Hi Jehova nga Dios an aton Maglalarang. Hiya an naghimo han ngatanan​—an aton nakikita pati an diri naton nakikita. Antes niya himoon an mga butang nga aton nakikita, naghimo anay hiya hin damu hinduro nga anghel. Maaram ka ba kon ano an mga anghel? An mga anghel persona nga ginhimo ni Jehova nga pariho ha iya. Diri naton hira nakikita, sugad la nga diri naton nakikita an Dios. An siyahan nga anghel nga ginhimo ni Jehova nagin kabulig niya. Binulig hiya han ginhimo ni Jehova an mga bitoon, mga planeta, ngan iba pa nga butang. Usa hito nga mga planeta amo an tuna, an aton makaruruyag nga urukyan.

Katapos, igin-andam ni Jehova an tuna basi ukyan han mga hayop ngan mga tawo. Iya ginhimo an adlaw basi maghatag hin sirak ha tuna. Iya ginhimo an mga bukid, dagat, ngan salog.

Ano an sunod nga nahitabo? Hi Jehova nagsiring: ‘Maghihimo ako hin mga banwa, mga tanom, ngan mga puno.’ Salit nanubo an iba-iba nga klase hin prutas, utan, ngan bukad. Tapos, ginhimo ni Jehova an tanan nga hayop​—mga hayop nga nalupad, nalangoy, ngan nagkakamang. Naghimo hiya hin gudtiay nga hayop, pariho han rabit, ngan dagku nga hayop, pariho han elepante. Ano an imo paborito nga hayop?

Katapos, hi Jehova nagsiring ha siyahan nga anghel: “Paghimoon naton an tawo.” An tawo iba ha hayop. Nakakaimbento hira hin mga butang.  Maaram hira magyakan, magtawa, ngan mag-ampo. Aatamanon nira an tuna ngan an mga hayop. Maaram ka ba kon hin-o an siyahan nga tawo? Kitaon naton.