PANANGLITAN may-ada naghatag ha imo hin espesyal hinduro nga regalo. Ano an bubuhaton mo?— Magpapasalamat ka la ba hin makausa ngan katapos hingangalimtan na an usa nga naghatag hito ha imo? O hinunumdoman mo hiya ngan an iya ginbuhat para ha imo?—

Hi Jehova nga Dios naghatag ha aton hin espesyal hinduro nga regalo. Iya sinugo an iya Anak nganhi ha tuna basi mamatay para ha aton. Maaram ka ba kon kay ano nga ginkinahanglan hi Jesus nga mamatay para ha aton?— Importante hinduro ini nga butang nga sadang naton masabtan.

Sugad han hinbaroan naton ha Kapitulo 23, nakasala hi Adan han gintalapas niya an hingpit nga balaud han Dios. Ngan napanunod naton an sala tikang kan Adan, an kaapoy-apoyan naton ngatanan. Salit, ano ha hunahuna mo an ginkikinahanglan naton?— Ha simboliko nga pagkayakan, ginkikinahanglan naton an usa nga bag-o nga amay, usa nga hingpit nga nagkinabuhi dinhi ha tuna. Hin-o ha hunahuna mo an mahimo magin sugad hito nga klase hin amay naton?— Hi Jesus.

Sinugo ni Jehova hi Jesus nganhi ha tuna basi magin pariho hin amay naton imbes kan Adan. An Biblia nasiring: ‘An siyahan nga tawo hi Adan nagin buhi nga kalag. An kataposan nga Adan nagin naghahatag-kinabuhi nga espiritu.’ Hin-o an siyahan nga Adan?— Hiya an usa nga ginhimo han Dios tikang ha tapotapo han tuna. Hin-o an ikaduha nga Adan?— Hi Jesus. Ipinapakita ini han Biblia han ito nasiring: “An siyahan nga tawo [Adan] kanan tuna, tunan-on; an ikaduha nga tawo [Jesus] langitnon.”​—1 Korinto 15:​45, 47; Genesis 2:7.

Tungod kay ginkuha han Dios an kinabuhi ni Jesus tikang ha langit ngan iginsulod ito ha tiyan han babaye nga hi Maria, hi Jesus waray makapanunod  hin bisan ano nga sala tikang kan Adan. Salit hi Jesus usa ka hingpit nga tawo. (Lukas 1:30-35) Ito liwat an hinungdan kon kay ano nga an usa nga anghel nagsiring ha mga magbarantay han mga karnero han natawo hi Jesus: ‘Natawo ha iyo yana an usa nga Manluluwas.’ (Lukas 2:11) Kondi basi magin Manluluwas naton, ano an siyahan nga kinahanglan buhaton han bata nga hi Jesus?— Kinahanglan magtubo hiya ngan magin hamtong nga lalaki, pariho kan Adan. Niyan, hi Jesus mahimo na magin ‘an ikaduha nga Adan.’

Hi Jesus, an aton Manluluwas, magigin aton liwat “Amay ha Kadayonan.” Ito an pagtawag ha iya ha Biblia. (Isaias 9:​6, 7) Oo, an hingpit nga hi Jesus mahimo magin amay naton imbes kan Adan, nga nagin diri-hingpit han hiya nakasala. Hito nga paagi mahimo naton pilion an ‘ikaduha nga Adan’ sugad nga amay naton. Siyempre, hi Jesus mismo Anak ni Jehova nga Dios.

Pinaagi han paghibaro mahitungod kan Jesus, mahimo naton karawaton hiya sugad nga aton Manluluwas. Nahinunumdoman mo ba kon tikang ha ano kita kinahanglan luwason?— Oo, tikang ha sala ngan kamatayon nga aton napanunod tikang kan Adan. An hingpit nga kinabuhi sugad nga hamtong nga tawo nga iginhalad ni Jesus para ha aton, tinatawag nga lukat. Hi Jehova an naghatag han lukat basi mapasaylo an aton mga sala.​—Mateo 20:28; Roma 5:8; 6:23.

Sigurado nga diri naton karuyag nga hingalimtan an ginbuhat han Dios ngan han iya Anak para ha aton, diri ba?— Ipinakita ni Jesus ha iya mga sumurunod an espesyal nga paagi nga makakabulig ha  aton nga mahinumdoman an iya ginbuhat. Aton pag-istoryahan an mahitungod hito.

Hunahunaa nga aadto ka ha igbaw nga kuwarto han usa nga balay ha Jerusalem, ha gab-i. Hi Jesus ngan an iya mga apostol aada ha may lamesa. Ha lamesa, aada an gin-asal nga karnero, halapad nga tinapay, ngan pula nga alaksiw. Espesyal an ira panihapon. Maaram ka ba kon kay ano?—

Ini nga panihapon nagpapahinumdom ha ira han ginbuhat ni Jehova ginatos ka mga tuig na an naglabay han an iya katawohan, an mga Israelita, mga uripon ha Ehipto. Hito nga panahon hi Jehova nagsiring ha iya katawohan: ‘Magpatay kamo hin nati nga karnero para han tagsa nga pamilya, ngan ibutang an dugo hito ha  mga poste han purtahan han iyo mga balay.’ Katapos, hiya nagsiring: ‘Sulod kamo ha iyo mga balay, ngan kaona an nati nga karnero.’

Ginbuhat ito han mga Israelita. Ngan hiton mismo nga gab-i, an anghel han Dios linabay ha tuna han Ehipto. Ha kadam-an nga mga balay, ginpatay han anghel an suhag nga anak. Kondi kon nakikita han anghel an dugo han nati nga karnero ha mga poste han purtahan, nalabay hiya hiton nga balay. Hiton nga mga balay, waray kabataan nga nagkamatay. Hi Paraon, an hadi han Ehipto, nahadlok ha ginbuhat han anghel ni Jehova. Salit hi Paraon nagsiring ha mga Israelita: ‘Talwas na kamo. Gawas kamo ha Ehipto!’ Dida hito, ira iginsakay an ira mga panag-iya ha ira mga kamelyo ngan mga asno ngan binaya.

Diri karuyag ni Jehova nga hingalimtan han iya katawohan kon paonan-o niya ginluwas hira. Salit hiya nagsiring: ‘Makausa han tuig kinahanglan kumaon kamo hin panihapon nga pariho han iyo ginkaon yana nga gab-i.’ Ira gintawag inin espesyal nga panihapon nga Paskua. Hiton nga gab-i an anghel han Dios ‘linabay’ ha mga balay nga tinigamnan hin dugo.​—Eksodo 12:1-13, 24-27, 31.

Ini an ginhuhunahuna ni Jesus ngan han iya mga apostol han kinaon hira han panihapon han Paskua. Katapos, ginbuhat ni Jesus an usa ka importante hinduro nga butang. Kondi, antes niya buhaton ito, ginpabaya niya an diri-matinumanon nga apostol, hi Judas. Katapos, pinurot ni Jesus an usa han nahisalin nga tinapay, nag-ampo para hito, gintipiktipik ito, ngan iginpasa ito ha iya mga disipulo. “Kuha kamo, kaon kamo,” siring niya. Katapos, hiya nagsiring ha ira: ‘Ini nga tinapay nangangahulogan han akon lawas nga akon ihahatag kon ako mamatay para ha iyo.’

Sunod pinurot ni Jesus an usa nga kopa han pula nga alaksiw. Katapos han ikaduha nga pag-ampo hin pagpasalamat, ipinasa niya ito ha iya mga apostol ngan nagsiring: ‘Inuma niyo ito, niyo ngatanan.’ Ngan hiya nagsiring ha ira: ‘Ini nga alaksiw nangangahulogan han akon dugo. Diri na mag-iiha akon igbububo an akon dugo basi talwason kamo ha iyo mga sala. Padayon nga buhata niyo ini sugad nga hinumdoman ha akon.’​—Mateo 26:26-28; 1 Korinto 11:23-26.

 Natigamnan mo ba nga hi Jesus nagsiring nga kinahanglan padayon nga buhaton ini han mga disipulo sugad nga hinumdoman ha iya?— Diri na hira magkakaada hin panihapon han Paskua. Lugod, makausa kada tuig magkakaada hira hinin espesyal nga panihapon sugad nga hinumdoman kan Jesus ngan ha iya kamatayon. Ini nga panihapon tinatawag nga Panihapon han Ginoo. Yana nga panahon agsob nga tinatawag naton ito nga Memoryal. Kay ano?— Tungod kay nagpapahinumdom ito ha aton han ginbuhat ni Jesus ngan han iya Amay, hi Jehova nga Dios, para ha aton.

An tinapay sadang magpahinumdom ha aton han lawas ni Jesus. Andam hiya nga ighalad iton nga lawas basi magkaada kita kinabuhi nga waray kataposan. Ngan kumusta man an pula nga alaksiw?— Sadang magpahinumdom ito ha aton han bili han dugo ni Jesus. Mas presyoso ito kay ha dugo han kordero han Paskua ha Ehipto. Maaram ka ba kon kay ano?— An Biblia nasiring nga pinaagi han dugo ni Jesus mapapasaylo an aton mga sala. Ngan kon mawara na an aton mga sala, diri na kita magkakasakit, malalagas, ngan mamamatay. Ito an sadang naton hunahunaon kon natambong kita ha Memoryal.

An ngatanan ba sadang kumaon han tinapay ngan uminom han alaksiw ha Memoryal?— Bueno, hi Jesus nagsiring ngada hadton nakaon ngan nainom: ‘Magkakaada kamo bahin ha akon ginhadian ngan malingkod ha mga lingkuranan nga hadianon ha langit kaupod ko.’ (Lukas 22:​19, 20, 30) Nangahulogan ini nga makadto hira ha langit basi magin mga hadi upod ni Jesus. Salit adto la nga may-ada paglaom nga magmando upod ni Jesus ha langit an sadang kumaon han tinapay ngan uminom han alaksiw.

Kondi bisan adton diri nakaon han tinapay o nainom han alaksiw sadang tumambong ha Memoryal. Maaram ka ba kon kay ano?— Tungod kay iginhatag ni Jesus an iya kinabuhi para ha aton liwat. Pinaagi han pagtambong ha Memoryal, ipinapakita naton nga diri kita nahingangalimot. Nahinunumdoman naton an espesyal nga regalo han Dios.