PRINSIPYO HA BIBLIA: “Iginpapadayag han mga lurong an ira kasina, kundi an tawo nga may buot maaram magpailob ngan magpugong han iya kasina.”—Darahonon [Proberbios] 29:11, Maupay nga Sumat.

MGA KAPULSANAN: Kon ililista mo an ngatanan nga kapulsanan han pagpugong ha kalugaringon, magkikinahanglan ka hin damu hinduro nga papel! Ha aton pa la kahimsog, daku na an nahihimo hito. “An murayaw nga kasingkasing amo an kinabuhi [o, kahimsog] han unod,” siring han Biblia. Nasiring liwat ito nga “an malipayon nga kasingkasing maopay nga tambal.” (Proberbios 14:30; 17:22) Ha kabaliktaran, iginpapakita han pagsaliksik nga an mga tawo nga madagmit masina ngan makiawayon daku an posibilidad nga magkasakit, labi na ha kasingkasing. Syempre, an kapulsanan han pagpugong ha kalugaringon labaw pa kay ha pisikal nga kahimsog.

Hi Cassius nga mga 30 anyos, nagsiring: “Hadto, putong ako ngan mahilig makigrasonay, ngan agsob ako makabiling hin away. Haros waray ako pagtahod ha akon kalugaringon. Kondi nagbag-o ito ngatanan han nagtikang ako pag-aplikar han mga prinsipyo ha Biblia. Nahibaro ako pagpugong han akon kasina ngan nakultibar ko an pagin mapainubsanon ngan pagin mapinasayloon. Kon waray ako magbag-o, bangin priso na ako yana. Oo, baga hin gintalwas ako tikang ha kamatayon!”