay maaram nga importante an igintapod han Dios ha ira, diri nira kami gindudominaran, lugod ginsisiguro nira an amon kaopayan ngan kalipay. (2 Korinto 1:24) Pariho hin magbarantay hin karnero nga maduruto nga nag-aataman han tagsa han iya hayop, nangangalimbasog an mga tigurang nga kilalahon an tagsa nga membro han kongregasyon.—Proberbios 27:23.

Nagtututdo kon paonan-o bubuhaton an kaburut-on han Dios. Kada semana, nangunguna an mga tigurang ha mga katirok han kongregasyon basi maparig-on an amon pagtoo. (Buhat 15:32) Nangunguna liwat hira ha ministeryo pinaagi ha pagbulig ngan pagbansay ha amon ha tanan nga bahin hito.

Naghahatag hin personal nga pagdasig ha amon. Basi maparig-on han tagsa ha amon an amon relasyon kan Jehova, ginbibisita kami han lokal nga mga tigurang ha amon balay o ginkakaistorya ha Kingdom Hall ha paghatag hin bulig ngan pagliaw tikang ha Biblia.—Jakobo 5:14, 15.

Dugang pa ha buruhaton han mga tigurang ha kongregasyon, kadam-an ha ira an may sekular nga trabaho ngan responsabilidad ha pamilya nga nagkikinahanglan hin panahon ngan atensyon. Salit inin maduruto nga kabugtoan takos gud han amon pagtahod.—1 Tesalonika 5:12, 13.

• Ano an buruhaton han mga tigurang ha kongregasyon?

• Paonan-o iginpapakita han mga tigurang an ira personal nga interes ha amon?