Han nakadto hi Moises ha Bukid Sinai, ginsugo hiya ni Jehova nga maghimo hin espesyal nga tolda nga gintatawag nga tabernakulo, diin an mga Israelita mahimo magsingba kan Jehova. Puydi nira ito madara kon nabalhin hira hin lugar.

Hi Jehova nagsiring: ‘Sidnga an mga tawo nga maghatag han ira maaakos basi makabulig ha paghimo han tabernakulo.’ An mga Israelita naghatag hin mga bulawan, silber, tumbaga, marahalon nga mga bato, ngan alahas. Naghatag liwat hira hin de-lana nga tela, lino, mga anit han hayop, ngan iba pa nga butang. Sobra-sobra an ira iginhatag salit ginsidngan hira ni Moises: ‘Igo na ini. Ayaw na kamo pagdara.’

Damu nga maabilidad nga kalalakin-an ngan kababayin-an an bumulig paghimo han tabernakulo. Gintagan hira ni Jehova hin kinaadman para hito. May mga naghimo hin inulang, naglara hin tela, o nagburda hito. An iba nagtaod hin marahalon nga mga bato, naghimo hin mga gamit tikang ha bulawan, o nag-ukit ha mga kahoy.

Ginhimo han katawohan an tabernakulo uyon ha ginsiring ni Jehova. Naghimo hira hin maopay nga kurtina basi mabahin an tabernakulo, ha Baraan ngan ha Pinakabaraan. Ha Pinakabaraan, iginbutang an arka han kasabotan nga hinimo ha kahoy nga akasya ngan ha bulawan. Ha Baraan, makikita an usa nga bulawan nga burutangan hin lampara, lamesa, ngan halaran para ha pagsunog hin insenso. Ha bungsaran, may tumbaga nga planggana ngan daku nga halaran. An arka han kasabotan nagpapahinumdom ha mga  Israelita han ira saad nga susugton nira hi Jehova. Maaram ka ba kon ano an kasabotan? Espesyal ito nga saad.

Ginpili ni Jehova hi Aaron ngan an iya mga anak nga lalaki basi magin mga saserdote ha tabernakulo. Kinahanglan atamanon nira ito ngan maghalad dida hito para kan Jehova. Hi Aaron la nga hitaas nga saserdote an puydi sumulod ha Pinakabaraan. Ginhihimo niya ito usa ka beses kada tuig basi maghalad para han iya mga sala, mga sala han iya pamilya, ngan mga sala han bug-os nga Israel.

Natapos han mga Israelita an tabernakulo usa ka tuig katapos nira bumaya ha Ehipto. Salit may-ada na hira lugar para ha pagsingba kan Jehova.

Ginpuno ni Jehova an tabernakulo han iya himaya ngan nagbutang hin dampog ha bawbaw hito. Kon an dampog aada ha bawbaw han tabernakulo, an mga Israelita nagpapabilin ha ira ginkakampohan. Pero kon magtipaigbaw ito, maaram hira nga panahon na ha pagbalhin. Ira igdidismantol an tabernakulo, dadad-on ito, ngan masunod ha dampog.