1-2. Ano an kinahanglan ta nga padayon nga buhaton katapos han bawtismo? Isaysay.

 ANO ka kaagsob maglimpyo han imo balay? Bangin antes ka bumalhin, ginkuskos mo ito hin maopay. Pero ano man kon diri mo ito limpyohan utro? Maaram kita nga madagmit la matirok an tapotapo ngan hugaw. Basi magin presentable an imo balay, kinahanglan regular mo ito nga limpyohan.

² Ha pariho nga paagi, kinahanglan padayon kita nga mangalimbasog nga tadungon an aton panhunahuna ngan personalidad. Syempre, antes kita magpabawtismo nangalimbasog gud kita nga maghimo han ginkikinahanglan nga mga pagbag-o ha aton kinabuhi basi ‘malimpyohan an aton kalugaringon ha ngatanan nga kahugaw ha unod ngan espiritu.’ (2 Cor. 7:1) Pero yana, kinahanglan ta sundon an sagdon ni apostol Pablo nga ‘padayon nga magbag-o.’ (Efe. 4:23) Kay ano nga ginkikinahanglan an nagpapadayon nga pangalimbasog? Kay madagmit la matirok ha aton an tapotapo ngan hugaw, siring pa, hini nga kalibotan. Basi malikyan ito ngan magpabilin nga presentable kan Jehova, kinahanglan regular nga usisahon ta an aton panhunahuna, personalidad, ngan mga hingyap.

3. Ano an iginpapasabot han ‘pagbag-o han imo panhunahuna’? (Roma 12:2)

³ Ano an kinahanglan ta buhaton basi mabag-o an aton panhunahuna? (Basaha an Roma 12:2.) An Griego nga mga pulong nga iginhubad nga “pagbag-o han iyo panhunahuna” mahimo mangahulogan nga sugad hin ginri-renovate ta an aton  hunahuna. Salit diri puydi nga basta la dekorasyonan ta an aton kinabuhi hin pipira nga mag-opay nga buhat. Lugod, kinahanglan ta usisahon kon ano gud an aton pagkatawo ngan maghimo han anoman nga ginkikinahanglan nga mga pagbag-o basi masunod an mga suruklan ni Jehova ha pinakamaopay nga aton mahihimo. Kinahanglan buhaton ta ini, diri la makausa, kondi padayon.

4. Ano an puydi ta himoon basi diri mamolde hini nga sistema han mga butang an aton panhunahuna?

⁴ Kon perpekto na kita, mapapalipay naton pirme hi Jehova ha ngatanan nga aton ginbubuhat. Pero ha pagkayana, kinahanglan padayon ta nga pangalimbasogan gud nga mahimo ito. Pansina nga ha Roma 12:2, siring ni Pablo nga kinahanglan ta bag-uhon an aton panhunahuna basi mahibaroan an kaburut-on han Dios. Imbes nga basta la magpamolde hini nga sistema han mga butang, kinahanglan ta anay usisahon an aton kalugaringon basi mahibaroan kon nagpapaimpluwensya gud ba kita ha panhunahuna han Dios—diri han kalibotan—kon naghihimo hin mga tumong ngan desisyon.

5. Paonan-o ta mauusisa an aton panhunahuna ha pagkahirani han adlaw ni Jehova? (Kitaa an piktyur.)

⁵ Aadi an usa nga ehemplo. Karuyag ni Jehova nga ‘hunahunaon ta pirme an presensya han adlaw ni Jehova.’ (2 Ped. 3:12) Pakianhi an imo kalugaringon: ‘Nakikita ba ha paagi han akon pagkinabuhi nga nasasabtan ko nga hirani na gud an kataposan hini nga sistema han mga butang? Nakikita ba ha akon mga desisyon parte ha pag-eskwela ha kolehiyo ngan pagpili hin trabaho nga an pag-alagad kan Jehova an pinakaimportante ha akon kinabuhi? May pagtoo ba ako nga magtatagana hi Jehova ha akon ngan ha akon pamilya, o nababaraka ako pirme ha materyal nga mga butang?’ Hunahunaa la an kalipay ni Jehova kon nakikita niya nga nangangalimbasog kita nga magkinabuhi uyon  ha iya kaburut-on.—Mat. 6:25-27, 33; Fil. 4:12, 13.

6. Ano an kinahanglan ta nga padayon nga buhaton?

⁶ Kinahanglan ta pirme usisahon an aton panhunahuna ngan katapos, maghimo han ginkikinahanglan nga mga pagbag-o. Hi Pablo nagsiring ha mga taga-Corinto: “Padayon nga sarihi kon aada kamo ha pagtoo; padayon nga pamatud-i kon ano gud kamo.” (2 Cor. 13:5) An pagin ‘aada ha pagtoo’ diri la nag-uupod han pag-atender ha mga katirok ngan pakigbahin ha ministeryo ha pana-panahon. Nag-uupod liwat ito han aton panhunahuna, mga hingyap, ngan mga motibo. Salit kinahanglan ta padayon nga bag-uhon an aton panhunahuna pinaagi ha pagbasa han Pulong han Dios, pag-aram nga subaron an iya panhunahuna, ngan pagbuhat han anoman nga ginkikinahanglan basi maipahiuyon an aton pagkinabuhi ha kaburut-on ni Jehova.—1 Cor. 2:14-16.

7. Sumala ha Efeso 4:31, 32, ano pa an kinahanglan ta buhaton, ngan kay ano nga bangin makuri ito?

⁷ Basaha an Efeso 4:31, 32. Labot ha paghimo hin mga pagbag-o ha aton panhunahuna, kinahanglan ta “isul-ot an bag-o nga personalidad.” (Efe. 4:24) Basi mahimo ito, kinahanglan may buhaton kita. Pananglitan, kinahanglan mangalimbasog gud kita nga malamposan an magraot nga kalidad sugad han pagdumot, kasina, ngan kapungot. Kay ano nga bangin makuri ito? Kay an pipira nga magraot nga kalidad nakagamot na gud ha aton. Pananglitan, an Biblia nasiring nga may mga tawo nga “masisinahon” ngan “pungtanon.” (Prob. 29:22) An pagkontrol ha nakagamot na nga mga batasan posible gud nga magkikinahanglan hin nagpapadayon nga pangalimbasog bisan katapos han bawtismo. Makikita ito ha masunod nga eksperyensya.

8-9. Paonan-o iginpapakita han eksperyensya ni Stephen nga kinahanglan padayon nga hukason an daan nga personalidad?

⁸ An brother nga hi Stephen nakurian gud pagkontrol han iya kasina. Hiya nagsiring, “Bisan han bawtismado na ako, kinahanglan padayon nga pangalimbasogan ko nga makontrol an akon kasina. Pananglitan, makausa han nagsasangyaw ako ha balay-balay, ginlanat ko an tawo nga nagkawat pa la han radyo han akon awto. Han nagtitikahirani na ako ha iya, ginbuhian niya an radyo ngan dinalagan pahirayo. Han gin-istorya ko ha iba nga akon kaupod kon paonan-o ko nabawi an akon radyo, usa nga tigurang hito nga grupo an nagpakiana ha akon, ‘Stephen, ano unta an imo bubuhaton kon naabtan mo hiya?’ Ito nga pakiana nagpahunahuna ha akon ngan nagpagios ha akon nga padayon nga pangalimbasogan nga magin mamurayawon.” b

⁹ Sugad han iginpapakita han eksperyensya ni Stephen, an usa nga maraot nga batasan mahimo gumawas hin diri ginlalaoman, bisan kon kahuna naton nalamposan ta na ito. Kon mahitabo ito ha imo, ayaw panluya ngan ayaw hunahunaa nga pakyas ka sugad nga Kristiano. Bisan hi apostol Pablo nagsiring: “Kon karuyag ko buhaton an husto, an maraot an aadi ha akon.” (Roma 7:21-23) An ngatanan nga diri perpekto nga Kristiano may magraot nga batasan nga nagbabalik-balik pariho hin tapotapo ngan hugaw nga natitirok ha aton balay. Kinahanglan padayon kita nga maningkamot nga magpabilin nga limpyo. Paonan-o ta ito mabubuhat?

10. Paonan-o naton maaatohan an diri mag-opay nga batasan? (1 Juan 5:14, 15)

¹⁰ Ig-ampo kan Jehova an batasan nga nakukurian ka nga wad-on; sarig nga pamamatian ngan bubuligan ka niya. (Basaha an 1 Juan 5: 14, 15.) Bisan kon diri milagroso nga wawad-on ni Jehova ito nga batasan, mapaparig-on ka niya basi diri mo ito maipakita. (1 Ped. 5:10) Ngan gios uyon ha imo mga pag-ampo pinaagi han diri pagbuhat han mga butang nga bangin magpabalik han daan nga personalidad. Pananglitan, likayi an pagkita hin mga pelikula ngan programa ha telebisyon o pagbasa hin mga istorya nga nag-aaghat han mga batasan nga imo ginpapaningkamotan nga wad-on. Ngan ayaw paghinunahuna hin sayop nga mga hingyap.—Fil. 4:8; Col. 3:2.

11. Ano an aton mahihimo basi padayon nga maisul-ot an bag-o nga personalidad?

¹¹ Bisan kon ginhukas mo na an daan nga personalidad, importante nga kultibaron mo an bag-o nga personalidad. Paonan-o mo ito mahihimo? Magin tumong nga subaron hi Jehova samtang nahibabaro ka parte han iya mga kalidad. (Efe. 5:1, 2) Pananglitan, kon may mabasa ka nga rekord ha Biblia nga nagpapakita han pagpasaylo ni Jehova, pakianhi an imo kalugaringon, ‘Nagpapasaylo ba ako ha iba?’ Kon may mabasa ka parte han kalooy ni Jehova ha mga nagkukuri, pakianhi an imo kalugaringon, ‘May-ada ba ako sugad hito nga pagpaid ha kabugtoan nga nagkukuri, ngan iginpapakita ko ba ito ha akon mga buhat?’ Padayon nga bag-oha an imo panhunahuna pinaagi ha pagsul-ot han bag-o nga personalidad, ngan magin pasensyoso ha imo kalugaringon samtang imo ginbubuhat ito.

12. Paonan-o naeksperyensyahan ni Stephen an gahum han Biblia nga bag-uhon an usa nga tawo?

¹² Hi Stephen, nga gin-unabi na, nakapansin nga hinay-hinay nga naisul-ot niya an bag-o nga personalidad. Hiya nagsiring: “Tikang han nabawtismohan ako, inatubang ako hin damu nga sitwasyon nga puydi na unta ako bumuto ha kasina. Nahibaro ako nga bumaya kon ginpapasina ako han mga tawo o pakalmahon an sitwasyon ha iba nga mga paagi. Ginkumendasyonan ako han damu nga tawo, pati na han akon asawa, ha paagi han akon pag-atubang hini nga mga sitwasyon. Bisan ako diri makatoo hito! Diri ko mahihimo ini nga mga pagbag-o ha akon personalidad kon ha akon la pangalimbasog. Lugod, natoo ako nga pamatuod ito nga an Biblia may-ada gahum nga bag-uhon an usa nga tawo.”

13. Ano an mabulig ha aton nga makultibar an tama nga mga hingyap? (Galacia 5:16)

¹³ Basaha an Galacia 5:16. Basi buligan kita nga magdaog ha pakig-away nga mabuhat an tama, hi Jehova hura nga naghahatag han iya baraan nga espiritu. Kon nag-aaram kita han Pulong han Dios, nagpapaimpluwensya kita hito nga espiritu. Nakakarawat liwat naton an baraan nga espiritu kon naatender kita ha aton mga katirok. Hiton Kristiano nga mga pagturotarampo, puydi kita maggahin hin panahon upod han kabugtoan, nga pariho ha aton, naniningkamot gud nga buhaton an tama, ngan makapadasig ito. (Heb. 10:24, 25; 13:7) Ngan kon nangangamuyo kita kan Jehova ha pag-ampo ngan nakikimalooy ha iya nga buligan kita ha aton kaluyahan, ihahatag niya ha aton an iya baraan nga espiritu basi maparig-on kita nga padayon nga makig-away. Bisan kon ito nga mga buruhaton posible nga diri makawara han sayop nga mga hingyap, mabulig ito ha aton nga maatohan an tendensya nga magpadára hito nga mga hingyap. Sugad han ginsisiring han Galacia 5:16, adton naglalakat pinaagi han espiritu “diri . . . magbubuhat hin unudnon nga hingyap.”

14. Kay ano nga importante nga padayon nga kultibaron an tama nga mga hingyap?

¹⁴ Kon maestablisar na naton an maopay nga rutina han espirituwal nga mga buruhaton,  importante nga tipigan ta ito nga rutina ngan padayon nga kultibaron an tama nga mga hingyap. Kay ano? Kay an usa han aton mga kaaway diri gud nakaturog. Ito nga kaaway amo an pagsulay nga buhaton an sayop. Bangin katapos han aton bawtismo mapansin ta nga naruruyag kita han mga butang mismo nga angay naton likayan, sugad han paghuygo, pag-abuso ha makahurubog nga mga irimnon, o pornograpiya. (Efe. 5:3, 4) Ini an gin-amin han usa nga batan-on nga brother: “Usa han pinakamakuri nga akon ginpapakig-awayan amo an akon pagkaruyag ha akon igkasi-lalaki. Kahuna ko mawawara na la ito paglabay han panahon, pero inaabat ko la gihapon ito.” Ano an makakabulig ha imo kon makusog gud an usa nga sayop nga hingyap?

15. Kay ano nga makapadasig hibaroan nga an sayop nga mga hingyap “komon nga nahitatabo ha mga tawo”? (Kitaa an piktyur.)

¹⁵ Samtang gin-aatohan mo an usa nga sayop nga hingyap nga makusog gud, hinumdumi nga diri ka nag-uusahan. An Biblia nasiring: “Waray pagsulay nga naabot ha iyo labot la han komon nga nahitatabo ha mga tawo.” (1 Cor. 10:13a) Ito nga mga pulong ginsurat para ha lalaki ngan babaye nga mga Kristiano ha Corinto. An pipira ha ira nag-aadulteryo, homoseksuwal, ngan parahubog hadto. (1 Cor. 6:9-11) Para ha imo, katapos han ira bawtismo, waray na gud ba hira makig-away ha bisan ano nga sayop nga mga hingyap? Diri ito posible. Oo, hira ngatanan dinihogan nga mga Kristiano, pero diri la gihapon hira perpekto. Sigurado nga kinahanglan nira pakig-awayan an sayop nga mga hingyap ha pana-panahon. Makapadasig ito ha aton. Kay ano? Kay nagpapakita ito nga anoman nga sayop nga hingyap an imo gin-aatohan, may iba na nga nakaato hito. Oo, kaya mo magpabilin nga ‘marig-on ha pagtoo, kay maaram ka nga an pariho nga klase hin mga pag-antos naieksperyensyahan han ngatanan mo nga kabugtoan ha bug-os nga kalibotan.’—1 Ped. 5:9.

16. Ano nga bitik an dapat ta likyan, ngan kay ano?

¹⁶ Likayi an bitik han paghunahuna nga waray  nakakasabot han imo gin-aatubang nga kaluyahan. Kon sugad hito an imo huhunahunaon, bangin abaton mo nga waray na paglaom an imo kahimtang ngan diri mo kaya atohan an sayop nga mga hingyap. Iba an ginsisiring han Biblia. Nasiring ito: “An Dios matinumanon, ngan diri niya itutugot nga sulayon kamo labaw han iyo maiilob, pero kon umabot an pagsulay maghihimo liwat hiya hin paagi nga makagawas kamo basi makailob hito.” (1 Cor. 10:13b) Salit bisan kon makusog an usa nga sayop nga hingyap, kaya ta ito mailob. Ha bulig ni Jehova, makakaya ta nga diri magpadára hito.

17. Bisan kon diri naton malilikayan an pagkaada sayop nga mga hingyap, ano an kaya ta kontrolon?

¹⁷ Pirme ini hinumdumi: Tungod kay diri ka perpekto, diri mo malilikayan an pagkaada sayop nga mga hingyap. Pero kon magkaada ka hito, puydi ka magdumiri dayon hito, pariho han ginbuhat ni Jose han dinalagan dayon hiya tikang ha asawa ni Potipar. (Gen. 39:12) Diri mo kinahanglan magpadára ha sayop nga mga hingyap!

18-19. Ano an puydi ta ipakiana ha aton kalugaringon samtang nangangalimbasog kita nga bag-uhon an aton panhunahuna?

¹⁸ An pagbag-o han aton panhunahuna nag-uupod han nagpapadayon nga pangalimbasog nga ipahiuyon an aton panhunahuna ngan mga buhat ha kaburut-on ni Jehova. Salit usisaha pirme an imo kalugaringon ngan ipakiana: ‘Nakikita ba ha akon mga buhat nga ginkakarawat ko nga halipot na gud la an nabibilin nga panahon? Nag-uuswag ba ako ha pagsul-ot han bag-o nga personalidad? Gintutugotan ko ba an espiritu ni Jehova nga maggiya han akon kinabuhi basi maatohan ko an pagsulay nga magpadára ha mga hingyap han unod?’

¹⁹ Samtang gin-uusisa mo an imo kalugaringon, ayaw laumi nga magigin perpekto ka, lugod pagpokus ha imo pag-uswag. Kon mapansin mo nga may kinahanglan ka pauswagon, ayaw panluya. Lugod, sunda an sagdon han Filipos 3:16: “Anoman nga pag-uswag an aton nahimo, padayon kita nga maglakat hin maopay ha amo gihapon nga paagi.” Kon bubuhaton mo ito, sarig nga bibendisyonan ni Jehova an imo mga pangalimbasog nga padayon nga bag-uhon an imo panhunahuna.