1. Ano an bangin hunahunaon mo katapos pag-adman hin maopay ini nga libro?

HA IMO pag-aram hini nga libro, damu na nga kamatuoran ha Biblia an imo nahibaroan, sugad han saad han Dios nga kinabuhi nga waray kataposan, an kahimtang han mga patay, ngan an paglaom nga pagkabanhaw. (Eclesiastes 9:5; Lucas 23:43; Juan 5:28, 29; Pahayag 21:3, 4) Bangin natambong ka na ha mga  katirok han mga Saksi ni Jehova ngan natoo ka nga hira an nagbubuhat han tinuod nga pagsingba. (Juan 13:35) Bangin nagtikang ka na pagkaada duok nga pakigsangkay kan Jehova, ngan bangin disidido ka na nga karuyag mo mag-alagad ha iya. Salit bangin maghunahuna ka, ‘Ano an sadang ko buhaton yana basi mag-alagad ha Dios?’

2. Kay ano nga karuyag han lalaki nga taga-Etiopia nga magpabawtismo?

² Ito an ginhunahuna han usa nga lalaki nga taga-Etiopia nga nabuhi ha panahon ni Jesus. Pipira ka panahon katapos banhawon hi Jesus, an iya disipulo nga hi Felipe nagsangyaw hito nga lalaki. Ginpamatud-an ni Felipe ha iya nga hi Jesus an Mesias. Napagios gud an lalaki nga taga-Etiopia ha iya nahibaroan salit nagsiring hiya dayon: “Kitaa! May tubig dinhi; ano man an nakakaulang ha akon ha pagpabawtismo?”​—Buhat 8:26-36.

3. (a) Ano an iginsugo ni Jesus ha iya mga sumurunod? (b) Paonan-o sadang bawtismohan an usa nga Kristiano?

³ Klaro nga igintututdo han Biblia nga kon karuyag mo mag-alagad kan Jehova, sadang ka magpabawtismo. Hi Jesus nagsiring ha iya mga sumurunod: “Panhimo kamo hin mga disipulo ha mga tawo han ngatanan nga nasud, bawtismuhi hira.” (Mateo 28:19) Iginpakita liwat ni Jesus an susbaranan han hiya mismo nagpabawtismo. Bug-os nga iginpailarom hiya ha tubig, diri kay ginwisikan la hin tubig ha iya ulo. (Mateo 3:16) Yana, kon an usa nga Kristiano ginbabawtismohan, kinahanglan liwat hiya bug-os nga ipailarom, o itunlob, ha tubig.

4. Ano an iginpapakita ha iba han imo bawtismo?

 ⁴ Kon nagpapabawtismo ka, iginpapakita hito ha iba nga karuyag mo gud magin sangkay han Dios ngan mag-alagad ha iya. (Salmo 40:7, 8) Salit bangin maghunahuna ka, ‘Ano an kinahanglan ko buhaton para mabawtismohan?’

5. (a) Antes ka magpabawtismo, ano an kinahanglan mo buhaton? (b) Kay ano nga importante an Kristiano nga mga katirok?

⁵ Antes ka magpabawtismo, kinahanglan makilala mo hi Jehova ngan hi Jesus. Gintikangan mo na an pagbuhat hini pinaagi ha pag-aram ha Biblia. (Basaha an Juan 17:3.) Pero diri la ini an sadang mo buhaton. An Biblia nasiring nga kinahanglan ‘mapuno ka han husto nga kahibaro’ han kaburut-on ni Jehova. (Colosas 1:9) An mga katirok han mga Saksi ni Jehova mabulig ha imo nga magkaada mas duok nga relasyon kan Jehova. Ito an usa nga importante nga rason kon kay ano nga kinahanglan regular nga tumambong ka hito nga mga katirok.​—Hebreo 10:24, 25.

6. Ano kadamu an kinahanglan mo hibaroan mahitungod ha Biblia antes ka magpabawtismo?

⁶ Syempre, diri naglalaom hi Jehova nga hibaroan mo an ngatanan mahitungod ha Biblia antes ka magpabawtismo. Waray hiya maglaom nga an lalaki nga taga-Etiopia mahibaro han ngatanan antes hiya magpabawtismo. (Buhat 8:30, 31) Ngan padayon nga mahibabaro kita mahitungod ha Dios ha waray kataposan. (Eclesiastes 3:11) Pero para mabawtismohan, kinahanglan hibaroan ngan karawaton mo bisan  an nangunguna la nga mga katutdoan ha Biblia.​—Hebreo 5:12.

7. Paonan-o ka nabuligan han imo pag-aram ha Biblia?

⁷ An Biblia nasiring: “Kon waray pagtoo imposible nga mapalipay gud an Dios.” (Hebreo 11:6) Salit kinahanglan nga may pagtoo ka antes ka mabawtismohan. An Biblia nagsusumat ha aton nga an pipira nga tawo ha kadaan nga syudad han Corinto nakabati han igintutdo han mga sumurunod ni Jesus, ngan sugad nga resulta, “tinoo ngan ginbawtismohan” hira. (Buhat 18:8) Ha pariho nga paagi, an imo pag-aram ha Biblia nakabulig ha imo nga magkaada pagtoo ha mga saad han Dios ngan ha gahum han halad ni Jesus, nga makakatalwas ha aton tikang ha sala ngan kamatayon.​—Josue 23:14; Buhat 4:12; 2 Timoteo 3:16, 17.

8. Ano an magpapagios ha imo nga isumat ha iba an imo nahibabaroan?

⁸ Samtang nagtitikadamu an imo nahibabaroan ha Biblia ngan nakikita mo kon paonan-o ito nakakabulig ha imo kinabuhi, mas magririg-on an imo pagtoo. Maruruyag ka nga isumat ha iba an imo nahibabaroan. (Jeremias 20:9; 2 Corinto 4:13) Pero kan kanay mo ito sadang isumat?

9, 10. (a) Hin-o an bangin siyahan nga sumatan mo han imo nahibabaroan? (b) Ano an sadang mo buhaton kon karuyag mo magsangyaw kaupod han kongregasyon?

⁹ Bangin maruyag ka nga isumat ha imo mga kapamilya, kasangkayan, mga amyaw, o katrabaho an imo nahibabaroan. Maopay ito, pero pirme ito buhata ha buotan ngan mahigugmaon nga paagi. Ha maabot  nga panahon, makakagsangyaw ka na kaupod han kongregasyon. Kon ha imo pag-abat andam ka na nga buhaton ito, puydi ka makiistorya ha Saksi nga nagtututdo ha imo han Biblia ngan sumatan hiya nga karuyag mo na makigbahin ha pagsangyaw nga buruhaton kaupod han kongregasyon. Kon para ha iya andam ka na ngan nagkikinabuhi ka na uyon ha mga suruklan ha Biblia, kamo nga duha makikiistorya ha duha nga tigurang ha kongregasyon.

¹⁰ Ano an mahitatabo hito nga pag-iristorya? An mga tigurang makikiistorya ha imo basi mahibaroan kon nasasabtan mo an nangunguna nga mga katutdoan ha Biblia ngan natoo ka hito, kon gin-aaplikar mo ha imo adlaw-adlaw nga pagkinabuhi an ginsisiring han Biblia, ngan kon karuyag mo gud magin usa han mga Saksi ni Jehova. Hinumdumi nga gin-aataman han mga tigurang an ngatanan nga membro han kongregasyon, pati na ikaw, salit ayaw kahadlok ha pakiistorya ha ira. (Buhat 20:28; 1 Pedro 5:2, 3) Katapos hini nga pag-iristorya, papahibaroon ka han mga tigurang kon puydi ka na magsangyaw kaupod han kongregasyon.

11. Kay ano nga importante gud nga maghimo hin mga pagbag-o antes ka makagsangyaw kaupod han kongregasyon?

¹¹ Bangin isaysay ha imo han mga tigurang nga kinahanglan mo pa maghimo hin pipira nga pagbag-o antes ka makagsangyaw kaupod han kongregasyon. Kay ano nga importante gud nga himoon mo ito nga mga pagbag-o? Tungod kay kon nag-iistorya kita ha iba mahitungod ha Dios, nagrirepresentar kita kan Jehova ngan kinahanglan kita magkinabuhi ha paagi  nga nagpapasidungog ha iya.​—1 Corinto 6:9, 10; Galacia 5:19-21.

12. Kay ano nga an ngatanan nga tawo kinahanglan magbasol?

¹² May iba pa nga kinahanglan mo buhaton antes ka magpabawtismo. Hi apostol Pedro nagsiring: “Salit pagbasol kamo ngan pagbag-o basi mapara an iyo mga sala.” (Buhat 3:19) Ano an karuyag sidngon han pagbasol? Nagpapasabot ito hin pag-abat hin duro nga kasubo tungod han bisan ano nga sayop nga aton nabuhat. Pananglitan, kon imoral an imo pagkinabuhi hadto, kinahanglan ka magbasol. Ngan bisan kon ha bug-os mo nga kinabuhi naniningkamot ka gud nga buhaton an husto, kinahanglan ka la gihap magbasol, tungod kay kita ngatanan nakakasala ngan kinahanglan mangaro ha Dios hin kapasayloan.​—Roma 3:23; 5:12.

13. Ano an karuyag sidngon han “pagbag-o”?

¹³ Eksakto na ba an pag-abat la hin duro nga kasubo ha imo mga nabuhat? Diri. Hi Pedro nagsiring nga kinahanglan liwat an “pagbag-o.” Nagpapasabot ito nga kinahanglan mo isalikway an bisan ano nga sayop nga buhat mo hadto ngan magtikang ka ha pagbuhat han husto. Ha pag-ilustrar, hunahunaa nga nagbibiyahe ka ngadto ha usa nga lugar ha siyahan pa la nga higayon. Waray pag-iha, nahibaroan mo nga nagtitipakadto ka ha sayop nga direksyon. Ano an imo bubuhaton? Sigurado nga maghihinay-hinay ka, maundang, mabalik, ngan makadto ha husto nga direksyon. Ha pariho nga paagi, samtang gin-aadman mo  an Biblia, bangin mahibaroan mo nga may pipira nga imo na nahiaraan o mga butang ha imo kinabuhi nga kinahanglan mo bag-uhon. Magin andam ha paghimo han ginkikinahanglan nga mga “pagbag-o” ngan magtikang ha pagbuhat han husto.

14. Paonan-o mo igindidedikar an imo kalugaringon kan Jehova?

¹⁴ An usa pa nga importante nga pitad nga kinahanglan mo buhaton antes magpabawtismo amo an pagdedikar han imo kalugaringon kan Jehova. Kon igindidedikar mo an imo kalugaringon kan Jehova, nag-aampo ka diin nagsasaad ka nga hiya gud la an imo sisingbahon ngan an iya kaburut-on an magigin pinakaimportante ha imo kinabuhi.​—Deuteronomio 6:15.

15, 16. Ano an magpapagios ha usa nga magdedikar han iya kalugaringon ha Dios?

¹⁵ An pagsaad nga kan Jehova ka la mag-aalagad pariho hin pagsaad ha usa nga imo hinigugma nga hiya an igkakaupod mo ha bug-os mo nga kinabuhi. Hunahunaa an usa nga lalaki ngan babaye nga mag-uyab. Samtang mas nakikilala han lalaki an babaye, mas ginhihigugma niya an babaye ngan karuyag niya nga pakasalan hiya. Bisan kon seryoso ini nga desisyon, andam an lalaki nga karawaton ini nga responsabilidad kay hinigugma niya an babaye.

¹⁶ Samtang mas damu an imo nahibabaroan mahitungod kan Jehova, mas ginhihigugma mo hiya ngan karuyag mo himoon an pinakamaopay basi mag-alagad ha iya. Magpapagios ini ha imo nga mag-ampo  diin nagsasaad ka nga mag-aalagad ha iya. An Biblia nasiring nga an bisan hin-o nga naruruyag sumunod kan Jesus kinahanglan “isalikway niya an iya kalugaringon.” (Marcos 8:34) Ano an iginpapasabot hito? Karuyag sidngon hito nga uunahon mo ha imo kinabuhi an pagsugot kan Jehova. An karuyag ni Jehova amo an mas importante kay ha imo kalugaringon nga mga hingyap ngan tumong.​—Basaha an 1 Pedro 4:2.

17. Kay ano nga an iba nga tawo diri nagdidedikar han ira kalugaringon kan Jehova?

¹⁷ An iba nga tawo diri nagdidedikar han ira kalugaringon kan Jehova, kay nahahadlok hira nga diri nira matuman an ira saad nga mag-alagad ha iya. Diri nira karuyag mapasubo hi Jehova, o bangin nangangatadongan hira nga kon waray pa hira magdedikar ha iya, waray hira baratunon kan Jehova ha ira mga ginbubuhat.

18. Ano an mabulig ha imo nga malamposan an bisan ano nga kahadlok nga mapasubo hi Jehova?

¹⁸ An imo gugma kan Jehova mabulig ha imo nga malamposan an bisan ano nga kahadlok nga mapasubo hiya. Tungod kay hinigugma mo hiya, hihimoon mo an imo pinakamaopay basi matuman an imo saad ha iya. (Eclesiastes 5:4; Colosas 1:10) Diri ka maghuhunahuna nga makuri hinduro an pagbuhat han kaburut-on ni Jehova. Hi apostol Juan nagsurat: “Ini an kahulogan han gugma ha Dios, nga tumanon naton an iya mga sugo; ngan an iya mga sugo diri mabug-at.”​—1 Juan 5:3.

19. Kay ano nga diri ka sadang mahadlok nga idedikar an imo kalugaringon kan Jehova?

 ¹⁹ Diri mo kinahanglan magin perpekto basi idedikar an imo kalugaringon kan Jehova. Diri hiya naglalaom hin labaw kay han aton mahihimo. (Salmo 103:14) Bubuligan ka niya nga himoon kon ano an husto. (Isaias 41:10) Sarig kan Jehova ha imo bug-os nga kasingkasing, ngan “iya tatadungon an imo mga aragian.”​—Proberbios 3:5, 6.

20. Katapos mo idedikar an imo kalugaringon kan Jehova, ano an sunod nga pitad?

²⁰ Ha imo hunahuna, andam ka na ba magdedikar han imo kalugaringon kan Jehova? Katapos mo idedikar an imo kalugaringon kan Jehova, andam ka na para ha sunod nga pitad. Kinahanglan magpabawtismo ka.

21, 22. Paonan mo ‘maipapasamwak ha publiko’ an imo pagtoo?

²¹ Sumati an koordinetor han lawas han mga tigurang ha iyo kongregasyon nga igindedikar mo na an imo kalugaringon kan Jehova ngan karuyag mo magpabawtismo. Katapos, hahangyoon niya an pipira nga tigurang nga repasuhon ha imo an nangunguna nga katutdoan han Biblia. Kon magkauruyon hira nga andam ka na, susumatan ka nira nga puydi ka na magpabawtismo ha sunod nga asembleya o kombensyon han mga Saksi ni Jehova. Ha asembleya, may pahayag nga magsasaysay han kahulogan han bawtismo. An mamumulong han pahayag magpapakiana ha mga barawtismohan hin duha nga simple nga  pakiana. Pinaagi ha pagbaton hito nga mga pakiana, imo ‘ipapasamwak ha publiko’ an imo pagtoo.​—Roma 10:10.

²² Katapos, babawtismohan ka. Bug-os nga ipapailarom ka ha tubig. An bawtismo magpapakita ha ngatanan nga imo na igindedikar an imo kalugaringon kan Jehova ngan yana usa ka na han mga Saksi ni Jehova.

23. Ano an karuyag sidngon han pagpabawtismo “ha ngaran han Amay ngan han Anak ngan han baraan nga espiritu”?

²³ Hi Jesus nagsiring nga an iya mga disipulo babawtismohan “ha ngaran han Amay ngan han Anak  ngan han baraan nga espiritu.” (Basaha an Mateo 28:19.) Ano an karuyag sidngon hito? Iginpapasabot hito nga ginkikilala mo an awtoridad ni Jehova ngan an papel ni Jesus ha katuyoan han Dios sugad man kon paonan-o ginagamit han Dios an iya baraan nga espiritu ha pagtuman han iya kaburut-on.​—Salmo 83:18; Mateo 28:18; Galacia 5:22, 23; 2 Pedro 1:21.

24, 25. (a) Ano an ginrirepresentaran han bawtismo? (b) Ano an aton hihisgotan ha kataposan nga kapitulo?

²⁴ An bawtismo nagrirepresentar hin importante gud nga butang. Kon iginpapailarom ka ha tubig, karuyag sidngon namatay, o bumaya ka na, ha imo daan nga pagkinabuhi. Paghaw-as mo ha tubig, magtitikang ka hin bag-o nga kinabuhi ha pagbuhat han kaburut-on han Dios. Iginpapakita hini nga tikang yana, mag-aalagad ka na kan Jehova. Hinumdumi nga nagdedikar ka diri ha usa nga tawo, organisasyon, o trabaho. Igindedikar mo an imo kinabuhi kan Jehova.

²⁵ An imo dedikasyon mabulig ha imo nga magkaada duok nga pakigsangkay ha Dios. (Salmo 25:14) Diri ini nagpapasabot nga an usa nga tawo matatalwas tungod la kay nagpabawtismo hiya. Hi apostol Pablo nagsurat: “Padayon kamo nga mangalimbasog para ha iyo katalwasan nga may kahadlok ngan pangurog.” (Filipos 2:12) An bawtismo tinikangan pa la. Pero paonan-o ka makakapabilin nga duok kan Jehova? Ini nga pakiana babatunon ha kataposan nga kapitulo hini nga libro.