MAY tawo ba nga magpapabilin nga matinumanon ha Dios kon makaeksperyensya hin duro nga kakurian ngan kon baga hin waray hiya nakakarawat nga materyal nga balos ha pagin masinugtanon? Iginbangon ito nga pakiana​—ngan ginbaton—​ha istorya han kinabuhi ni Job.

Samtang an mga Israelita nakadto pa ha Ehipto, hi Job nga paryente ni Abraham nag-uukoy ha lugar nga tinatawag na yana nga Arabia. Hito nga panahon, nagtirok an mga anghel ha atubangan han Dios, ngan nakadto liwat an rebelde nga hi Satanas. Ha atubangan han mga anghel, iginpahayag ni Jehova an iya pagsarig ha iya maunungon nga surugoon nga hi Job. Ha pagkamatuod, Hiya nagsiring nga waray tawo nga may integridad pariho han kan Job. Kondi hi Satanas nagsiring nga nag-aalagad la hi Job ha Dios tungod kay ginbibendisyonan ngan ginpapanalipdan hiya. Hi Satanas nagdugang nga kon kuhaon kan Job an iya gintatag-iya, panhihimarauton niya an Dios.

Gintugotan han Dios hi Satanas ha pagkuha han karikohan ni Job, pagpatay han iya mga anak, ngan ha urhi, pagdaot han iya kahimsog. Tungod kay diri maaram han bahin ni Satanas hini, waray hisabti ni Job kon kay ano nga gintugotan han Dios nga maeksperyensyahan niya ini. Bisan pa hito, waray gud hiya bumaya ha Dios.

Tulo nga palso nga kasangkayan an nakiistorya kan Job. Ha sunod-sunod nga kapahayagan han iya kasangkayan nga mababasa ha libro han Job, sayop nga ginkombinse nira hi Job nga ginsisirotan hiya han Dios tungod hin tinago nga mga sala. Nagsiring pa ngani hira nga diri nalilipay o nasarig an Dios ha iya mga surugoon. Iginsalikway ni Job an ira sayop nga mga opinyon. Tungod han pagsarig, hiya nagsiring nga iya titipigan an iya integridad tubtob ha kamatayon!

Kondi nagsayop hi Job tungod han sobra nga kabaraka nga pamatud-an nga matadong hiya. Usa nga mas batan-on nga hi Elihu nga nagpinamati ha bug-os nga pag-uruistorya an nagyakan. Iya ginsaway hi Job tungod kay waray ni Job masantop nga an pagbindikar han soberanya ni Jehova mas importante gud kay han dungog han bisan hin-o. Marig-on nga ginsaway liwat ni Elihu an palso nga kasangkayan ni Job.

Katapos, nakiistorya hi Jehova kan Job ngan gintadong an iya panhunahuna. Pinaagi ha pag-unabi han damu nga urusahon ha mga linarang, gintagan hiya ni Jehova hin leksyon mahitungod ha pagin minos han tawo kon itanding ha pagin gamhanan han Dios. Mapainubsanon nga ginkarawat ni Job ito nga pagtadong. Tungod kay hi Jehova “puno ha paghinuklog, ngan pagkalooy,” Iya iginbalik an kahimsog ni Job, gindoble an karikohan kay han naglabay, ngan ginbendisyonan hin napulo nga anak. (Jakobo 5:11) Pinaagi han pagtipig ni Job han iya integridad bisan pa han duro nga kakurian, napamatud-an niya nga buwa an akusasyon ni Satanas nga an tawo diri magpapabilin nga matinumanon ha Dios kon makaeksperyensya ito hin kakurian.

​—Iginbasar ha libro nga Job.