ANO an imo inaabat kon nakakakarawat ka hin makaparig-on nga surat tikang ha imo sangkay? An disipulo nga hi Timoteo nakakarawat hin sugad nga surat tikang kan apostol Pablo. Ito nga surat amo na yana an libro han Biblia nga 2 Timoteo. Sigurado nga eksayted gud hi Timoteo nga mamiling hin mamingaw nga lugar basi basahon didto an surat han iya hinigugma nga sangkay. Posible nga naghunahuna hi Timoteo: ‘Kumusta daw la hi Pablo? May igsasagdon daw la hiya ha akon nga makakabulig ha akon toka? Makakabulig ba ini nga surat basi maglampos an akon ministeryo ngan an akon pagbulig ha iba?’ Sugad han aton mahibabaroan, nabaton ni Timoteo ito nga mga pakiana ngan an iba pa pinaagi hiton importante nga surat. Pero yana, magpokus kita ha pipira nga sagdon tikang hito nga surat nga makakabulig ha aton.

Han ginbasa ni Timoteo an tinikangan han surat, sigurado nga inabat dayon niya an gugma ha iya ni Pablo. Gintawag hiya ni Pablo nga ‘hinigugma nga anak.’ (2 Tim. 1:2) Bisan kon hi Timoteo posible sobra 30 anyos pa la han nakarawat niya ito nga surat han mga 65 C.E., hito nga panahon eksperyensyado na hiya nga tigurang. Nakaupod na niya hi Pablo hin sobra napulo ka tuig ngan damu gud an iya nahibaroan tikang ha iya.

Sigurado nga naparig-on gud hi Timoteo han nahibaroan niya nga hi Pablo nagpapabilin nga matinumanon bisan pa ha mga kasakitan. Hito nga panahon, priso hi Pablo ha Roma ngan hirani na patayon. (2 Tim. 1:15, 16; 4:6-8) Sigurado nga nakita ni Timoteo an kaisog ni Pablo tungod kay hi Pablo nagsiring: “Padayon nga gin-iilob ko an ngatanan nga butang.” (2 Tim. 2:8-13) Pariho kan Timoteo, mapaparig-on liwat kita han ehemplo ni Pablo ha pagin mapailubon.

Gin-aghat ni Pablo hi Timoteo nga hunahunaon nga importante gud an iya toka ha pag-alagad ha Dios. Karuyag ni Pablo nga “padayon nga pasigahon [ni Timoteo] sugad hin kalayo an regalo han Dios” nga iginhatag ha iya. (2 Tim. 1:6) Gin-gamit ni Pablo an pulong nga khaʹri·sma para ha “regalo.” Ito nga Griego nga pulong kaurogan na nga nagtutudlok ha libre ngan diri matupngan nga regalo, usa nga butang nga iginhahatag ha usa nga tawo bisan kon waray hiya ginhihimo nga pangalimbasog ngan diri unta angay makakarawat hito. Nakakarawat hi Timoteo hini nga regalo han ginpili  hiya nga magserbi ha kongregasyon ha espesyal nga paagi.​—1 Tim. 4:14.

Ano an angay buhaton ni Timoteo hini nga regalo? Samtang ginbabasa niya an mga pulong nga “padayon nga pasigahon sugad hin kalayo,” bangin nahunahuna niya an kalayo nga ginpapasiga han mga tawo nga usahay nagigin bága na la. Ito nga mga bága kinahanglan pasigahon basi magkaada kalayo ngan magin mas mapaso. Usa nga diksyonaryo an nagsiring nga an Griego nga pulong (a·na·zo·py·reʹo) nga gin-gamit ni Pablo nangangahulogan hin “dagkotan utro, buhion utro, pasigahon,” salit nagpapasabot ito nga magin eksayted ngan madasigon ha buruhaton. Sugad hin nasiring hi Pablo kan Timoteo: ‘Himoa an imo pinakamaopay ha imo toka!’ Yana, ito liwat an kinahanglan naton buhaton​—magin madasigon gud ha aton pag-alagad.

Samtang ginbabasa ni Timoteo an surat han iya hinigugma nga sangkay, may nabasa pa hiya dida hito nga makakabulig nga magin malampuson an iya ministeryo. Hi Pablo nagsurat: “Bantayi inin maopay nga igintapod ha imo pinaagi han baraan nga espiritu nga aadi ha aton.” (2 Tim. 1:14) Ano ito nga igintapod kan Timoteo? Ha nahiuna nga bersikulo, gin-unabi ni Pablo an “mag-opay nga mga pulong,” an kamatuoran nga aada ha Kasuratan. (2 Tim. 1:13) Sugad nga Kristiano nga ministro, kinahanglan itutdo ni Timoteo an kamatuoran ha sulod ngan ha gawas han kongregasyon. (2 Tim. 4:1-5) Ginpili liwat hi Timoteo sugad nga tigurang basi atamanon an panon han Dios. (1 Ped. 5:2) Mababantayan ni Timoteo an igintapod ha iya​—an kamatuoran nga kinahanglan niya itutdo—​pinaagi ha pagsarig ha baraan nga espiritu ni Jehova ngan ha Iya Pulong.​—2 Tim. 3:14-17.

Yana, gintaporan liwat kita han kamatuoran nga aton igintututdo ha iba. (Mat. 28:19, 20) Basi diri mawara an aton apresasyon hinin maopay nga igintapod ha aton, kinahanglan padayon kita nga mag-ampo ngan regular nga pag-adman an Pulong han Dios. (Roma 12:11, 12; 1 Tim. 4:13, 15, 16) Bangin may-ada liwat kita dugang nga toka ha pag-alagad, sugad han pagin tigurang o pagin aada ha bug-os-panahon nga pag-alagad. Ito nga igintapod ha aton kinahanglan magpagios ha aton nga magin mapainubsanon, nga mabulig ha aton nga bug-os nga sumarig ha Dios. Salit mababantayan, o mapuproteksyonan, naton an igintapod ha aton pinaagi ha pagpabili hito ngan pagsarig han bulig ni Jehova basi matuman ta ito.

Kaupod han toka ni Timoteo an pagbansay ha iba. Salit gin-aghat hiya ni Pablo: ‘An mga butang nga imo nabatian ha akon, itapod ini ha matinumanon nga kalalakin-an, basi hira liwat magin kwalipikado gud ha pagtutdo ha iba.’ (2 Tim. 2:2) Oo, an mga nahibaroan ni Timoteo kinahanglan liwat niya itutdo ha iba nga kabugtoan. Kinahanglan maningkamot liwat an mga paramangno ha kongregasyon nga buhaton ito. An maopay nga paramangno diri naaawa nga itutdo ha iba an iya nahibabaroan mahitungod ha iya toka. Lugod, gintututdoan niya an iba basi mabuhat liwat nira an toka. Diri hiya nababaraka nga bangin mas damu an ira mahibaroan o magin mas maabilidad hira kay ha iya. Salit, an igintututdo han paramangno diri la an mga paagi ha pagbuhat ha usa nga toka. Lugod, karuyag niya buligan an iya ginbabansay nga magkaada maopay nga pagturotimbang ngan hilarom nga pagsabot basi magin hamtong ha espirituwal. Hito nga paagi, an “matinumanon nga kalalakin-an” nga iya gintututdoan magigin daku gud nga bulig ha kongregasyon.

Waray ruhaduha nga ginpabilhan gud ni Timoteo an makaparig-on nga surat ni Pablo. Sigurado nga pauroutro nga ginbinasa niya an mapulsanon nga mga sagdon ngan ginpamalandong kon paonan-o niya ito maiaaplikar hin maopay ha iya mga toka.

Karuyag liwat naton iaplikar ito nga mga sagdon. Paonan-o? Pinaagi ha paningkamot nga padayon nga pasigahon sugad hin kalayo an regalo ha aton, bantayan an igintapod ha aton, ngan itutdo ha iba an aton eksperyensya ngan kahibaro. Hito nga paagi, ‘bug-os nga matutuman [naton] an aton ministeryo,’ sugad han ginsiring ni Pablo kan Timoteo.​—2 Tim. 4:5.