Kon mas hinbabaroan naton an mga kalidad han usa, mas nakikilala naton hiya, ngan tungod hito mahimo maghilarom an aton relasyon ha iya. Ha pariho nga paagi, kon mas nahibabaroan naton an mga kalidad ni Jehova, mas mahibabaroan naton an iya personalidad, salit mahimo mas maghilarom an aton relasyon ha iya. Ha ngatanan nga mag-opay nga kalidad han Dios, may-ada upat nga nangunguna: an iya gahum, kinaadman, hustisya, ngan gugma.

“O Jehova nga Soberano nga Ginoo! Kitaa! Imo ginhimo an langit ngan an tuna pinaagi han imo daku nga gahum.”—JEREMIAS 32:17.

An ebidensya han gahum han Dios makikita ha mga linarang. Pananglitan, kon nasisirakan ka ha panahon han katpaso, ano an inaabat han imo panit? An kapaso han adlaw. Oo, inaabat mo an mga resulta han gahum han paglarang ni Jehova. Mationan-o kakusog an pwersa han adlaw? Ha butnga hito, ginsisiring nga an temperatura hito mga 15 milyon sentigrado. Kada segundo nagpapagawas an adlaw hin enerhiya nga katugbang ha pagbuto han damu ka gatos ka milyon nga bomba nuklear.

Kondi an adlaw gutiay la kon itanding ha diri maihap nga kadamu han bitoon ha uniberso. Ginbabanabana han mga syentista nga an usa han pinakadaku nga bitoon nga ginngangaranan nga UY Scuti, may-ada diyametro nga mga 1,700 ka beses nga mas daku kay han adlaw. Kon ibubutang an UY Scuti ha hinmumutangan han adlaw, puydi mahisulod dida hito an tuna bisan an orbit han planeta nga Jupiter. Bangin makabulig ito nga mas masabtan naton an mga pulong ni Jeremias nga ginlarang ni Jehova nga Dios an langit ngan an tuna, karuyag sidngon an uniberso, pinaagi han iya daku nga gahum.

Paonan-o kita nakakapahimulos tikang ha gahum han Dios? An aton kinabuhi nakadepende ha mga linarang han Dios, sugad han adlaw ngan han tanan  nga mag-opay nga bahandi han tuna. Dugang pa, ginagamit han Dios an iya gahum basi magpahimulos an mga tawo sugad nga indibiduwal. Paonan-o? Han siyahan nga siglo, gintagan han Dios hi Jesus hin gahum basi magbuhat hin mga milagro. Mababasa naton: “An mga buta nakakakita na yana ngan an mga piay nakakalakat na, an mga may liprosi nagin limpyo na ngan an mga bungol nakakabati na, an mga patay nagkabubuhi.” (Mateo 11:5) Kumusta man yana? “Iya gintatagan hin kusog an ginkakapoy,” siring han Biblia, ngan ito nagdugang: “An mga naglalaom kan Jehova magkakaada utro hin kusog.” (Isaias 40:29, 31) An Dios mahimo makaghatag hin “diri ordinaryo nga gahum” basi maatubang o mailob naton an mga kakurian ngan mga pagsari ha kinabuhi. (2 Corinto 4:7) Diri ka ba naaaghat nga magin duok ha Dios nga mahigugmaon ngan ginagamit an iya waray tubtoban nga gahum para ha aton kaopayan?

“Damu gud an imo mga buhat, O Jehova! Imo ginhimo ito ngatanan pinaagi han kinaadman.”—SALMO 104:24.

Samtang mas nahibabaro kita mahitungod han mga butang nga ginlarang han Dios, mas nahipapausa kita han iya kinaadman. Ha pagkamatuod, may-ada kanataran han syensya nga tinatawag nga biomimetics, o biomimicry, diin gin-uusisa han mga syentista an mga linarang ni Jehova ngan ginsusubad ito basi pauswagon an ira mga gindisenyo. Ini nga mga disenyo nag-uupod tikang ha simple nga magic tape ngadto ha disenyo hin eruplano.

An pinakaurusahon nga ehemplo han kinaadman han Dios amo an lawas han tawo. Tagda pananglitan kon paonan-o napuporma an usa nga minasus-an. Nagtitikang an proseso ha usa nga napertilisar nga selyula nga nagsusulod han tanan nga ginkikinahanglan nga henetiko nga instruksyon. Ito nga selyula nababahin ngadto ha damu nga selyula nga parapriho pagkit-on. Kondi ha husto nga panahon, nagtitikang ka porma ito nga mga selyula ha iba-iba nga paagi, salit nagkakaada ginatos nga klase hin magkaiba-iba nga selyula, sugad han mga selyula han dugo, mga selyula han kaugatan, ngan mga selyula han bukog. Ha diri maiha nabubug-os an mga sistema han lawas ngan nagtitikang ito gumana. Ha sulod la hin siyam ka bulan, ito nga napertilisar nga selyula nagigin kompleto nga gutiay nga lawas han tawo nga ginkukompwesto hin binilyon nga selyula. An kinaadman nga nakikita ha sugad nga disenyo nag-aaghat ha damu nga umuyon ha parasurat han Biblia nga nagsiring: “Gindadayaw ko ikaw kay ha urusahon gud nga paagi maopay hinduro an pagkahimo ha akon.”—Salmo 139:14.

Paonan-o kita nakakapahimulos tikang ha kinaadman han Dios? Maaram an Maglalarang han aton mga kinahanglan basi magin malipayon. Tungod kay may-ada hiya daku nga kahibaro ngan pagsabot, nakakaghatag hiya hin maaramon nga sagdon tikang ha iya Pulong, an Biblia. Pananglitan, ito nagdadasig: “Padayon nga . . . hura nga magpasaylo ha usa kag usa.” (Colosas 3:13) Maaramon ba ito nga sagdon? Oo. Nahibaroan han mga pag-aram nga an pagin mapinasayloon mahimo mas magpaopay han pagkaturog han usa ngan magpahamubo han presyur han dugo. Mahimo liwat ito magpahamubo han peligro nga magkaada depresyon ngan iba pa nga sakit. An Dios pariho hin maaramon ngan mahigugmaon nga sangkay nga diri naundang ha paghatag hin bulig  ngan mapulsanon nga sagdon. (2 Timoteo 3:16, 17) Diri ka ba naruruyag magkaada sugad nga klase hin sangkay?

“Hi Jehova nahigugma han hustisya.”—SALMO 37:28.

An Dios pirme nagbubuhat kon ano an husto. Ngani, “imposible gud nga magbuhat hin maraot an tinuod nga Dios, nga magbuhat hin sayop an Makagarahum-ha-ngatanan!” (Job 34:10) An iya mga paghukom matadong, sugad la han siring han salmista kan Jehova: “Magigin patas an imo paghukom ha mga katawohan.” (Salmo 67:4) Tungod kay “nakikita ni Jehova an kasingkasing,” diri hiya malilimbongan kay pirme niya nakikita an kamatuoran ngan nakakahimo hin husto nga paghukom. (1 Samuel 16:7) Dugang pa, maaram hiya han ngatanan nga kawaray-hustisya ngan korapsyon dinhi ha tuna, ngan nagsasaad hiya nga ha diri maiha “an magraot pupoohon tikang ha tuna.”—Proberbios 2:22.

Kondi, an Dios diri madarahog nga hukom nga naruruyag pagsirot ha katawohan. Nagpapakita hiya hin kalooy kon angayan. An Biblia nasiring: “Hi Jehova maloloy-on ngan mapinairon” bisan ha mga magraot, kon sinsero hira nga magbasol. Diri ba ito tinuod nga hustisya?—Salmo 103:8; 2 Pedro 3:9.

Paonan-o kita nakakapahimulos tikang ha hustisya han Dios? Hi apostol Pedro nagsiring: “An Dios waray pinaurog, kondi ha tagsa nga nasud an tawo nga may kahadlok ha iya ngan nagbubuhat han husto ginkakarawat niya.” (Buhat 10:34, 35) Nakakapahimulos kita tikang ha hustisya han Dios tungod kay waray hiya ginpapaurog o diri nagpapakita hin paboritismo. Mahimo kita niya karawaton ngan magin iya magsiringba anoman an aton tribo, nasyonalidad, edukasyon, o estado ha kinabuhi.

Tungod kay karuyag han Dios nga makasabot ngan makapahimulos kita tikang ha iya hustisya, gintagan kita niya hin konsensya. Ginhuhulagway han Biblia an konsensya sugad nga balaud nga ‘nahisurat ha aton kasingkasing,’ nga “nagtitestigo” kon an aton panggawi husto ba o sayop. (Roma 2:15) Paonan-o kita nakakapahimulos hini? Kon nabansay hin maopay an aton konsensya, magpapagios ito ha aton  nga bayaan an aton nakakadaot o diri maopay nga mga buhat. Ngan kon makabuhat kita hin sayop, aaghaton kita hito nga magbasol ngan tadungon an aton pagkinabuhi. Oo, an pagsabot han hustisya han Dios mabulig ngan mag-aaghat ha aton nga magin duok ha iya!

“An Dios gugma.”—1 JUAN 4:8.

An Dios nagpapakita hin gahum, kinaadman, ngan hustisya, kondi an Biblia diri nasiring nga an Dios gahum, kinaadman, o hustisya. Nasiring ito nga hiya gugma. Kay ano? Tungod kay husto nga masisiring nga an gahum han Dios an nagpapahinabo ha iya nga gumios, ngan an iya hustisya ngan kinaadman naggigiya han paagi han iya pagbuhat. Kondi an gugma ni Jehova an nag-aaghat ha iya nga gumios. Gugma an hinungdan han ngatanan nga iya ginbubuhat.

Bisan kon waray kulang kan Jehova, an iya gugma an nag-aghat ha iya nga maghimo hin intelihente nga mga linarang ha langit ngan ha tuna nga makakapahimulos ngan makakakarawat han iya gugma. Mahigugmaon nga igin-andam niya an tuna basi magin maopay nga urukyan han iya mga linarang nga tawo. Ngan padayon nga iginpapakita niya an gugma ha ngatanan nga tawo. Ngani, “iya ginpapasirang an iya adlaw ngada ha magraot ngan ha mag-opay ngan nagpapauran ha magtadong ngan ha diri magtadong.”—Mateo 5:45.

Dugang pa, “hi Jehova malumo hinduro magpalangga ngan maloloy-on.” (Santiago 5:11) Iya iginpapahayag an iya gugma ha mga sinsero nga nangangalimbasog nga makilala ngan magin duok ha iya. Interesado hiya ha kada tagsa hito nga indibiduwal. Ngani, ‘interesado hiya ha imo kaopayan.’—1 Pedro 5:7.

Paonan-o kita nakakapahimulos tikang ha gugma han Dios? Naruruyag kita pagkinita ha katunod han adlaw. Nalilipay kita pamati ha tawa han minasus-an. Naliliaw kita han gugma han aton mga kapamilya. Bangin diri ini importante nga mga butang, kondi daku nga kalipay an iginhahatag hini ha aton.

Nagpapahimulos liwat kita ha usa pa nga kapahayagan han gugma han Dios, an pag-ampo. An Biblia nag-aaghat: “Ayaw kamo kabaraka ha bisan ano nga butang, kondi ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo.” Pariho hin mahigugmaon nga tatay, karuyag niya nga mangaro kita hin bulig ha iya kon may-ada kita mga problema. Ngan hi Jehova, tungod han iya daku nga gugma, nagsasaad ha paghatag hin “kamurayawan han Dios nga labaw ha ngatanan nga pagsabot.”—Filipos 4:6, 7.

Nakabulig ba ha imo inin halipot nga paghisgot mahitungod han nangunguna nga mga kalidad han Dios sugad han iya gahum, kinaadman, hustisya, ngan gugma nga mas makilala an iya personalidad? Basi mas makilala mo pa an Dios, gin-iimbitar ka namon nga hibaroan kon ano an iya ginbuhat ngan an iya pagbubuhaton pa para ha imo kapulsanan.