1-3. Ano an waray buhata han waray ngarani nga propeta tikang ha Juda, ngan ano an nagin resulta hito? (Kitaa an retrato hini nga pahina.)

DURANTE han pagmando ni Hadi Jeroboam, nagsugo hi Jehova hin propeta tikang ha Juda basi ipahayag an Iya mensahe han paghukom para hinin apostata nga hadi han Israel. Gintuman gud han mapainubsanon nga propeta an sugo han Dios, ngan ginpanalipdan hiya ni Jehova tikang ha duro nga kasina ni Jeroboam.—1 Hadi 13:1-10.

² Han tipauli na an propeta, may iginkatapo hiya nga lagas nga lalaki hirani ha Betel. Ini nga tawo nagsiring nga may mensahe hiya tikang kan Jehova. Ginlimbongan niya an propeta basi diri sugton hini nga propeta an espisipiko nga mga instruksyon ni Jehova nga ‘diri kumaon hin tinapay o uminom hin tubig ha Israel’ ngan ‘diri bumalik ha amo gihapon nga dalan nga iya gin-agian.’ Waray gud malipay hi Jehova ha ginbuhat han propeta. Katapos hito, pagtipauli niya, gintapo hiya hin leon ngan ginpatay hiya hito.—1 Hadi 13:11-24.

³ Kay ano nga inin mapainubsanon hadto nga propeta nagin paragbuot pinaagi ha pagpamati ha malimbong nga lagas nga lalaki? Waray magsiring an Biblia. Kondi posible nga nahingalimot gud hiya nga kinahanglan niya ‘maglakat nga mapainubsanon kaupod han Dios.’ (Basaha  an Mika 6:8.) Ha Biblia, an paglakat kaupod ni Jehova nagpapasabot hin pagsarig ha iya, pagsuporta ha iya pagkasoberano, ngan pagsunod ha iya giya. An mapainubsanon nga tawo maaram gud nga puydi hiya makigkomunikar ha iya mahigugmaon ngan makagarahum-ha-ngatanan nga Amay, ngan kinahanglan niya ito buhaton pirme. Salit mahimo unta maghangyo an propeta kan Jehova nga klaruhon an Iya mga instruksyon, pero waray magsiring an Kasuratan nga ginbuhat niya ito. Usahay, kinahanglan liwat naton maghimo hin magkuri nga desisyon, ngan bangin diri kita sigurado han angay buhaton. Kon mapainubsanon nga mangangaro kita han giya ni Jehova, mabulig ito ha aton nga malikyan an pakabuhat hin seryoso nga sala.

4. Ano an aton mahibabaroan hini nga artikulo?

⁴ Ha nahiuna nga artikulo, hinbaroan naton kon kay ano nga importante pa gihapon ha mga Kristiano an pagin mapainubsanon ngan kon ano an nahiuupod hito. Kondi ha ano nga mga kahimtang mahimo masarihan an aton pagin mapainubsanon? Ngan paonan-o naton makukultibar inin makaruruyag nga kalidad basi makapabilin kita nga mapainubsanon bisan pa ha mga pagsari? Basi mabaton ini nga mga pakiana, hisgotan naton an tulo nga kahimtang nga mahimo magsari han aton pagin mapainubsanon, ngan kitaon naton kon paonan-o kita magawi hin maaramon ha tagsa nga sitwasyon.—Prob. 11:2.

5, 6. Paonan-o iginpakita ni Barsilyay nga mapainubsanon hiya?

⁵ An mga pagbag-o han aton kahimtang o toka mahimo magsari han aton pagin mapainubsanon. Han gin-imbitar ni David an 80 anyos nga hi Barsilyay nga umukoy ha palasyo han hadi, sigurado nga inabat ni Barsilyay nga daku ito nga kadungganan. An pagkarawat ha imbitasyon ni David maghahatag unta ha iya hin higayon nga padayon nga makaupod an hadi. Kondi nagbaribad hiya. Kay ano? Ginsumatan niya hi David nga diri niya karuyag nga makapabug-at ha hadi kay lagas na hiya. Salit iginrekomendar niya hi Kimaam, posible nga usa han iya mga anak nga lalaki, nga amo an umupod kan David.—2 Sam. 19:31-37.

⁶ An pagin mapainubsanon ni Barsilyay nakabulig ha iya ha paghimo hin makatadunganon nga desisyon. Ginbaribaran niya an imbitasyon ni David diri tungod kay inabat niya nga diri niya mahihimo an toka o nadiri na hiya hin mga responsabilidad. Lugod, iya ginkarawat nga nagbag-o an iya kahimtang ngan ginkilala an iya mga limitasyon. Diri niya karuyag magbuhat hin labaw han iya mahihimo. (Basaha an Galacia 6:4, 5.) Kon magpupokus kita ha katungdanan, pagin prominente, o pagin sikat, magriresulta la ito ha pagpaimportante ha kalugaringon, kompetisyon, ngan ha urhi, kapakyasan. (Gal. 5:26) Kondi an pagin mapainubsanon nabulig ha aton nga gamiton an aton kusog ngan abilidad ha pagdayaw kan Jehova ngan pagbulig ha iba.—1 Cor. 10:31.

7, 8. Paonan-o an pagin mapainubsanon makakabulig ha aton nga malikyan an sobra nga pagsarig ha kalugaringon?

⁷ An pagkaada mas daku nga responsabilidad kasagaran na nga nag-uupod hin mas daku nga awtoridad, salit mahimo ito magsari han aton pagin mapainubsanon. Han hinbatian ni Nehemia an makuri nga kahimtang han katawohan ha Jerusalem, sinsero nga nag-ampo hiya kan Jehova. (Neh. 1:4, 11) Ginbendisyonan hiya ni Jehova han ginpili hiya ni Hadi Artaherhes nga magin gobernador han rehiyon. Kondi bisan pa han iya hitaas nga katungdanan, karikohan, ngan daku nga awtoridad, waray gud sumarig hi Nehemia ha iya eksperyensya o mga abilidad. Padayon hiya nga naglakat kaupod han Dios. Pirme hiya nagpapagiya kan Jehova pinaagi ha pagbasa han Balaud han Dios. (Neh. 8:1, 8, 9) Waray niya gamita an iya awtoridad basi manalumpigos; lugod, nagsakripisyo hiya basi serbihan an iba.—Neh. 5:14-19.

⁸ Iginpapakita han ehemplo ni Nehemia nga an pagin mapainubsanon makakabulig ha aton nga malikyan an sobra nga pagsarig ha kalugaringon kon nagbabag-o an aton toka o nakakakarawat hin  dugang nga responsabilidad. Pananglitan, an usa nga tigurang nga nasarig ha iya kalugaringon nga eksperyensya bangin mangalimbasog ha pag-asikaso han mga butang ha kongregasyon nga diri anay nag-aampo kan Jehova. An iba bangin nagdidesisyon anay ngan katapos nag-aampo kan Jehova nga bendisyonan an ira desisyon. Kondi nagpapakita ba ito hin pagin mapainubsanon? An usa nga mapainubsanon maaram han iya papel ha kahikayan han Dios ngan ginkikilala niya nga mas labaw gud an abilidad ni Jehova. Anoman an aton abilidad, kinahanglan kita mag-ikmat nga diri sumarig ha aton kalugaringon, labi na kon naatubang kita hin mga sitwasyon o problema nga naeksperyensyahan na naton hadto. (Basaha an Proberbios 3:5, 6.) Sugad nga membro han panimalay han Dios, nagpupokus kita ha pagtuman han aton toka ha pamilya ngan ha kongregasyon diri ha pagkaada awtoridad o pagin labaw ha iba.—1 Tim. 3:15.

9, 10. Paonan-o an pagin mapainubsanon makakabulig ha aton nga maatubang an pag-insulto?

⁹ Bangin makuri gud kontrolon an aton emosyon kon gin-iinsulto kita. Hi Hana agsob magtangis kay pirme hiya gintatamay han iya karibal nga hi Penina. Hinigugma hi Hana han iya bana, pero baog hi Hana. Ha urhi, han nag-aampo hiya ha tabernakulo, gintahapan hiya nga hubog han hitaas nga saserdote nga hi Eli. Makasurubo gud ito! Kondi bisan pa hini ngatanan, an mapainubsanon nga hi Hana nagpabilin nga kalmado ngan matinalahuron nga binaton kan Eli. An iya makapabantad nga pag-ampo iginsurat ha Biblia. Iginpapakita han iya pag-ampo an iya marig-on nga pagtoo, pagdayaw, ngan pagpasalamat kan Jehova.—1 Sam. 1:5-7, 12-16; 2:1-10.

¹⁰ An pagin mapainubsanon makakabulig liwat ha aton nga ‘daugon pirme an maraot pinaagi han maopay.’ (Roma 12:21) Kasagaran na nga maraot an pagtratar ha aton han kalibotan ni Satanas, pero kinahanglan naton atohan an tendensya nga masina ha ginhihimo han magraot. (Sal. 37:1) Kondi mas masakit ito kon kabugtoan an nagbubuhat hito ha aton. An pagpaubos magpapagios ha aton nga subaron hi Jesus. An Biblia nasiring: “Han gin-iinsulto hiya, waray hiya bumulos hin pag-insulto . . . , lugod iginsarig niya an iya kalugaringon ha usa nga naghuhukom ha matadong nga  paagi.” (1 Ped. 2:23) Maaram hi Jesus nga hi Jehova la an may katungod ha pagbulos. (Roma 12:19) An mga Kristiano gin-aaghat liwat nga magin mapainubsanon ngan diri ‘bumulos hin maraot ha maraot.’—1 Ped. 3:8, 9.

11, 12. (a) Paonan-o an pagin mapainubsanon makakabulig ha aton nga maatubang an sobra nga pagdayaw? (b) Paonan-o an pagin mapainubsanon sadang makaapekto ha aton desisyon may kalabotan ha aton pamado, pag-ayos, ngan panggawi?

¹¹ An sobra nga pagdayaw mahimo liwat magsari han aton pagin mapainubsanon. Tagda an maopay nga disposisyon ni Ester han nakaeksperyensya hiya hin diri ginlalaoman nga panhitabo ha iya kinabuhi. Usa hiya han pinakamahusay nga babaye ha bug-os nga Imperyo han Persia ngan nagpahimulos hin programa hin pagpahusay ha sulod hin usa ka tuig. Adlaw-adlaw niya nga nakakaupod an damu nga kadaragan-an nga nakikigkompetensya para makuha an atensyon han hadi. Bisan pa hito, nagpabilin hiya nga matinalahuron ngan mapainubsanon. Waray hiya magin hambog o magpahitaas bisan kon hiya an ginpili han hadi nga magin rayna.—Est. 2:9, 12, 15, 17.

¹² An pagin mapainubsanon nabulig ha aton nga pirme mamado, mag-ayos, ngan gumawi ha desente ngan angayan nga paagi. Maaram kita nga napapalipay naton an iba, diri pinaagi ha paghambog o pagpabilib, kondi pinaagi ha pagpakita hin “kalmado ngan malumo nga disposisyon.” (Basaha an 1 Pedro 3:3, 4; Jer. 9:23, 24) Kon may-ada kita sayop nga mga pagbati ngan panhunahuna, ha urhi, makikita ito ha aton mga buhat. Pananglitan, bangin ipaabat naton ha iba nga labaw kita ha ira tungod han aton talagsahon nga pribilehiyo, han aton hinbabaroan nga diri maaram an iba, o han aton duok nga relasyon ha kabugtoan nga may responsabilidad ha organisasyon. O bangin isaysay naton an mga butang ha paagi nga baga hin tikang gud ha aton an mga ideya o nagmalampuson kita tungod han aton kalugaringon nga pangalimbasog, bisan kon ha pagkamatuod ginbuligan kita han iba. May kalabotan hini, maopay liwat nga susbaranan hi Jesus. Kadam-an han iya ginsiring direkta o diri direkta nga ginkotar niya tikang ha Hebreo nga Kasuratan. Hito nga paagi, iginpakita niya nga mapainubsanon hiya tungod kay iginpasabot niya ha iya mga mamarati nga an iya igintututdo tikang kan Jehova, diri ha iya kalugaringon nga kahibaro o kinaadman.—Juan 8:28.

13, 14. Paonan-o an pagin mapainubsanon makakabulig ha aton ha paghimo hin mag-opay nga desisyon?

¹³ Mahimo liwat masarihan an aton pagin mapainubsanon kon naghihimo hin mga desisyon. Han nakadto hi apostol Pablo ha Cesarea, ginsumatan hiya ni propeta Agabo nga kon dumayon hiya pagkadto ha Jerusalem, aarestuhon hiya o bangin patayon pa ngani. Tungod han kahadlok, nanginyupo an kabugtoan kan Pablo nga diri hiya dumayon. Pero waray magpapugong hi Pablo. Sobra ba an iya kompyansa ha kalugaringon o diri hiya nahahadlok? Diri man. Bug-os hiya nga nasarig kan Jehova ngan andam hiya nga tumanon an sugo ha iya, diin man hiya igtoka. Han hinbaroan ini han kabugtoan, nagin mapainubsanon hira ngan waray na nira pugngi hi Pablo nga kumadto ha Jerusalem.—Buh. 21:10-14.

¹⁴ An pagin mapainubsanon makakabulig liwat ha aton ha paghimo hin mag-opay nga desisyon bisan kon diri naton bug-os nga nasasabtan o kontrolado an mga kahimtang. Pananglitan, bangin ginhunahuna naton nga sumulod ha bug-os-panahon nga pag-alagad. Pero ano man kon magkasakit kita? Ano man kon an aton edaran na nga mga kag-anak magkinahanglan han aton bulig? Paonan-o naton aatamanon an aton kalugaringon kon malagas na kita? Ini nga mga pakiana diri bug-os nga mababaton han mga pag-ampo ngan pagsaliksik. (Ekles. 8:16, 17) An aton pagsarig kan Jehova mabulig ha aton nga mahibaroan ngan karawaton an aton mga limitasyon. Katapos magsaliksik, mamakiana, ngan mag-ampo para hin giya, kinahanglan naton gumios uyon ha paggiya han espiritu han Dios. (Basaha an Eklesiastes 11:4-6.)  Kon bubuhaton naton ito, may rason hi Jehova nga bendisyonan kita, o giyahan kita nga bag-uhon an aton tumong.—Prob. 16:3, 9.

15. Paonan-o an pagpamalandong mahitungod kan Jehova mabulig ha aton nga magpabilin nga mapainubsanon?

¹⁵ Tungod kay mapulsanon gud an pagin mapainubsanon, paonan-o naton ito mas makukultibar? Tagdon naton an upat nga paagi. Siyahan, mas magigin mapainubsanon kita ngan mas maghihilarom an aton pagtahod kan Jehova kon papamalandungon naton an iya diri matupngan nga mga kalidad ngan awtoridad. (Isa. 8:13) Hinumdumi nga naglalakat kita kaupod han Makagarahum-ha-ngatanan nga Dios, diri han usa nga anghel o tawo. Ini nga kamatuoran magpapagios ha aton nga “magpasakop . . . ha gamhanan nga kamot han Dios.”—1 Ped. 5:6.

16. Paonan-o an pagpamalandong han gugma han Dios magpapagios ha aton nga magin mapainubsanon?

¹⁶ Ikaduha, an pagpamalandong han gugma ni Jehova mabulig ha aton nga makultibar an pagin mapainubsanon. Hi apostol Pablo nagsurat nga ginpapabilhan ni Jehova an mga bahin han lawas nga ginhuhunahuna naton nga diri sugad kadungganon. (1 Cor. 12:23, 24) Ha pariho nga paagi, ginpapabilhan ni Jehova an tagsa ha aton bisan pa han aton mga limitasyon. Diri kita niya iginkukompara ha iba, ngan hinigugma pa gihapon kita niya bisan kon nagsasayop kita. Tungod han gugma ni Jehova, makakasiguro kita nga ginpapabilhan kita niya anoman an aton toka ha iya organisasyon.

17. Paonan-o kita magpapahimulos kon ginkikita naton an maopay ha iba?

¹⁷ Ikatulo, magtutubo an aton apresasyon ha aton toka ha pag-alagad kon susubaron naton hi Jehova, nga ginkikita an maopay ha iba. Imbes nga pirme hunahunaon nga an aton ideya an pinakamaopay o diktahan an iba han ira hihimoon, maipapakita naton an pagin mapainubsanon kon papakianhan naton hira han ira mga suhestyon ngan magigin andam ha pagsunod hito. (Prob. 13:10) Malilipay liwat kita kon an aton kabugtoan nakakakarawat hin mga pribilehiyo. Ngan dadayawon naton hi Jehova kon nakikita naton nga iya ginbibendisyonan an ‘ngatanan nga aton kabugtoan ha bug-os nga kalibotan.’—1 Ped. 5:9.

18. Paonan-o naton mababansay an aton konsensya basi magin mas mapainubsanon kita?

¹⁸ Ikaupat, mas magigin mapainubsanon kita kon babansayon naton an aton konsensya uyon ha mga prinsipyo han Biblia. Magkakaada kita maopay nga pagturotimbang kon mangangalimbasog kita nga hibaroan an panhunahuna ni Jehova ha mga butang. Pinaagi han regular nga pag-aram, pag-ampo, ngan pag-aplikar han aton mga nahibabaroan, mas magkakaada kita maopay nga konsensya. (1 Tim. 1:5) Nahibabaro kita nga unahon an kaopayan han iba. Kon bubuhaton naton ini nga mga butang, hi Jehova nagsasaad nga ‘tatapuson niya an aton pagbansay’ nga mabulig ha aton nga makultibar an pagin mapainubsanon ngan an iba pa nga mag-opay nga kalidad.—1 Ped. 5:10.

19. Ano an mabulig ha aton nga magpabilin nga mapainubsanon ha waray kataposan?

¹⁹ Tungod han pagin paragbuot han waray ngarani nga propeta tikang ha Juda, bisan kon ginbuhat niya ito hin usa la ka beses, namatay hiya ngan nawara an pag-uyon ha iya ni Jehova. Pero an usa nga indibiduwal mahimo makapabilin nga mapainubsanon bisan pa ha mga pagsari. Ginpapamatud-an ito han ehemplo han mapainubsanon nga mga alagad ni Jehova hadto ngan yana. Samtang nagtitikaiha kita ha paglakat kaupod ni Jehova, sadang kita mas magin mapainubsanon. (Prob. 8:13) Anoman an aton toka yana, hinumdumi nga an paglakat kaupod ni Jehova usa nga makalilipay ngan waray kapariho nga pribilehiyo. Salit pabilhi gud ito nga pribilehiyo, ngan padayon nga buhata an imo bug-os nga mahihimo ha paglakat nga mapainubsanon kaupod ni Jehova ha waray kataposan.