Kon karuyag mo makilala an usa, an siyahan nga butang nga posible mo buhaton amo an pagpakiana, “Ano an imo ngaran?” Kon ipapakiana mo ito ha Dios, ano daw la an iya igbabaton?

“Ako hi Jehova. Ito an akon ngaran.”—Isaias 42:8.

An ngaran importante ha Dios mismo. Waray naghatag ha Dios han iya ngaran; iya ito ginpili para ha iya kalugaringon. Hi Jehova nagsiring: “Ini an akon ngaran ha kadayonan, ngan pinaagi hini hinunumdoman ako ha ngatanan nga henerasyon.” (Exodo 3:15) Ha Biblia, mas agsob makita an ngaran han Dios kay han iba niya nga titulo sugad han Makagarahum-ha-ngatanan, Amay, Ginoo, o Dios, ngan mas agsob gamiton kay han iba nga personal nga ngaran sugad han Abraham, Moises, David, o Jesus. Dugang pa, kaburut-on ni Jehova nga makilala an iya ngaran. An Biblia nasiring: “Hinaot mahibaro an katawohan nga ikaw, nga an ngaran amo hi Jehova, ikaw gud la an Gihitaasi ha bug-os nga tuna.”—Salmo 83:18.

An ngaran importante kan Jesus. Ha pag-ampo nga gintatawag nga Amay Namon o Pag-ampo han Ginoo, gintutdoan ni Jesus an iya mga sumurunod nga manginyupo ha Dios pinaagi han mga pulong: “Baraanon unta an imo ngaran.” (Mateo 6:9) Ngani, hi Jesus mismo nag-ampo ha Dios: “Amay, himayaa an imo ngaran.” (Juan 12:28) Para kan Jesus, prayoridad an pagbindikar han ngaran han Dios, salit ha pag-ampo may kagawasan hiya ha pagsiring: “Iginpakilala ko ha ira an imo ngaran ngan igpapakilala ko pa ito.”—Juan 17:26.

An ngaran importante ha mga nakilala ha Dios. Maaram an katawohan han Dios han naglabay nga makakarawat nira an proteksyon ngan kaluwasan kon nakilala hira han waray kapariho nga ngaran han Dios. “An ngaran ni Jehova marig-on nga torre. An matadong nga tawo nadangop dida hito ngan napuproteksyonan.” (Proberbios 18:10) “An bisan hin-o nga natawag ha ngaran ni Jehova matatalwas.” (Joel 2:32) Iginpapakita han Biblia nga an ngaran han Dios magpapakilala hadton mga nag-aalagad ha iya. “Kay an ngatanan nga mga katawohan maglalakat, an kada tagsa ha ngaran han ira dios, pero maglalakat  kita ha ngaran ni Jehova nga aton Dios ha kadayonan, oo ha kadayonan.”—Micas 4:5; Buhat 15:14.

Ito la an ngaran nga nagpapakilala ha Dios. Damu nga eskolar an nasiring nga an ngaran nga Jehova nangangahulogan hin “Hiya Nagpapahinabo nga Magin.” Ginbuligan kita ni Jehova nga Dios nga mahibaroan an kahulogan han iya ngaran han iginpakilala niya an iya kalugaringon pinaagi hini nga mga pulong nga iya iginyakan kan Moises: “Ako Magigin Kon Ano an Akon Pilion nga Magin.” (Exodo 3:14) Salit an ngaran han Dios nagsusumat ha aton hin labaw pa han iya pagin Maglalarang han tanan nga butang. An iya ngaran nagpapahayag han iya abilidad nga puydi niya himoon an iya kalugaringon sugad man an iya mga linarang nga magin bisan ano nga ginkikinahanglan basi matuman an iya katuyoan. Bisan kon an mga titulo mahimo maghulagway han katungdanan, awtoridad, o gahum han Dios, an iya la ngaran nga Jehova an makakagrepresentar kon ano gud hiya ngan kon ano an mahimo niya magin.

An ngaran nagpapakita nga interesado an Dios ha aton. An kahulogan han ngaran han Dios nagpapakita han iya diri nalubad nga gugma ha iya mga linarang, upod na ha aton. Dugang pa, an pagpakilala han Dios han iya ngaran nagpapasabot nga karuyag niya nga makilala naton hiya. Ngani, hiya an siyahan nga naghimo hin paagi basi masumatan kita han iya ngaran antes pa kita mahibaro nga mahimo kita maghangyo nga hibaroan ito. Matin-aw nga diri karuyag han Dios nga tagdon naton hiya sugad nga diri masabtan ngan diri madadaop nga dios, kondi sugad nga tinuod nga Persona nga mahimo magin duok ha aton.—Salmo 73:28.

An paggamit han ngaran han Dios nagpapakita han aton interes ha iya. Ha pag-ilustrar, bangin hangyoon mo an usa nga karuyag mo magin sangkay nga tawagon ka ha imo ngaran. Ano man an imo aabaton kon padayon nga magdumiri hiya nga gamiton ito? Bangin maghunahuna ka kon karuyag gud ba niya makigsangkay ha imo. Sugad man liwat ito ha Dios. Iginsusumat ni Jehova ha katawohan an iya ngaran, ngan gindadasig kita niya nga gamiton ito. Kon ginbubuhat naton ito, iginpapakita naton kan Jehova nga karuyag naton magin duok ha iya. Ngani, nakikita niya an “mga namamalandong [o, “nagpapabili,” footnote] han iya ngaran”!—Malakias 3:16.

An paghibaro han ngaran han Dios amo an importante ngan siyahan nga pitad ha pagkilala ha iya. Kondi diri kita sadang umundang tungod la kay kilala na naton an iya ngaran. Kinahanglan naton hibaroan an personalidad han tag-iya hito nga ngaran.