HAN gintutdoan ni Jesus an iya mga disipulo kon paonan-o isasangyaw an maopay nga sumat, gin-unabi niya nga an mensahe han Ginhadian diri pirme kakarawaton. (Luc. 10:3, 5, 6) Ha aton ministeryo, bangin igkita kita hin mga tawo nga nag-iisog ha aton o agresibo pa ngani. Tungod han sugad nga mga reaksyon, mahimo magin makuri an padayon nga pagpakita hin pagpaid ha mga tawo nga aton ginsasangyawan.

An mapinairon nga tawo nakakakita han panginahanglan ngan problema han iba, may simpatiya ha ira, ngan karuyag bumulig. Pero kon magtikang kawara an aton pagpaid ha mga nakakaistorya naton ha ministeryo, bangin magtikang liwat kawara an aton kadasig ngan pagin epektibo. Ha luyo nga bahin, kon ginkukultibar naton an pagpaid, sugad hin gindudugangan naton hin sungo an kalayo​—gintitipigan naton nga naglalaga an aton kadasig ha ministeryo!​—1 Tes. 5:19.

Paonan-o naton makukultibar an pagpaid bisan ha mga panahon nga makuri ito buhaton? Hisgotan naton an tulo nga ehemplo nga takos subaron​—an ehemplo ni Jehova, ni Jesus, ngan ni apostol Pablo.

Yinukot na nga katuigan nga gin-iilob ni Jehova an pagpasipara nga iginhahatag ha iya ngaran. Pero nagpapabilin hiya nga “buotan . . . ha mga diri-mapasalamaton ngan magraot.” (Luc. 6:35) An iya pagin buotan nakikita pinaagi han iya pagpailob. Karuyag ni Jehova nga “an ngatanan nga klase hin tawo” matalwas. (1 Tim. 2:3, 4) Bisan kon nangangalas an Dios ha karaotan, gintatagad niya nga presyoso an mga tawo ngan diri niya karuyag nga mawara an kinabuhi han bisan hin-o.​—2 Ped. 3:9.

Maaram hi Jehova nga epektibo gud hi Satanas ha pagbuta ha mga tawo nga diri tumuroo. (2 Cor. 4:3, 4) Damu an gintutdoan hin sayop nga mga toloohan ngan disposisyon tikang ha kabata, salit nakukurian hira nga karawaton an kamatuoran. Karuyag gud ni Jehova nga buligan an sugad nga mga tawo. Kay ano nga nakasiring kita hito?

Pananglitan, tagda kon ano an gin-abat ni Jehova ha mga tawo ha syudad han Ninibe. Bisan pa han ira pagin madarahog, hi Jehova nagsiring kan Jonas: “Diri ba ako magtatagad han Ninibe adton daku nga bungto, diin aada an labaw hin usa ka gatus karuhaan ka yukut nga tawo nga diri nakakatino han ginkakalainan han ira too nga kamot ngan han ira wala nga kamot?” (Jon. 4:11) Nalooy hi Jehova ha ira kay diri hira maaram han kamatuoran mahitungod ha iya. Salit ginsugo niya hi Jonas basi pahamangnoan hira.

Pariho kan Jehova, gintatagad naton nga presyoso an mga tawo. Masusubad naton hiya pinaagi han pangalimbasog nga buligan an bisan hin-o nga bangin mamati, bisan kon baga hin diri hira magios.

Kon negatibo an reaksyon han mga tawo ha aton mensahe, kinahanglan sabton naton hira ngan pakianhan an aton kalugaringon kon kay ano nga sugad  hito an ira reaksyon. An iba bangin may negatibo nga panhunahuna ha Biblia o ha Kristianidad tungod han maraot nga mga ehemplo han nag-aangkon nga mga Kristiano. An iba naman bangin ginsumatan hin mga buwa mahitungod han aton mga gintotoohan. Ngan an iba pa bangin tamayon han mga tawo ha ira komunidad o han ira mga kapamilya kon karawaton nira kita.

May mga nakakaistorya kita ha ministeryo nga bangin negatibo an reaksyon tungod kay may-ada hira magraot nga eksperyensya nga nakaapekto gud ha ira. An misyonero nga hi Kim nagsiring: “Ha usa nga lugar ha amon teritoryo, damu nga tawo an biktima hin girra, ngan tungod hito nawara an ngatanan nira nga panag-iya. Waray hira tinuod nga paglaom ha tidaraon. Nasisina hira ngan diri natapod ha bisan hin-o. Hito nga lugar, agsob namon igkita an mga tawo nga nakontra ha aton mensahe. Usa ka beses, gin-atake ako han usa nga tagbalay samtang nagsasangyaw.”

Ano an nakakabulig kan Kim nga padayon nga magpakita hin pagpaid bisan pa han sugad nga pagtratar? Nagsiring hiya: “Kon gintatratar hin diri maopay, pirme ko ginhuhunahuna an Proberbios 19:11, nga nasiring: ‘An kanan tawo pagtirotimbang nakakahimo ha iya nga mahinay ha pagkasina.’ An paghinumdom han gin-agian han mga tawo ha amon teritoryo nakakabulig ha akon nga makultibar an pagpaid ha ira. Ngan diri man ngatanan nga amon nakakaistorya nakontra. Hito liwat nga lugar, may-ada kami mga ginbabalik-bisita.”

Mahimo naton pakianhan an aton kalugaringon, ‘Ano an akon magigin reaksyon ha mensahe han Ginhadian kon ako an aada ha kahimtang han amon ginsasangyawan?’ Pananglitan, ano man kon pauroutro nga ginsusumatan kita hin mga buwa mahitungod ha mga Saksi ni Jehova? Ha sugad nga mga kahimtang, bangin magin negatibo liwat an aton reaksyon ngan manginahanglan kita hin pagpaid. Kon hihinumdumon naton an sugo ni Jesus nga trataron an iba sugad han karuyag naton nga magin pagtratar ha aton, mapapagios kita nga magpakita hin empatiya bisan ha mga panahon nga makuri ito buhaton.​—Mat. 7:12.

Hi apostol Pablo nagpakita hin pagpaid bisan ha mga madarahog nga nakontra. Kay ano? Waray niya kalimti an iya kalugaringon nga eksperyensya. Nagsiring hiya: “Hadto parapasipara ako, paratimaraot, ngan nanmamaltrato nga tawo. Pero bisan pa hito, ginkalooyan ako tungod han akon kaignorante ngan kawaray pagtoo.” (1 Tim. 1:13) Ginkilala niya nga hi Jehova ngan hi Jesus nagpakita ha iya hin daku nga kalooy. Posible nga nakikita niya ha pipira nga iya ginsasangyawan an iya pagkatawo hadto.

May mga panahon nga iginkita hi Pablo hin mga tawo nga nakagamot na gud ha ira an buwa nga mga gintotoohan. Ano an iya gin-abat? An Buhat 17:16  nagsusumat nga samtang nakadto hi Pablo ha Atenas, “naaringit hiya pagkinita ha syudad kay puno ito hin mga dios-dios.” Bisan pa hito, gin-gamit ni Pablo an butang mismo nga iya naaringitan basi makasangyaw. (Buh. 17:22, 23) Iginpahiuyon niya an iya mga paagi han pagsangyaw ha mga gintikangan han iba-iba nga klase hin tawo basi niya “matalwas . . . an iba ha anoman nga paagi kon posible.”​—1 Cor. 9:20-23.

Masusubad naton hi Pablo pinaagi han pagsabot ha negatibo nga mga disposisyon o ha sayop nga mga gintotoohan han mga tawo nga iginkikita naton ngan pinaagi han mataktika nga pag-istorya ha ira han “magopay nga mga sumat han kaopayan.” (Isa. 52:7) An sister nga hi Dorothy nagsiring: “Ha amon teritoryo, damu an gintutdoan nga an Dios mapintas ngan madagmit maghukom. Ginkukumendasyonan ko an sugad nga mga tawo tungod han ira marig-on nga pagtoo ha Dios. Katapos, ginsusumatan ko hira han ginsisiring han Biblia mahitungod han mahigugmaon nga personalidad ni Jehova ngan han iya mga saad ha tidaraon.”

Sadang liwat naton tagdon kon paonan-o paparig-unon an aton kabugtoan. Hi Jessica nagsiring: “Kon an usa ha amon nagkaada diri maopay nga eksperyensya, nangangalimbasog ako nga diri magpokus hito. Lugod, ginhihimo ko nga positibo an amon istorya, sugad han maopay nga nahihimo han aton ministeryo bisan pa han negatibo nga mga reaksyon han iba.”

Maaram gud hi Jehova han mga kakurian nga aton naieksperyensyahan ha ministeryo. Sigurado nga nalilipay gud hiya kon ginsusubad naton an iya kalooy! (Luc. 6:36) Syempre, may kataposan gihapon an pagpaid ni Jehova. Makakasarig kita nga maaram gud hiya han husto nga panahon ha pagtapos hini nga sistema han mga butang. Samtang diri pa ito naabot, gin-aapura an aton pagsangyaw. (2 Tim. 4:2) Padayon nga tumanon naton an aton toka nga may kadasig ngan pagpaid ha “ngatanan nga klase hin tawo.”