An Dios waray ginpapaurog ngan karuyag niya bendisyonan an ngatanan nga tawo.

An Dios nagsaad ha propeta nga hi Abraham nga “an ngatanan nga pamilya ha tuna bibendisyonan gud pinaagi ha [iya].”​—Genesis 12:3.

Ano an aton mahibabaroan hini? Hinigugma gud kita han Dios ngan karuyag niya nga bendisyonan an ngatanan nga pamilya​—kalalakin-an, kababayin-an, ngan kabataan—​nga nasugot ha iya.

An Dios maloloy-on ngan ginbibendisyonan niya adton nangangalimbasog nga makilala hiya.

An Makagarahum-ha-ngatanan naghatag hin gahum kan propeta Moises ha paghimo hin urusahon nga mga milagro. Bisan pa hito, hi Moises nag-ampo: “Ipahibaro ha akon an imo mga dalan, basi makilala ko ikaw ngan padayon nga makarawat an imo pag-uyon.” (Exodo 33:13) Nalipay an Dios ha hangyo ni Moises salit ginbuligan hiya han Dios nga mas masabtan ngan mahibaroan an Iya mga dalan ngan mga kalidad. Pananglitan, nahibaroan ni Moises nga an Maglalarang “usa nga Dios nga maloloy-on ngan mapinairon.”​—Exodo 34:6, 7.

Ano an aton mahibabaroan hini? Karuyag han Dios nga bendisyonan kita tanan​—kalalakin-an, kababayin-an, ngan kabataan—​kon mangangalimbasog kita nga mas makilala hiya. Iginpakita niya ha Kasuratan kon paonan-o hiya sisingbahon ngan karuyag gud niya nga makarawat naton an iya pag-uyon ngan bendisyon.

Makakarawat naton an waray kataposan nga bendisyon han Dios kon kikilalahon ta hi Jesus ngan pag-aadman an iya mga ginhimo ngan gintutdo.

Mababasa ha Pulong han Dios an damu nga detalye ha kinabuhi ngan katutdoan ni Jesus. Gintagan hiya han Dios hin gahum ha paghimo hin damu nga milagro, sugad han pagtambal ha buta, bungol, ngan piay. Nagbanhaw pa ngani hiya hin patay. Pinaagi hito, iginpakita ni Jesus an mga bendisyon nga hirani na ihatag han Dios ha ngatanan nga tawo. Iginsaysay niya kon paonan-o kita makakapahimulos hito nga mga bendisyon: “Nangangahulogan ini hin kinabuhi nga waray kataposan, an ira padayon nga pagkilala ha imo, an amo la nga tinuod nga Dios, ngan ha iya nga imo ginsugo, hi Jesu-Kristo.”​—Juan 17:3.

Hi Jesus mapinairon, malumo, ngan buotan. An kalalakin-an, kababayin-an, kabataan, ngan mga lagas nandaop ha iya tungod hinin mahigugmaon niya nga imbitasyon: “Mahibaro kamo tikang ha akon, kay malumo ako ngan mapainubsanon an kasingkasing, ngan marirepreskohan kamo.” (Mateo 11:29) Diri pariho ha iba ha iya panahon nga ginmiminos an kababayin-an, buotan hiya ha kababayin-an ngan gintratar hira nga may dignidad ngan respeto.

Ano an aton mahibabaroan hini? Hi Jesus nagpakita hin daku nga gugma ha mga tawo ngan hin maopay nga susbaranan kon paonan-o naton tatrataron an usa kag usa.

An Baraan nga Kasuratan nagtututdo nga “ha pagkamatuod, usa la an aton Dios” ngan hi Jesu-Kristo mapainubsanon nga mensahero han Dios. (1 Corinto 8:6) Hi Jesus matin-aw nga nagsiring nga an Dios labaw ha iya ngan ginsugo hiya han Dios nganhi ha tuna.​—Juan 11:41, 42; 14:28. *