Hi Josia nagin hadi han Juda han otso anyos hiya. Hito nga panahon, an mga tawo nagbubuhat hin madyik ngan nagsisingba ha mga dios-dios. Han 16 anyos hi Josia, nangalimbasog hiya nga mahibaro kon paonan-o sisingbahon hi Jehova ha husto nga paagi. Han 20 anyos hiya, gintikangan niya an pagpamungkag ha mga dios-dios ngan ha mga halaran ha bug-os nga nasud. Ngan han 26 anyos hiya, iya ginpanginano nga maayad an templo ni Jehova.

Ha templo, nabilngan han hitaas nga saserdote nga hi Hilkia an linukot nga basahon han Balaud ni Jehova​—posible nga ito an linukot nga basahon nga iginsurat mismo ni Moises. Gindara ito ni Sapan, an sekretaryo han hadi, ngadto kan Josia ngan ginbasa an Balaud ha daku nga tingog. Samtang namamati hi Josia, nasantop niya nga ha damu na nga katuigan, an katawohan diri nasunod kan Jehova. Hi Hadi Josia nagsiring kan Hilkia: ‘Nasisina gud hi Jehova ha aton. Kadto ngan pakiistorya ha iya. Isusumat ni Jehova an kinahanglan naton buhaton.’ Iginpahibaro ni Jehova an iya mensahe pinaagi kan propetisa Hulda: ‘An katawohan han Juda binaya ha akon. Sisirotan ko hira, pero diri ha panahon han paghadi ni Josia tungod kay nagpaubos hiya.’

Han hinbatian ni Hadi Josia an mensahe, kinadto hiya ha templo ngan iginpatawag an katawohan han Juda. Katapos, iya ginbasa ha makusog nga tingog an Balaud ni Jehova ha atubangan han bug-os nga nasud. Hi Josia ngan an katawohan nagsaad nga susundon nira hi Jehova ha bug-os nira nga kasingkasing.

 Ha sulod hin damu nga katuigan, an nasud han Juda waray na magselebrar han Paskua. Pero han nabasa ni Josia ha Balaud nga kinahanglan ito iselebrar kada tuig, ginsidngan niya an nasud: ‘Magsiselebrar kita hin Paskua kan Jehova.’ Tapos, nangandam hi Josia hin damu nga halad ngan nag-organisar hin grupo hin mga parakanta ha templo. Kahuman, ginsaurog han nasud an Paskua, nga ginsundan han Piyesta han Tinapay nga Waray Libadura nga inabot hin pito ka adlaw. Waray pa gud magkaada sugad hito nga Paskua tikang ha panahon ni Samuel. Hinigugma gud ni Josia an Balaud han Dios. Nalilipay ka ba paghibaro mahitungod kan Jehova?