Labot la nga nakakatambal hi Jesus hin may sakit ngan nakakabanhaw hin patay, nakukontrol liwat niya an hangin ngan uran. Katapos niya mag-ampo didto ha usa nga bukid, nakita niya nga may subasko ha Dagat han Galilea. An iya mga apostol nga nakadto ha sakayan naniniguro gud pagbugsay sungsong ha hangin. Linusad hi Jesus ha bukid ngan naglakat ha bawbaw han tubig tikadto ha ira sakayan. Han nakita han mga apostol nga may naglalakat ha bawbaw han tubig, nahadlok hira. Pero ginsidngan hira ni Jesus: ‘Ako ini. Ayaw kamo kahadlok.’

Hi Pedro nagsiring: ‘Ginoo, kon ikaw gud ito, palakta ako ngada ha imo.’ Hi Jesus nagsiring: ‘Kadi.’ Salit samtang nagsusubasko, hinaw-as hi Pedro ha sakayan ngan naglakat ha bawbaw han tubig tikadto kan Jesus. Pero han hirani na hiya kan Jesus, ginkita niya an subasko salit nahadlok hiya. Inabat niya nga nagtitikalunod hiya. Sininggit hiya: ‘Ginoo, talwasa ako!’ Ginkaptan hiya ni Jesus ngan ginsidngan: ‘Kay ano nga nagruhaduha ka? Hain an imo pagtoo?’

Pagsakay nira Jesus ngan Pedro ha sakayan, inundang dayon an subasko. Nahuhunahuna mo ba an gin-abat han mga apostol? Hira nagsiring: “Ikaw gud an Anak han Dios.”

Diri la ini an higayon nga ginkontrol ni Jesus an kahimtang han panahon. Ha usa pa nga higayon, han tumabok hi Jesus ngan an iya mga apostol ha Dagat han Galilea, kumaturog hiya ha ulin han sakayan. Samtang nakaturog, nagkaada makusog nga subasko. An ira sakayan ginpupusakan hin mga balud salit nasudlan ito hin damu nga tubig. Gumuliat an mga apostol ha pagpukaw kan Jesus: ‘Magturutdo, mamamatay na kami! Buligi kami!’ Bumuhat hi Jesus ngan ginsidngan an dagat: “Maglinaw ka!” Hito mismo nga takna, kumalma an hangin ngan an dagat. Ginsidngan ni Jesus an mga apostol: ‘Hain an iyo pagtoo?’ Nagsiring hira ha kada tagsa: “Bisan an hangin ngan an dagat nasugot ha iya.” Hinbaroan han mga apostol nga kon bug-os nga masarig hira kan Jesus, diri hira mahahadlok ha bisan ano.