HANDURAWA nga nagbabaktas ka ha kalsada ha katutnga han gab-i. Katapos, inabat mo nga baga hin may nagsisinunod ha imo. Kon naundang ka, naundang liwat hiya. Kon nagdadagmit ka, nagdadagmit liwat hiya. Katapos, dumalagan ka pakadto ha hirani nga balay han imo sangkay. Han gin-abrihan ka han imo sangkay ngan ginpasulod ha ira balay, nakaginhawa ka hin hilarom kay inabat mo nga talwas ka na.

Bangin waray mo pa maeksperyensyahi an sugad nga sitwasyon, pero bangin may iba nga butang nga imo ginkakabarak-an o ginkakahadlokan. Pananglitan, may gin-aatohan ka ba nga kaluyahan pero pauroutro mo ito nga nabubuhat? Maiha ka na ba nga waray trabaho ngan bisan pa han imo pangalimbasog waray ka la gihapon pakakabiling hin trabaho? Nababaraka ka ba kon ano an mahitatabo ha imo kon lagas ka na ngan maluya na an kahimsog? O may iba pa nga nakakapabaraka ha imo?

Anoman an imo kahimtang, sigurado nga maliliaw ka kon may-ada ka duok nga sangkay nga andam mamati han imo mga ginkakabarak-an ngan andam bumulig ha imo. May-ada ka ba sugad hito nga sangkay? Oo! Hi Jehova duok mo gud nga sangkay sugad la nga nagin duok hiya nga sangkay han patriarka nga hi Abraham sumala ha Isaias 41:8-13. Ha bersikulo 10 ngan 13, hi Jehova nagsiring ha nasud han Israel: “Diri ka mahadlok, kay ako upod ha imo; ayaw kahulop, kay ako an imo Dios; ako magpaparig-on ha imo; oo, ako mabulig ha imo; oo akon ka aagang-agangon pinaagi han too nga kamot han akon pagkamatadong. Kay ako, hi Jehova an imo Dios, makapot han imo too nga kamot, nga masiring ha imo: Ayaw kahadlok; ako mabulig ha imo.”

Diri ba makaparig-on gud ini nga mga pulong? Handurawa nga ikaw mismo an aada hito nga sitwasyon nga iginhuhulagway ni Jehova. Hini nga kahimtang, diri iginpapakita nga naglalakat kamo ni Jehova nga nagkakapotay. Kay kon sugad hito, an iya unta too nga kamot an nakakapot ha imo wala. Pero dinhi, an iya ‘too nga kamot han pagkamatadong’ amo an iya iginkakapot ha “imo too nga kamot,” nga baga hin ginbubutong ka tikang ha makuri nga kahimtang. Samtang ginbubutong ka niya, ginpapasarig ka niya: “Ayaw kahadlok; ako mabulig ha imo.”

Ginhuhunahuna mo ba hi Jehova sugad nga mahigugmaon nga Amay ngan Sangkay nga mabulig ha imo kon aada ka ha makuri nga kahimtang? Importante ka ha iya, interesado hiya han imo kaopayan, ngan karuyag gud niya nga buligan ka. Kon nakakaeksperyensya ka hin mga problema, karuyag ni Jehova nga abaton mo nga talwas ka kay hinigugma ka gud niya. “Parabulig gud [hiya] ha panahon han kakurian.”​—Sal. 46:1.

An iba nakukonsensya pa gihapon han ira nabuhat nga mga sala hadto ngan naghihinunahuna kon napasaylo na ba hira han Dios. Kon ito an imo kahimtang, tagda an matinumanon nga hi Job. Ginkarawat niya an iya ‘mga karaotan [o, sala] han iya pagkabatan-on.’ (Job 13:26) An salmista nga hi David inabat liwat hin sugad hito: “Ayaw hinumdumi an mga sala han akon kabatan-on bisan an akon mga pagsupak.” (Sal. 25:7) Tungod kay diri kita perpekto, kita ‘ngatanan nakakasala ngan diri naton naipapakita an himaya han Dios.’​—Roma 3:23.

An mensahe ha Isaias kapitulo 41 iginsurat para ha mga Israelita. Tungod han ira grabe nga sala, ginsirotan hira ni Jehova pinaagi ha pagdistyero ha ira ngadto ha Babilonya. (Isa. 39:6, 7) Bisan pa hito, nagsaad hiya nga tatalwason niya adton magbabasol ngan mabalik ha iya! (Isa. 41:8, 9; 49:8) Yana, iginpapakita liwat ni Jehova an iya gugma ngan kalooy hadton sinsero nga nagbabasol ngan karuyag nga makakarawat han iya pag-uyon.​—Sal. 51:1.

Tagda an eksperyensya ni Takuya. * Nangalimbasog hiya nga maatohan an pagkinita hin pornograpiya ngan pagbuhat han masturbasyon. Pero pauroutro la gihapon niya ito nga nahihimo. Ano an iya inabat? “Inabat ko nga diri na gud ako mapapasaylo, pero kon nag-aampo ako kan Jehova basi mangaro hin pasaylo, ginbubuligan niya ako nga makabangon tikang ha akon kahipakulob.” Paonan-o hiya ginbuligan ni Jehova? An mga tigurang ha kongregasyon nagsiring kan Takuya nga sumatan hira kon nabubuhat niya utro an iya mga sala. Hiya nagsiring: “Diri masayon an pagsumat ha ira, pero kon ginbubuhat ko ito, napaparig-on ako.” Katapos, naghikay an mga tigurang nga i-shepherding hi Takuya han paramangno han sirkito. An paramangno han sirkito nagsiring ha iya: “Diri kay nahituman la an akon pagkanhi. Kumanhi ako kay karuyag han mga tigurang nga bisitahon ko ikaw. Ikaw an ira ginpili nga i-shepherding ko.” Hi Takuya nagsiring: “Ako an nakasala, pero hi Jehova an dumaop pagbulig ha akon pinaagi han mga tigurang.” Nag-uswag hi Takuya, nagin regular payunir, ngan yana nag-aalagad na ha usa nga sanga nga opisina. Sugad la nga ginbuligan ini nga brother, bubuligan ka liwat han Dios nga makabangon tikang ha imo kahipakulob.

Damu an nababaraka tungod han kawaray-trabaho. An iba nawad-an hin trabaho ngan nakukurian nga makabiling hin iba nga pakabuhi. Ano daw la an imo aabaton kon diri ka ginkakarawat han imo gin-aaplayan nga mga trabaho? An pipira nga nakakaeksperyensya hito nawawad-an hin kompyansa ha kalugaringon. Paonan-o ka mabubuligan ni Jehova? Bangin diri ka dayon niya tagan hin maopay nga trabaho, pero mahimo niya ipahinumdom ha imo an ginsiring ni David: “Nagin bata ako, ngan yana lagas na ako; kondi waray pa ako makakita nga an mga magtadong pagpasibay-an, bisan ngani waray pa an iya mga katulinan pagpakilimos hin tinapay.” (Sal. 37:25) Oo, birilhon ka gud kan Jehova, ngan pinaagi han iya ‘too nga kamot han pagkamatadong,’ mabubuligan ka niya nga magkaada han imo ginkikinahanglan basi padayon nga makag-alagad ha iya.

Hi Sara nga taga-Colombia, nakaeksperyensya han bulig ni Jehova. Daku an iya sweldo ha usa nga  kilala nga kompanya pero daku nga panahon an iya igin-gagahin hito. Kondi karuyag niya nga pauswagon an iya ministeryo, salit umundang hiya ha iya trabaho ngan nagpayunir. Pero nakurian hiya pamiling hin part-time nga trabaho. Nag-abri hiya hin gutiay nga tindahan hin ice cream kondi hinay-hinay nga naubos an iya puhunan salit kinahanglan niya ito isara. “Tulo ka tuig an linabay, pero ha bulig ni Jehova, nakapailob ako,” siring ni Sara. Hinbaroan niya kon ano gud an mga panginahanglan ngan an mga karuyag la, ngan diri magkinabaraka para ha sunod nga adlaw. (Mat. 6:33, 34) Ha urhi, gintawagan hiya han iya agaron hadto ngan ginpapabalik ha iya trabaho. Nagsiring hiya nga kakarawaton niya an trabaho kon part-time la ito ngan tutugotan hiya nga mag-leave para ha espirituwal nga mga buruhaton. Oo, gutiay la an iya sweldo kay han hadto, pero padayon hiya nga nakakagpayunir. Hito ngatanan nga iya naeksperyensyahan, hiya nagsiring, “Inabat ko an mahigugmaon nga bulig ni Jehova.”

An kalagas usa pa nga nakakapabaraka ha mga tawo. Damu an naabot ha edad nga kinahanglan nira magretiro salit naghuhunahuna hira kon magkakaada pa ba hira igo nga kwarta nga makakasuporta ha ira bug-os nga kinabuhi. Nababaraka liwat hira nga bangin magkasakit hira kon malagas na. Posible nga hi David an naghangyo kan Jehova: “Ayaw ako isalikway kon ako matigurang [o, lagas] na; ayaw ako pagpasibay-i kon an akon kusog lumuya.”​—Sal. 71:9, 18.

Kon sugad, paonan-o magkakaada kasigurohan an mga surugoon ni Jehova kon lagas na hira? Kinahanglan padayon nira nga parig-unon an ira pagtoo ha Dios ngan sumarig nga iya itatagana an ira panginahanglan. Syempre kon hura hira hin materyal hadto, bangin kinahanglan nira pasimplihon an ira pagkinabuhi ngan magin kontento. Bangin masantop nira nga an pagkaon hin “mga utan” imbes nga “pinatambok nga baka” mas makalilipay ngan maopay pa ngani ha kahimsog! (Prob. 15:17) Kon nakapokus ka ha pag-alagad kan Jehova, tataganahan ka niya tubtob ha imo kalagas.

Tagda an kahimtang nira José ngan Rose, nga sobra 65 ka tuig na ha bug-os-panahon nga pag-alagad. Durante hito nga panahon, kinahanglan nira atamanon an tatay ni Rose adlaw ngan gab-i. Kinahanglan liwat ni José nga magpaopera ha iya kanser ngan magpa-chemotherapy. Igin-unat ba ni Jehova an iya too nga kamot hini nga matinumanon nga mag-asawa? Oo, kondi paonan-o? Ginpaukoy hira ha apartment han mag-asawa nga ira kakongregasyon nga hira Tony ngan Wendy. Libre nira nga ginpapaukyan an ira apartment para ha mga bug-os-panahon nga nag-aalagad. Nahinunumdoman ni Tony nga han hayskul hiya, nakikita niya ha bintana hira José ngan Rose nga pirme nagsasangyaw. Naapresyar gud niya an ira kadasig, ngan nagkaada ito daku nga epekto ha iya. Tungod kay gin-gamit hinin lagas na nga mag-asawa an ira bug-os nga kinabuhi ha pag-alagad kan Jehova, napagios hira Tony ngan Wendy nga paukyon hira ha ira apartment. Kinse ka tuig na nga ginbubuligan nira ini nga mag-asawa nga mga 85 anyos na yana. Gintatagad nira José ngan Rose an bulig nira Tony ngan Wendy sugad nga regalo tikang kan Jehova.

Igin-uunat liwat han Dios ha imo an iya ‘too nga kamot han pagkamatadong.’ Makapot ka ba ha kamot han Usa nga nagsasaad ha imo: “Ayaw kahadlok; ako mabulig ha imo”?