NAGLABAY an mga 350 ka tuig tikang han Baha ha panahon ni Noe. An patriarka nga hi Abraham naukoy ha mainuswagon nga syudad han Ur nga tinatawag yana nga Iraq. May-ada hiya marig-on nga pagtoo. Kondi hito nga takna, sasarihan an iya pagtoo.

Ginsugo ni Jehova hi Abraham nga bumaya ha iya natawhan nga nasud ngan bumalhin ha langyaw nga dapit han Kanaan. Waray mag-alang ha pagsunod hi Abraham. Iya igin-upod an iya panimalay, upod an iya asawa nga hi Sara, ngan an iya umangkon nga hi Lot, ngan katapos hin maiha nga pagbiyahe, nag-ukoy ha mga tolda ha Kanaan. Ha kauyonan nga ginhimo ni Jehova kan Abraham, nagsaad Hiya nga Iya hihimoon hiya nga usa nga daku nga nasud, diin an tanan nga pamilya ha tuna mabibendisyonan pinaagi ha iya, ngan an iya katulinan magtatag-iya han Kanaan.

Nag-uswag hira Abraham ngan Lot ngan nagkaada damu nga kakarnerohan ngan kabakahan. Tungod kay diri hakog, ginpapili ni Abraham hi Lot kon ano nga lugar an iya karuyag. Ginpili ni Lot an matambok nga katunaan han Salog Jordan ngan nag-ukoy hirani ha syudad han Sodoma. Kondi, an mga naukoy didto imoral—magpakasasala gud kan Jehova.

Ha urhi, ginpasarig utro ni Jehova hi Abraham nga an iya katulinan magdadamu pariho ha mga bitoon ha langit. Sinarig hi Abraham hito nga saad. Kondi, an iya hinigugma nga asawa nga hi Sara nagpabilin nga baw-as. Katapos, han 99 anyos na hiya ngan hi Sara hirani na mag-90, ginsumatan hiya han Dios nga magkakaanak hira. Natuman an ginsiring han Dios, ngan nag-anak hi Sara kan Isaak. May-ada iba nga anak hi Abraham, kondi pinaagi kan Isaak maabot an Manluluwas nga iginsaad ha Eden.

Samtang hito nga panahon, hi Lot ngan an iya pamilya nag-uukoy ha Sodoma, kondi matadong hiya ngan waray magin pariho ha imoral nga mga umurukoy didto. Salit, han nagdesisyon hi Jehova nga bungkagon ito nga syudad, nagsugo hiya hin mga anghel ha pagpahamangno kan Lot. Ginsagda han mga anghel hi Lot ngan an iya pamilya nga pumalagiw ha Sodoma ngan diri lumingi. Katapos, nagpauran an Dios hin kalayo ngan asupre ha Sodoma ngan ha kahirani hito nga maraot nga syudad han Gomorra, salit nabungkag an tanan nga naukoy didto. Nakapalagiw hi Lot ngan an iya duha nga anak nga babaye. Kondi liningi an asawa ni Lot, bangin tungod kay nanganganugon han iya mga ginbayaan. Tungod han iya diri-pagkamasinugtanon, namatay hiya.

​—Iginbasar ha Genesis 11:10–19:38.