Durante han huraw, ginsidngan ni Jehova hi Elias: ‘Pakadto ha Sarepat. Usa nga balo didto an maghahatag ha imo hin pagkaon.’ Ha ganghaan han syudad, may nakita hi Elias nga pobre nga balo nga nangangahoy. Nangaro hiya ha balo hin usa ka baso nga tubig. Han tilakat na an balo basi kumuha, nagsiring hi Elias: ‘Alayon, dad-i ako hin tinapay.’ Pero an balo nagsiring: ‘Waray ako tinapay nga maihahatag ha imo. An akon harina ngan lana igo na la para makahimo hin gutiay nga pagkaon para ha akon ngan ha akon anak.’ Ginsidngan hiya ni Elias: ‘Nagsaad hi Jehova nga kon himoan mo ako hin tinapay, an imo harina ngan lana diri mauubos tubtob nga umuran utro.’

Salit inuli an balo ngan naghimo hin tinapay para ha propeta ni Jehova. Sugad han iginsaad ni Jehova, waray mawad-i hin pagkaon an balo ngan an iya anak ha bug-os nga huraw. Pirme puno an iya burutangan hin harina ngan lana.

 Tapos, may maraot nga nahitabo. Nagkasakit an anak han balo ngan namatay. Nakimalooy hiya kan Elias nga buligan hiya. Ginkuha ha iya ni Elias an bata ngan gindara ha kwarto ha igbaw han iya balay. Ginbutang ni Elias an bata ha katre ngan nag-ampo: ‘Jehova, alayon banhawa ini nga bata.’ Maaram ka ba kon kay ano nga urusahon gud kon buhaton ito ni Jehova? Kay hito nga panahon, waray pa gud nabanhaw. Usa pa, ini nga balo ngan an iya anak diri ngani mga Israelita.

Pero nabuhi an bata, ngan nagtikang hiya guminhawa! Ginsidngan ni Elias an balo: ‘Kitaa! Buhi an imo anak.’ Nalipay hinduro an balo ngan nagsiring kan Elias: ‘Surugoon ka gud han Dios. Maaram ako hito kay an imo ginsisiring, kon ano la an ginpapayakan ha imo ni Jehova.’