Tanan nga ginbubuhat han mga Pariseo puro la pagpabilib. Nagbubuhat hira hin maopay para la makita han iba. Nag-aampo hira ha panpubliko nga mga lugar para makita hira han tanan. Nagmimemorya hira hin hilaba nga mga pag-ampo ngan gin-uuroutro ito ha mga sinagoga ngan mga eskina han kalsada diin mababatian hira han iba. Salit nahipausa an katawohan han ginsidngan hira ni Jesus: ‘Ayaw kamo pag-ampo pariho ha mga Pariseo. Kahuna nira malilipay an Dios ha ira damu nga pulong, pero ha pagkamatuod diri. Kon nag-aampo, hi Jehova la an iyo kaistorya. Ayaw uroutroha an amo gihap nga mga pulong. Karuyag ni Jehova nga isumat niyo ha iya an aada ha iyo kasingkasing.

‘Sadang kamo mag-ampo ha sugad hini nga paagi: “Amay namon ha langit, pagbaraanon an imo ngaran. Kumanhi unta an imo Ginhadian.  Matuman an imo kaburut-on dinhi ha tuna sugad han ha langit.”’ Ginsidngan liwat hira ni Jesus nga sadang hira mag-ampo para ha ira kakaunon ha kada adlaw, para ha kapasayloan han ira mga sala, ngan mahitungod ha personal nga mga butang.

Hi Jesus nagsiring: ‘Ayaw gud undang pag-ampo. Padayon nga pangaro ha iyo Amay, hi Jehova, hin mag-opay nga butang. Ngatanan nga kag-anak karuyag maghatag hin mag-opay nga butang ha ira anak. Kon umaro an imo anak hin tinapay, tatagan mo ba hiya hin bato? Kon umaro hiya hin isda, tatagan mo ba hiya hin halas?’

Tapos, iginsaysay ni Jesus an leksyon: ‘Kon nahatag kamo hin mag-opay nga regalo ha iyo mga anak, diri ba labi na gud an iyo Amay, hi Jehova, mahatag ha iyo hin baraan nga espiritu? Kinahanglan la niyo mangaro.’ Ginsusunod mo ba an sagdon ni Jesus? Ano an imo igin-aampo?