Gintagan ni Jehova an mga Israelita hin mga hukom basi manguna ha ira, pero karuyag nira hin hadi. Nagsiring hira kan Samuel: ‘Ngatanan nga nasud ha palibot naton may mga hadi. Karuyag liwat namon hin hadi.’ Maaram hi Samuel nga sayop ito, salit igin-ampo niya ito kan Jehova. Hi Jehova nagsiring ha iya: ‘Diri ikaw an iginsasalikway han katawohan. Ako an ira iginsasalikway. Sumati hira nga puydi hira magkaada hadi, pero damu an aaroon ha ira han hadi.’ Bisan pa hito, an katawohan nagsiring: ‘Waray kami labot. Karuyag namon hin hadi!’

Hi Jehova nagsiring kan Samuel nga hi Saul an magigin siyahan nga hadi. Han binisita hi Saul kan Samuel ha Rama, gindihogan hiya ni Samuel sugad nga hadi pinaagi ha pagbubo hin lana ha iya ulo.

Katapos, iginpatawag ni Samuel an mga Israelita basi ipakita ha ira an ira bag-o nga hadi. Pero waray nira mabibilngi hi Saul. Maaram ka ba kon kay ano? Tungod kay tinago hiya ha mga bagahe. Han nabilngan na nira hi Saul, igin-gawas nira hiya ngan ginpatindog ha butnga han katawohan. Mas hitaas gud hi Saul kay ha bisan hin-o, ngan gwapo hiya hinduro. Hi Samuel nagsiring: ‘Kitaa an ginpili ni Jehova.’ An katawohan gumuliat: ‘Mabuhi an hadi!’

Ha siyahan, namamati hi Hadi Saul kan Samuel ngan nasugot kan Jehova. Pero nagbag-o hiya. Pananglitan, usa ka beses, naghalad hi Saul bisan kon diri hiya puydi magbuhat hito. Ginsidngan hiya ni Samuel nga hulaton hiya, pero waray dayon umabot hi Samuel. Salit nagdesisyon hi Saul nga hiya na la an maghalad. Ano an reaksyon ni Samuel? Hiya nagsiring: ‘Ginsugot mo unta hi Jehova.’ Nahibaro ba hi Saul hin leksyon tikang ha iya sayop?

Ha urhi, han makikig-away hi Saul ha mga Amalekanhon, ginsidngan hiya ni Samuel nga patayon hira ngatanan. Pero waray pataya ni Saul hi Hadi Agag. Hi Jehova nagsiring kan Samuel: ‘Bumaya na hi Saul ha akon, ngan diri hiya namamati ha akon.’ Nasubo gud hi Samuel, ngan hiya nagsiring kan Saul: ‘Tungod kay diri ka na nasunod kan Jehova, magpipili  hiya hin bag-o nga hadi.’ Pagtalikod ni Samuel basi bumaya, tigda nga ginkaptan ni Saul an sidsid han iya bado ngan nagisi ito. Katapos, hi Samuel nagsiring kan Saul: ‘Ginkuha ni Jehova an ginhadian tikang ha imo.’ Ihahatag ni Jehova an ginhadian ha usa nga nahigugma ngan nasunod ha iya.