1. Ano an ginsiring ni David mahitungod ha pagkamapainubsanon ni Jehova?

MASISIRING gud ba naton nga mapainubsanon hi Jehova? Oo. Makausa, hi David nagsiring: “Imo iginhahatag ha akon an imo taming han katalwasan, ngan an imo pagkamapainubsanon nakakahimo ha akon nga bantogan.” (2 Sam. 22:36; Sal. 18:35) Han ginsurat ini ni David, bangin ginhihinumdom niya an panahon nga kinadto hi propeta Samuel ha balay han iya tatay basi dihogan an sunod nga hadi han Israel. Hi David an puto ha walo nga kalalakin-an, pero hiya an ginpili ni Jehova basi sumaliwan kan Hadi Saul.​—1 Sam. 16:1, 10-13.

2. Ano an aton hihisgotan hini nga artikulo?

² Sigurado nga mauyon hi David ha ginsiring han usa nga salmista mahitungod kan Jehova: “Natamod hiya basi kitaon an langit ngan an tuna, ginbabangon an ubos tikang ha tapotapo. Gin-aalsa niya an pobre . . . basi palingkuron hiya upod han mga dungganon.” (Sal. 113:6-8) Hini nga artikulo, hihisgotan anay naton an pipira nga importante nga leksyon mahitungod ha pagkamapainubsanon pinaagi ha pagrepaso han mga higayon nga iginpakita ni Jehova ini nga kalidad. Katapos, uusisahon naton kon ano an aton mahibabaroan kanda Hadi Saul, propeta Daniel, ngan Jesus mahitungod hini nga kalidad.

3. Paonan-o kita gintatratar ni Jehova ngan ano an iginpapakita hito?

³ Iginpapakita ni Jehova nga mapainubsanon hiya ha paagi han iya pagtratar ha iya diri perpekto nga mga magsiringba. Diri la kay ginkakarawat niya an aton pagsingba kondi ginkukonsiderar liwat kita niya sugad nga iya kasangkayan. (Sal. 25:14) Basi magin posible an pakigsangkay ha iya, iginhatag niya an iya Anak sugad nga halad para ha aton mga sala. Maloloy-on ngan mapinairon gud hi Jehova!

4. Ano an iginhatag ha aton ni Jehova, ngan kay ano?

 ⁴ Hunahunaa an usa pa nga paagi nga iginpapakita ni Jehova nga mapainubsanon hiya. Sugad nga Maglalarang, puydi unta kita himoon ni Jehova nga waray abilidad ha pagpili kon ano an bubuhaton naton ha aton kinabuhi. Pero waray niya ito buhata. Ginhimo kita niya uyon ha iya dagway ngan gintagan kita hin kagawasan ha pagbuot. Bisan kon gutiay ngan maluya kita kon ikompara ha iya, karuyag niya nga kinasingkasing nga mag-alagad kita ha iya tungod kay hinigugma naton hiya ngan maaram kita nga mapulsanon an pagsunod ha iya. (Deut. 10:12; Isa. 48:17, 18) Mapasalamaton gud kita nga mapainubsanon hi Jehova!

5. Paonan-o kita gintututdoan ni Jehova nga magin mapainubsanon? (Kitaa an retrato ha kobre.)

⁵ Gintututdoan kita ni Jehova nga magin mapainubsanon ha paagi han iya pagtratar ha aton. Hi Jehova an pinakabaltok nga Persona ha uniberso. Bisan pa hito, andam hiya ha pagkarawat hin suhestyon tikang ha iba. Pananglitan, ginpabulig ni Jehova an iya Anak ha paghimo han tanan nga butang. (Prob. 8:27-30; Col. 1:15, 16) Ngan bisan kon makagarahum-ha-ngatanan hi Jehova, nahatag hiya hin awtoridad ha iba. Pananglitan, ginpili niya hi Jesus sugad nga Hadi han Ginhadian, ngan tatagan Niya hin awtoridad an 144,000 nga mga tawo basi magin igkasi-magmarando ni Jesus. (Luc. 12:32) Syempre, ginbansay ni Jehova hi Jesus basi magin Hadi ngan Hitaas nga Saserdote. (Heb. 5:8, 9) Ginbabansay liwat niya adton mga igkasi-magmarando ni Jesus ha pagtuman han ira toka. Pero diri niya kukontrolon kon paonan-o nira bubuhaton an tagsa nga detalye han ira toka. Lugod, nasarig hiya nga bubuhaton nira an iya kaburut-on.​—Pah. 5:10.

6-7. Ano an aton mahibabaroan ha aton langitnon nga Amay ha paghatag hin awtoridad ha iba?

⁶ Kon an aton langitnon nga Amay​—nga diri nagkikinahanglan hin bulig—​nahatag hin awtoridad ha iba, mas labi nga kinahanglan naton ito buhaton. Pananglitan, usa ka ba nga ulo han pamilya o tigurang ha kongregasyon? Sunda an susbaranan ni Jehova pinaagi ha paghatag hin toka  ha iba ngan ayaw kontrola kon paonan-o nira ito ginbubuhat. Kon ginsusubad mo hi Jehova, matatapos an buruhaton ngan mati-train mo liwat an iba ngan mabubuligan hira nga magkaada dugang nga kompyansa. (Isa. 41:10) Ano pa an mahibabaroan tikang kan Jehova hadton mga may awtoridad?

⁷ Iginpapakita han Biblia nga interesado hi Jehova ha opinyon han iya mga anak nga mga anghel. (1 Hadi 22:19-22) Mga kag-anak, paonan-o niyo masusunod an susbaranan ni Jehova? Kon angayan, aroa an opinyon han iyo mga anak kon paonan-o bubuhaton an usa nga toka. Ngan sunda an ira suhestyon, kon angayan.

8. Paonan-o nagin mapailubon hi Jehova kanda Abraham ngan Sarah?

⁸ Usa pa nga paagi nga iginpapakita ni Jehova nga mapainubsanon hiya amo an pagin mapailubon. Pananglitan, nagpapailob hi Jehova kon matinalahuron nga ginkukwestyon han mga nag-aalagad ha iya an iya mga desisyon. Namati hiya samtang iginsusumat ni Abraham an iya mga kabaraka mahitungod han Iya desisyon nga bungkagon an Sodoma ngan Gomorra. (Gen. 18:22-33) Ngan hinumdumi kon ano an reaksyon ni Jehova han nagtawa hi Sarah nga asawa ni Abraham ha iya saad nga magbuburod hiya bisan kon lagas na. Waray hiya masina kan Sarah. (Gen. 18:10-14) Lugod, gintratar niya hiya nga may dignidad.

9. Ano an mahibabaroan han mga kag-anak ngan mga tigurang tikang ha susbaranan ni Jehova?

⁹ Mga kag-anak ngan mga tigurang, ano an iyo mahibabaroan ha susbaranan ni Jehova? Ano an imo reaksyon kon ginkukwestyon han imo mga anak o han pipira ha kongregasyon an imo mga desisyon? Gintatadong mo ba dayon hira? O nangangalimbasog ka nga masabtan an ira panhunahuna? Sigurado nga nagpapahimulos an mga pamilya ngan mga kongregasyon kon ginsusubad hi Jehova hadton mga may awtoridad. Nahisgotan na naton kon ano an aton mahibabaroan mahitungod ha pagkamapainubsanon tikang ha susbaranan ni Jehova. Yana kitaon naton kon ano an aton mahibabaroan mahitungod ha pagkamapainubsanon tikang ha mga ehemplo nga nakarekord ha Pulong han Dios.

10. Paonan-o gin-gagamit ni Jehova an ehemplo han iba basi tutdoan kita?

¹⁰ Sugad nga aton “Harangdon nga Instruktor,” nagtatagana hi Jehova hin mga ehemplo ha iya Pulong basi tutdoan kita. (Isa. 30:20, 21) Nahibabaro kita kon ginpapamalandong naton an mga istorya ha Biblia mahitungod hadton nagpakita hin diosnon nga mga kalidad, upod na an pagkamapainubsanon. Nahibabaro liwat kita samtang aton gin-uusisa kon ano an nahitabo hadton waray makagpakita han sugad nga mga kalidad.​—Sal. 37:37; 1 Cor. 10:11.

11. Ano an aton mahibabaroan tikang ha maraot nga ehemplo ni Saul?

¹¹ Hunahunaa an nahitabo kan Hadi Saul. Ha tinikangan, mapainubsanon hiya. Maaram hiya han iya mga limitasyon ngan nag-alang pa ngani ha pagkarawat hin dugang nga responsabilidad. (1 Sam. 9:21; 10:20-22) Pero paglabay han panahon, nagin mapahitas-on hi Saul ngan nagbuhat hin mga butang nga waray hiya katungod. Nagtikang hiya magin sugad hito waray pag-iha tikang han nagin hadi hiya. Makausa, naubosan hiya hin pasensya samtang naghuhulat kan propeta Samuel. Imbes nga mapainubsanon nga sumarig kan Jehova nga magios hiya para ha iya katawohan, naghalad hi Saul hin halad nga sinunog bisan kon waray hiya katungod nga buhaton ito. Sugad nga resulta, nawara an pag-uyon ha iya ni Jehova ngan ha urhi, iginsalikway hiya sugad nga hadi. (1 Sam. 13:8-14) Maopay gud kon mahibabaro kita hin leksyon tikang hinin maraot nga ehemplo ngan likyan an pagbuhat hin mga butang nga waray kita katungod.

12. Paonan-o iginpakita ni Daniel an pagkamapainubsanon?

¹² Kabaliktaran han maraot nga ehemplo ni Saul, tagda an maopay nga ehemplo ni propeta  Daniel. Ha iya bug-os nga kinabuhi, nagpabilin nga mapainubsanon hi Daniel ngan pirme nangangaro hin giya kan Jehova. Pananglitan, han gin-gamit hiya ni Jehova basi ig-interpretar an inop ni Nabucodonosor, waray hiya magsiring nga nainterpretar adto niya tungod han iya kalugaringon nga abilidad. Lugod, mapainubsanon nga iginhatag niya kan Jehova an ngatanan nga kadayawan. (Dan. 2:26-28) Ano an leksyon? Kon naruyagan han kabugtoan an aton mga pahayag o kon may mag-opay kita nga eksperyensya ha ministeryo, kinahanglan ihatag naton kan Jehova an ngatanan nga kadayawan. Kinahanglan mapainubsanon nga karawaton naton nga diri naton mahihimo ini nga mga butang kon waray an bulig ni Jehova. (Fil. 4:13) Kon ginbubuhat naton ito, ginsusunod liwat naton an susbaranan ni Jesus. Paonan-o?

13. Ano an aton mahibabaroan mahitungod ha pagkamapainubsanon ha ginsiring ni Jesus ha Juan 5:19, 30?

¹³ Bisan kon hi Jesus perpekto nga Anak han Dios, sinarig hiya kan Jehova. (Basaha an Juan 5:19, 30.) Waray hiya man-agaw hin awtoridad ha iya langitnon nga Amay. An Filipos 2:6 nasiring nga “waray hiya maghunahuna nga man-agaw, karuyag sidngon, nga magin katupong hiya han Dios.” Sugad nga mapinasakupon nga Anak, maaram hi Jesus han iya mga limitasyon ngan ginrespeto an awtoridad han iya Amay.

14. Han may naghangyo kan Jesus hin usa nga butang nga waray hiya awtoridad ha paghatag, ano an iya ginbuhat?

¹⁴ Tagda an ginbuhat ni Jesus han dinaop ha iya an mga disipulo nga hira Santiago ngan Juan upod an ira nanay ngan naghangyo hin pribilehiyo nga waray awtoridad hi Jesus ha paghatag. Waray pag-alang nga nagsiring hi Jesus nga an iya la langitnon nga Amay an makakagdesisyon kon hin-o an malingkod ha iya too ngan ha iya wala ha Ginhadian. (Mat. 20:20-23) Iginpakita ni Jesus nga maaram hiya han iya mga limitasyon. Mapainubsanon hiya. Waray hiya magbuhat hin bisan ano nga waray igsugo ha iya ni Jehova. (Juan 12:49) Paonan-o naton masusunod an susbaranan ni Jesus?

15-16. Paonan-o naton maiaaplikar an sagdon han Biblia ha 1 Corinto 4:6?

¹⁵ Ginsusunod naton an susbaranan ni Jesus pinaagi ha pag-aplikar han sagdon han Biblia ha 1 Corinto 4:6. Ginsusumatan kita hito: “Ayaw niyo pasobrahi an mga butang nga nahisurat.” Salit kon gin-aaroan kita hin sagdon, diri naton karuyag ipirit an aton opinyon o igyakan dayon an siyahan naton nga nahuhunahuna. Lugod, kinahanglan naton gamiton an sagdon nga mababasa ha Biblia ngan ha aton mga publikasyon.  Hini nga paagi, ginkikilala naton an aton mga limitasyon. Mapainubsanon kita kon ginbubuhat naton ini kay iginpapakita naton nga nasasabtan gud naton nga mas maopay an sagdon ni Jehova kay han aton.​—Pah. 15:3, 4.

¹⁶ Labot pa ha pagpasidungog kan Jehova, may iba pa nga mag-opay nga rason nga magin mapainubsanon. Hisgotan naton yana kon paonan-o an pagin mapainubsanon ngan pagkilala han aton mga limitasyon mabulig ha aton nga magin malipayon ngan magkaada maopay nga relasyon ha iba.

17. Kay ano nga malipayon an mga tawo nga mapainubsanon ngan maaram han ira mga limitasyon?

¹⁷ Kon mapainubsanon kita ngan ginkikilala naton an aton mga limitasyon, posible nga magin mas malipayon kita. Kay ano? Kon maaram kita han aton mga limitasyon, magigin mapasalamaton ngan malipayon kita ha bisan ano nga bulig nga aton nakakarawat tikang ha iba. Pananglitan, hunahunaa han gintambal ni Jesus an napulo nga may leprosi. Usa la ha ira an binalik basi pasalamatan hi Jesus ha pagtambal ha iya han iya makangingirhat nga sakit. Maaram inin mapainubsanon nga tawo nga diri niya matatambal an iya kalugaringon kon waray an bulig ni Jesus. Salit mapasalamaton hiya han bulig nga iya nakarawat ngan gindayaw an Dios.​—Luc. 17:11-19.

18. Paonan-o an pagkamapainubsanon ngan pagkilala han aton mga limitasyon mabulig ha aton nga magkaada maopay nga relasyon ha iba? (Roma 12:10)

¹⁸ An mga tawo nga mapainubsanon ngan maaram han ira mga limitasyon kaurogan na nga may maopay nga relasyon ha iba ngan nagkakaada hin duok nga kasangkayan. Kay ano? Malipayon nga ginkikilala nira nga an iba may mag-opay nga kalidad ngan natapod hira ha ira. Adton mga mapainubsanon ngan maaram han ira mga limitasyon nalilipay kon naglalampos an iba ha mga toka nga ira nakakarawat, ngan ira dayon hira ginkukumendasyonan ngan ginpapasidunggan.​—Basaha an Roma 12:10.

19. Ano an pipira nga rason kon kay ano nga kinahanglan naton likyan an pagpahitaas?

 ¹⁹ Ha kabaliktaran, an mapahitas-on nga mga tawo nakukurian nga maghatag hin kumendasyon ha iba; mas karuyag nira nga hira an dayawon. Ginkukompara nira an ira kalugaringon ha iba ngan nakikigkompetensya. Imbes nga mag-train ngan maghatag hin awtoridad, posible nga magsiring hira, “kon karuyag mo nga tama an pagkahimo han usa nga butang”​—ha paagi nga nakakapalipay ha ira—​“kinahanglan ikaw mismo an magbuhat hito.” An mapahitas-on nga tawo kaurogan nga ambisyoso ngan aw-anon. (Gal. 5:26) An sugad nga mga tawo talagsa la magkaada hin nagpapadayon nga pagkamagsangkay. Kon napansin naton nga nagpapahitaas na kita, kinahanglan manginyupo kita han bulig ni Jehova nga ‘mabag-o an aton panhunahuna’ basi diri makagamot ha aton inin maraot nga kalidad.​—Roma 12:2.

20. Kay ano nga kinahanglan magin mapainubsanon kita ngan kilalahon naton an aton mga limitasyon?

²⁰ Mapasalamaton gud kita ha susbaranan ni Jehova! Nakikita naton an iya pagkamapainubsanon ha paagi han iya pagtratar ha iya mga surugoon, ngan karuyag naton nga sundon an iya susbaranan. Dugang pa, karuyag naton sundon an mag-opay nga ehemplo ha Biblia han mapainubsanon nga mga tawo nga nagkaada pribilehiyo nga maglakat kaupod han Dios. Hinaot pirme naton ihatag kan Jehova an dungog ngan himaya nga angayan ha iya. (Pah. 4:11) Kon bubuhaton naton ito nga mga butang, magigin kwalipikado liwat kita nga maglakat kaupod han aton langitnon nga Amay, kay nahigugma hiya ha mga tawo nga mapainubsanon ngan maaram han ira mga limitasyon.