Hi Timoteo batan-on nga Kristiano ha kongregasyon ha Listra. An iya tatay Griego, ngan an iya nanay Judio. Tikang ha kabata, gintutdoan hiya han iya nanay nga hi Eunice ngan han iya lola nga hi Loida mahitungod kan Jehova.

Pagbisita ni Pablo ha Listra ha iya ikaduha nga pagbiyahe basi magsangyaw, naobserbaran niya nga hinigugma ni Timoteo an kabugtoan ngan karuyag gud ni Timoteo nga buligan hira. Gin-agda niya hi Timoteo nga umupod ha iya pagbiyahe. Paglabay han panahon, nabansay niya hi Timoteo nga magin maopay nga magsarangyaw ngan magturutdo han maopay nga sumat.

Gin-giyahan hira Pablo ngan Timoteo han baraan nga espiritu diin man hira kumadto. Usa ka gab-i, nagkaada bisyon hi Pablo. May lalaki nga nagsiring nga kumadto hiya ha Macedonia ngan buligan hira. Salit hira Pablo, Timoteo, Silas, ngan Lucas kumadto basi magsangyaw ngan mag-establisar hin mga kongregasyon.

Ha syudad han Tesalonica, nga sakop han Macedonia, damu an nagin Kristiano. Pero may mga Judio nga nangabugho kan Pablo ngan ha iya mga kaupod. Nagtirok hira hin magraot nga tawo ngan ira gindanas an kabugtoan ngadto ha mga magmarando han syudad, ngan nan-gugliat: ‘Ini nga mga lalaki kaaway han gobyerno han Roma!’ Nameligro hira Pablo ngan Timoteo, salit pagkagab-i pinalagiw hira ngadto ha Berea.

Karuyag gud han mga taga-Berea mahibaro han maopay nga sumat, ngan an mga Griego ngan mga Judio didto nagin mga tumuroo. Pero han may inabot nga mga Judio tikang ha Tesalonica ngan nagpatikang hin samok, binaya hi Pablo ngan kumadto ha Atenas. Hira Timoteo ngan Silas nagpabilin ha Berea basi parig-unon an kabugtoan. Waray pag-iha, ginpabalik ni Pablo hi Timoteo ha Tesalonica basi buligan an kabugtoan  nga maatubang an duro nga pagtimaraot didto. Ha urhi, ginsugo ni Pablo hi Timoteo nga bisitahon an damu pa nga kongregasyon basi dasigon hira.

Ginsidngan ni Pablo hi Timoteo: ‘An naruruyag mag-alagad kan Jehova pagtitimarauton.’ Hi Timoteo gintimaraot ngan ginpriso tungod han iya pagtoo. Bisan pa hito, nalipay hiya kay nagkaada hiya higayon nga pamatud-an an iya pagkamaunungon kan Jehova.

Ginsidngan ni Pablo an mga taga-Filipos: ‘Pakakadaon ko ha iyo hi Timoteo. Tututdoan niya kamo kon ano an kahulogan han paglakat ha kamatuoran ngan babansayon kamo ha ministeryo.’ Maaram hi Pablo nga masasarigan hi Timoteo. Sugad nga magsangkay ngan igkasi-surugoon, nagbinuligay hira ha sulod hin damu ka tuig.