1-2. Kay ano nga naatender kita ha Memoryal kada tuig?

 HAROS 2,000 ka tuig na an naglabay, iginhatag ni Jesus an iya kinabuhi para ha aton, ngan tungod hito posible na kita mabuhi ha waray kataposan. Han gab-i antes hi Jesus mamatay, ginsugo niya an iya mga sumurunod nga hinumdumon an iya mahigugmaon nga buhat pinaagi hin simple nga seremonya nga may tinapay ngan bino.—1 Cor. 11:23-26.

² Ginsusunod ta an sugo ni Jesus kay hinigugma gud naton hiya. (Juan 14:15) Kada tuig ha panahon han Memoryal, iginpapakita ta an aton apresasyon ha iya ginbuhat pinaagi ha paghatag hin panahon ha pagpamalandong ngan pag-ampo mahitungod ha kahulogan han iya kamatayon. Malipayon liwat kita nga dugangan pa an aton pakigbahin ha ministeryo ngan mangimbitar hin damu gud tubtob han aton mahihimo basi umupod ha aton hinin espesyal nga okasyon. Ngan syempre, determinado kita nga diri tugotan an bisan ano nga makaulang ha aton ha pag-atender ha Memoryal.

3. Ano an aton hihisgotan hini nga artikulo?

³ Hini nga artikulo, aton hihisgotan an tulo nga paagi diin an katawohan ni Jehova naningkamot gud nga hinumdumon an kamatayon ni Jesus: (1) pinaagi ha pagsunod utro han surubdan nga iginhatag ni Jesus, (2) pinaagi ha pag-imbitar ha iba nga umatender ha Memoryal, ngan (3) pinaagi ha pagsaurog  han Memoryal bisan pa han magkuri nga kahimtang.

4. Ano nga mga kamatuoran an ginpapabug-atan kada tuig ha Memoryal, ngan kay ano nga diri naton dapat igbalewaray ini nga mga kamatuoran? (Lucas 22:19, 20)

⁴ Kada tuig ha Memoryal, namamati kita hin basado ha Biblia nga pahayag nga naghahatag hin klaro nga mga baton ha damu nga pakiana. Nahibabaro kita kon kay ano nga an katawohan nagkikinahanglan hin lukat ngan kon paonan-o an kamatayon han usa la nga tawo makakabayad han sala han damu. Napapahinumdoman kita kon ano an ginsisimbolohan han tinapay ngan han bino ngan kon hin-o an dapat kumaon ngan uminom hito. (Basaha an Lucas 22:19, 20.) Ngan aton ginpapamalandong an mga bendisyon nga makakarawat hadton may tunan-on nga paglaom. (Isa. 35:5, 6; 65:17, 21-23) Diri naton dapat igbalewaray ini nga mga kamatuoran. Binilyon nga tawo an diri nakakasabot hini, ngan diri hira maaram kon ano kaimportante an halad ni Jesus. Diri liwat nira ginsasaurog an Memoryal han iya kamatayon uyon ha surubdan nga iya gintikangan. Kay ano?

5. Katapos mamatay han kadam-an han mga apostol, ano an nahitabo ha surubdan nga iginhatag ni Jesus?

⁵ Waray pag-iha katapos mamatay an kadam-an han mga apostol ni Jesus, an buwa nga mga Kristiano hinay-hinay nga nakasulod ha kongregasyon. (Mat. 13:24-27, 37-39) Nagyakan hira hin “baliko nga mga butang basi ipahirayo an mga disipulo ngan pasundon ha ira.” (Buh. 20:29, 30) Ha kamaihaan, an usa han “baliko nga mga butang” nga gintikangan pagtutdo han buwa nga mga Kristiano nga hi Jesus waray maghalad han iya lawas hin “makausa gud la basi pas-anon an mga sala han damu,” sugad han siring han Biblia, lugod kinahanglan hiya ighalad hin pauroutro. (Heb. 9:27, 28) Yana damu nga sinsero nga tawo an natoo hiton buwa nga katutdoan. Nagkakatirok hira hin regular ha mga singbahan—danay kada adlaw—basi isaurog an gintatawag nga “Baraan nga Komunyon.” b Diri sugad kaagsob an paghinumdom han iba nga mga relihiyon ha kamatayon ni Jesus, pero an kadam-an han ira mga membro diri nakakasabot hin klaro kon ano an nahimo han halad ni Jesus. An pipira bangin naghuhunahuna, ‘Iginpapasabot gud ba han kamatayon ni Jesus nga mapapasaylo an akon mga sala?’ Kay ano nga iginpapakiana nira ito? An iba ha ira naimpluwensyahan hadton nagruruhaduha nga pinaagi han halad ni Jesus posible mapasaylo an mga sala. Paonan-o gin-atubang han tinuod nga mga sumurunod ni Jesus ini nga isyu?

6. Han 1872, ano an nasabtan han usa nga grupo han mga estudyante han Biblia?

⁶ Ha ikatarapos han ika-19 ka siglo, an usa nga grupo han mga estudyante han Biblia nga ginpapangunahan ni Charles Taze Russell nagtikang pag-aram hin maopay han Kasuratan. Karuyag nira mahibaroan an kamatuoran parte ha kahulogan han halad ni Jesus ngan kon paonan-o dapat hinumdumon an iya kamatayon. Han 1872, nasabtan nira base ha Biblia nga naghatag gud man hi Jesus hin lukat para ha ngatanan nga tawo. Waray nira itago an ira nahibaroan. Lugod, iginpasamwak nira ito pinaagi hin mga libro, dyaryo, ngan magasin. Waray pag-iha katapos hito, ha pagsubad ha mga Kristiano ha siyahan nga siglo, nagtikang hira pagkatirok hin makausa la ha usa ka tuig basi isaurog an Memoryal.

7. Paonan-o kita nagpapahimulos ha mga gin-adman han nahiuna nga mga estudyante han Biblia?

 ⁷ Yana nagpapahimulos kita ha mga gin-adman hiton sinsero nga mga Kristiano damu ka tuig na an naglabay. Paonan-o? Pinaagi han bendisyon ni Jehova, nasabtan ta an kamatuoran mahitungod han halad ni Jesus ngan han nahihimo hito. (1 Juan 2:1, 2) Nahibaro liwat kita nga an Biblia naghahatag hin duha nga paglaom ha mga tawo nga nakakapalipay ha Dios—imortal nga kinabuhi ha langit para ha pipira ngan kinabuhi nga waray kataposan ha tuna para ha minilyon nga iba pa. Nagigin mas duok kita kan Jehova samtang aton ginhuhunahuna kon ano kadaku an iya gugma ha aton ngan kon ano kadaku an kapulsanan ha aton mismo han halad ni Jesus. (1 Ped. 3:18; 1 Juan 4:9) Salit pariho han aton matinumanon nga kabugtoan ha naglabay, gin-iimbitar ta an iba nga umupod ha aton ha pagsaurog han Memoryal uyon ha surubdan nga iginhatag ni Jesus.

8. Ano na an nahimo han katawohan ni Jehova basi imbitaron an iba nga umatender ha Memoryal? (Kitaa an piktyur.)

⁸ An katawohan ni Jehova maiha na nga nangingimbitar ha iba nga umatender ha Memoryal. Han 1881 pa la, an kabugtoan ha United States gin-imbitar nga magkatirok ha balay han usa nga bugto ha Allegheny, Pennsylvania, para hiton espesyal nga okasyon. Ha urhi, an tagsa nga kongregasyon nagkaada kalugaringon nga Memoryal. Han Marso 1940, ginsidngan an mga magwarali nga puydi nira imbitaron an bisan hin-o nga interesado dida ha ira teritoryo. Han 1960, ha siyahan nga higayon,  an Bethel nagtagana ha mga kongregasyon hin inimprinta nga mga imbitasyon. Tikang hito nga panahon, binilyon na nga imbitasyon ha Memoryal an naipanaltag. Kay ano nga naghahatag kita hin daku gud nga panahon ngan pangalimbasog basi imbitaron an iba?

9-10. Hin-o an nagpapahimulos han aton mga paningkamot nga imbitaron an iba ha Memoryal? (Juan 3:16)

⁹ Usa nga rason nga gin-iimbitar ta an iba nga umatender ha Memoryal upod ha aton kay karuyag naton nga adton maatender ha siyahan nga higayon mahibaro han kamatuoran mahitungod han ginbuhat ni Jehova ngan ni Jesus para ha aton ngatanan. (Basaha an Juan 3:16.) Naglalaom kita nga an ira makikita ngan mababatian ha Memoryal magpapagios ha ira nga mahibaro hin dugang pa ngan magin mga surugoon ni Jehova. Pero an iba nagpapahimulos liwat.

¹⁰ Gin-iimbitar liwat naton adton diri na aktibo ha pag-alagad kan Jehova. Ginbubuhat ta ito basi ipahinumdom ha ira nga hinigugma la gihapon hira han Dios. Damu an nakarawat han aton imbitasyon, ngan nalilipay gud kita nga makita hira. An pag-atender ha Memoryal nagpapahinumdom ha ira kon ano hira kamalipayon ha pag-alagad kan Jehova hadto. Pansina an eksperyensya ni Monica. c Nagin aktibo utro hiya nga magwarali ha panahon han COVID-19 nga pandemya. Katapos niya umatender ha Memoryal han 2021, hiya nagsiring: “Espesyal gud ha akon ini nga Memoryal. Ha siyahan nga higayon ha sulod hin 20 ka tuig, nakagsangyaw na ako ha mga tawo ngan naimbitar hira ha Memoryal. Nangalimbasog gud ako nga buhaton ito kay nagpapasalamat gud ako han ginbuhat ni Jehova ngan ni Jesus para ha akon.” (Sal. 103:1-4) Karawaton man o diri han mga tawo an aton imbitasyon, ginhihimo ta an aton pinakamaopay nga imbitaron hira ha Memoryal, kay maaram kita nga gin-aapresyar ni Jehova an aton mga paningkamot.

11. Paonan-o ginbibendisyonan ni Jehova an aton mga paningkamot nga imbitaron an mga tawo ha Memoryal? (Hagai 2:7)

¹¹ Ginbibendisyonan gud ni Jehova an aton mga paningkamot nga imbitaron an mga tawo ha Memoryal. Han 2021, bisan pa han mga restriksyon tungod han COVID-19 nga pandemya, nagkaada kita waray kapariho nga kadamu han inatender—21,367,603. Sobra duha ngan tunga ka pilo ito ha kadamu han mga Saksi ni Jehova ha bug-os nga kalibotan! Syempre, diri la ha kadamu interesado hi Jehova. Interesado hiya ha tagsa nga naatender. (Luc. 15:7; 1 Tim. 2:3, 4) Kombinsido kita nga ginagamit ni Jehova an aton pangimbitar basi buligan kita nga mabilngan an mga tawo nga may maopay nga kasingkasing.—Basaha an Hagai 2:7.

12. Ha ano nga mga kahimtang mahimo kita makurian nga isaurog an Memoryal? (Kitaa an piktyur.)

¹² Hi Jesus nagtagna nga ha kataposan nga mga adlaw, maatubang kita hin iba-iba nga magkuri nga kahimtang—pagkontra han pamilya, pagtimaraot, mga girra, epidemya, ngan damu pa. (Mat. 10:36; Mar. 13:9; Luc. 21:10, 11) May mga panahon nga nakukurian kita paghinumdom ha kamatayon ni Jesus tungod hini nga mga kahimtang. Ano an ginbuhat han aton kabugtoan basi malamposan an sugad nga mga problema, ngan paonan-o hira ginbuligan ni Jehova?

13. Paonan-o ginbendisyonan ni Jehova an kaisog ngan determinasyon ni Artem nga isaurog an Memoryal samtang priso hiya?

¹³ Kapriso. An aton kabugtoan nga napriso tungod han ira pagtoo nagbubuhat han ira  mahihimo basi hinumdumon an kamatayon ni Jesus. Pansina an eksperyensya ni Artem. Ha panahon han Memoryal han 2020, ginpriso hiya ha 17 metro kwadrado nga selda nga tubtob lima an aada nga priso. Bisan kon priso hiya, nakakuha la gihap hiya hin mga butang nga magagamit sugad nga mga emblema ha Memoryal, ngan plano niya nga magpahayag ha Memoryal para ha iya kalugaringon. Pero an iya mga kaupod ha selda nasigarilyo ngan pirme nabuyayaw. Ano an iya ginbuhat? Naghangyo hiya kon puydi diri hira magbuyayaw ngan magsigarilyo hin usa la ka oras. Nahipausa hi Artem nga inuyon an iya mga kaupod ha selda nga diri magsigarilyo o magbuyayaw samtang nagpapadayon an Memoryal. Nagsiring hi Artem, “Siring ko susumatan ko hira mahitungod han Memoryal.” Bisan kon nagsiring hira nga nadiri hira pamati parte hito nga okasyon, katapos nira makita ngan mabatian an pagsaurog ni Artem han Memoryal, nagpakiana hira ha iya mahitungod hito.

14. Ano nga mga paningkamot an ginhimo basi maisaurog an Memoryal bisan pa han COVID-19 nga pandemya?

¹⁴ COVID-19 nga pandemya. Tungod hini nga pandemya, an katawohan ni Jehova diri na makakaatender hin personal ha Memoryal. Pero  waray ito magpugong ha ira nga isaurog an Memoryal. d An mga kongregasyon nga may access ha Internet nagsaurog han Memoryal pinaagi hin videoconference. Pero kumusta man an minilyon nga waray access ha Internet? Ha pipira nga nasud, ginhikay nga ibrodkast an pahayag ha TV o ha radyo. Dugang pa, ginrekord han mga sanga nga opisina an pahayag ha sobra 500 nga linggwahe basi bisan an aadto ha interyor nga mga lugar makakagsaurog han Memoryal. Ngan gindul-ong han matinumanon nga mga brother an nakarekord nga mga pahayag ha kabugtoan nga nanginginahanglan hito.

15. Ano an imo mahibabaroan ha eksperyensya han Bible study nga hi Sue?

¹⁵ Pagkontra han pamilya. Ha iba, an pinakadaku nga ulang ha pagsaurog han Memoryal amo an pagkontra han pamilya. Pansina an eksperyensya ni Sue, usa nga Bible study. Han 2021, ha adlaw antes han Memoryal, ginsumatan ni Sue an nagba-Bible study ha iya nga tungod han pagkontra han iya pamilya, diri hiya makakaatender ha Memoryal. Ginbasa han nagba-Bible study ha iya an Lucas 22:44. Katapos, an sister nagsiring nga kon nakakaeksperyensya kita hin mga kakurian, kinahanglan ta subaron an ehemplo ni Jesus pinaagi ha pag-ampo kan Jehova ngan bug-os nga pagsarig ha Iya. Kinabuwasan, igin-andam ni Sue an mga emblema ngan ginkita an espesyal nga programa han Morning Worship ha jw.org. Hito nga gab-i, samtang nag-uusahan ha iya kwarto, namati hiya ha Memoryal ha iya telepono. Katapos hito, hi Sue nagsurat ha nagba-Bible study ha iya: “Nadasig mo gud ako kakulop. Ginbuhat ko an tanan nga akon mahihimo basi makaatender ha Memoryal, ngan ginbuligan gud ako ni Jehova. Diri ko maisaysay an akon kalipay ngan pagin mapasalamaton!” Ha imo hunahuna, mabubuligan ka ba ni Jehova kon umatubang ka hin puropariho nga sitwasyon?

16. Kay ano nga makakasiguro kita nga bibendisyonan ni Jehova an aton mga paningkamot nga umatender ha Memoryal? (Roma 8:31, 32)

¹⁶ Gin-aapresyar gud ni Jehova an aton mga paningkamot ha paghinumdom ha kamatayon ni Jesus. Makakasiguro kita nga bibendisyonan kita niya kon nagpapakita kita hin apresasyon ha iya ginbuhat para ha aton. (Basaha an Roma 8:31, 32.) Salit magin determinado kita nga umatender ha Memoryal yana nga tuig ngan buhaton an aton mahihimo basi dugangan an aton pakigbahin ha espirituwal nga mga buruhaton ha panahon han Memoryal.