1. Sumala ha 1 Tesalonica 5:11, ha ano nga buruhaton kita ngatanan nakikigbahin?

 AN IYO ba kongregasyon nagtukod o nag-renovate hin Kingdom Hall? Kon oo, sigurado nga nahinunumdoman mo an iyo siyahan nga katirok ha bag-o nga pasilidad. Mapasalamaton ka gud kan Jehova. Ngani, ha imo sobra nga kalipay bangin haros makatangis ka ngan diri makaluwas han mga pulong han siyahan nga kanta. An aton mag-opay gud nga Kingdom Hall naghahatag hin kadayawan kan Jehova. Pero mas naghahatag kita hin kadayawan ha iya kon nakikigbahin kita ha usa pa nga klase hin pagtukod. Nag-uupod ito hin usa nga butang nga mas importante pa kay han literal nga mga bilding. May kalabotan ito ha mga tawo nga napakadto hito nga mga lugar han pagsingba. Hi apostol Pablo naggamit hin pulong nga mahimo liwat mangahulogan hin “pagtukod” basi ipagawas an ideya han pagparig-on ha iba, sugad han mababasa ha aton tema nga teksto ha 1 Tesalonica 5:11.—Basaha.

2. Ano an aton hihisgotan hini nga artikulo?

² Hi apostol Pablo maopay gud nga ehemplo kay maaram hiya kon paonan-o paparig-unon an iya mga igkasi-tumuroo. May empatiya hiya ha ira. Hini nga artikulo, aton hihisgotan kon paonan-o niya ginbuligan an kabugtoan nga (1) mailob an mga pagsari, (2) makigmurayaw ha usa kag usa, ngan (3) maparig-on an ira pagtoo kan Jehova. Aton kitaon kon paonan-o naton hiya masusubad ngan hito nga paagi maparig-on an aton kabugtoan yana.—1 Cor. 11:1.

3. Ano an balanse nga panhunahuna ni Pablo?

³ Hinigugma gud ni Pablo an kabugtoan. Hiya mismo nakaeksperyensya hin kakurian; salit naipakita niya an pagpaid ngan empatiya ha iya mga igkasi-tumuroo han naatubang hira hin  mga pagsari. Makausa, naubosan hi Pablo hin kwarta ngan kinahanglan mamiling hin trabaho basi masuportahan an iya kalugaringon ngan an iya mga kaupod. (Buh. 20:34) Panhimo hin tolda an iya trabaho. Pag-abot niya ha Corinto, nagtrabaho anay hiya upod nira Aquila ngan Priscila, nga mga parahimo liwat hin tolda. Pero “kada sabbath” nagsasangyaw hiya ha mga Judio ngan mga Griego. Katapos, pag-abot nira Silas ngan Timoteo, “hi Pablo nagtikang magin sagipo gud ha pagpasamwak han pulong.” (Buh. 18:2-5) Waray gud hingalimti ni Pablo an iya nangunguna nga katuyoan ha kinabuhi, an pag-alagad kan Jehova. Hi Pablo maopay nga ehemplo ha pagin maduruto salit nadasig niya an kabugtoan. Ginpahinumdoman niya hira nga diri tugotan an mga presyur ha kinabuhi ngan an panginahanglan nga magtagana ha pamilya nga magin rason nga mapabay-an nira “an mas importante nga mga butang”—an ngatanan nga bahin han pagsingba kan Jehova.—Fil. 1:10.

4. Paonan-o ginbuligan nira Pablo ngan Timoteo an ira mga igkasi-tumuroo nga makaya an pagtimaraot?

⁴ Waray pag-iha katapos maestablisar an kongregasyon ha Tesalonica, an bag-o nga mga tumuroo inatubang hin grabe nga pagkontra. Han waray hiagii han usa nga grupo han bayolente nga mga parakontra hira Pablo nga Silas, gindanas nira “an pipira han kabugtoan ngadto ha mga magmarando han syudad” ngan nagginuliat: “Ini hira . . . nakontra ha mga balaud han Cesar.” (Buh. 17:6, 7) Maiimadyin mo ba an kahadlok hiton bag-o pa la nga nakombirte nga mga Kristiano han nasabtan nira nga an mga tawo han syudad kinontra na ha ira? Puydi unta hira manluya ha pag-alagad kan Jehova, pero diri karuyag ni Pablo nga mahitabo ito. Bisan kon kinahanglan nira ni Silas bumaya, ginsiguro nira nga maataman hin maopay an bag-o nga kongregasyon. Ginpahinumdoman ni Pablo an mga taga-Tesalonica: “Ginsugo namon hi Timoteo, nga aton bugto . . . , basi parig-unon kamo ngan liawon kamo may kalabotan ha iyo pagtoo, basi diri mabay-og an bisan hin-o tungod hini nga mga kasakitan.” (1 Tes. 3:2, 3) Hi Timoteo posible gud nga gintimaraot ha Listra, an iya gintikangan nga bungto. Nakita niya kon paonan-o ginparig-on ni Pablo an kabugtoan didto. Tungod kay nakita ni Timoteo an bendisyon nga iginhatag ni Jehova, mapapasarig niya an bag-o nga kabugtoan nga magigin maopay gihap an ira kahimtang.—Buh. 14:8, 19-22; Heb. 12:2.

5. Paonan-o nakabenepisyo an brother nga hi Bryant ha bulig han usa nga tigurang?

⁵ Ha ano pa nga paagi ginparig-on ni Pablo an iya mga igkasi-tumuroo? Pagbalik nira Pablo ngan Bernabe ha Listra, Iconio, ngan Antiokia, “nagtuin hira hin mga tigurang para ha ira ha tagsa nga kongregasyon.” (Buh. 14:21-23) Sigurado nga iton gintuinan nga kalalakin-an nakahatag hin pagliaw ha mga kongregasyon, pariho han mga tigurang yana. Pansina an ginsiring han brother nga hi Bryant: “Han nag-15 anyos ako,” siring niya, “hi Papa binaya ha balay ngan hi Mama na-disfellowship. Nanluya ako ngan inabat nga ginbayaan ako.” Ano an nakabulig kan Bryant nga mailob inin makuri nga panahon? Siring niya: “Hi Kuya Tony, nga usa nga tigurang, nakiistorya ha akon ha mga katirok ngan ha iba nga panahon. Ginsumatan niya ako mahitungod hadton inatubang hin mga pagsari pero malipayon la gihap. Iginpakita niya ha akon an Salmo 27:10 ngan agsob mag-istorya parte kan Hezekias, nga matinumanon nga nag-alagad bisan kon an iya tatay diri maopay nga ehemplo.” Ano an nagin epekto kan Bryant hinin praktikal nga bulig? “Tungod han pagdasig ni Kuya Tony,” siring ni Bryant, “ha urhi sinulod ako ha bug-os-panahon nga pag-alagad, nga nakapalipay gud ha akon.” Mga tigurang, magin alerto ha pagbulig ha kabugtoan, nga pariho kan Bryant, bangin nagkikinahanglan hin “maopay nga pulong” han pagdasig.—Prob. 12:25.

6. Paonan-o gin-gamit ni Pablo an mga istorya han kinabuhi basi dasigon an kabugtoan?

⁶ Ginpahinumdoman ni Pablo an kabugtoan  nga may ‘daku nga dampog han mga saksi’ nga nakailob ha mga kakurian kay gintagan hira ni Jehova hin dugang nga kusog. (Heb. 12:1) Maaram hi Pablo nga an mga istorya han kinabuhi hadton malampuson nga nakailob ha ngatanan nga klase hin kakurian han naglabay makakabulig ha kabugtoan nga magkaada kaisog ngan padayon nga magpokus ha “syudad han buhi nga Dios.” (Heb. 12:22) Ito liwat an kahimtang yana. Sigurado nga napaparig-on gud kita ha pagbasa kon paonan-o ginbuligan ni Jehova hira Gideon, Barak, David, Samuel, ngan an damu pa. (Heb. 11:32-35) Ngan kumusta man an mga ehemplo han pagtoo ha aton panahon? Ha world headquarters, agsob kami makakarawat hin mga surat tikang ha kabugtoan nga naparig-on an pagtoo katapos nira basahon an istorya han kinabuhi han usa nga matinumanon nga alagad ni Jehova ha aton panahon.

7. Ano an imo mahibabaroan ha sagdon ni Pablo nga nakarekord ha Roma 14:19-21?

⁷ Ginpaparig-on ta an aton kabugtoan kon nabulig kita basi magkaada kamurayawan ha kongregasyon. Diri naton gintutugotan nga magkabahin-bahin kita tungod han pagkaiba-iba han opinyon. Ngan diri naton igin-iinsister an aton mga katungod kon waray man matatalapas nga prinsipyo ha Kasuratan. Aadi an usa nga ehemplo. An kongregasyon ha Roma ginkukompwesto hin Judio ngan Hentil nga mga Kristiano. Han gintanggal an Mosaiko nga Balaud, waray na ipatuman an mga restriksyon hito ha pipira nga pagkaon. (Mar. 7:19) Tikang hito nga panahon, inabat han pipira nga Judio nga Kristiano nga puydi na nira kaunon an tanan nga klase hin pagkaon. Pero diri ito kaya buhaton han iba nga Judio nga Kristiano. Nabahin an kongregasyon tungod hini nga isyu. Ginpabug-atan ni Pablo an pagkaimportante han pagtipig han kamurayawan ngan nagsiring: “Mas maopay nga diri kumaon hin karne o uminom hin bino o magbuhat hin bisan ano nga nakakapakdol ha imo bugto.” (Basaha an Roma 14:19-21.) Hito nga paagi, ginbuligan ni Pablo an iya mga igkasi-tumuroo nga masabtan nga an sugad nga mga pagdiskusyon nakakadaot gud ha mga indibiduwal ngan ha bug-os nga kongregasyon. Andam liwat hiya nga bag-uhon an iya mismo panggawi para diri makapakdol ha iba. (1 Cor. 9:19-22) Mapaparig-on liwat naton an iba ngan matitipigan an kamurayawan kon diri naton hihimoon nga isyu an mga butang nga nakadepende ha karuyag han kada tagsa.

8. Ano an ginbuhat ni Pablo han nameligro nga mawara an kamurayawan han kongregasyon tungod han usa nga importante nga isyu?

⁸ Nagpakita hi Pablo hin maopay nga ehemplo ha pagtipig hin murayaw nga relasyon ha mga diri nauyon parte ha importante nga mga butang. Pananglitan, an pipira ha siyahan-siglo nga kongregasyon nag-insister nga turion an nakombirte nga mga Hentil, posible basi diri hira pakarauton han mga Judio. (Gal. 6:12) Diri gud nauyon hi Pablo hito nga panhunahuna, pero imbes nga mag-insister nga sundon an iya paagi, mapainubsanon nga nangaro hiya hin sagdon ha mga apostol ngan tigurang ha Jerusalem. (Buh. 15:1, 2) Sugad nga resulta, an iya panggawi nakabulig hito nga mga Kristiano nga matipigan an kalipay ngan kamurayawan ha kongregasyon.—Buh. 15:30, 31.

9. Paonan-o naton masusubad an ehemplo ni Pablo?

⁹ Kon magkaada seryoso nga pagdiskusyon, makakabulig kita basi magkaada kamurayawan pinaagi ha pangaro han giya hadton gintuinan ni Jehova nga mag-ataman ha kongregasyon. Agsob nga an giya nga nakabase ha Biblia mababasa ha aton mga publikasyon o ha mga instruksyon tikang ha organisasyon. Kon magpupokus kita ha pagsunod hito nga mga instruksyon imbes nga ha pag-aghat han aton personal nga mga opinyon, makakabulig kita basi magkaada kamurayawan ha kongregasyon.

10. Ano pa an ginbuhat ni Pablo basi makabulig ha pagkaada kamurayawan ha kongregasyon?

 ¹⁰ Binulig hi Pablo ha pagkaada kamurayawan pinaagi ha pagpokus ha positibo nga mga kalidad han kabugtoan, diri ha ira negatibo nga mga batasan. Pananglitan, ha kataposan han surat ni Pablo ha mga taga-Roma, gin-unabi niya an ngaran han damu nga tawo ngan nagdugang hiya hin positibo nga komento o personal nga detalye parte ha kadam-an ha ira. Masusubad naton hi Pablo kon diri kita mag-aalang ha pag-unabi han mag-opay nga kalidad han aton kabugtoan. Kon ginbubuhat naton ito, gintatagan ta an aton kabugtoan hin dugang nga rason nga magin duok ha usa kag usa, nga nagpaparig-on han gugma ha sulod han kongregasyon.

11. Paonan-o naton maibabalik an kamurayawan kon nagkakaada diri pagsinabtanay?

¹¹ Usahay, bisan an hamtong nga mga Kristiano bangin magkaada diri pagsinabtanay o magdiskusyon. Nahitabo ito kan Pablo ngan ha iya duok nga sangkay nga hi Bernabe. Inin duha nga lalaki waray gud magkauyon kon ig-uupod ba hi Marcos ha sunod nira nga pagbiyahe sugad nga misyonero. “Nasisina nga naglantugi” hira ngan nagbulag. (Buh. 15:37-39) Pero iginbalik nira Pablo, Bernabe, ngan Marcos an ira maopay nga relasyon, nga nagpapakita nga importante ha ira an kamurayawan ngan pagkaurosa han kongregasyon. Ha urhi, hi Pablo nagyakan hin positibo parte kanda Bernabe ngan Marcos. (1 Cor. 9:6; Col. 4:10) Kon may-ada kita diri pagsinabtanay ha aton kabugtoan, kinahanglan liwat naton ito sulbaron ngan padayon nga magpokus ha ira mag-opay nga kalidad. Hito nga paagi, makakabulig kita ha pagkaada kamurayawan ngan pagkaurosa.—Efe. 4:3.

12. Ano an pipira nga problema nga gin-aatubang han aton kabugtoan?

¹² Gindadasig ta an aton kabugtoan kon ginpaparig-on naton an ira pagtoo kan Jehova. An pipira gintatamay han ira diri tumuroo nga mga kapamilya o han ira mga katrabaho o kaeskwela. An iba may grabe nga sakit o nakukurian nga wad-on an kasakit nga ira inaabat ha ginyakan o ginbuhat han iba. An iba naman damu ka tuig na nga bawtismado nga Kristiano ngan maiha na nga naghihinulat nga matapos ini nga sistema. Ini nga mga sitwasyon mahimo magsari han pagtoo han mga Kristiano yana. An kabugtoan ha siyahan-siglo nga kongregasyon inatubang hin puropariho nga mga problema. Ano an ginhimo ni Pablo basi maparig-on hira?

13. Paonan-o ginbuligan ni Pablo adton gintatamay tungod han ira mga gintotoohan?

¹³ Gin-gamit ni Pablo an Kasuratan basi parig-unon an pagtoo han kabugtoan. Pananglitan, an Judio nga mga Kristiano bangin diri maaram han ira ibabaton ha ira diri tumuroo nga mga kapamilya nga nasiring nga an Judaismo mas labaw ha Kristianidad. Sigurado nga an surat ni Pablo ha mga Hebreo nagparig-on gud hito nga mga Kristiano. (Heb. 1:5, 6; 2:2, 3; 9:24, 25) Magagamit nira an iya mapwersa nga mga pangatadongan ha pagbaton ha mga nag-aakusar ha ira. Yana, mabubuligan ta an aton kabugtoan nga naatubang hin pagtamay nga gamiton an aton mga publikasyon nga basado ha Biblia basi isaysay an mga rason han ira mga gintotoohan. Ngan kon gintatamay an aton mga batan-on kay natoo hira ha paglarang, mabubuligan naton hira nga makabiling hin impormasyon ha mga brosyur nga Ginlarang ba an Kinabuhi? ngan The Origin of Life—Five Questions Worth Asking basi ipakita kon kay ano nga natoo hira nga ginlarang an kinabuhi.

14. Bisan kon busy hi Pablo ha pagsangyaw ngan pagtutdo, ano an iya ginhimo?

¹⁴ Gindasig ni Pablo an kabugtoan nga magpakita hin gugma pinaagi han “mag-opay nga mga buhat.” (Heb. 10:24) Ginbuligan niya hira diri la pinaagi han iya ginsiring kondi pinaagi liwat han iya ginbuhat. Pananglitan, han an kabugtoan ha Judea nakaeksperyensya hin gutom,  binulig hi Pablo ha panhatag hin ayuda ha ira. (Buh. 11:27-30) Ngani, bisan kon busy hi Pablo ha pagsangyaw ngan pagtutdo, pirme hiya namimiling hin mga paagi nga mabuligan adton nagkikinahanglan hin materyal nga suporta. (Gal. 2:10) Ha pagbuhat hito, ginparig-on niya an pagsarig han iya mga igkasi-tumuroo nga aatamanon hira ni Jehova. Yana, kon ginagamit naton an aton panahon, kusog, ngan mga skill basi magboluntaryo ha disaster relief, ginpaparig-on liwat naton an pagtoo han aton kabugtoan. Nahihimo liwat naton ini kon regular kita nga nagdudonar para ha bug-os-kalibotan nga buruhaton. Hini ngan ha iba pa nga paagi, ginbubuligan ta an aton kabugtoan nga sumarig nga diri gud hira papabay-an ni Jehova.

15-16. Ano an angay naton magin pagtratar ha kabugtoan nga nagluya an pagtoo?

¹⁵ Waray hi Pablo humunong ha pagbulig ha kabugtoan nga nagluya an pagtoo. Nagpakita hiya hin pagpaid ha ira ngan nagyakan ha mahigugmaon ngan positibo nga paagi. (Heb. 6:9; 10:39) Pananglitan, ha iya bug-os nga surat ha mga Hebreo, agsob niya gamiton an mga pulong nga “kita,” “aton,” ngan “naton.” Hito nga paagi, gin-amin niya nga hiya liwat kinahanglan mag-aplikar han iya sagdon. (Heb. 2:1, 3) Pariho kan Pablo, diri kita nahunong ha pagbulig ha kabugtoan nga nagluya an pagtoo. Lugod, ginpaparig-on naton hira pinaagi ha pagpakita hin tinuod nga interes ha ira. Hini nga paagi, ginpapasarig naton hira nga nahigugma kita ha ira. An aton mahigugmaon ngan buotan nga paagi han pagyakan makakabulig basi magin mas makaparig-on an aton mismo iginyayakan.

¹⁶ Ginpasarig ni Pablo an kabugtoan nga maaram hi Jehova han ira mag-opay nga buhat. (Heb. 10:32-34) Mahihimo naton an puropariho hito kon nabulig ha usa nga bugto nga nagluya an pagtoo. Puydi naton hiya hangyoon nga ig-istorya kon paonan-o hiya nagin Saksi o dasigon nga hinumdoman an mga higayon nga inabat niya an  bulig ni Jehova. Puydi naton gamiton ito nga oportunidad basi pasarigon hiya nga waray kalimti ni Jehova an gugma nga iya iginpakita ha Iya han naglabay ngan diri Niya hiya papabay-an ha tiarabot. (Heb. 6:10; 13:5, 6) Ini nga mga pag-istorya bangin makadasig hinin hinigugma nga kabugtoan nga hingyapon nga magpadayon ha pag-alagad ha Iya.

17. Ano nga mga skill an padayon naton nga mapapauswag?

¹⁷ Sugad la nga an mga skill han usa nga trabahador ha konstruksyon nag-uuswag ha paglabay han panahon, kita liwat mahimo magin mas epektibo ha pagparig-on ha usa kag usa. Makakabulig kita ha iba nga magkaada kusog basi mailob an mga pagsari pinaagi ha pag-istorya ha ira han mga ehemplo hadton nag-ilob han naglabay. Mahimo kita bumulig nga magkaada kamurayawan pinaagi ha pag-unabi han mag-opay nga kalidad nga aton nakikita ha iba, mahimo naton tipigan an kamurayawan kon namimeligro ito nga mawara, ngan mahimo naton ibalik an kamurayawan kon nagkakaada diri pagsinabtanay. Ngan padayon nga mapaparig-on naton an pagtoo han aton kabugtoan pinaagi ha pagsumat ha ira hin importante nga mga kamatuoran ha Biblia, paghatag hin praktikal nga bulig, ngan pagsuporta ha bisan hin-o nga nagluya an espirituwalidad.

18. Ano an imo determinasyon?

¹⁸ Malipayon ngan kontento adton nagtatrabaho ha teokratiko nga mga proyekto han pagpanukod. Mahimo kita magin malipayon ngan kontento kon nabulig kita ha pagparig-on han pagtoo han aton kabugtoan. Diri pariho han literal nga mga bilding nga madudumog ha kamaihaan, an mga resulta han aton buruhaton mahimo magpadayon ha waray kataposan! Hinaot magin determinado kita nga “padayon nga dasigon . . an usa kag usa ngan parig-unon an usa kag usa.”—1 Tes. 5:11.