1. Ano an ginpapaningkamotan han damu nga kabugtoan basi madugangan pa an ira mga ginbubuhat ha pag-alagad kan Jehova?

 DAMU gud an aton buruhaton samtang nagtitikahirani an kataposan hini nga sistema. (Mat. 24:14; Luc. 10:2; 1 Ped. 5:2) Karuyag naton buhaton an ngatanan nga aton makakaya ha pag-alagad kan Jehova. Damu an nagpapahaluag han ira ministeryo. An iba karuyag magpayunir. An iba naman karuyag mag-alagad ha Bethel o magboluntaryo ha pagpanukod ha teokratiko nga mga pasilidad. Ngan damu nga brother an nangangalimbasog nga magin kwalipikado sugad nga ministeryal nga surugoon o tigurang. (1 Tim. 3:1, 8) Sigurado nga nalilipay gud hi Jehova nga makita kon ano an andam buhaton han iya katawohan ha pag-alagad ha iya!​—Sal. 110:3; Isa. 6:8.

2. Ano an bangin naton abaton kon diri naton nakakab-ot an pipira naton nga tumong ha espirituwal?

² Pero bangin masubo kita kon damu ka tuig na an naglabay ngan diri la gihapon naton nakakab-ot an pipira naton nga tumong ha espirituwal. O bangin manluya kita kon diri kita magin kwalipikado ha pipira nga pribilehiyo tungod han aton edad o iba pa nga rason. (Prob. 13:12) Ito an sitwasyon ni Melissa. * Karuyag gud niya mag-alagad ha Bethel o umiskwela ha School for Kingdom Evangelizers, pero hiya nagsiring: “Diri na ako kwalipikado hito tungod kay lagas na ako. Ito nga mga pribilehiyo sugad hin mga inop na la para ha akon. Usahay, naabat ako hin panluya.”

3. Ano an bangin kinahanglan buhaton han pipira basi magin kwalipikado ha mga pribilehiyo ha pag-alagad?

³ An pipira nga batan-on pa ngan mahimsog bangin kinahanglan anay magin hamtong ngan magkultibar hin pipira nga kalidad antes magin kwalipikado para ha dugang nga mga pribilehiyo. Pananglitan, bangin baltok hira, madagmit makadesisyon, ngan andam magbuhat hin bisan ano nga trabaho; pero bangin kinahanglan nira magin mas pasensyoso, magin mas pulido ha trabaho, o magin mas  matinalahuron. Kon magpupokus ka ha pagkultibar han mga kalidad nga ginkikinahanglan, bangin ihatag ha imo an usa nga pribilehiyo ha pag-alagad ha panahon nga diri mo ginlalaoman. Tagda an eksperyensya ni Nick. Han 20 anyos hiya, nasubo hiya kay waray hiya pilia nga magin ministeryal nga surugoon. Hiya nagsiring, “Inabat ko nga may problema ha akon.” Pero waray umundang hi Nick. Ginhimo niya an iya pinakamaopay ha kongregasyon ngan ha pagsangyaw nga buruhaton. Yana membro na hiya han usa nga Branch Committee.

4. Ano an aton hihisgotan hini nga artikulo?

⁴ Nanluluya ka ba kay diri mo pa nakakab-ot an usa mo nga tumong ha espirituwal? Kon oo, isumat kan Jehova an imo inaabat. (Sal. 37:5-7) Pangaro liwat hin mga suhestyon ha hamtong nga kabugtoan kon paonan-o mo mapapauswag an imo pag-alagad ha Dios, ngan pangalimbasog nga iaplikar an ira sagdon. Kon bubuhaton mo ito, bangin makarawat mo ito nga pribilehiyo o makab-ot ito nga tumong. Pero pariho kan Melissa nga gin-unabi kanina, bangin diri posible ha imo yana nga makab-ot an pribilehiyo nga imo karuyag. Kon sugad, paonan-o ka makakapabilin nga malipayon? Basi mabaton ito, hihisgotan hini nga artikulo (1) kon ano an makakahatag ha imo hin kalipay, (2) kon paonan-o madudugangan an imo kalipay, ngan (3) kon ano nga mga tumong an mahimo mo kab-uton nga makakadugang han imo kalipay.

5. Basi magin malipayon kita, ha ano kita kinahanglan magpokus? (Eclesiastes 6:9)

⁵ Iginsasaysay han Eclesiastes 6:9 kon ano an makakabulig ha aton nga magin malipayon. (Basaha.) An usa nga tawo nga nalilipay han “nakikita han mga mata” nag-aapresyar han kon ano an may-ada hiya, sugad han iya presente nga kahimtang. Ha kabaliktaran, an tawo nga padayon nga naghihiningyap han mga butang nga diri niya makukuha, diri gud makukontento. Salit ano an leksyon? Basi magin malipayon, kinahanglan magpokus kita ha kon ano an may-ada kita ngan ha mga tumong nga posible naton makab-ot.

6. Ano nga parabola an aton yana uusisahon, ngan ha ano kita magpupokus?

⁶ Posible gud ba nga makontento ka ha kon ano an may-ada ka? Para ha damu, imposible ito kay samtang nalabay an panahon, natural la ha aton nga maghingyap nga mahibaro ha pagbuhat hin bag-o nga mga butang. Pero ha pagkamatuod, posible ito. Mahimo kita malipay ha mga butang nga may-ada kita yana. Paonan-o naton ito mahihimo? Basi mahibaroan, usisahon naton an parabola ni Jesus mahitungod ha mga talanton nga mababasa ha Mateo 25:14-30. Magpupokus kita ha igintututdo hito ha aton kon paonan-o kita magigin malipayon ngan mas magigin malipayon pa ngani ha mga bendisyon nga aton nakakarawat yana.

7. Isumaryo hin halipot an parabola ni Jesus mahitungod ha mga talanton.

⁷ Ha parabola, an tawo magbibiyahe ha iba nga nasud. Antes hiya lumarga, gintawag niya an iya mga uripon ngan gintagan an tagsa ha ira hin mga talanton basi nira ignegosyo. * Tungod kay maaram hiya han abilidad han iya mga uripon, an siyahan nga uripon gintagan niya hin lima ka talanton, an ikaduha nga uripon gintagan niya hin duha, ngan an ikatulo nga uripon gintagan niya hin usa. An siyahan nga duha nga uripon maduruto nga nagtrabaho basi tumubo ito nga kwarta. Pero an ikatulo nga uripon waray ginhimo ha kwarta nga iginhatag ha iya, salit ginpaiwas hiya han iya agaron.

8. Kay ano nga nalipay an siyahan nga uripon ha parabola?

⁸ Sigurado nga nalipay an siyahan nga uripon  nga gintaporan hiya hin lima ka talanton han iya agaron. Daku gud ito nga kantidad, ngan nagpapakita ito nga daku an pagsarig ha iya han iya agaron! Pero kumusta man an ikaduha nga uripon? Puydi unta hiya masubo kay an iya nakarawat nga talanton diri sugad kadamu han nakarawat han siyahan nga uripon. Pero ano an iya ginbuhat?

9. Ano an waray igsiring ni Jesus mahitungod han ikaduha nga uripon? (Mateo 25:22, 23)

⁹ Basaha an Mateo 25:22, 23. Waray magsiring hi Jesus nga nasina ngan nagdumot an ikaduha nga uripon tungod kay duha la ka talanton an iya nakarawat. Ngan waray liwat magsiring hi Jesus nga nagreklamo ito nga uripon: ‘Ini la an iginhatag ha akon? Maduruto man ako nga nagtatrabaho pariho han uripon nga nakakarawat hin lima ka talanton! Kon diri ako gin-aapresyar han akon agaron, ilulubong ko na la ini nga duha nga talanton ngan maglulugaring ako pagnegosyo.’

10. Ano an ginbuhat han ikaduha nga uripon ha iya mga talanton?

¹⁰ Pariho han siyahan nga uripon, ginseryoso liwat han ikaduha nga uripon an responsabilidad nga iginhatag ha iya, ngan maduruto nga nagserbi hiya ha iya agaron. Sugad nga resulta, napatubo niya hin doble an mga talanton han iya agaron. An pagin maduruto ngan pagin maabilidad hini nga uripon hura gud nga ginbalosan. Labot la nga nalipay an iya agaron, gintaporan liwat hiya hin dugang pa nga responsabilidad!

11. Ano an mahimo naton buhaton basi madugangan an aton kalipay?

¹¹ Ha pariho nga paagi, madudugangan an aton kalipay pinaagi ha pagin maduruto gud ha anoman nga iginpapabuhat ha aton ha pag-alagad kan Jehova. Magin “sagipo gud” ha pagsangyaw nga buruhaton, ngan bug-os nga makigbahin ha mga buruhaton ha kongregasyon. (Buh. 18:5; Heb. 10: 24, 25) Magin andam kon natambong ha mga katirok basi makaghatag ka hin makaparig-on nga mga komento. Seryosoha an imo bahin sugad nga estudyante durante ha katirok ha midweek. Kon ginhangyo ka nga bumulig ha usa nga trabahoon ha kongregasyon, abot ha eksakto nga oras ngan magin masasarigan. Ayaw hunahunaa nga an toka nga iginhatag ha imo diri importante ngan diri angay tagan hin panahon. Pangalimbasog nga mapauswag an imo mga abilidad. (Prob. 22:29) Kon magigin mas maduruto ka ha espirituwal nga mga buruhaton ngan ha mga igintoka ha imo, mas malaksi ka nga mag-uuswag ngan mas magigin malipayon ka. (Gal. 6:4) Malilipay ka liwat kon nakakakarawat an iba hin pribilehiyo nga karuyag mo makarawat.​—Roma 12:15; Gal. 5:26.

12. Ano an ginbuhat han duha nga Saksi basi madugangan an ira kalipay?

¹² Nahinunumdoman mo ba hi Melissa, an sister nga nagsiring nga karuyag niya mag-alagad ha Bethel o makaeskwela ha School for Kingdom Evangelizers? Bisan kon diri posible para ha iya nga makab-ot ito, hiya nagsiring: “Ginbubuhat ko an akon pinakamaopay ha akon pagpayunir, ngan nakikigbahin ako ha iba-iba nga pamaagi han pagsangyaw. Naghahatag gud ini ha akon hin daku nga kalipay.” Ngan paonan-o nalamposan ni Nick an iya kasubo han waray hiya mapili sugad nga ministeryal nga surugoon? “Nagpokus ako ha mga pribilehiyo nga abrido ha akon​—an pakigbahin ha ministeryo ngan paghatag hin makaparig-on nga mga komento ha katirok. Nag-apply liwat ako para ha pag-alagad ha Bethel, ngan han sumunod nga tuig, nakarawat ako.”

13. Ano an magigin resulta kon magigin maduruto ka ha imo toka yana? (Eclesiastes 2:24)

¹³ Kon maduruto nga ginbubuhat mo an imo mga toka yana, makakakarawat ka daw la hin dugang nga mga responsabilidad ha tiarabot? Mahimo ito mahitabo, pariho kan Nick. Pero kon diri man ito mahitabo, pariho kan Melissa, madudugangan la gihapon an imo kalipay, ngan aabaton mo an kakontento ngan kalipay ha imo pag-alagad kan Jehova. (Basaha an Eclesiastes 2:24.) Dugang pa, sigurado nga malilipay ka gud ha paghibaro nga an imo mga pangalimbasog nakakapalipay ha aton Agaron nga hi Jesu-Kristo.

14. May kalabotan ha aton mga tumong ha espirituwal, ano an kinahanglan naton hinumdoman?

¹⁴ An pagpokus ba ha aton mga toka yana nagpapasabot nga diri na kita angay mamiling hin mga paagi basi mapauswag pa an aton pag-alagad kan Jehova? Diri gud! Kinahanglan maghimo kita hin mga tumong ha espirituwal nga mabulig ha aton basi magin mas epektibo kita ha aton ministeryo ngan mas makabulig ha aton kabugtoan. Maglalampos kita kon maaramon ngan mapainubsanon nga magpupokus kita ha pagserbi ha iba imbes ha aton kalugaringon.​—Prob. 11:2; Buh. 20:35.

15. Ano an pipira nga tumong nga makakadugang han imo kalipay?

¹⁵ Ano nga mga tumong an mahimo mo kab-uton? Paghangyo kan Jehova nga buligan ka nga mahibaroan mo kon ano nga mga tumong an kaya mo kab-uton. (Prob. 16:3; San. 1:5) Mahimo mo ba kab-uton an usa han mga tumong nga gin-unabi ha  siyahan nga parapo hini nga artikulo​—an pag-auxiliary o pagregular payunir, pag-alagad ha Bethel, o pagboluntaryo ha mga proyekto han pagpanukod han organisasyon? O bangin puydi ka mag-aram hin iba nga linggwahe basi maipasamwak an maopay nga sumat o makagsangyaw pa ngani ha teritoryo nga iba an linggwahe. Mahimo mo mahibaroan an dugang nga mga impormasyon mahitungod hini nga mga tumong pinaagi ha pagbasa han kapitulo 10 han libro nga Organisado ha Pagbuhat han Kaburut-on ni Jehova ngan ha pakiistorya ha mga tigurang ha iyo kongregasyon. * Samtang nangangalimbasog  ka nga makab-ot ito nga mga tumong, makikita han iba an imo pag-uswag ngan madudugangan an imo kalipay.

16. Ano an mahimo mo buhaton kon diri posible para ha imo yana nga makab-ot an usa nga tumong?

¹⁶ Pero ano man kon diri posible para ha imo yana nga makab-ot an usa han gin-unabi nga mga tumong? Paghunahuna hin iba nga tumong nga posible para ha imo nga makab-ot. Tagda an masunod nga mga tumong nga mahimo mo kab-uton.

17. Sumala ha 1 Timoteo 4:13, 15, ano an mahimo buhaton han usa nga brother basi magin mas maopay hiya nga magturutdo?

¹⁷ Basaha an 1 Timoteo 4:13, 15. Kon usa ka nga bawtismado nga brother, mahimo ka mangalimbasog nga magin mas maopay nga mamumulong ngan magturutdo. Kay ano? Kay kon mangangalimbasog ka nga magin maopay nga parabasa, mamumulong, ngan magturutdo, magpapahimulos an mga namamati ha imo. Himoa nga tumong an pag-aram ngan pag-aplikar han tagsa nga kalidad ha pagyakan nga ginhihisgotan ha brosyur nga Magin Mas Epektibo ha Pagbasa Ngan Pagtutdo. Pag-admi an tagsa nga kalidad han pagyakan. Maduruto nga pagpraktis ha iyo balay ngan pangalimbasog nga iaplikar ito ha imo mga bahin. Pangaro hin mga suhestyon ha kabulig nga magsaragdon o ha iba nga tigurang nga “maduruto ha pagyakan ngan pagtutdo.” * (1 Tim. 5:17) Ayaw la pagpokus kon paonan-o mo maiaaplikar an mga leksyon ha brosyur, kondi pagpokus liwat kon paonan-o mo mabubuligan an imo mga mamarati nga maparig-on an ira pagtoo o mapagios hira nga iaplikar an ira mga nahibabaroan. Kon bubuhaton mo ito, magigin mas malipayon ka ngan pati hira.

18. Ano an makakabulig ha aton basi makab-ot an aton mga tumong ha ministeryo?

¹⁸ Kita ngatanan gintokahan nga magsangyaw ngan manhimo hin disipulo. (Mat. 28:19, 20;  Roma 10:14) Karuyag mo ba nga mas pauswagon pa an imo mga abilidad para hinin importante gud nga buruhaton? Paghimo hin espisipiko nga mga tumong samtang gin-aadman ngan gin-aaplikar mo an imo mga nahibabaroan ha Pagtutdo nga brosyur. Makakakuha ka liwat hin dugang nga praktikal nga mga suhestyon ha An Aton Kristiano nga Pagkinabuhi Ngan Ministeryo—Workbook Para ha Katirok ngan ha mga video han sampol nga mga pakiistorya nga iginpapasalida ha mga katirok ha midweek. Testingi iton iba-iba nga suhestyon basi mahibaroan mo kon hain hito an haom gud ha imo sitwasyon. Kon susundon mo ito nga mga suhestyon, sigurado nga aabaton mo an daku nga kalipay han pagin epektibo nga Kristiano nga ministro.​—2 Tim. 4:5.

19. Paonan-o mo makukultibar an mga kalidad nga nakakapalipay ha Dios?

¹⁹ Kon naghihimo ka hin mga tumong, ayaw hingalimti an usa han pinakaimportante​—an pagkultibar han mga kalidad nga nakakapalipay ha Dios. (Gal. 5:22, 23; Col. 3:12; 2 Ped. 1:5-8) Paonan-o mo ito bubuhaton? Pananglitan, karuyag mo magkaada mas marig-on nga pagtoo. Mahimo ka magbasa hin mga artikulo ha aton mga publikasyon nga naghahatag hin praktikal nga mga suhestyon kon paonan-o mapaparig-on an imo pagtoo. Sigurado nga magpapahimulos ka ha pagkita han mga video ha JW Broadcasting^® mahitungod ha kabugtoan nga nagpakita hin daku gud nga pagtoo bisan pa han ira mga problema. Katapos, hunahunaa kon paonan-o mo masusubad an ira pagtoo.

20. Ano an mahimo naton buhaton basi madugangan an aton kalipay ngan maibanan an aton pag-abat hin kapakyas?

²⁰ Sigurado nga karuyag naton ngatanan nga mas dugangan pa an aton mga nahihimo para kan Jehova. Ha bag-o nga kalibotan han Dios, bug-os na nga makakag-alagad kita ha iya. Pero ha pagkayana, kon sasalingabuton naton an anoman nga oportunidad nga may-ada kita, madudugangan an aton kalipay ngan maiibanan an aton pag-abat hin kapakyas. Ngan an mas importante, mapapasidunggan ngan madadayaw naton hi Jehova, an aton “malipayon nga Dios.” (1 Tim. 1:11) Salit malipay kita ha mga pribilehiyo nga may-ada kita!