KINAON ka na ba yana nga adlaw?— Maaram ka ba kon hin-o an nag-andam hito?— Bangin an imo nanay o an iba, kondi kay ano nga sadang magpasalamat kita ha Dios tungod hito?— Tungod kay an Dios an nagpapatubo han mga butang basi magin pagkaon. Kondi, sadang liwat kita magpasalamat ha usa nga nag-andam han pagkaon o ha usa nga nagserbi hito ha aton.

Usahay nahingangalimot kita magpasalamat kon an iba nagbuhat hin maopay para ha aton, diri ba? Han an Bantogan nga Magturutdo nakanhi pa ha tuna, may-ada pipira nga mga sanlahon nga nahingalimot ha pagpasalamat.

Maaram ka ba kon ano an sanlahon?— An sanlahon usa ka tawo nga may-ada sakit nga tinatawag nga sanla. Ito nga sakit nakakadunot pa ngani han unod han tawo. Han nakanhi pa hi Jesus ha tuna, an mga sanlahon kinahanglan ibulag tikang ha iba nga mga tawo. Ngan kon an usa nga sanlahon nakakita hin iba nga tawo nga tiarabot, kinahanglan suminggit hiya ha pagpahamangno hiton nga tawo nga magpahirayo ha iya. Ginbubuhat ini basi an iba nga mga tawo diri gud humirani ngan bangin mataponan han sakit han sanlahon.

Mapinairon gud hi Jesus ha mga sanlahon. Usa ka adlaw, han tikadto hiya ha Jerusalem, kinahanglan umagi hi Jesus ha usa ka gutiay nga bungto. Han hirani na hiya ha bungto, napulo nga sanlahon an ginawas basi makigkita ha iya. Ira hinbatian nga hi Jesus may-ada gahum tikang ha Dios ha pagtambal han ngatanan nga klase hin mga sakit.

An mga sanlahon waray gud humirani kan Jesus. Tinindog hira ha hirayo. Kondi natoo hira nga hi Jesus makakatambal han ira sanl. Salit han  hinkit-an han mga sanlahon an Bantogan nga Magturutdo, hira nagsinggit ha iya: ‘Jesus, Magturutdo, buligi kami!’

Nalolooy ka ba ha mga tawo nga masakit?— Nalooy hi Jesus. Maaram hiya nga makasurubo gud an pagin sanlahon. Salit hiya binaton ha ira ngan nagsiring: ‘Lakat ngan magpakita kamo ha mga saserdote.’​—Lukas 17:11-14.

Kay ano nga nagsiring hi Jesus ha ira nga buhaton ini? Tungod han balaud nga iginhatag ni Jehova ha Iya katawohan mahitungod han mga sanlahon. Ini nga balaud nagsiring nga kinahanglan usisahon han saserdote han Dios an unod han sanlahon. Susumatan han saserdote an sanlahon kon natambal na gud an iya sakit. Kon mahimsog na hiya, mahimo na liwat hiya mag-ukoy upod han mahimsog nga mga tawo.​—Lebitiko 13:​16, 17.

 Kondi ini nga mga sanlahon may-ada pa han ira sakit. Salit kinadto ba hira ha saserdote sugad la han ginsiring ni Jesus ha ira?— Oo, kinadto dayon hira. Ini nga kalalakin-an sigurado nga tinoo nga tatambalon ni Jesus an ira sakit. Ano an nahitabo?

Samtang tikadto hira ha saserdote, nag-opay an ira sakit. Natambal an ira unod. Nagin mahimsog na hira! Ginbalosan an ira pagtoo ha gahum ni Jesus. Nalipay gud hira! Kondi, ano unta an sadang nira pagbuhaton ha pagpakita han ira pagpasalamat? Kon ikaw, ano an imo bubuhaton?—

Usa han natambal nga kalalakin-an an binalik kan Jesus. Nagtikang hiya paghimaya kan Jehova, nagdadayaw ha Dios. Ito an husto nga buhaton tungod kay an gahum nga nakatambal ha iya nagtikang ha Dios. An lalaki linuhod liwat ha tiilan han Bantogan nga Magturutdo ngan nagpasalamat ha iya. Mapasalamaton gud hiya ha ginbuhat ni Jesus.

Kondi kumusta man an iba nga siyam nga lalaki? Hi Jesus nagpakiana: ‘Napulo an sanlahon nga natambal, diri ba? Hain an siyam? Usa la ba an binalik basi maghimaya ha Dios?’

Oo. Usa la han napulo an naghimaya, o nagdayaw ha Dios ngan binalik basi magpasalamat kan Jesus. Ngan ini nga tawo usa nga Samaritano, nga taga-iba nga nasud. An  siyam waray magpasalamat ha Dios, ngan waray hira magpasalamat kan Jesus.​—Lukas 17:15-19.

Hito nga kalalakin-an, kan kanay ka pariho? Karuyag naton magin pariho han Samaritano, diri ba?— Salit kon may-ada nagbubuhat hin maopay para ha aton, ano an sadang hinumdoman naton nga buhaton?— Sadang kita magpasalamat. An mga tawo agsob nga nahingangalimot ha pagsiring hin salamat. Kondi ito an husto nga buhaton, an pagsiring hin salamat. Kon buhaton naton ito, nalilipay hi Jehova nga Dios ngan an iya Anak, hi Jesus.

Kon imo hunahunaon an mahitungod hito, mahinunumdoman mo nga an mga tawo nagbuhat hin damu nga mag-opay nga mga butang para ha imo. Pananglitan, nagkasakit ka na ba?— Bangin waray ka pa gud magkasakit hin sugad kagrabe hiton napulo nga sanlahon, kondi bangin ginsip-on ka na o nagsuol an imo tiyan. May-ada ba nagmangno ha imo?— Bangin tinagan ka nira hin medisina ngan nagbuhat hin iba nga mga butang para ha imo. Nalipay ka ba nga ginbuligan ka nira nga mag-opay?—

An Samaritano nagpasalamat kan Jesus tungod ha pagtambal ha iya, ngan nakalipay ini kan Jesus. Ha hunahuna mo, malilipay ba an imo nanay o tatay kon nagpapasalamat ka kon may-ada hira ginbubuhat para ha imo?— Oo, malilipay hira.

An iba nga mga tawo nagbubuhat hin maopay para ha imo kada adlaw o kada semana. Bangin trabaho nira an pagbuhat hini nga mga butang. Bangin nalilipay pa ngani hira ha pagbuhat hito. Kondi bangin mahingalimot  ka ha pagpasalamat. An imo magturutdo ha eskwelahan bangin maduruto nga nabulig ha imo basi mahibaro ka. Ini an iya trabaho. Kondi malilipay hiya kon pasalamatan mo hiya tungod ha pagbulig ha imo nga mahibaro.

Usahay gudtiay la nga mga butang an ginbubuhat han mga tawo para ha imo. May-ada na ba nag-abre han purtahan para ha imo? O may-ada ba nagpasa hin pagkaon ha imo ha lamesa? Maopay an pagpasalamat bisan hinin gudtiay nga mga butang.

Kon nahinunumdom kita ha pagpasalamat ha mga tawo dinhi ha tuna, niyan posible nga mas mahinunumdom kita ha pagpasalamat ha aton Amay ha langit. Ngan damu gud an mga butang nga angay pasalamatan hi Jehova! Hiya an naghatag ha aton hin kinabuhi ngan han ngatanan nga mag-opay nga mga butang nga nakakahimo han kinabuhi nga makalilipay. Salit may-ada kita han ngatanan nga hinungdan ha paghimaya ha Dios pinaagi han pagsiring hin mag-opay nga mga butang mahitungod ha iya kada adlaw.