1, 2. Kay ano nga maaramon an pagpamati ha aton Maglalarang kon nagdidesisyon kita kon ano an aton magigin mga tumong ha kinabuhi? (Kitaa an retrato hini nga pahina.)

KON usa ka nga batan-on, posible nga damu na an imo nakarawat nga sagdon may kalabotan ha imo kabubuwason. An mga titser, guidance counselor, o iba pa bangin nag-aaghat ha imo nga magkab-ot hin hitaas nga edukasyon ngan karera nga mabulig ha imo nga magkaada damu nga kwarta. Pero iba an igin-aaghat ha imo ni Jehova. Syempre, karuyag niya nga magin maduruto ka nga estudyante basi magkaada ka pangabuhi nga makakasuporta ha imo kahuman mo pag-eskwela. (Col. 3:23) Pero kon nagdidesisyon ka kon ano an imo magigin prayoridad ha imo kinabuhi, gin-aaghat ka niya nga magpagiya ha mag-opay nga mga prinsipyo basi makahimo ka hin mga desisyon uyon ha iya katuyoan ngan han iya kaburut-on para ha aton durante hinin panahon han kataposan.​—Mat. 24:14.

² Hinumdumi liwat nga maaram hi Jehova han ngatanan. Maaram hiya kon ano an mahitatabo hini nga kalibotan ngan maaram hiya nga hirani na gud an kataposan hini. (Isa. 46:10; Mat. 24:3, 36) Kilala liwat kita ni Jehova. Maaram hiya kon ano an makakaghatag ha aton hin tinuod nga  kakontento ngan kalipay ngan kon ano an makakapasubo ngan makakagwara han aton kalipay. Salit bisan kon baga hin maopay an sagdon han mga tawo, kon diri ito iginbasar ha Pulong han Dios, diri gud ito maaramon.​—Prob. 19:21.

3, 4. Paonan-o nakaapekto kanda Adan ngan Eva ngan ha ira katulinan an pagpamati ha maraot nga sagdon?

³ An maraot nga sagdon nagtikang ha tinikangan pa la han kasaysayan han tawo han sinulod hi Satanas ha eksena. Hi Satanas, nga mapahitas-on ngan naghimo han iya kalugaringon nga magsaragdon, nagsiring kan Eva nga magigin mas malipayon hiya ngan an iya bana kon hira an magpipili han ira karuyag nga klase han pagkinabuhi. (Gen. 3:1-6) Pero ha pagkamatuod, makikalugaringon an motibo ni Satanas. Karuyag niya nga hira Adan ngan Eva​—ngan an ira magigin mga anak—​magpasakop ngan magsingba ha iya imbes nga kan Jehova. Pero may-ada ba hiya ginhimo para ha ira? Hi Jehova an naghatag kanda Adan ngan Eva han ngatanan nga may-ada hira​—an ira pagin magkaupod, an makaruruyag nga hardin nga ira urukyan, ngan an ira perpekto nga lawas nga may kapas nga mabuhi ha waray kataposan.

⁴ Makasurubo, gintalapas nira Adan ngan Eva an Dios. Ha pagbuhat hito, iginbulag nira an ira kalugaringon ha iya. Sugad han aton hinbabaroan, makasurubo gud an nagin resulta hito. Pariho hin mga bukad nga gin-utod tikang ha tanom, hira Adan ngan Eva hinay-hinay nga nalagas ngan namatay. Nag-antos liwat an ira mga anak tungod han epekto han sala. (Roma 5:12) Bisan pa hito, ginpipili la gihapon han kadam-an nga tawo yana nga diri magpasakop ha Dios. Karuyag nira magkinabuhi uyon ha ira mga paagi. (Efe. 2:1-3) An mga resulta klaro nga nagpapakita nga “waray kinaadman” kon an mga tawo nakontra kan Jehova.​—Prob. 21:30.

5. May kalabotan ha mga tawo, ha ano nasarig an Dios, ngan husto ba hiya?

⁵ Bisan pa hito, nasarig hi Jehova nga may mga tawo, upod na an damu nga batan-on, nga mamimiling ngan mag-aalagad ha iya. (Sal. 103:17, 18; 110:3) Presyoso gud ha iya an sugad nga mga indibiduwal! Usa ka ba ha ira? Kon oo, sigurado nga nagpapahimulos ka han damu nga “kaopayan” o mag-opay nga butang tikang ha Dios nga nakakadugang han imo kalipay. (Basaha an Salmos 103:5; Prob. 10:22) Sugad han aton hihisgotan, inin mag-opay nga butang nag-uupod han hura nga espirituwal nga pagkaon, mag-opay gud nga kasangkayan, mapulsanon nga mga tumong, ngan tinuod nga kagawasan.

6. Kay ano nga sadang mo tagbawon an imo espirituwal nga panginahanglan, ngan paonan-o hi Jehova nagtatagana para ha imo?

⁶ Diri pariho ha mga hayop, may-ada ka espirituwal nga panginahanglan, ngan an imo la Maglalarang an makakatagbaw hito. (Mat. 4:4) Kon mamamati ka ha iya, magkakaada ka hilarom nga pagsabot, kinaadman, ngan kalipay. “Malipayon an mga mahunahunaon han ira espirituwal nga panginahanglan,” siring ni Jesus. (Mat. 5:3) Gintatagbaw han Dios an imo espirituwal nga panginahanglan pinaagi han iya Pulong ngan han hura nga espirituwal nga pagkaon nga iya igintatagana pinaagi han “matinumanon ngan maaramon nga uripon.” (Mat. 24:45) Ngan magkadurodilain gud ito nga pagkaon!​—Isa. 65:13, 14.

7. Ano an pipira nga benepisyo ha pagpahimulos han espirituwal nga pagkaon nga igintatagana han Dios?

⁷ An espirituwal nga pagkaon nga igintatagana han Dios maghahatag ha imo hin kinaadman ngan abilidad ha paghunahuna, nga makakaprotektar ha imo ha damu nga paagi. (Basaha an Proberbios 2:10-14.) Pananglitan, ini nga mga kalidad mabulig ha imo nga makilal-an an buwa nga mga katutdoan, sugad han kabuwaan nga waray Maglalarang. Magpuprotektar ito ha imo tikang ha kabuwaan nga an kwarta ngan mga panag-iya amo an makakaghatag hin kalipay. Ngan mabulig ito ha imo nga malikyan an sayop nga mga hingyap ngan panggawi nga makakadaot ha imo. Salit padayon nga pamilnga an diosnon nga kinaadman ngan abilidad ha paghunahuna, ngan tagda ito sugad nga bahandi!  Samtang nangangalimbasog ka ha pagkaada hito nga mga kalidad, mahibabaroan mo mismo tikang ha imo eksperyensya nga hinigugma ka ni Jehova ngan karuyag niya an pinakamaopay para ha imo.​—Sal. 34:8; Isa. 48:17, 18.

8. Kay ano nga sadang ka magin duok ha Dios yana, ngan ano an magigin kapulsanan hito ha imo ha tidaraon?

⁸ Diri mag-iiha, mabubungkag na an ngatanan nga bahin han kalibotan ni Satanas, ngan hi Jehova la an makakaghatag ha aton hin seguridad. Ngani, bangin umabot an panahon diin madepende kita ha iya para han aton sunod nga kakaunon! (Hab. 3:2, 12-19) Oo, yana na an panahon nga magin duok ha imo langitnon nga Amay ngan parig-unon an imo pagsarig ha iya. (2 Ped. 2:9) Kon bubuhaton mo ito, anoman an mahitabo ha imo palibot, aabaton mo an pariho han inabat han salmista nga hi David nga nagsurat: “Hi Jehova iginbutang ko gihapon ha atubangan ko: Tungud kay aadi hiya ha akon too nga kamot, diri ako hatatalindas.”​—Sal. 16:8.

9. (a) Sumala ha Juan 6:44, ano an ginbubuhat ni Jehova? (b) Ano an makatirigamnan kon may nakikilala kita nga iba nga Saksi?

⁹ Iginpapahirani ni Jehova adton iya gintutugotan nga magin membro han iya espirituwal nga pamilya; may pagkabuotan nga iginpapahirani niya an sinsero nga mga tawo ha tinuod nga pagsingba. (Basaha an Juan 6:44.) Kon siyahan mo pa la nga nakilala an usa nga diri Saksi, damu na ba an imo nahibabaroan mahitungod ha iya? Bangin gutiay gud la, labot la han iya ngaran ngan pisikal nga hitsura. Pero diri sugad hito an sitwasyon kon an siyahan mo pa la nga nakilala usa nga indibiduwal nga nakilala ngan nahigugma kan Jehova. Bisan kon iba an iya gintikangan, nasud, tribo, o kultura, damu na an imo hinbabaroan mahitungod ha iya, ngan damu liwat an iya hinbabaroan mahitungod ha imo!

10, 11. Ano an ginkakaparihoan han ngatanan nga katawohan ni Jehova, ngan paonan-o kita nagpapahimulos hito?

¹⁰ Pananglitan, nasasabtan dayon niyo nga pariho an iyo “yinaknan”​—an “uray nga yinaknan” han kamatuoran. (Sep. 3:9) Sugad nga resulta, maaram kamo kon ano an gintotoohan han tagsa ha iyo mahitungod ha Dios, suruklan ha moral, paglaom ha tidaraon, ngan iba pa. Ngan ini gud nga mga butang an importante nga mahibaroan ha usa ka tawo kay nabulig ini nga magkaada kamo kompyansa ngan pagtapod ha usa kag usa. Nabulig liwat ini nga magkaada kamo marig-on nga pagkamagsangkay nga magpapadayon ha waray kataposan.

 ¹¹ Salit kon nagsisingba ka kan Jehova, makakasiring ka gud nga may-ada ka han pinakamaopay nga kasangkayan. May-ada ka kasangkayan ha bug-os nga kalibotan, bisan kon waray mo pa hira makilala. May iba pa ba nga nagpapahimulos hinin presyoso nga regalo labot han katawohan ni Jehova?

12. Ano nga mapulsanon nga mga tumong an puydi mo himoon?

¹² Basaha an Eklesiastes 11:9–12:1. May-ada ka ba espirituwal nga mga tumong nga ginpapangalimbasogan mo nga makab-ot? Bangin nangangalimbasog ka nga magbasa han Biblia kada adlaw o nga pauswagon an imo abilidad ha pagyakan ngan pagtutdo. Anoman ito nga tumong, kon nakikita mo an mag-opay nga resulta​—o kon nakikita ito han iba ngan ginkukumendasyonan ka—​ano an imo inaabat? Sigurado nga nalilipay ka gud ngan inaabat mo nga naglampos ka. Ngan ito gud an sadang mo abaton, kay gin-uuna mo an kaburut-on han Dios kay han imo kalugaringon, pariho han ginbuhat ni Jesus.​—Sal. 40:8; Prob. 27:11.

13. Kay ano nga mas maopay an pag-alagad ha Dios kay ha pagpokus ha kalibotanon nga mga tumong?

¹³ Kon nagpupokus ka ha pag-alagad kan Jehova, nagbubuhat ka liwat hin buruhaton nga maghahatag ha imo hin tinuod nga kalipay ngan katuyoan ha kinabuhi. Hi apostol Pablo nagsurat: “Magmarig-on kamo, diri nababantad, nga pirme damu an ginbubuhat ha buruhaton han Ginoo, kay maaram kamo nga an iyo pag-alagad ha Ginoo diri nakakarag.” (1 Cor. 15:58) Ha kabaliktaran, an kinabuhi nga nakapokus ha kalibotanon nga mga tumong ngan mga panalinguha​—bisan kon baga hin malampuson gud ito—​waray gud kapulsanan. (Luc. 9:25) Napamatud-an ito ni Hadi Solomon, ngan mahibabaro kita hin leksyon ha iya ehemplo.​—Roma 15:4.

14. Ano an imo mahibabaroan tikang ha eksperimento ni Solomon may kalabotan ha pagkalipay?

¹⁴ Hi Solomon, nga riko hinduro ngan maimpluwensya, nag-eksperimento nga sarihan an pagkalipay ngan kitaon kon may maopay ba ito nga resulta. (Ekles. 2:1-10) Naghimo hiya hin mga balay, nagdisenyo hin mga garden ngan parke, ngan ginbuhat an ngatanan niya nga karuyag. Ano an iya inabat katapos hito? Nakontento ba hiya ngan nagin malipayon? Diri na naton kinahanglan tiguhon pa an baton hini. Ginsumatan kita mismo ni Solomon. Hiya nagsurat: “Ako nagtan-aw ha ngatanan nga buruhaton nga ginbuhat han akon mga kamot, . . . an ngatanan parayaw . . . ngan waray kapulsanan.” (Ekles. 2:11) Mapwersa gud ito nga leksyon! Iaaplikar mo ba ito?

15. Kay ano nga importante an pagtoo, ngan ano an mga kapulsanan hito sugad han ginsisiring han Salmos 32:8?

¹⁵ Diri karuyag ni Jehova nga maeksperyensyahan mo anay an kasakit nga resulta han sayop nga desisyon antes mo mahibaroan an leksyon. Oo, kinahanglan mo an pagtoo basi magin masinugtanon ha Dios ngan unahon ha imo kinabuhi an iya kaburut-on. Importante ito nga pagtoo, ngan diri mo gud pagbabasolan an mga desisyon nga imo ginhihimo tungod han imo pagtoo. Oo, diri gud kakalimtan ni Jehova “an gugma nga [imo] iginpakita para ha iya ngaran.” (Heb. 6:10) Salit buhata an ngatanan basi magin marig-on an imo pagtoo, ngan sugad nga resulta, makikita mo mismo nga karuyag han imo langitnon nga Amay an pinakamaopay para ha imo.​—Basaha an Salmos 32:8.

16. Kay ano nga sadang naton pabilhan an kagawasan ngan gamiton ito hin maaramon?

¹⁶ Hi Pablo nagsurat: “Kon hain an espiritu ni Jehova, may-ada kagawasan.” (2 Cor. 3:17) Oo, hinigugma ni Jehova an kagawasan, ngan iginbutang niya ito nga gugma ha imo kasingkasing. Pero karuyag niya nga gamiton mo an imo kagawasan ha maaramon nga paagi, kay magpapanalipod ito ha imo. Bangin may kilala ka nga mga batan-on nga nagkikita hin pornograpiya, nagbubuhat hin seksuwal nga imoralidad, naapi ha delikado nga mga isport, o nag-aabuso ha droga o de-alkohol nga irimnon. Oo, bangin abaton nira an kalipay ha halipot nga panahon. Pero kasagaran na nga maraot an resulta  hito nga mga buhat, sugad han pagkaada sakit, pagin adik, o kamatayon pa ngani. (Gal. 6:7, 8) Matin-aw, an ira “kagawasan” nakakadaot ngan nakakalimbong ha ira kalugaringon.​—Tito 3:3.

17, 18. (a) Ha ano nga paagi an pagin masinugtanon ha Dios naghahatag hin kagawasan? (b) Ano an kaibahan han kagawasan nga napahimulosan nira Adan ngan Eva ha tinikangan kon ikompara ha kagawasan han mga tawo yana?

¹⁷ Ha luyo nga bahin, may mga kilala ka ba nga nagkasakit tungod kay ginsunod nira an mga suruklan han Biblia? Matin-aw, an pagin masinugtanon kan Jehova mapulsanon ha kahimsog ngan naghahatag hin tinuod nga kagawasan. (Sal. 19:7-11) Dugang pa, kon ginagamit mo hin maaramon an imo kagawasan​—karuyag sidngon, ginpipili mo nga sundon an perpekto nga mga balaud ngan prinsipyo han Dios—​iginpapakita mo ha Dios, pati ha imo mga kag-anak nga mahimo ka taporan hin dugang nga kagawasan. Ngani, katuyoan han Dios nga ha urhi tagan an iya matinumanon nga mga surugoon hin perpekto nga kagawasan, nga iginhuhulagway ha Biblia sugad nga an “mahimayaon nga kagawasan han iya mga anak.”​—Roma 8:21.

¹⁸ Hira Adan ngan Eva nagpahimulos hito nga kagawasan. Ha hardin han Eden, pira an ginsugo ha ira han Dios nga diri nira sadang buhaton? Usa la. Diri nira sadang kaunon an bunga han usa nga puno. (Gen. 2:9, 17) Masisiring mo ba nga istrikto hinduro o diri makatadunganon an Dios tungod han iya paghatag hito nga balaud? Diri gud! Ikompara ito ha damu hinduro nga balaud nga ginhimo han mga tawo ngan iginpipirit nga hibaroan ngan sugton han iba.

19. Ano an igintututdo ha aton ni Jehova ngan ni Jesus nga mabulig ha aton nga magkaada kagawasan?

¹⁹ Maaramon gud an paagi han pagtratar ni Jehova ha iya mga surugoon. Imbes nga tagan kita hin damu hinduro nga balaud, mapailubon nga gintututdoan kita niya nga sundon an balaud han gugma. Karuyag niya nga magkinabuhi kita uyon ha iya mga prinsipyo ngan kangalasan naton an maraot. (Roma 12:9) An kan Jesus Sermon ha Bukid usa nga maopay nga ehemplo hito nga paagi han pagtutdo, kay ginhihisgotan hito kon ano gud an mga hinungdan han sayop nga mga buhat. (Mat. 5:27, 28) Sugad nga Hadi han Ginhadian han Dios, padayon nga tututdoan kita han Kristo ha bag-o nga kalibotan basi perpekto nga masubad naton an iya panhunahuna ha katadongan ngan karaotan. (Heb. 1:9) Hihimoon liwat ni Jesus nga perpekto an aton lawas ngan hunahuna. Handurawa la, diri ka na masusulay ha pagbuhat hin sala o mag-aantos han makasurubo nga mga epekto han sala. Ngan ha urhi, mapapahimulsan mo na an “mahimayaon nga kagawasan” nga iginsaad ha imo ni Jehova.

20. (a) Paonan-o ginagamit ni Jehova an iya kagawasan? (b) Paonan-o ka magpapahimulos ha ehemplo han Dios?

²⁰ Ha bag-o nga kalibotan, may mga limitasyon pa gihapon an aton kagawasan. Gugma ha Dios ngan ha aton igkasi-tawo an maggigiya ha aton ha paggamit han aton kagawasan. Ngani, ginhahangyo kita ni Jehova nga subaron naton hiya. Waray limitasyon an iya kagawasan, pero ginpili niya nga gugma an maggiya ha iya ha iya pagtratar ha iya intelihente nga mga linarang. (1 Juan 4:7, 8) Salit makatadunganon an pagsiring nga magkakaada la kita tinuod nga kagawasan kon ginsusubad naton an Dios.

21. (a) Ano an inabat ni David mahitungod kan Jehova? (b) Ano an aton hihisgotan ha sunod nga artikulo?

²¹ Gin-aapresyar mo ba an damu nga mag-opay nga butang nga iginhahatag ha imo ni Jehova, sugad han hura nga espirituwal nga pagkaon, mag-opay nga kasangkayan, mapulsanon nga mga tumong, ngan an paglaom nga magkaada perpekto nga kagawasan? (Sal. 103:5) Kon oo, hinaot abaton mo liwat an inabat ni David han nag-ampo hiya, nga aton mababasa ha Salmos 16:11: “Ipakikita mo ha akon an dalan ha kinabuhi: Ha imo atubangan aada an kapuraw han kalipayan; Ha imo too nga kamot mayada mga kalipayan nga ha kagihaponan.” Ha sunod nga artikulo, hihisgotan naton an iba pa nga presyoso nga mga kamatuoran ha Salmos 16. Mabulig ini ha aton nga mahibaro hin dugang pa mahitungod ha mga paagi kon paonan-o magkakaada malipayon gud nga kinabuhi.