1. Kay ano nga ginlarang ni Jehova an kinabuhi?

MAY panahon hadto nga nag-uusahan la hi Jehova. Pero diri hiya masurub-on. Diri niya kinahanglan hin kaupod basi magin malipayon. Kondi karuyag han Dios nga magkaada hin kinabuhi an iba ngan magin malipayon liwat. Tungod han gugma, ginlarang ni Jehova an mga butang.​—Sal. 36:9; 1 Juan 4:19.

2. Ano an gin-abat ni Jesus ngan han mga anghel ha mga linarang ni Jehova?

² Una, naghimo hi Jehova hin iya igkasi-magburuhat. Katapos, pinaagi hini nga iya suhag nga Anak, “ginlarang an ngatanan nga iba pa nga butang,” upod na an minilyon nga mga anghel. (Col. 1:16) Nalipay gud hi Jesus ha pagbuhat kaupod han iya Amay. (Prob. 8:30) Ngan nalipay liwat an mga anak han Dios nga mga anghel. Nakita nira han ginhimo ni Jehova ngan han iya Eksperto nga Magburuhat nga hi Jesus, an kalangitan ngan an tuna. Paonan-o nira iginpakita an ira kalipay? “Nagtikang [hira] pagsinggit hin pagdayaw” han ginhimo an tuna, ngan sigurado nga padayon nga gindayaw nira hi Jehova han nakita nira an tagsa nga iya ginhimo, upod na an iya ultimo nga obra maestra, an mga tawo. (Job 38:7; Prob. 8:31) An tagsa hini nga iya ginhimo nagpapakita han gugma ngan kinaadman ni Jehova.​—Sal. 104:24; Roma 1:20.

3. Sumala ha 1 Corinto 15:21, 22, ano an nagin posible tungod han halad-lukat ni Jesus?

³ Katuyoan ni Jehova nga an mga tawo mabuhi ha waray kataposan ha maopay gud nga planeta nga iya ginhimo. Kondi, han nagrebelde hira Adan ngan Eva ha ira mahigugmaon nga Amay, sinulod an sala ngan kamatayon ha bug-os nga tuna. (Roma 5:12) Ano an ginbuhat ni Jehova? Iginsumat dayon niya kon paonan-o  niya tatalwason an katawohan. (Gen. 3:15) Katuyoan ni Jehova nga magtagana hin lukat basi magin posible para ha mga anak nira Adan ngan Eva nga magkaada kagawasan tikang ha sala ngan kamatayon. Pinaagi hito, matatagan niya hin oportunidad an tagsa nga tawo nga magdesisyon nga mag-alagad ha iya ngan makakarawat hin kinabuhi nga waray kataposan.​—Juan 3:16; Roma 6:23; basaha an 1 Corinto 15:21, 22.

4. Ano nga mga pakiana an hihisgotan naton hini nga artikulo?

⁴ Damu an nabangon nga pakiana mahitungod han saad han Dios nga pagbanhaw han mga patay. Pananglitan, paonan-o posible mahitabo an pamanhaw? Makikilala ba naton an aton mga hinigugma kon banhawon na hira? Ha ano nga mga paagi an pagkabanhaw maghahatag ha aton hin kalipay? Ngan paonan-o an pagpamalandong han pagkabanhaw magpaparig-on han aton apresasyon han gugma, kinaadman, ngan pagpailob ni Jehova? Hisgotan naton an tagsa hito nga mga pakiana.

5. Kay ano nga makakalaom kita nga diri durungan nga babanhawon an mga namatay?

⁵ Kon banhawon na ni Jehova an minilyon pinaagi han iya Anak, makakalaom kita nga diri hira durungan nga mababanhaw. Kay ano? Kay posible nga magin masamok kon tigda nga magdadamu an populasyon ha tuna. Ngan diri gud nagbubuhat hi Jehova hin bisan ano ha diri organisado nga paagi. Maaram hiya nga kinahanglan magin organisado an mga butang basi an mga tawo magkinabuhi nga mamurayawon. (1 Cor. 14:33) Makinaadmananon ngan mapailubon hi Jehova nga Dios han nagbuhat hiya kaupod hi Jesus ha pag-andam han tuna basi ukyan han tawo. Ha Usa ka Yukot ka Tuig nga Pagmando, ipapakita liwat ni Jesus ito  nga mga kalidad kon magbuhat na hiya upod han mga makakatalwas ha Armagedon ha pag-andam han tuna para ha mga babanhawon.

6. Sumala ha Buhat 24:15, hin-o an mga kaapi hadton babanhawon ni Jehova?

⁶ An pinakaimportante, an mga makakatalwas ha Armagedon kinahanglan magtutdo ha mga babanhawon mahitungod han Ginhadian han Dios ngan han mga sugo ni Jehova. Kay ano? Kay kadam-an hadton mga babanhawon “mga diri magtadong.” (Basaha an Buhat 24:15.) Kinahanglan nira maghimo hin damu nga pagbag-o basi makapahimulos han lukat han Kristo. Hunahunaa la an buruhaton nga nahiuupod ha pagtutdo han kamatuoran ha minilyon nga mga tawo nga waray hinbabaroan mahitungod kan Jehova. Usa-usa ba hira nga tututdoan, pariho han paagi han aton pag-Bible study yana? Ini ba nga mga bag-ohan itutoka ha mga kongregasyon ngan babansayon basi magtutdo ha sunod nga mga babanhawon? Kinahanglan kita maghulat basi hibaroan ito. Pero maaram gud kita nga ha kataposan han Usa ka Yukot ka Tuig nga Pagmando han Kristo, “an tuna mapupuno gud han kahibaro mahitungod kan Jehova.” (Isa. 11:9) Magkakaada gud kita damu nga makalilipay nga buruhaton ha sulod hin usa ka yukot ka tuig!

7. Kay ano nga an katawohan han Dios magkakaada hin simpatiya samtang gintututdoan nira an mga binanhaw?

⁷ Ha Usa ka Yukot ka Tuig nga Pagmando han Kristo, an ngatanan nga anak ni Jehova ha tuna kinahanglan maghimo hin mga pagbag-o basi mapalipay hiya. Salit hira ngatanan magkakaada hin simpatiya samtang ira ginbubuligan an mga binanhaw nga atohan an makasasala nga mga tendensya ngan magkinabuhi uyon ha mga suruklan ni Jehova. (1 Ped. 3:8) Waray ruhaduha nga adton mga binanhaw maruruyag magsingba kan Jehova upod han mapainubsanon nga katawohan niya, nga ‘mangangalimbasog [liwat] para ha ira katalwasan.’​—Fil. 2:12.

8. Kay ano nga makakalaom kita nga adton matapo ha mga binanhaw makakakilala ha ira mga hinigugma?

⁸ May pipira nga rason kon kay ano nga makakalaom kita nga an mga matapo ha mga binanhaw makakakilala ha ira mga hinigugma. Pananglitan, basado ha mga pagkabanhaw nga nahitabo na, baga hin lalarangon utro ni Jehova an mga tawo basi an ira hitsura, paagi han pagyakan, ngan paghunahuna pariho la gihapon han antes hira mamatay. Hinumdumi nga iginpariho ni Jesus an kamatayon ha pagkaturog ngan an pagkabanhaw iginpariho ha pagmata tikang ha pagkaturog. (Mat. 9:18, 24; Juan 11:11-13) Kon an mga tawo nagmamata tikang ha pagkaturog, an ira hitsura ngan an paagi han ira pagyakan pariho la gihapon han antes hira kinaturog, ngan nagpapabilin an ira memorya. Tagda an ehemplo ni Lazaro. Upat ka adlaw na hiya nga patay, salit an iya lawas nadudunot na. Pero han ginbanhaw hiya ni Jesus, nakilal-an dayon hiya han iya mga bugto, ngan klaro nga nahinumdoman hira ni Lazaro.​—Juan 11:38-44; 12:1, 2.

9. Kay ano nga an mga binanhaw diri dayon magkakaada perpekto nga hunahuna ngan lawas kabanhaw nira?

⁹ Hi Jehova nagsasaad nga ilarom han pagmando han Kristo, waray bisan usa nga masiring: “May sakit ako.” (Isa. 33:24; Roma 6:7) Salit, adton mga binanhaw magkakaada mahimsog nga panlawas. Pero diri dayon hira magigin perpekto. Kay kon perpekto na hira, bangin diri na hira makilal-an han ira mga hinigugma. Ha Usa ka Yukot ka Tuig nga Pagmando han Kristo, baga hin an ngatanan nga tawo hinay-hinay nga magigin perpekto. Ha kataposan la han usa ka yukot ka tuig ibabalik ni Jesus ha iya Amay an Ginhadian. Hito nga panahon, nahimo na han Ginhadian an ngatanan nga iginpapabuhat ni Jehova, upod na an paghimo ha mga tawo nga magin perpekto.​—1 Cor. 15:24-28; Pah. 20:1-3.

10. Ano an imo aabaton mahitungod han pagkabanhaw?

¹⁰ Imadyina kon ano an imo aabaton kon makita mo na utro an imo mga hinigugma. Magtatawa ka daw la o magtatangis tungod han kalipay? Magkakanta ka daw la hin mga pagdayaw ngadto kan Jehova? Usa nga butang an sigurado, maabat ka gud hin daku nga gugma para ha imo mahigugmaon nga Amay ngan ha iya diri makikalugaringon nga Anak tungod han maopay gud nga regalo nga pagkabanhaw.

11. Sumala ha mga pulong ni Jesus ha Juan 5:28, 29, ano an maieksperyensyahan hadton mga nagkikinabuhi uyon ha matadong nga mga suruklan han Dios?

¹¹ Imadyina an kalipay nga aabaton hadton mga binanhaw samtang ira ginhuhukas an daan nga personalidad ngan nagkikinabuhi uyon ha matadong nga mga suruklan han Dios. Adton maghihimo hini nga mga pagbag-o tutugotan nga mabuhi ha waray kataposan ha Paraiso. Pero adton mga nadiri magbag-o diri tutugotan han Dios nga padayon nga mabuhi ha Paraiso basi magpabilin an kamurayawan.​—Isa. 65:20; basaha an Juan 5:28, 29.

12. Ha ano nga paagi an ngatanan ha tuna bibendisyonan ni Jehova?

¹² Ha pagmando han Ginhadian, makikita han ngatanan nga katawohan han Dios nga tinuod gud an mga pulong ha Proberbios 10:22 nga nasiring: “An bendisyon ni Jehova an nagpapariko ha usa nga tawo, ngan diri Niya ito gindudugangan hin kasakit.” Ha bulig han espiritu ni Jehova, an katawohan han Dios magigin riko ha espirituwal, karuyag sidngon, mas magtitikapariho gud hira ha Kristo ngan magigin perpekto. (Juan 13:15-17; Efe. 4:23, 24) Kada adlaw, magigin mas mahimsog hira ngan magigin mas maopay nga tawo. Magigin makalilipay gud ito nga kinabuhi! (Job 33:25) Pero, paonan-o an pagpamalandong han pagkabanhaw makakabulig yana ha imo?

13. Uyon ha Salmo 139:1-4, paonan-o iginpapakita han pagkabanhaw nga kilala gud kita ni Jehova?

¹³ Sugad han ginhisgotan na, kon banhawon ni Jehova an mga tawo, ibabalik niya an ira mga memorya ngan an ira mga personalidad. Hunahunaa la kon ano an iginpapasabot hito. Hi Jehova nahigugma gud ha imo salit iya ginkikita ngan ginhihinumdom an ngatanan nga imo ginhuhunahuna, gin-aabat, ginsisiring, ngan ginbubuhat. Salit kon babanhawon ka niya, masayon la niya nga maibabalik an imo mga memorya, batasan, ngan personalidad. Maaram hi Hadi David nga interesado gud hi Jehova ha kada tagsa ha aton. (Basaha an Salmo 139:1-4) Ano an aton inaabat kon nasasabtan naton nga kilala gud kita ni Jehova?

14. Ano an angay naton abaton kon ginpapamalandong naton kon mationan-o kita kakilala ni Jehova?

¹⁴ Kon ginpapamalandong naton kon mationan-o kita kakilala ni Jehova, diri kita angay mabaraka. Kay ano? Hinumdumi nga hinigugma gud kita ni Jehova. Presyoso gud ha iya an kada tagsa ha aton. Gintitigamnan gud niya an aton mga eksperyensya ha kinabuhi nga nakakaimpluwensya ha aton. Nakakaliaw gud ito! Diri gud naton angay abaton nga nag-uusahan kita. Kada minuto, kaupod naton hi Jehova, nga nagbibiling hin oportunidad ha pagbulig ha aton.​—2 Cron. 16:9.

15. Paonan-o an pagkabanhaw nagpapamatuod han kinaadman ni Jehova?

¹⁵ An tarhog nga kamatayon gamhanan nga armas. Ginagamit ito hadton mga kontrolado ni Satanas basi pwersahon an mga tawo nga magtraydor ha ira kasangkayan o isalikway an ira mga gintotoohan. Pero diri kita nira mapipirit nga buhaton ito. Maaram kita nga kon patayon kita han aton mga kaaway, babanhawon kita ni Jehova. (Pah. 2:10) Kombinsido kita nga anoman an ira buhaton, diri ito makakagbulag  ha aton tikang kan Jehova. (Roma 8:35-39) Urusahon gud an kinaadman nga iginpapakita ni Jehova pinaagi ha paghatag ha aton han paglaom nga pagkabanhaw! Tungod hito, diri kita nahahadlok ha mga nasuporta kan Satanas kon gintatarhog kita nga papatayon kita nira. Nagkakaada liwat kita hin kaisog nga magin maunungon kan Jehova.

16. Ano an kinahanglan mo ipakiana ha imo kalugaringon, ngan paonan-o an mga baton makakabulig ha imo nga mahibaroan kon mationan-o kadaku an imo pagsarig kan Jehova?

¹⁶ Kon tarhugon ka han mga kaaway ni Jehova nga papatayon ka nira, masarig ka ba nga babanhawon ka ni Jehova? Paonan-o mo mahibabaroan nga masarig ka ha iya hito nga takna? An usa nga paagi amo an pagpakiana ha imo kalugaringon, ‘An gudti ba nga mga desisyon nga akon ginhihimo kada adlaw nagpapakita nga nasarig ako kan Jehova?’ (Luc. 16:10) An usa pa nga pakiana, ‘An akon ba paagi han pagkinabuhi nagpapamatuod nga nasarig ako ha saad ni Jehova nga itatagana an akon materyal nga panginahanglan kon unahon ko an iya Ginhadian?’ (Mat. 6:31-33) Kon oo an imo baton hito nga mga pakiana, ginpapamatud-an mo nga nasarig ka kan Jehova, ngan magigin andam ka ha bisan ano nga pagsari nga maabot ha imo.​—Prob. 3:5, 6.

17. (a) Paonan-o iginpapakita han pagkabanhaw nga mapailubon hi Jehova? (b) Paonan-o naton maipapakita an aton apresasyon ha pagpailob ni Jehova?

¹⁷ May itinanda nga adlaw ngan oras hi Jehova kon san-o niya tatapuson inin daan nga sistema. (Mat. 24:36) Diri hiya mawawad-an hin pagpailob ngan diri hiya magios antes hito nga panahon. Karuyag gud niya banhawon an mga patay, pero mapailubon hiya. (Job 14:14, 15) Naghuhulat hiya nga umabot an husto nga panahon ha pagbanhaw ha ira. (Juan 5:28) May mag-opay gud kita nga rason nga apresyaron an pagpailob ni Jehova. Hunahunaa la: Tungod kay mapailubon hi Jehova, damu nga tawo, upod na kita, an nagkaada panahon nga “magbasol.” (2 Ped. 3:9) Karuyag ni Jehova nga magkaada kinabuhi nga waray kataposan an mas damu nga tawo tubtob nga posible. Salit ipakita naton nga gin-aapresyar naton an iya pagpailob. Paonan-o? Pinaagi han maduruto nga pagbiling hadton “may husto nga disposisyon basi magkaada kinabuhi nga waray kataposan” ngan buligan hira nga higugmaon hi Jehova ngan mag-alagad ha iya. (Buh. 13:48) Pinaagi hito, magpapahimulos hira han pagpailob ni Jehova, pariho ha aton.

18. Kay ano nga kinahanglan magin mapailubon kita ha iba?

¹⁸ Mapailubon nga maghuhulat hi Jehova tubtob  nga matapos an usa ka yukot ka tuig antes hiya maglaom nga magigin perpekto na kita. Samtang waray pa ito nga panahon, andam hi Jehova nga palabyon an aton mga sala. Salit sigurado nga may rason kita nga kitaon an mag-opay nga kalidad han iba ngan magin mapailubon ha ira. Tagda an ehemplo han usa nga sister nga an asawa nagkaada grabe nga mga kabaraka ngan waray na umatender ha mga katirok. “Makuri gud ini para ha akon,” siring niya. “An amon kinabuhi tigda nga nagbag-o ngan waray na namon mahimo an amon mga plano.” Pero bisan pa hito ngatanan, inin mahigugmaon nga sister mapailubon gud ha iya asawa. Sinarig hiya kan Jehova ngan waray gud hiya humunong. Pariho kan Jehova, waray hiya magpokus ha problema, lugod nagpokus hiya ha mag-opay nga butang mahitungod ha iya asawa. Hiya nagsiring, “An akon asawa may mag-opay nga kalidad, ngan nangangalimbasog hiya nga hinay-hinay nga makarekober.” Importante gud nga magin mapailubon kita ha aton mga kapamilya o kakongregasyon nga nangangalimbasog nga malamposan an magkuri nga pagsari!

19. Ano an kinahanglan naton magin determinasyon?

¹⁹ Hi Jesus ngan an mga anghel malipayon gud han ginhimo an tuna. Pero imadyina an kalipay nga ira aabaton nga makita an tuna nga puno hin perpekto nga mga tawo, nga nahigugma ngan nag-aalagad kan Jehova. Imadyina an kalipay nga aabaton hadton mga mahingangadto ha langit basi magmando kaupod han Kristo kon makita na nira nga an katawohan nagpapahimulos han ira buruhaton. (Pah. 4:4, 9-11; 5:9, 10) Ngan imadyina la an kinabuhi kon an mga luha han kasakit saliwnan na han mga luha han kalipay, kon an sakit, kasubo, ngan kamatayon mawara na ha kadayonan. (Pah. 21:4) Tubtob hito nga panahon, magin determinado nga subaron an imo mahigugmaon, makinaadmananon, ngan mapailubon nga Amay. Kon bubuhaton mo ito, magpapabilin ka nga malipayon, anoman nga mga pagsari an imo atubangon. (San. 1:2-4) Mapasalamaton gud kita ha saad ni Jehova nga “magkakaada pagkabanhaw”!​—Buh. 24:15.