Ha tinuod la, diri ito an iginpapasabot hini nga bersikulo. Lugod, nagtutudlok ito ha usa nga tawo nga natutumba ha paagi nga pauroutro hiya nga nakakaeksperyensya hin mga problema o kakurian ngan nabuhat utro ha paagi nga nakakarekober hiya.

Kitaon naton an konteksto: “Ayaw paghulat nga nakatago hirani ha balay han matadong nga tawo nga may maraot ka nga katuyoan; ayaw rub-a an iya lugar nga pahuwayan. Kay an matadong nga tawo bangin matumba hin pito ka beses, ngan mabuhát hiya utro, pero an magraot mahipapakdol tungod han karat-an. Kon matumba an imo kaaway, ayaw pagrayhak, ngan kon mahipakdol hiya, ayaw kalipay ha imo kasingkasing.”​—Prob. 24:15-17.

May mga naghuhunahuna nga an bersikulo 16 naaplikar ha usa nga tawo nga nakakasala pero nagbabasol ngan nagkakaada utro maopay nga relasyon ha Dios. Duha nga British nga klero an nagsurat nga “agsob gamiton han mga parawali, hadto ngan yana, ini nga teksto” hito nga paagi. Ito nga mga klero nagsiring liwat nga ito nga pagsaysay nangangahulogan nga “an usa nga maopay nga tawo mahimo matumba pinaagi . . . ha pakabuhat hin seryoso nga mga sala pero diri nawawara an iya gugma ha Dios, ngan ha kada niya pakakasala nabuhat hiya pinaagi ha pagbasol.” Ito nga opinyon maruruyagan gud han usa nga nadiri pag-ato han iya tendensya nga makasala. Bangin maghunahuna hiya nga bisan kon pauroutro hiya nga nakakasala, pirme hiya papasayloon han Dios.

Pero diri ito an iginpapasabot han bersikulo 16.

An Hebreo nga pulong nga iginhubad nga “matumba” ha bersikulo 16 ngan 17 mahimo gamiton ha iba-iba nga paagi. Mahimo ito mangahulogan hin usa nga baka nga natumba ha kalsada, usa nga tawo nga nahulog tikang ha atop, o usa nga bato nga nahulog ha tuna. (Deut. 22:4, 8; Amos 9:9) Ito nga pulong mahimo liwat mangahulogan hin simboliko nga katumba o kahipakdol, pariho hini nga ehemplo: “Gin-gigiyahan ni Jehova an mga pitad han usa nga tawo kon nalilipay Hiya ha iya panggawi. Bisan kon mahipakdol hiya, diri hiya mahipapakulob, kay ginkakaptan ni Jehova an iya kamot.”​—Sal. 37:23, 24; Prob. 11:5.

Pero, tagda an ginsiring ni Propesor Edward H. Plumptre: “An Hebreo nga pulong para ha [“matumba”] diri gud ginagamit may kalabotan ha pakabuhat hin sala.” Salit, iginsumaryo han usa pa nga eskolar an bersikulo 16 hini nga paagi: “Magigin waray pulos ngan magigin lugi la an usa kon mamaltratuhon niya an katawohan han Dios, tungod kay pirme hira maglalampos​—an mga magraot diri!”

Salit, an “katumba” nga gin-uunabi ha Proberbios 24:16 diri nagtutudlok ha pakabuhat hin sala, kondi ha pauroutro nga pakaeksperyensya hin mga problema o kakurian. Hinin maraot nga kalibotan, an usa nga matadong mahimo makaeksperyensya hin mga problema ha kahimsog o iba pa nga mga problema. Bangin duro nga pagtimarauton pa ngani hiya han gobyerno tungod han iya pagtoo. Pero makakasarig hiya nga bubuligan hiya han Dios nga makapailob ngan maglampos. Pakianhi an imo kalugaringon, ‘Diri ba nakikita ko nga kaurogan na nga nakakapailob an mga surugoon han Dios ha mga pagsari?’ Kay ano? Kay nasarig kita nga “ginbubuligan ni Jehova an ngatanan nga natutumba ngan ginbabangon an ngatanan nga nabubug-atan.”​—Sal. 41:1-3; 145:14-19.

“An matadong nga tawo” diri nalilipay nga may mga problema an iba. Lugod, nalilipay hiya kay maaram hiya nga “maghihingaopay adton may kahadlok ha tinuod nga Dios, kay may kahadlok hira ha iya.”​—Ecles. 8:11-13; Job 31:3-6; Sal. 27:5, 6.