Nahinunumdom ka ba han mahipakulob ka han bata ka pa? Bangin nasamad ka o napanggasan. Nahinunumdoman mo pa ba kon paonan-o ka ginliaw han imo nanay? Bangin ginlimpyohan niya an imo samad ngan ginbutangan ito hin bendahe. Nagtangis ka, pero an iya nakakaliaw nga mga pulong ngan hangkop nakapaopay han imo pamati. Hito nga panahon, masayon la makuha an pagliaw nga imo ginkikinahanglan.

Pero samtang nagkakaedad kita, nagigin mas komplikado an kinabuhi. Nagtitikadaku an mga problema, ngan nagigin mas makuri bilngon an pagliaw. Makasurubo, an problema han adulto diri na nasusulbad han bendahe o hangkop han nanay. Tagda an pipira nga ehemplo.

• Inabat ka na ba hin kabaraka tungod han kawad-i hin trabaho? Hi Julian nasiring nga waray hiya makatoo nga ginpaiwas hiya ha trabaho, ngan nabaraka gud hiya. Hiya naghunahuna, ‘Paonan-o ako makakagtagana ha akon pamilya?’ ‘Kay ano daw la nga gintagad han kompanya nga waray na ako pulos bisan han pipira ko na ka tuig nga pagtrabaho ha ira?’

• Bangin inabat ka hin duro nga kasakit han magbulag kamo nga mag-asawa. “Han tigda nga ginbayaan ako han akon bana, 18 ka bulan an naglabay, nasubo gud ako. Baga hin nasamaran an akon kasingkasing,” siring ni Raquel. “Pisikal ngan emosyonal nga kasakit an akon inabat. Nahadlok gud ako.”

• Bangin may grabe ka nga sakit nga baga hin diri naoopay. Bangin may panahon nga naabat ka han gin-abat han patriarka nga hi Job nga nagsiring: “Ikinasusumo ko an akon kinabuhi; diri ako mabubuhi kanunay.” (Job 7:16) O bangin pariho an imo inaabat kan Luis nga sobra 80 anyos. Hiya nagsiring: “Usahay, baga hin naghuhulat na la ako nga mamatay.”

• O bangin naghihingyap ka hin pagliaw tungod han kamatayon han usa nga hinigugma. “Han namatay an akon anak ha aksidente ha eruplano, diri ako makatoo hito ha siyahan,” siring ni Robert. “Katapos inabat ko an kasakit, an kasakit nga iginpapariho han Biblia ha hilaba nga espada nga iginbuno ha imo.”—Lucas 2:35.

Hira Robert, Luis, Raquel, ngan Julian nakabiling hin pagliaw bisan pa hiton nakakapanluya nga sitwasyon. Nakilala nira an Persona nga makakagtagana gud hito—waray iba kondi an Makagarahum-ha-ngatanan nga Dios. Paonan-o niya ginbubuhat ito? Itatagana ba liwat niya an pagliaw nga imo ginkikinahanglan?