MAY kilala ka ba nga masakit?— Bangin ikaw mismo nagkakasakit usahay. Bangin may sip-on ka, o maul-ol an imo tiyan. An iba nga mga tawo masakit hinduro. Diri ngani hira nakakatindog kon waray nabulig ha ira. Agsob nga nahitatabo ini kon an mga tawo lagas na hinduro.

An ngatanan nagkakasakit usahay. Maaram ka ba kon kay ano nga an mga tawo nagkakasakit, nalalagas, ngan namamatay?— Usa ka adlaw, an usa nga lalaki nga diri nakakalakat gindara ngadto kan Jesus, ngan ipinakita ni Jesus kon kay ano nga an mga tawo nagkakasakit ngan namamatay. Susumatan ko ikaw mahitungod hito.

Hi Jesus nag-uukoy hadto ha usa nga balay ha bungto hirani han Dagat han Galilea. Nagkaabot an damu nga mga tawo basi makigkita ha iya. Damu hinduro nga mga tawo an nagkaabot salit waray na lugar para ha iba nga makasulod ha balay. Waray na ngani nakahirani ha purtahan. Kondi, padayon an pagkaabot han mga tawo! Usa nga grupo han mga tawo an nagdara hin usa nga paralisado nga lalaki nga diri ngani nakakalakat. Kinahanglan dad-on hiya hin upat nga lalaki dida ha gutiay nga higdaan, o teheras.

Maaram ka ba kon kay ano nga karuyag nira dad-on kan Jesus ini nga masakit nga lalaki?— Natoo hira nga hi Jesus makakabulig ha iya. Natoo hira nga hi Jesus makakatambal han iya sakit. Maaram ka ba kon paonan-o nira iginpahirani kan Jesus an paralisado nga lalaki bisan pa hiton damu nga mga tawo ha balay?—

Aw, ipinapakita han retrato nga nakikita mo dinhi kon paonan-o nira ginbuhat ito. Siyahan, ira gindara an lalaki ngadto ha atop. Patag ito nga  atop. Katapos, naghimo hira hin daku nga buho ha atop. Ha kataposan, ira igin-ubos an masakit nga lalaki ha iya teheras dida mismo ha buho ngan ngada ha kuwarto ha ubos. Marig-on gud an ira pagtoo!

Nahipausa an ngatanan nga mga tawo ha balay han nakita nira ito nga hitabo. An paralisado nga lalaki ha teheras inabot ngada ha ubos dida mismo ha butnga nira. Nasina ba hi Jesus han nakita niya an ginhimo han kalalakin-an?— Waray! Nalipay hiya nga makita nga may-ada hira pagtoo. Hiya nagsiring ha paralisado nga lalaki: “Ginpasaylo ka na han imo mga sala.”

An iba nga mga tawo waray maghunahuna nga angay ito sidngon ni Jesus. Waray hira maghunahuna nga mapapasaylo niya an mga sala. Salit basi ipakita nga mahihimo niya ito, hi Jesus nagsiring ha lalaki: ‘Buhat, kuhaa an imo teheras, ngan kadto ha imo balay.’

 Han ginsiring ito ni Jesus, an lalaki natambal! Diri na hiya paralisado. Yana nakatindog na hiya nga waray binulig nga iba ngan naglakat. Nahipausa an mga tawo nga nakakita hini nga milagro. Ha bug-os nira nga kinabuhi, waray pa gud hira makakita hin urusahon nga butang nga sugad hito! Ira gindayaw hi Jehova tungod ha paghatag ha ira hinin Bantogan nga Magturutdo, nga nakakatambal pa ngani han mga sakit han mga tawo.​—Markos 2:1-12.

Ano an hinbaroan naton tikang hini nga milagro?— Hinbaroan naton nga hi Jesus may-ada gahum ha pagpasaylo han mga sala ngan pagtambal ha magsakit nga mga tawo. Kondi may-ada pa kita hinbaroan nga importante hinduro nga butang. Hinbaroan naton nga an mga tawo nagkakasakit tungod han sala.

Tungod kay kita ngatanan nagkakasakit usahay, nangangahulogan ba ini nga magpakasasala kita ngatanan?— Oo, an Biblia nasiring nga kita ngatanan natawo nga may-ada sala. Maaram ka ba kon ano an kahulogan han katawo nga may-ada sala?— Nangangahulogan ito nga natawo kita nga diri-hingpit. Usahay nakakahimo kita hin sayop, bisan kon diri naton karuyag. Maaram ka ba kon paonan-o kita ngatanan nagkaada hin sala?—

Natawo kita ha sala tungod kay an siyahan nga lalaki, hi Adan, waray sumugot ha Dios. Nakasala hiya han gintalapas niya an balaud han Dios. Ngan napanunod naton ngatanan an sala tikang kan Adan. Maaram ka ba kon paonan-o naton napanunod an sala tikang ha iya? Akon isasaysay ito ha paagi nga masasabtan mo.

Bangin nakakita ka na hin usa nga naghimo hin tinapay ha hurmaan. Ano an mahitatabo ha tinapay kon kipi an hurmaan? Maaram ka ba?—  Iton mismo nga marka, o kipi, makikita ha ngatanan nga tinapay nga ginhimo dida hiton nga hurmaan, diri ba?—

Hi Adan pariho hiton nga hurmaan, ngan pariho kita han tinapay. Nagin diri-hingpit hiya han gintalapas niya an balaud han Dios. Sugad hin nagkaada hiya hin kipi, o diri-hingpit nga marka. Salit han nagkaada hiya mga anak, ano an magigin hitsura nira?— An ngatanan nga mga anak niya magkakaada hini mismo nga marka han pagkadiri-hingpit.

An kadam-an nga mga anak diri natatawo nga may-ada daku nga pagkadiri-hingpit nga nakikita mo. May-ada hira butkon o bitiis. Kondi an ira pagkadiri-hingpit daku gud salit hira nagkakasakit ngan, maabot an panahon, mamamatay.

Siyempre, an iba nga mga tawo mas agsob magkasakit kay ha iba. Kay ano? Tungod ba kay natawo hira nga mas damu an sala?— Diri, an ngatanan natawo nga may-ada pariho nga kadamu hin sala. Natawo kita ngatanan nga diri-hingpit. Salit, ha kataposan, an ngatanan magkakaada usa nga klase hin sakit. Bisan an mga tawo nga nangangalimbasog ha pagsugot ha mga balaud han Dios ngan diri nagbubuhat hin maraot gud mahimo magkasakit.

Niyan, kay ano nga an iba nga mga tawo mas agsob nga nagkakasakit kay ha iba?— Damu an mga hinungdan. Bangin waray hira igo nga pagkaon. O bangin diri hira nakaon han husto nga klase hin pagkaon. Bangin nakaon hira hin damu hinduro nga keyk ngan dulse. An usa pa nga hinungdan, bangin nagpipiraw hira hinduro ha gab-i ngan kulang hin igo nga pagkaturog. O bangin diri hira nagbabado hin husto kon nauran. An mga lawas han iba nga mga tawo maluya hinduro, ngan diri nira napupugngan an sakit, bisan kon ginmamangnoan nira an ira kalugaringon.

 Maabot pa ba an panahon nga diri na kita magkakasakit? Mawawara pa ba ha aton an sala?— Ano an ginbuhat ni Jesus para hiton nga paralisado nga lalaki?— Ginpasaylo ni Jesus an iya mga sala ngan gintambal hiya. Hito nga paagi, ipinakita ni Jesus an iya bubuhaton ha maabot nga panahon para ha ngatanan nga nangangalimbasog ha pagbuhat han husto.

Kon aton ipakita nga diri naton karuyag nga makasala ngan kinangangalasan naton an sayop, tatambalon kita ni Jesus. Ha tidaraon, kukuhaon niya ha aton an pagkadiri-hingpit nga aada ha aton yana. Bubuhaton niya ini sugad nga Hadi han Ginhadian han Dios. An sala diri dayon makukuha ha aton ngatanan. Kukuhaon ito samtang nalabay an usa ka peryodo han panahon. Niyan kon an aton mga sala ha kataposan nawara na, diri na gud kita magkakasakit utro. Kita ngatanan magkakaada hingpit nga kahimsog. Magigin daku gud ito nga bendisyon!