May mga pagsaysay kita nga sugad hito an iginpapasabot. Baga hin nauyon ito ha aton mababasa ha Hebreo 12:16. Ito nga teksto nasiring nga hi Esau “waray apresasyon ha sagrado nga mga butang” ngan “an katungod ha pagkasuhag [iya iginhatag kan Jacob kabalyo] ha usa nga pagkaon.” Baga hin iginpapasabot hini nga han hi Jacob na an may “katungod ha pagkasuhag,” nagin kaapi liwat hiya han kaapoy-apoyan han Mesias.​—Mat. 1:2, 16; Luc. 3:23, 34.

Kondi iginpapakita han pagrepaso ha mga asoy han Biblia nga diri kinahanglan nga magin suhag nga anak nga lalaki an usa basi magin kaapoy-apoyan han Mesias. Tagda an pipira nga ebidensya:

Ha mga anak nga lalaki ni Jacob (Israel), an iya suhag kan Leah amo hi Ruben. Ha urhi, an suhag nga anak ni Jacob ha iya mas hinigugma nga asawa nga hi Raquel amo hi Jose. Han nakabuhat hin sala hi Ruben, an katungod ha pagkasuhag iginpasa kan Jose. (Gen. 29:31-35; 30:22-25; 35:22-26; 49:22-26; 1 Kron. 5:1, 2) Bisan pa hito, waray magtikang kan Ruben o kan Jose an tulin nga pagtitikangan han Mesias. Lugod, nagtikang ito kan Juda, an ikaupat nga anak ni Jacob kan Leah.​—Gen. 49:10.

 Ha Lucas 3:32 mababasa an lima nga ngaran han tulin nga pagtitikangan han Mesias. An tagsa ha ira baga hin suhag nga anak. Hi Boas nag-anak kan Obed, nga amo an tatay ni Jesse.​—Rut 4:17, 20-22; 1 Kron. 2:10-12.

Kondi, an anak ni Jesse nga hi David diri amo an suhag. Hiya an putó ha walo nga anak nga kalalakin-an. Pero an Mesias magtitikang ha tulin ni David. (1 Sam. 16:10, 11; 17:12; Mat. 1:5, 6) Sugad man, an sunod ha lista han katulinan amo hi Solomon, bisan kon diri hiya an suhag nga anak ni David.​—2 Sam. 3:2-5.

Diri ini nagpapasabot nga diri importante an pagkasuhag. An suhag nga anak nga lalaki may dungganon nga posisyon ngan kasagaran na nga nagigin sunod nga ulo han pamilya. Hiya liwat an anak nga nakakakarawat han duha nga bahin han panurundon.​—Gen. 43:33; Deut. 21:17; Jos. 17:1.

Pero an katungod ha pagkasuhag mahimo maipasa. Ginpaiwas ni Abraham hi Ismael salit iginpasa kan Isaac an katungod ha pagkasuhag. (Gen. 21:14-21; 22:2) Ngan sugad han ginhisgotan na, an katungod ha pagkasuhag ni Ruben iginpasa kan Jose.

Tagdon naton utro an Hebreo 12:16, nga nasiring: “Waray bisan hin-o ha iyo an sadang magin imoral o waray apresasyon ha sagrado nga mga butang, pariho kan Esau nga an katungod ha pagkasuhag iginbalyo ha usa nga pagkaon.” Ano an punto hini nga teksto?

Diri dinhi naghihisgot hi apostol Pablo mahitungod han katulinan han Mesias. Gin-aghat pa la niya an mga Kristiano nga ‘tadungon an mga dalan para ha ira mga tiil.’ Ha pagbuhat hito, ‘makakarawat nira an diri-matupngan nga pagkabuotan han Dios,’ nga mahimo mawara kon magbubuhat hira hin imoralidad. (Heb. 12:12-16) Kon hihimoon nira iton maraot nga buhat, magigin pariho hira kan Esau. ‘Waray niya apresyara an sagrado nga mga butang,’ ngan diri niya karuyag an espirituwal nga mga butang.

Hi Esau nabuhi ha panahon han mga patriarka, ngan posible nga ha panapanahon nakapribilehiyo hiya nga maghalad. (Gen. 8:20, 21; 12:7, 8; Job 1:4, 5) Pero tungod han iya unudnon nga tendensya, iginhatag niya ito ngatanan nga pribilehiyo kabalyo ha usa ka yahong nga utan. Bangin karuyag niya malikyan an pag-antos nga igintagna nga mahitatabo ha katulinan ni Abraham. (Gen. 15:13) Iginpakita liwat ni Esau nga mas karuyag niya an diri espirituwal nga mga butang ngan waray hiya apresasyon ha sagrado nga mga butang, pinaagi ha pag-asawa hin duha nga pagano nga babaye, nga nakapasubo gud ha iya mga kag-anak. (Gen. 26:34, 35) Kabaliktaran gud ito ha ginhimo ni Jacob; ginsiguro niya nga mag-asawa hin magsiringba han tinuod nga Dios!​—Gen. 28:6, 7; 29:10-12, 18.

Salit ano an aton mahimo magin konklusyon mahitungod ha tulin nga pagtitikangan ni Jesus, an Mesias? Usahay ito nga tulin nagtitikang ha suhag nga anak nga lalaki​—pero diri ha ngatanan nga higayon. Maaram hini an mga Judio ngan ginkarawat nira ito; nagsiring hira nga an Kristo magtitikang ha tulin ni David, an putó nga anak ni Jesse.​—Mat. 22:42.