Tungod kay libre naton nga iginpapanaltag an aton basado ha Biblia nga mga publikasyon, may mga naghuhunahuna nga puydi an pagkopya ngan pag-post hito ha iba nga website o ha social media. Kondi, an pagbuhat hito nagtatalapas han Mga Kondisyon ha Paggamit * han aton mga website ngan nagriresulta ha damu nga problema. Sugad han klaro nga ginsisiring hito nga mga Kondisyon, waray bisan usa an gintutugotan nga “mag-post hin artwork, elektroniko nga mga publikasyon, mga trademark, musika, retrato, video, o mga artikulo tikang hini nga website ngadto ha Internet (ha bisan ano nga website, file-sharing site, video-sharing site, o social network).” Kay ano nga importante an sugad nga restriksyon?

An ngatanan nga materyal ha aton mga website protektado hin copyright. Ginagamit han mga apostata ngan han iba pa nga parakontra ha ira mga website an aton mga publikasyon basi isimang an mga Saksi ni Jehova ngan an iba. Ini nga mga website may mga materyal nga gindisenyo basi magkaada pagruhaduha an mga magbarasa. (Sal. 26:4; Prob. 22:5) Ginagamit han iba an aton mga publikasyon o an aton jw.org nga logo ha mga adbertisment, ha mga produkto nga iginbabaligya, ngan ha mga app ha gadyet. Tungod kay may-ada kita copyright ngan trademark, may-ada kita legal nga basihan nga igdiri ito nga sayop nga paggamit. (Prob. 27:12) Pero kon papasagdan naton an mga tawo, bisan an aton kabugtoan, ha pag-post ha iba nga website hin mga materyal tikang ha aton mga website o ha paggamit han jw.org nga trademark ha ira mga iginbabaligya nga produkto, bangin diri suportaran han mga korte an aton pangalimbasog nga  did-an an mga parakontra ngan mga negosyante ha pagbuhat hito.

Peligroso an pag-download han aton mga publikasyon ha bisan diin labot la ha jw.org. “An matinumanon ngan maaramon nga uripon” la an gintaporan ni Jehova ha pagtagana hin espirituwal nga pagkaon. (Mat. 24:45) An www.dan124.com, tv.dan124.com, ngan wol.dan124.com amo la an opisyal nga mga website nga ginagamit hini nga “uripon” ha pagtagana hin espirituwal nga pagkaon. Ngan tulo la an aton opisyal nga app—JW Language^®, JW Library^®, ngan JW Library Sign Language^®. Makakatapod kita nga ini nga mga website ngan app waray mga adbertisment o impluwensya tikang ha kalibotan ni Satanas. Kon an espirituwal nga pagkaon tikang na ha iba nga surok, diri kita makakasiguro nga waray ito bag-oha o mahugawi.—Sal. 18:26; 19:8.

Dugang pa, an pag-post han aton mga publikasyon ha mga website diin puydi magkomento an usa maghahatag hin higayon ha mga apostata ngan iba pa nga parakontra nga dauton an organisasyon ni Jehova. May pipira nga kabugtoan nga nadadani nga umapi ha mga debate ha Internet, nga nagriresulta la ha dugang nga pagpasipara ha ngaran ni Jehova. An mga paghisgot pinaagi ha Internet diri angayan nga lugar ha ‘pagtutdo ha mga rebelyoso’ ha malumo nga paagi. (2 Tim. 2:23-25; 1 Tim. 6:3-5) Naobserbaran liwat nga may ginhimo nga peke nga mga account ha social media ngan mga website nga nakangaran ha organisasyon, ha Nagmamando nga Lawas, ngan ha tagsa nga membro hito. Kondi, an mga membro han Nagmamando nga Lawas waray personal nga website o account ha bisan ano nga social media.

An paggiya ha mga tawo ha jw.org nabulig ha pagpasamwak han “maopay nga sumat.” (Mat. 24:14) An mga website ngan app nga igintatagana ha aton basi magamit ha aton ministeryo padayon nga ginpapaopay. Karuyag naton nga mapahimulosan ito han ngatanan. Salit, sugad han ginsisiring ha Mga Kondisyon ha Paggamit, mahimo ka magpadara hin elektroniko nga kopya o hin link han materyal nga makikita ha jw.org gamit an e-mail. Pinaagi ha paggiya ha interesado nga mga tawo ha aton opisyal nga mga website, ginigiyahan naton hira ngadto ha amo la nga tinuod nga surok han espirituwal nga pagkaon, “an matinumanon ngan maaramon nga uripon.”