1. Ano an usa nga rason kon kay ano nga iginpariho ni Jesus an iya mga sumurunod ha mga karnero?

IGINPARIHO ni Jesus an iya relasyon ha iya mga sumurunod ha duok nga relasyon han usa nga paraataman ngan han iya mga karnero. (Juan 10:14) Angayan gud ito nga pagkompara. Kilala han mga karnero an ira paraataman ngan namamati hira han iya tingog. Ito mismo an naeksperyensyahan han usa nga turista. Hiya nagsiring: “Karuyag namon piktyuran an pipira nga karnero ngan naningkamot kami nga humirani hira ha amon. Pero waray hira sumunod ha amon kay diri nira kilala an amon tingog. Katapos, inabot an bata nga lalaki nga nag-aataman ha ira, ngan han gintawag niya ito nga mga karnero, sinunod dayon hira.”

2-3. (a) Paonan-o iginpapakita han mga sumurunod ni Jesus nga namamati hira han iya tingog? (b) Ano an aton hihisgotan hini nga artikulo ngan ha masunod?

² An eksperyensya hito nga turista nagpapahinumdom ha aton han ginsiring ni Jesus mahitungod ha iya mga karnero—an iya mga disipulo. Hiya nagsiring: “Mamamati hira ha akon tingog.” (Juan 10:16) Pero hi Jesus aadto ha langit. Paonan-o naton masisiring nga namamati kita ha iya? Namamati kita ha tingog han aton Agaron kon igin-aaplikar naton an iya mga katutdoan.—Mat. 7:24, 25.

³ Hini nga artikulo ngan ha masunod, hihisgotan naton an pipira nga katutdoan ni Jesus. Sugad han aton mahibabaroan, gintutdoan kita ni Jesus nga dapat diri na naton buhaton an pipira nga butang ngan dapat buhaton naton an iba nga butang. Hihisgotan anay naton an duha nga iginsugo ha aton han maopay nga paraataman nga diri na naton buhaton.

4. Sumala ha Lucas 12:29, ano an mahimo magin hinungdan ha “pagkinabaraka hin sobra”?

⁴ Basaha an Lucas 12:29. Gin-aghat ni Jesus an iya mga sumurunod nga ‘[diri] na magkinabaraka hin sobra’ mahitungod han ira materyal nga panginahanglan. Maaram kita nga an sagdon ni Jesus pirme maaramon ngan husto. Karuyag naton iaplikar ito, pero usahay bangin nakukurian kita ha pagbuhat hito. Kay ano?

5. Kay ano nga an iba bangin nababaraka kon paonan-o magkakaada han ira materyal nga panginahanglan?

 ⁵ An pipira bangin nababaraka kon paonan-o hira magkakaada materyal nga panginahanglan—pagkaon, bado, ngan urukyan. Bangin naukoy hira ha pobre nga nasud. Bangin nakukurian hira ha pagkaada igo nga kità nga makakasustento han panginahanglan han ira pamilya. O bangin namatay an nagpapakabuhi ha ira pamilya, salit nagkukuri hira ha pinansyal. Dugang pa, bangin damu an nawad-an hin trabaho ngan pakabuhi tungod han COVID-19 nga pandemya. (Ecles. 9:11) Kon nakakaeksperyensya ka hin bisan hain hito o iba pa nga problema, paonan-o mo masusunod an sugo ni Jesus nga diri na magkinabaraka?

6. Makausa, ano an nahitabo kan apostol Pedro?

⁶ Makausa, han hi apostol Pedro ngan an iba pa nga apostol nakadto ha Dagat han Galilea sakay hin usa nga baluto durante han subasko, nakita nira nga hi Jesus naglalakat ha bawbaw han tubig. Hi Pedro nagsiring: “Ginoo, kon ikaw ito, pakadaa ako ha imo ha bawbaw han tubig.” Katapos sidngan hiya ni Jesus “kadi,” hi Pedro hinaw-as ha baluto ngan “naglakat ha bawbaw han tubig tipakadto kan Jesus.” Pansina an sunod nga nahitabo. “Han ginkita niya an subasko, nahadlok hiya. Ngan han nagtikalunod hiya, ginuliat hiya: ‘Ginoo, talwasa ako!’”  Igin-unat ni Jesus an iya kamot ngan gintalwas hiya. Hinumdumi, nakalakat hi Pedro ha bawbaw han mabalud nga dagat han nakada an iya pokus kan Jesus. Pero han nagkita hi Pedro ha subasko, nahadlok gud hiya ngan nagruhaduha salit nagtikalunod hiya.—Mat. 14:24-31.

7. Ano an aton mahibabaroan ha ehemplo ni Pedro?

⁷ May mahibabaroan kita ha ehemplo ni Pedro. Han hinaw-as hi Pedro ha baluto ngan naglakat ha bawbaw han tubig, waray hiya maghunahuna nga mahahadlok hiya ha subasko ngan magtitikalunod. Karuyag niya nga padayon nga makalakat ha bawbaw han tubig tubtob nga makaabot ha iya Agaron. Pero waray hiya makapabilin nga pokus hito nga iya tumong. Yana, kinahanglan naton an pagtoo basi makaya an mga problema, sugad la nga ginkinahanglan ni Pedro an pagtoo basi makalakat ha bawbaw han tubig. Kon mawawara an aton pokus kan Jehova ngan ha iya mga saad, magtitikalunod kita ha espirituwal. Anoman nga simboliko nga bagyo an umabot ha aton, kinahanglan magpabilin kita nga pokus kan Jehova ngan ha iya abilidad ha pagbulig ha aton. Paonan-o naton ito mahihimo?

8. Ano an makakabulig ha aton nga diri sobra nga magkinabaraka ha aton materyal nga panginahanglan?

⁸ Imbes nga magkinabaraka mahitungod han aton mga problema, kinahanglan sumarig kita kan Jehova. Hinumdumi nga an aton mahigugmaon nga Amay, hi Jehova, nagsasaad nga itatagana niya an aton materyal nga panginahanglan kon uunahon naton an espirituwal nga mga butang. (Mat. 6:32, 33) Pirme niya gintutuman ito nga saad. (Deut. 8:4, 15, 16; Sal. 37:25) Kon gintataganahan ni Jehova an mga tamsi ngan mga bukad, diri gud kita angay mabaraka han aton kakaunon o isusul-ot! (Mat. 6:26-30; Fil. 4:6, 7) Sugad la nga ginpapagios han gugma an mahigugmaon nga mga kag-anak basi itagana an materyal nga panginahanglan han ira mga anak, an aton langitnon nga Amay ginpapagios liwat han gugma basi itagana an materyal nga panginahanglan han iya katawohan. Oo, makakasiguro gud kita nga diri kita papabay-an ni Jehova!

9. Ano an imo mahibabaroan ha eksperyensya han usa nga mag-asawa?

⁹ Tagda an usa nga eksperyensya nga nagpapakita kon paonan-o mahimo itagana ni Jehova an aton materyal nga panginahanglan. Usa nga mag-asawa nga aada ha bug-os-panahon nga pag-alagad an nagbiyahe hin usa ka oras gamit an ira daan na nga awto basi kuhaon an pipira nga sister nga naukoy ha refugee center para makatambong ha katirok. An brother nagsiring: “Katapos han katirok, gin-imbitar namon an mga sister para ha pangaon, pero nasantop namon nga waray ngay-an kami ipapakaon ha ira.” Ano an bubuhaton hito nga mag-asawa? An brother nagpadayon: “Pag-abot namon ha balay, may nakita kami ha gawas han amon purtahan nga duha nga dagku nga supot nga may mga pagkaon. Diri kami maaram kon hin-o an nagbutang hito. Gin-ataman kami ni Jehova.” Waray pag-iha, naguba an awto han mag-asawa. Kinahanglan nira ito ha ira ministeryo; pero waray hira kwarta nga pampaayad. Han gindara nira an ira awto ha usa nga talyer basi hibaroan kon pira an ira magagasto hito, may lalaki nga nagpakiana: “Kanay ini awto?” An brother nagsiring nga iya ito ngan may guba ito. An lalaki binaton: “Okey la. Karuyag han akon asawa ini nga klase hin awto ngan ini mismo nga kolor an iya karuyag. Pira an imo pagbaligya hito?” Iginbaligya han brother an awto ngan nakapalit hiya hin iba nga awto. Hiya nagsiring: “Diri gud namon maisaysay an amon inabat hito nga adlaw. Maaram kami nga diri la ito basta nahituman la. Ginbuligan kami ni Jehova.”

10. Paonan-o kita gindadasig han Salmo 37:5 nga diri magkinabaraka mahitungod han aton materyal nga panginahanglan?

¹⁰ Kon mamamati kita ha maopay nga paraataman  ngan diri na kita sobra nga magkikinabaraka mahitungod han aton materyal nga panginahanglan, makakasiguro kita nga hi Jehova magtatagana para ha aton. (Basaha an Salmo 37:5; 1 Ped. 5:7) Tagda an mga sitwasyon nga gin-unabi ha  parapo 5. Tubtob yana, mahimo gamiton ni Jehova an usa nga ulo han pamilya o usa nga agaron basi buligan kita nga magkaada han aton adlaw-adlaw nga panginahanglan. Kon diri na ito mahihimo han ulo han pamilya o kon mawad-an kita hin trabaho, aatamanon kita ni Jehova ha iba nga paagi. Makakasiguro gud kita hito. Yana, hisgotan naton an usa pa nga igin-aaghat ha aton han maopay nga paraataman nga diri na naton dapat buhaton.

11. Sumala ha Mateo 7:1, 2, ano an ginsiring ni Jesus nga diri na naton dapat buhaton, ngan kay ano nga usahay makuri an pagbuhat hito?

¹¹ Basaha an Mateo 7:1, 2. Maaram hi Jesus nga an iya diri perpekto nga mga mamarati may tendensya nga magin kritiko ha iba. Salit hiya nagsiring: “Ayaw na kamo paghukom.” Bangin naniningkamot kita nga diri maghukom ha aton mga igkasi-tumuroo. Pero kita ngatanan diri perpekto. Kon napapansin naton nga usahay nagigin kritiko na kita, ano an dapat naton buhaton? Pamati kan Jesus, ngan pangalimbasog nga diri na maghukom.

12-13. Paonan-o an pagpamalandong ha pagtratar ni Jehova kan Hadi David makakabulig ha aton nga diri na maghukom ha iba?

¹² Makakapahimulos kita ha pagpamalandong han ehemplo ni Jehova. Nagpupokus hiya ha mag-opay nga kalidad han mga tawo. Makikita naton ito ha iya pagtratar kan Hadi David, nga nakabuhat hin seryoso nga mga sala. Pananglitan, nakabuhat hiya hin pag-adulteryo kan Bat-sheba, ngan iginpapatay pa ngani niya an asawa ni Bat-sheba. (2 Sam. 11:2-4, 14, 15, 24) Tungod hito, diri la hi David an nag-antos kondi pati an iya pamilya, upod na an iba niya nga mga asawa. (2 Sam. 12:10, 11) Ha usa pa nga higayon, waray makagpakita hi David hin bug-os nga pagsarig kan Jehova han ginpaihap niya an kasundalohan han Israel bisan kon waray hiya sugoa ni Jehova ha pagbuhat hito. Ginbuhat ito ni David bangin tungod kay iginrakudaku niya an kadamu han iya kasundalohan ngan nasarig hiya dida hito. Ano an nagin resulta? Mga 70,000 nga Israelita an namatay tungod ha peste!—2 Sam. 24:1-4, 10-15.

¹³ Kon naukoy ka ha Israel hito nga panahon, ano an imo magigin pagkita kan David? Huhukman mo ba hiya sugad nga diri angay pakitaan ni Jehova hin kalooy? Diri sugad hito an pagkita ha iya ni Jehova. Nagpokus hi Jehova ha kabug-osan nga rekord han pagkamatinumanon ni David ngan han iya sinsero nga pagbasol. Tungod hito, ginpasaylo ni Jehova hi David ha iya seryoso nga mga sala. Maaram hi Jehova nga hinigugma gud hiya ni David ngan karuyag ni David nga buhaton kon ano an husto. Diri ka ba mapasalamaton nga an aton mag-opay nga kalidad ngan mga ginbubuhat an ginkikita ha aton han Dios?—1 Hadi 9:4; 1 Cron. 29:10, 17.

14. Ano an makakabulig ha mga Kristiano nga diri na maghukom ha iba?

¹⁴ Hi Jehova makonsiderasyon ha diri perpekto nga mga tawo, salit kinahanglan magin makonsiderasyon liwat kita ha usa kag usa ngan kitaon naton an maopay nga mga kalidad han iba. Kasagaran na nga masayon la makita an mga kaluyahan han iba ngan magin kritiko ha ira. Pero an usa nga espirituwal nga tawo gintatratar la gihapon niya hin maopay an iba bisan kon nakikita niya an ira mga kaluyahan. An usa nga diamante nga waray pa tabasa bangin diri maopay pagkit-on, pero nasasabtan han maaramon nga tawo nga magigin maopay gud ito ngan marahalon kon tabason na ito ngan pahamison. Pariho kan Jehova ngan kan Jesus, kinahanglan diri kita magpokus ha mga kaluyahan han mga  tawo. Lugod, magpokus kita ha ira mag-opay nga kalidad.

15. Paonan-o an paghunahuna han kahimtang han mga tawo makakabulig ha aton nga diri magin kritiko ha ira?

¹⁵ Labot la ha pagpokus ha mag-opay nga mga kalidad han iba, ano pa an makakabulig ha aton nga diri magin kritiko ha ira? Hunahunaa an ira kahimtang. Tagda ini nga ehemplo. Usa ka adlaw ha templo, may nakita hi Jesus nga nagkukuri nga balo nga babaye nga naghulog ha kahon han kontribusyon hin duha nga sinselyo nga gutiay gud an kantidad. Hi Jesus waray magpakiana: “Kay ano nga ito la an iya iginhulog?” Imbes nga magpokus ha kantidad nga iginhulog, nagpokus hi Jesus ha motibo ngan kahimtang han balo ngan gindayaw niya hiya tungod kay ginhimo niya an bug-os niya nga makakaya.—Luc. 21:1-4.

16. Ano an imo nahibaroan ha eksperyensya ni Veronica?

¹⁶ Makikita naton an pagkaimportante ha paghunahuna han kahimtang han iba pinaagi ha pag-usisa han eksperyensya han sister nga hi Veronica. May kakongregasyon hiya nga magnanay ngan ito nga nanay nagsusolo nga kag-anak. Hi Veronica nagsiring: “Nakikita ko nga baga hin diri hira aktibo ha mga buruhaton ha kongregasyon. Salit nagin negatibo an akon pagkita ha ira. Pero makausa, nakapartner ko ha ministeryo ito nga nanay. Nagsiring hiya nga an iya anak autistic [may depekto ha hunahuna]. Ginbubuhat niya an ngatanan para maitagana an ira pisikal ngan espirituwal nga panginahanglan. Usahay, tungod ha kondisyon han iya anak, ha iba nga kongregasyon na la hiya natambong.”  Hi Veronica nagsiring: “Diri ako maaram nga makuri gud an iya kahimtang. Yana, gin-aapresyar ngan ginrirespeto ko gud ito nga sister tungod han tanan niya nga ginbubuhat ha pag-alagad kan Jehova.”

17. Ano an iginpapabuhat ha aton han Santiago 2:8, ngan paonan-o naton ito mahihimo?

¹⁷ Ano an dapat naton buhaton kon mapansin naton nga ginhuhukman na naton an usa nga igkasi-tumuroo? Kinahanglan hinumdoman naton nga dapat higugmaon naton an kabugtoan. (Basaha an Santiago 2:8.) Kinahanglan sinsero nga mag-ampo liwat kita kan Jehova, makimalooy kita ha iya nga buligan kita nga diri na maghukom. Maipapakita naton nga nagios kita uyon ha aton mga pag-ampo pinaagi ha paggahin hin panahon nga makaupod an tawo nga ginhuhunahunaan naton hin negatibo. Pinaagi hito, mas makikilala naton hiya. Mahimo liwat naton hiya imbitaron nga umupod ha aton ha pagsangyaw o ha usa nga pangaon. Samtang mas nakikilala naton hin maopay an bugto, nangangalimbasog kita nga sundon an ehemplo ni Jehova ngan ni Jesus pinaagi ha pagkita han iya mag-opay nga kalidad. Hito nga paagi, iginpapakita naton nga namamati kita han sugo han maopay nga paraataman nga diri na maghukom.

18. Paonan-o naton maipapakita nga namamati kita ha tingog han maopay nga paraataman?

¹⁸ Sugad la nga an mga karnero namamati ha tingog han ira paraataman, an mga sumurunod ni Jesus namamati liwat han iya tingog. Kon maniningkamot kita nga diri na magkinabaraka mahitungod han aton materyal nga panginahanglan ngan diri na maghukom ha iba, bibendisyonan ni Jehova ngan ni Jesus an aton mga pangalimbasog. Bahin man kita han “gutiay nga panon” o han “iba nga mga karnero,” hinaot padayon nga mamati kita ngan sumugot han tingog han maopay nga paraataman. (Luc. 12:32; Juan 10:11, 14, 16) Ha sunod nga artikulo, hihisgotan naton an duha nga butang nga iginsugo ni Jesus ha iya mga sumurunod nga kinahanglan nira buhaton.