1, 2. Kay ano nga may mga panahon nga hi Jehova naggamit hin mga visual aid ha pagsumat hin mga kamatuoran ha iya mga alagad ha tuna?

 IMADYINA an usa nga pamilya nga may gudti nga kabataan nga nalingkod ha may lamesa ha kusina ngan nag-aaram han Biblia. Basi buligan an kabataan nga masabtan an usa nga kamatuoran ha Kasuratan, an tatay nagpakita hin simple nga mga drowing. An ira hiyom ngan malipayon nga komento nagpakita nga naglampos hiya. Pinaagi han mga drowing, nabuligan niya hira nga masabtan an mga katutdoan mahitungod kan Jehova nga diri unta nira masasabtan tungod han ira edad.

² Ha pariho nga paagi, hi Jehova naggamit hin mga visual aid basi buligan an iya tawhanon nga mga anak nga magkaada hilarom nga pagsabot ha diri nakikita nga mga reyalidad nga diri nira masasabtan kon waray ito. Pananglitan, basi isaysay an higlarom nga kamatuoran mahitungod ha iya, nagpakita hiya kan Ezekiel hin bisyon nga may kakaiba nga mga dagway. Ha nauna nga kapitulo, ginhisgotan naton an usa hito. Yana, magpokus kita ha usa nga espisipiko nga bahin han bisyon ngan kon paonan-o an pagsabot han kahulogan hito mabulig ha aton nga magin mas duok kan Jehova.

3. (a) Sumala ha Ezekiel 1:4, 5, ano an nakita ni Ezekiel ha bisyon? (Kitaa an retrato ha tinikangan hini nga kapitulo.) (b) Ano an imo naobserbaran ha paagi han paghulagway ni Ezekiel han iya mga nakita?

³ Basaha an Ezekiel 1:4, 5. Iginhulagway ni Ezekiel an “sugad hin upat nga buhi nga linarang” nga may hitsura hin anghel, tawo, ngan hayop. Tigamni nga eksakto gud an iya paghulagway pinaagi ha pagsiring nga nakita niya an “sugad hin” buhi nga mga linarang. Samtang imo ginbabasa an bisyon ha Ezekiel kapitulo 1, maoobserbaran mo nga pauroutro nga gin-gamit niya an mga pulong nga “sugad hin,” “pariho,” ngan “puropariho.” (Ezek. 1:13, 24, 26) Matin-aw nga nasantop ni Ezekiel nga an iya nakita mga dagway la han diri nakikita nga mga reyalidad ha langit.

4. (a) Ano an epekto kan Ezekiel han bisyon? (b) Ano an sigurado nga hinbabaroan ni Ezekiel mahitungod ha mga kerubin?

⁴ Sigurado nga nahipausa gud hi Ezekiel ha iya mga nakita ngan nabatian. An upat nga buhi nga linarang pariho hin “naglalaga nga mga bága.” An ira mga kiwa sugad kalaksi hin “mga kidlat.” An aringasa han ira mga pako ‘pariho hin haganas han masulog nga katubigan’ ngan an aringasa han ira mga kiwa “pariho hin kanan kasundalohan.” (Ezek. 1:13, 14, 24-28; kitaa an kahon nga “Ginkikinita Ko an Buhi nga mga Linarang.”) Ha lain nga bisyon, iginpakilala ni Ezekiel an upat nga buhi nga linarang sugad nga “mga kerubin,” o gamhanan nga mga anghel. (Ezek. 10:2) Tungod kay nagdaku hiya ha pamilya han mga saserdote, sigurado nga maaram hiya nga an mga kerubin konektado gud ha presensya han Dios ngan mga kabulig Niya.​—1 Cron. 28:18; Sal. 18:10.

5. (a) Paonan-o iginpapakita han mga kerubin ngan han ira upat nga nawong an himaya ngan gahum ni Jehova? (b) Kay ano nga iginpapahinumdom ha aton hini nga bahin han bisyon an kahulogan han ngaran han Dios? (Kitaa an footnote.)

⁵ Basaha an Ezekiel 1:6, 10. Napansin liwat ni Ezekiel nga an tagsa nga kerubin may upat nga nawong​—kanan tawo, leon, todo nga baka, ngan agila. An pakakita hito sigurado nga nagpasilsil ha iya han diri matupngan nga himaya ngan gahum ni Jehova. Kay ano? Kay makatirigamnan nga an tagsa nga nawong kanan linarang nga nagsisimbolo hin pagkaharangdon, kusog, ngan pagin gamhanan. An leon harangdon nga ihalas nga hayop, an todo nga baka nakakabilib nga hayop, an agila makusog nga tamsi, ngan an tawo obra maestra ha mga linarang han Dios ha tuna, an magmarando ha ngatanan nga linarang ha tuna. (Sal. 8:4-6) Pero hini nga bisyon, nakita ni Ezekiel nga iton upat nga gamhanan nga linarang, nga makikita ha upat nga nawong han tagsa nga kerubin, aada ha ubos han trono ni Jehova, an Supremo nga Soberano. Iginpapakita gud hito nga magagamit ni Jehova an iya mga linarang ha pagtuman han iya katuyoan! * Tinuod an ginsiring han salmista mahitungod kan Jehova, “An iya pagkaharangdon labaw pa han tuna ngan langit.”​—Sal. 148:13.

6. Ano an bangin nakabulig kan Ezekiel nga masabtan kon ano pa an ginrirepresentaran han upat nga nawong?

⁶ Paglabay han panahon, han napamalandong na ni Ezekiel an iya nakita, bangin nahinumdoman niya nga an mga surugoon han Dios nga nabuhi antes ha iya naggamit hin mga hayop ha pagtanding.  Pananglitan, iginpariho han patriarka nga hi Jacob an iya anak nga hi Juda ha leon ngan hi Benjamin liwat ha lobo. (Gen. 49:9, 27) Kay ano? Kay an mga kalidad han leon ngan lobo makikita ha ira personalidad. Salit basado hito nga mga ehemplo ha giniyahan nga mga sinurat ni Moises, sigurado nga nahunahuna ni Ezekiel nga an mga nawong han mga kerubin nagsisimbolo liwat hin importante gud nga mga kalidad. Pero ano nga mga kalidad?

7, 8. Ano nga mga kalidad an agsob ikaw-ing ha upat nga nawong han mga kerubin?

⁷ Ha ano nga mga kalidad iginkaw-ing han mga parasurat han Biblia antes kan Ezekiel an leon, agila, ngan todo nga baka? Tagda ini nga mga teksto: “An maisog nga tawo nga an kasingkasing pariho han kanan leon.” (2 Sam. 17:10; Prob. 28:1) “An agila nalupad tipaigbaw,” ngan “an mga mata hito nagkikita ha hirayo gud.” (Job 39:27, 29) “An kusog han todo nga baka naghahatag hin damu nga ani.” (Prob. 14:4) Basado hito, an nawong han leon nagsisimbolo ha hustisya nga may kaisog; an nawong han agila, ha kinaadman nga hirayo an nakikita; an nawong han todo nga baka, ha kusog, o gahum, nga diri maaatohan, sugad han agsob unabihon ha aton mga publikasyon.

⁸ Pero kumusta man “an nawong hin tawo”? (Ezek. 10:14) Sigurado nga nagtutudlok ito ha kalidad nga waray ha hayop, kondi aada ha mga tawo, nga ginhimo ha dagway han Dios. (Gen. 1:27) Ha tuna mga tawo la an nagpapakita hito, nga ginpapabug-atan hini nga mga sugo han Dios: “Higugmaa hi Jehova nga imo Dios ha bug-os mo nga kasingkasing” ngan “higugmaa an imo igkasi-tawo sugad ha imo kalugaringon.” (Deut. 6:5; Lev. 19:18) Kon ginsusugot naton ini pinaagi ha pagpakita hin diri makikalugaringon nga gugma, ginsusubad naton an gugma ni Jehova mismo. Sugad han iginsurat ni apostol Juan, “nahigugma kita kay una hiya nga naghigugma ha aton.” (1 Juan 4:8, 19) Salit “an nawong hin tawo” nagsisimbolo han gugma.

9. Kan kanay an mga kalidad nga iginkakaw-ing ha mga nawong han mga kerubin?

⁹ Kan kanay ini nga mga kalidad? Tungod kay mga nawong ini han mga kerubin, mga kalidad ini han ngatanan nga ginrirepresentaran han mga kerubin​—an kan Jehova langitnon nga pamilya han maunungon nga espiritu nga mga linarang. (Pah. 5:11) Dugang pa, tungod kay hi Jehova an Gintitikangan han kinabuhi han mga kerubin, hiya liwat an Gintitikangan han ira mga kalidad. (Sal. 36:9) Salit an mga nawong han mga kerubin nagsisimbolo han mga kalidad ni Jehova mismo. (Job 37:23; Sal. 99:4; Prob. 2:6; Mic. 7:18) Ano an pipira nga paagi nga iginpapakita niya inin importante gud nga mga kalidad?

10, 11. Ano an pipira nga paagi nga nagpapahimulos kita ha pagpakita ni Jehova han iya upat nga nangunguna nga kalidad?

¹⁰ Hustisya. Sugad nga Dios nga “nahigugma han hustisya,” hi Jehova “waray ginpapaurog.” (Sal. 37:28; Deut. 10:17) Salit anoman  an aton kahimtang ha sosiedad o gintikangan, may higayon kita nga magin ngan magpabilin nga iya mga surugoon ngan makakarawat hin waray kataposan nga mga bendisyon. Kinaadman. Sugad nga Dios nga ‘maaramon an kasingkasing,’ hi Jehova naghatag hin libro nga puno hin “praktikal nga kinaadman.” (Job 9:4; Prob. 2:7) An pag-aplikar ha maaramon nga sagdon han Biblia nabulig ha aton nga atubangon an adlaw-adlaw nga mga problema ngan magkaada kinabuhi nga may katuyoan. Gahum. Sugad nga Dios nga “daku an gahum,” ginagamit ni Jehova an iya baraan nga espiritu ha paghatag ha aton hin “diri ordinaryo nga gahum.” Nagpaparig-on ini ha aton nga ilubon an anoman nga makuri ngan masakit nga mga pagsari nga bangin atubangon naton.​—Nah. 1:3; 2 Cor. 4:7; Sal. 46:1.

¹¹ Gugma. Sugad nga Dios nga “hura hin maunungon nga gugma,” diri gud babayaan ni Jehova an iya magtinumanon nga magsiringba. (Sal. 103:8; 2 Sam. 22:26) Salit bisan kon nasusubo kita kay limitado na an aton nahihimo ha pag-alagad tungod han sakit o kalagas, naliliaw kita ha paghibaro nga nahinunumdoman ni Jehova an aton mga sakripisyo hadto tungod han gugma ha iya. (Heb. 6:10) Matin-aw nga nagpapahimulos na kita ha pagpakita ni Jehova hin hustisya, kinaadman, gahum, ngan gugma, ngan padayon nga magpapahimulos kita hinin upat nga nangunguna nga kalidad ha maabot nga panahon.

12. Ano an angay naton hinumdoman mahitungod han aton abilidad nga masabtan an mga kalidad ni Jehova?

¹² Syempre, angay naton hinumdoman nga sugad nga mga tawo, an nasasabtan naton mahitungod han mga kalidad ni Jehova ‘gutiay la nga bahin han iya mga buhat.’ (Job 26:14) “Diri naton matutugkad an pagsabot ha Makagarahum-ha-ngatanan,” kay “an iya pagkaharangdon diri matugkad.” (Job 37:23; Sal. 145:3) Salit maaram kita nga an iya mga kalidad diri maiihap ngan diri mahimo pagburublagon. (Sal. 139:17, 18; basaha an Roma 11:33, 34.) Ngani, an bisyon mismo ni Ezekiel nagpapakita hito nga kamatuoran. Ano nga bahin han bisyon an nagpapabug-at hiton importante nga kamatuoran?

13, 14. Ano an ginrirepresentaran han upat nga nawong han mga kerubin, ngan kay ano nga ito an aton konklusyon?

¹³ Nakita ni Ezekiel nga diri la usa an nawong han tagsa nga kerubin, kondi upat. Ano an iginpapasabot hito? Hinumdumi nga ha Pulong han Dios, an numero kwatro agsob gamiton basi ipasabot an pagin bug-os, o kompleto, nga nag-uupod han ngatanan. (Isa. 11:12; Mat. 24:31; Pah. 7:1) Makatirigamnan nga hini nga bisyon, gin-unabi ni Ezekiel an numero kwatro hin 11 ka beses! (Ezek. 1:5-18) Salit ano an aton konklusyon? Sugad la nga an upat nga kerubin nagrirepresentar han ngatanan nga maunungon nga espiritu nga linarang, an upat nga nawong han mga kerubin kon kikitaon ha  kabug-osan nagrirepresentar, o nag-uupod, han ngatanan nga kalidad ni Jehova. *

¹⁴ Ha pag-ilustrar nga an upat nga nawong han mga kerubin diri la nagtutudlok ha upat nga kalidad, tagda an upat nga kaliding dinhi hini nga bisyon. Daku hinduro an tagsa nga kaliding, pero kon kikitaon ha kabug-osan, diri la ito kay basta upat nga dagku gud nga kaliding​—ito an pundasyon nga gintutungtongan han karuwahe. Ha pariho nga paagi, kon an upat nga nawong kikitaon ha kabug-osan, diri la ito kay nagrirepresentar hin upat nga kalidad​—ito an pundasyon han urusahon gud nga personalidad ni Jehova.

15. Ano nga makaparig-on nga kamatuoran an hinbaroan ni Ezekiel pinaagi han siyahan nga bisyon nga iya nakarawat?

¹⁵ Pinaagi hinin siyahan nga bisyon, may hinbaroan hi Ezekiel nga importante ngan makaparig-on nga kamatuoran parte ha iya relasyon kan Jehova. Ano ito? Iginpapakita ito ha siyahan nga mga pulong han libro hini nga propeta. Katapos magsiring nga nakadto hiya “ha tuna han mga Caldeo,” iginsumat niya an iya naeksperyensyahan: “An gahum ni Jehova ginios ha iya didto.” (Ezek. 1:3) Tigamni nga nagsiring hi Ezekiel nga nakarawat niya an bisyon, diri  ha Jerusalem, kondi didto​—ha Babilonya. * Salit ano an iginpasabot hito ha iya? Ini: Bisan kon ubos la hiya nga distyero nga nahibulag ha Jerusalem ngan ha templo hito, waray hiya mahibulag kan Jehova ngan ha pagsingba ha Iya. An pagpakita ni Jehova kan Ezekiel ha Babilonya nagpapasabot nga an putli nga pagsingba ha Dios diri nakadepende ha lokasyon o estado ha kinabuhi. Lugod, nakadepende ito ha kahimtang han iya kasingkasing ngan ha iya hingyap nga mag-alagad kan Jehova.

16. (a) Ano nga nakakaliaw nga pasarig an aton hibabaroan ha bisyon ni Ezekiel? (b) Ano an nakakaaghat ha imo nga mag-alagad kan Jehova ha bug-os mo nga kasingkasing?

¹⁶ Kay ano nga nakakaliaw gud ha aton an kamatuoran nga hinbaroan ni Ezekiel? Nagpapasarig ito ha aton nga kon bug-os-kasingkasing an aton pag-alagad kan Jehova, nagpapabilin hiya nga duok ha aton diin man kita naukoy, anoman kita kamasurub-on, o anoman an aton kahimtang. (Sal. 25:14; Buh. 17:27) Tungod han iya hura nga maunungon nga gugma ha tagsa niya nga alagad, diri dayon hiya nawawad-an hin paglaom ha aton. (Ex. 34:6) Salit pirme gud kita maaabot han iya maunungon nga gugma. (Sal. 100:5; Roma 8:35-39) Iginpapahinumdom liwat hinin urusahon nga bisyon mahitungod ha pagkabaraan ni Jehova ngan ha iya diri matupngan nga gahum nga hiya an angay naton singbahon. (Pah. 4:9-11) Mapasalamaton gud kita nga gin-gamit ni Jehova an sugad nga mga bisyon ha pagbulig ha aton nga masabtan an pipira nga importante nga kamatuoran mahitungod ha iya ngan ha iya mga kalidad! Samtang naghihilarom an aton pagsabot ha makaruruyag nga mga kalidad ni Jehova, naaaghat kita nga magin mas duok ha iya, dayawon hiya, ngan mag-alagad ha iya ha bug-os naton nga kasingkasing ngan kusog.​—Luc. 10:27.

17. Ano nga mga pakiana an aton babatunon ha sunod nga mga kapitulo?

¹⁷ Kondi makasurubo nga ha panahon ni Ezekiel, nahugawan an putli nga pagsingba. Paonan-o ito nahitabo? Ano an reaksyon ni Jehova? Ngan ano an kahulogan para ha aton hito nga mga hitabo? Ini nga mga pakiana babatunon ha sunod nga mga kapitulo.