Nahuhunahuna mo ba kon ano an magigin tidaraon mo ngan han imo pamilya? Nakikita mo ba an imo kalugaringon nga riko o pobre, hinigugma o masurub-on, hilawig an kinabuhi o temprano nga mamamatay? Ito nga mga pakiana ginhihinunahuna na han mga tawo hin yinukot na ka mga tuig.

Gin-aadman han mga eksperto yana an mga nahihitabo ha kalibotan ngan naghihimo hin pagbanabana han tidaraon. Bisan kon damu han ira pagbanabana an natuman, napakyas an iba hito, ngan an pipira hito napakyas gud. Pananglitan han 1912, hi Guglielmo Marconi, an nakaimbento han wireless nga telegrapo, nagtagna: “An pag-abot han wireless era magwawara han posibilidad han girra.” Ngan usa nga representante han Decca Record Company nagtoo nga an mga musikero nga naggigitara diri magigin sikat salit waray niya karawata an Beatles han 1962.

Damu an nakonsulta ha espiritismo basi hibaroan an tidaraon. May mga namimiling hin sagdon tikang ha mga astrologo ngan ha horoscope nga regular nga bahin han damu nga barasahon. An iba nakonsulta ha mga parapanigo o saykik nga gintotoohan nga “nakakabasa” han tidaraon pinaagi han tarot card, numero, o linya han palad.

Ha pangalimbasog nga hibaroan an tidaraon, an iba ha kadaan nga panahon nagkonsulta hin mga orakulo—padi nga lalaki ngan babaye nga naghahatag hin impormasyon tikang ha dios nga ira kuno ginrirepresentaran. Pananglitan, gintotoohan nga hi Hadi Croesus han Lydia nagpadara hin marahalon nga regalo ha orakulo ha Delphi, Gresya, sugad nga kabalyo basi hibaroan an magigin resulta kon makig-away hiya kontra kan Ciro han Persia. An orakulo nagsiring nga mabubungkag an “usa nga daku nga imperyo” kon makig-away hiya kontra kan Ciro. Tungod kay nakasiguro nga magdadaog hiya, nakig-away hi Croesus, kondi an daku nga imperyo nga napirde amo an iya imperyo!

An waray klaro nga tagna han orakulo waray gud pulos. Puydi sabuton nga husto an iya tagna tungod kay mahimo magdaog an bisan hin-o. Nag-antos gud hi Croesus tungod han diri husto nga impormasyon nga nagresulta han iya kapirdihan. Yana nga panahon, diri na ba napapakyas an mga nakonsulta ha popular nga pamaagi han panagna?