1. Ano an nakikita ni Jehova ha iya katawohan?

HI Jehova nga Dios “nalilipay ha iya katawohan.” (Sal. 149:4) Nakakapalipay gud ito ha aton! Nakikita ni Jehova an aton mag-opay nga kalidad; nakikita liwat niya an aton potensyal ngan ginbubuligan kita niya nga magin iya sangkay. Kon magpapabilin kita nga matinumanon ha iya, magigin duok hiya ha aton ha kadayonan!​—Juan 6:44.

2. Kay ano nga an iba nakukurian tumoo nga hinigugma hira ni Jehova?

² An iba bangin magsiring, ‘Maaram ako nga hinigugma ni Jehova an iya katawohan sugad nga grupo, pero paonan-o ako makakasiguro nga hinigugma niya ako?’ Kay ano nga bangin maipakiana ito han usa? Hi Oksana * nga nakaeksperyensya hin magraot nga panhitabo han bata pa, nagsiring: “Nalipay gud ako han nagpabawtismo ako ngan nagpayunir. Pero paglabay hin 15 ka tuig, binalik ha akon hunahuna an magraot nga nahitabo ha akon ha naglabay. Naghunahuna ako nga diri na ako gin-uuyonan ni Jehova ngan diri ako angayan han iya gugma.” Hi Yua nga payunir nga sister nga nakaeksperyensya liwat hin magraot nga panhitabo han bata pa, nagsiring: “Igindedikar ko an akon kinabuhi kan Jehova kay karuyag ko nga mapalipay hiya. Pero maaram ako nga diri gud niya ako hihigugmaon.”

3. Ano an aton hihisgotan hini nga artikulo?

³ Pariho han duha nga matinumanon nga sister nga gin-unabi pa la, sigurado nga hinigugma mo gud hi Jehova, pero bangin nagruruhaduha ka nga hinigugma ka niya. Kay ano nga kinahanglan magin kombinsido ka nga hinigugma ka gud niya? Ngan ano  an makakabulig ha imo kon nagkakaada ka negatibo nga panhunahuna? Hisgotan naton an mga baton hito.

4. Kay ano nga delikado an pagruhaduha nga hinigugma kita ni Jehova?

⁴ An gugma usa nga makusog nga pwersa nga nagpapagios ha aton. Kon kombinsido kita nga hinigugma ngan ginbubuligan kita ni Jehova, mapapagios kita nga mag-alagad ha iya ha bug-os nga kasingkasing bisan pa han mga problema. Ha luyo nga bahin, kon nagruruhaduha kita nga hinigugma kita han Dios, “magigin gutiay gud an [aton] kusog.” (Prob. 24:10) Ngan kon manluya kita ngan diri na tumoo nga hinigugma kita han Dios, masayon la kita nga madadaog ha mga pag-atake ni Satanas.​—Efe. 6:16.

5. Ano an nahitabo ha pipira nga nagruhaduha nga hinigugma hira han Dios?

⁵ May matinumanon nga mga Kristiano yana nga nanluya ha espirituwal tungod han pagruhaduha. An tigurang nga hi James, nagsiring: “Bisan kon nag-aalagad ako ha Bethel ngan nag-i-enjoy ha akon ministeryo ha kongregasyon nga iba an yinaknan, naghunahuna la gihapon ako kon ginkakarawat gud ba ni Jehova an akon mga sakripisyo. Makausa, nagruhaduha pa ngani ako kon ginpapamatian ba ni Jehova an akon mga pag-ampo.” Hi Eva nga nag-aalagad liwat hin bug-os-panahon, nagsiring: “Nahibaroan ko nga delikado an pagruhaduha nga hinigugma kita ni Jehova kay maaapektohan hito an ngatanan mo nga ginbubuhat ha pag-alagad. Maaapektohan hito an imo kadasig ha espirituwal nga mga butang ngan mawawara an imo kalipay ha pag-alagad kan Jehova.” Hi Michael nga regular payunir ngan tigurang, nagsiring, “Kon diri ka natoo nga hinigugma ka han Dios, ig-aanod ka pahirayo ha iya.”

6. Ano an kinahanglan naton buhaton kon nagtitikang na kita magruhaduha nga hinigugma kita han Dios?

⁶ Ito nga mga eksperyensya nagpapakita nga nakakadaot gud ha espirituwal an negatibo nga panhunahuna. Pero ano an angay naton buhaton kon nagtitikang na kita magruhaduha nga hinigugma kita han Dios? Kinahanglan wad-on dayon naton ito! Paghangyo kan Jehova nga buligan ka nga iton ‘nakakapabaraka nga mga panhunahuna’ masaliwnan han ‘kamurayawan han Dios nga magbabantay han imo kasingkasing ngan panhunahuna.’ (Sal. 139:23; Fil. 4:6, 7) Ngan hinumdumi, diri la ikaw an nakakaeksperyensya hito. May matinumanon nga mga kabugtoan liwat nga nangangalimbasog nga atohan an negatibo nga mga pag-abat. Bisan an  mga surugoon ni Jehova han naglabay nakaeksperyensya liwat hin sugad hito. Tagda kon ano an aton mahibabaroan ha ehemplo ni apostol Pablo.

7. Ano nga mga problema an gin-atubang ni Pablo?

⁷ Nabubug-atan ka ba usahay tungod han imo damu nga responsabilidad ngan nakukurian ka nga buhaton ito ngatanan? Kon oo, masasabtan mo hi Pablo. Nabaraka hiya, diri la para ha usa nga kongregasyon, kondi para “ha ngatanan nga kongregasyon.” (2 Cor. 11:23-28) May maiha ka na ba nga sakit nga tungod hito, diri ka na nagigin malipayon? Nakaeksperyensya liwat hi Pablo hin “tunok ha unod” nga maiha niya nga gin-inantos, posible nga usa ito nga sakit ngan karuyag gud niya nga mawara na ito. (2 Cor. 12:7-10) Nanluluya ka ba tungod han imo mga kaluyahan? May mga panahon nga ito liwat an inabat ni Pablo. Nagsiring pa ngani hiya nga ‘kairo niya nga tawo’ tungod han iya padayon nga pakig-away ha iya mga kaluyahan.​—Roma 7:21-24.

8. Ano an nakabulig kan Pablo nga makapailob bisan pa han iya mga problema?

⁸ Bisan pa han iba-iba nga pagsari ngan nakakapanluya nga mga sitwasyon, padayon nga nag-alagad hi Pablo kan Jehova. Ano an nakahatag ha iya hin kusog basi mabuhat ito? Bisan kon maaram gud hiya han iya mga kaluyahan, may-ada hiya marig-on nga pagtoo ha lukat. Maaram liwat hiya han saad ni Jesus nga an ‘bisan hin-o nga nagpapakita hin pagtoo [kan Jesus] magkakaada kinabuhi nga waray kataposan.’ (Juan 3:16; Roma 6:23) Oo, nagpakita gud hi Pablo hin pagtoo ha lukat. Kombinsido hiya nga andam hi Jehova magpasaylo bisan hadton nakasala hin seryoso kon mabinasulon hira.​—Sal. 86:5.

9. Ano an aton mahibabaroan ha ginsiring ni Pablo ha Galacia 2:20?

⁹ May pagtoo liwat hi Pablo ha gahum han gugma han Dios nga iginpakita pinaagi han Kristo. (Basaha an Galacia 2:20.) Pansina an nagpapasarig nga mga pulong ha kataposan hito nga bersikulo. Hi Pablo nagsiring: “[An] Anak han Dios . . . nahigugma ha akon ngan nagtubyan han iya kalugaringon para ha akon.” Waray hunahunaa ni Pablo nga sobra hiya karaot salit diri hiya hihigugmaon han Dios. Waray hiya maghunahuna, ‘Maaram ako kon kay ano nga hinigugma ni Jehova an akon kabugtoan, pero posible nga diri niya ako hihigugmaon.’ Ginpahinumdoman ni Pablo an mga taga-Roma: “Samtang mga makasasala pa kita, an Kristo namatay para ha aton.” (Roma 5:8) Waray gud makakaulang han gugma ha aton han Dios!

10. Ano an aton mahibabaroan ha Roma 8:38, 39?

 ¹⁰ Basaha an Roma 8:38, 39. Maaram gud hi Pablo kon ano kakusog an gugma han Dios. Nagsurat hiya nga waray bisan ano nga “makakagbulag ha aton ha gugma han Dios.” Maaram hi Pablo nga nagin mapailubon gud hi Jehova ha nasud han Israel. Maaram liwat hiya kon paonan-o hiya ginpakitaan ni Jehova hin kalooy. Mahimo naton isumaryo an pangatadongan ni Pablo hini nga paagi, ‘Tungod kay iginpadara ni Jehova an iya mismo Anak basi mamatay para ha akon, may rason pa ba ako nga pagruhaduhaan an iya gugma?’​—Roma 8:32.

11. Bisan kon nakahimo hi Pablo hin mga sala sugad hadton mga gin-uunabi ha 1 Timoteo 1:12-15, kay ano nga sigurado hiya nga hinigugma hiya han Dios?

¹¹ Basaha an 1 Timoteo 1:12-15. Posible gud nga may mga panahon nga nasubo gud hi Pablo tungod han iya mga nabuhat ha naglabay. Nagsiring hiya nga hiya an “pinakamakasasala,” ngan diri ito urusahon! Antes hiya mahibaro han kamatuoran, gintimaraot gud niya an mga Kristiano ha iba-iba nga syudad; iya iginpapriso an pipira ha ira ngan gin-aprobaran niya an desisyon nga patayon an iba ha ira. (Buh. 26:10, 11) Naiimadyin mo ba an posible nga inaabat ni Pablo kon may nakikilala hiya nga batan-on nga Kristiano nga an mga kag-anak ginpatay tungod han iya pag-aprobar? Ginbasolan gud ni Pablo an iya mga sala, pero maaram hiya nga diri niya mababag-o an naglabay. Ginkarawat niya nga an Kristo namatay para ha iya, ngan may kompyansa nga nagsurat hiya: “Pinaagi han diri matupngan nga pagkabuotan han Dios nagin sugad ako hini.” (1 Cor. 15:3, 10) Ano an leksyon? Karawata nga an Kristo namatay para ha imo ngan tungod hito, nagin posible nga magkaada ka duok nga relasyon kan Jehova. (Buh. 3:19) An importante ha Dios amo an aton ginbubuhat yana ngan bubuhaton ha tiarabot, diri an mga sala nga aton nahimo ha naglabay, Saksi ni Jehova man kita hito nga panahon o diri.​—Isa. 1:18.

12. Paonan-o an 1 Juan 3:19, 20 makakabulig ha aton kon inaabat naton nga waray kita pulos o diri angay higugmaon?

 ¹² Kon ginhuhunahuna mo nga namatay hi Jesus basi mapasaylo an imo mga sala, bangin magsiring ka, ‘Inaabat ko nga diri ako takos kumarawat hiton presyoso nga regalo.’ Kay ano nga bangin abaton mo ito? An aton diri perpekto nga kasingkasing mahimo maglimbong ha aton, nga tungod hito abaton naton nga waray kita pulos o diri kita angay higugmaon. (Basaha an 1 Juan 3:19, 20.) Kon ito an aton inaabat, kinahanglan hinumdoman naton nga “an Dios mas daku kay ha aton kasingkasing.” An gugma ngan pagpasaylo han aton langitnon nga Amay mas makusog gud kay ha bisan ano nga negatibo nga pag-abat nga bangin aada ha aton kasingkasing. Kinahanglan kombinsihon naton an aton kalugaringon nga hinigugma kita ni Jehova. Basi mabuhat ito, kinahanglan naton pirme pag-adman an iya Pulong, mag-ampo pirme ha iya, ngan regular nga makiupod ha iya maunungon nga katawohan. Kay ano nga importante gud nga buhaton naton ini?

13. Paonan-o makakabulig ha aton an pag-aram han Pulong han Dios? (Kitaa liwat an kahon nga “ Kon Paonan-o Nakakabulig ha Ira an Pulong han Dios.”)

¹³ Pag-admi an Pulong han Dios kada adlaw, ngan mas makikita mo an damu nga mag-opay nga kalidad ni Jehova. Masasabtan mo nga hinigugma ka gud niya. An pagpamalandong han Pulong han Dios kada adlaw makakabulig ha imo nga makapanhunahuna hin mas maopay, ‘maitadong an mga butang’ ha imo hunahuna ngan kasingkasing. (2 Tim. 3:16) An tigurang nga hi Kevin nga hadto minos an iya pagkita ha iya kalugaringon, nagsiring, “An pagbasa ngan pagpamalandong han Salmo 103 nakabulig ha akon nga maitadong an akon panhunahuna ngan masabtan kon ano gud an panhunahuna ni Jehova mahitungod ha akon.” Hi Eva nga gin-unabi kanina, nagsiring: “Katatapos han bug-os nga adlaw, ginpapamalandong ko kon ano an panhunahuna ni Jehova ha mga butang. Tungod hito, nagigin murayaw ako ngan nagririg-on an akon pagtoo.”

14. Paonan-o makakabulig ha aton an pag-ampo?

¹⁴ Pag-ampo pirme. (1 Tes. 5:17) Basi magin marig-on an aton pakigsangkay ha usa nga tawo, importante an pirme pakig-istorya ha iya hin kinasingkasing. Aplikado liwat ito ha aton pakigsangkay kan Jehova. Kon iginsusumat naton ha iya ha pag-ampo an aton mga inaabat, ginhuhunahuna, ngan ginkakabarak-an, iginpapakita naton nga nasarig kita ha iya ngan maaram kita nga hinigugma kita niya. (Sal. 94:17-19; 1 Juan 5:14, 15) Hi Yua nga gin-unabi kanina, nagsiring: “Kon nag-aampo ako, an akon iginsusumat kan Jehova diri la an mga nahitabo ha akon ha bug-os nga adlaw. Iginsusumat ko liwat ha iya kon ano gud an akon inaabat. Salit hinay-hinay nga  nakilala ko hi Jehova, diri sugad nga manidyer han usa nga kompanya, kondi sugad nga Amay nga nahigugma gud ha iya mga anak.”​—Kitaa an kahon nga “ Nabasa Mo Na ba Ito?”

15. Paonan-o hi Jehova nagpapakita ha aton hin personal nga interes?

¹⁵ Pakig-upod ha maunungon nga kasangkayan; regalo hira ni Jehova. (San. 1:17) An aton Amay ha langit nagpapakita hin personal nga interes ha aton pinaagi ha pagtagana hin espirituwal nga pamilya nga “nahigugma ha ngatanan nga panahon.” (Prob. 17:17) Ha surat ni Pablo ha mga taga-Colosas, nag-unabi hiya hin mga Kristiano nga binulig ha iya ngan nagsiring hiya nga “naghahatag hira hin daku nga pagliaw” ha iya. (Col. 4:10, 11) Bisan hi Kristo Jesus nagkinahanglan han bulig han iya kasangkayan, mga anghel man o tawo, ngan iya gin-apresyar an bulig nga iya nakarawat.​—Luc. 22:28, 43.

16. Paonan-o makakabulig ha aton an maunungon nga kasangkayan basi magin mas duok kita kan Jehova?

¹⁶ Ginpapahimulsan mo ba hin bug-os an regalo ni Jehova nga maunungon nga kasangkayan? An pagsumat han aton mga kabaraka ha usa nga hamtong nga sangkay diri tigaman han pagin maluya; makakaprotektar ito ha aton. Pansina an ginsiring ni James nga gin-unabi kanina: “An duok nga pakigsangkay ha hamtong nga mga Kristiano daku gud nga bulig ha akon. Kon nadadaog ako han negatibo nga mga panhunahuna, inin presyoso nga kasangkayan mapailubon nga namamati ha akon ngan nagpapahinumdom nga hinigugma nira ako. Pinaagi ha ira, nakikita ko an gugma ngan pag-ataman ha akon ni Jehova.” Importante gud nga magkaada kita duok nga pakigsangkay ha aton kabugtoan ngan tipigan ito!

17-18. Kan kanay kita dapat mamati, ngan kay ano?

¹⁷ Karuyag ni Satanas nga diri na naton buhaton an tama. Karuyag niya nga hunahunaon naton nga diri kita hinigugma ni Jehova ngan diri kita angay talwason. Pero sugad han aton nahibaroan, diri gud ito tinuod.

¹⁸ Hinigugma ka ni Jehova. Presyoso ka ha iya. Kon susugton mo hiya, ‘magpapabilin [ka] ha iya gugma’ ha kadayonan, pariho kan Jesus. (Juan 15:10) Salit ayaw pamati kan Satanas o ha imo kasingkasing nga naghuhukom ha imo. Lugod, pamati kan Jehova nga nagkikita han mag-opay nga kalidad han kada tagsa ha aton. Magin kombinsido nga “nalilipay [hiya] ha iya katawohan,” upod ka na hito!