Han nagin hadi hi Solomon ha Israel, ginpakianhan hiya ni Jehova: ‘Ano an karuyag mo nga ihatag ko ha imo?’ Hiya binaton: ‘Bata pa ako ngan diri maaram han akon ginbubuhat. Alayon tagi ako hin kinaadman basi maataman ko an imo katawohan.’ Hi Jehova nagsiring: ‘Tungod kay ginhangyo mo nga magmaaramon ka, hihimoon ko ikaw nga pinakamaaramon ha bug-os nga tuna. Paparikuhon ko gud liwat ikaw. Ngan kon susundon mo ako, maghihilawig an imo kinabuhi.’

Gintikangan ni Solomon an paghimo han templo. Gumamit hiya han pinakamaopay nga klase han bulawan, silber, kahoy, ngan bato. Yinukot nga maabilidad nga kalalakin-an ngan kababayin-an an nagtrabaho ha templo. Paglabay hin pito ka tuig, andam na an templo para idedikar kan Jehova. May altar ito, ngan may mga halad dida hito. Linuhod hi Solomon ha atubangan han altar ngan nag-ampo: ‘O Jehova, ini nga templo diri igo an kadaku o an kaopay para ha imo, pero alayon karawata an amon pagsingba ngan pamatii an amon mga pag-ampo.’ Naruyagan ba ni Jehova an templo ngan an pag-ampo ni Solomon? Katapos gud la niya mag-ampo, may kalayo nga linusad tikang ha langit ngan ginsunog an mga halad nga nakada ha altar. Nalipay hi Jehova hito nga templo. Han nakita ini han mga Israelita, nalipay hira.

Kilala hi Hadi Solomon ha bug-os nga Israel ngan bisan ha higrayo nga lugar tungod han iya kinaadman. An mga tawo napakadto ha iya basi magpabulig ha ira mga problema. Bisan an rayna han Sheba kumadto ha iya basi sarihan hiya pinaagi hin makuri nga mga pakiana. Han hinbatian han rayna an mga baton ni Solomon, hiya nagsiring: ‘Waray ako tumoo ha ginsiring han mga tawo mahitungod ha imo, pero nakita ko yana nga mas maaramon ka pa kay han ira gin-istorya. An imo Dios nga hi Jehova nagbibendisyon ha imo.’ Maopay an kahimtang han nasud han Israel, ngan malipayon an mga tawo. Pero magbabag-o an kahimtang.