1. Sugad han iginpapakita han 3 Juan 3, 4, ano an nakakapalipay ha aton?

NAIIMADYIN mo ba an kalipay nga inabat ni apostol Juan han nahibaroan niya nga adton iya mga nabuligan nga mahibaro han kamatuoran padayon nga nag-aalagad kan Jehova hin matinumanon? Inatubang hira hin damu nga problema, ngan nangalimbasog gud hi Juan nga parig-unon an pagtoo hinin maunungon nga mga Kristiano nga iya ginkukonsiderar nga iya mga anak. Sugad man, nalilipay kita kon an aton mga anak o adton mga nabuligan naton nga mahibaro han kamatuoran nagdidedikar han ira kalugaringon kan Jehova ngan padayon nga nag-aalagad ha iya.​—Basaha an 3 Juan 3, 4.

2. Ano an katuyoan han mga surat nga ginhimo ni Juan?

² Han 98 C.E., hi Juan posible nga naukoy ha Efeso o hirani dida hito. Bangin binalhin hiya didto katapos niya makagawas ha prisohan ha isla han Patmos. Hito nga mga panahon, ginpagios hiya han espiritu ni Jehova nga maghimo hin tulo nga surat. Katuyoan hito nga mga surat nga dasigon an maunungon nga mga Kristiano nga tipigan an ira pagtoo kan Jesus ngan padayon nga maglakat ha kamatuoran.

3. Ano nga mga pakiana an aton babatunon?

³ Hi Juan na la an buhi nga apostol, ngan nababaraka hiya ha mga kongregasyon tungod han maraot nga impluwensya han buwa nga mga magturutdo. * (1 Juan 2:18, 19, 26) Ito nga mga apostata nasiring nga kilala nira an Dios pero diri hira nasunod han mga sugo ni Jehova. Hisgotan naton an giniyahan nga sagdon nga iginhatag ni Juan ngan batunon naton inin tulo nga pakiana:  Ano an iginpapasabot han paglakat ha kamatuoran? Ano nga mga ulang an aton gin-aatubang? Ngan paonan-o naton mabubuligan an usa kag usa nga magpabilin ha kamatuoran?

4. Sumala ha 1 Juan 2:3-6 ngan 2 Juan 4, 6, ano an kinahanglan naton buhaton basi makaglakat ha kamatuoran?

⁴ Basi makaglakat ha kamatuoran, kinahanglan naton hibaroan an kamatuoran nga makikita ha Pulong han Dios, an Biblia. Dugang pa, kinahanglan naton ‘tumanon an mga sugo [ni Jehova].’ Karuyag sidngon, kinahanglan naton sundon ito. (Basaha an 1 Juan 2:3-6; 2 Juan 4, 6.) Hi Jesus nagpakita hin perpekto nga susbaranan ha pagsunod kan Jehova. Salit, an usa nga importante nga paagi nga ginsusugot naton hi Jehova amo an pagsunod hin maopay ha mga pitad ni Jesus tubtob gud ha aton mahihimo.​—Juan 8:29; 1 Ped. 2:21.

5. Ha ano kita kinahanglan magin kombinsido?

⁵ Basi makaglakat ha kamatuoran, kinahanglan magin kombinsido kita nga hi Jehova an Dios han kamatuoran, ngan tinuod an ngatanan nga iginsusumat niya ha aton dida ha iya Pulong, an Biblia. Ngan kinahanglan magin kombinsido liwat kita nga hi Jesus an iginsaad nga Mesias. Yana, damu an nagruruhaduha nga hi Jesus an gindihogan nga Hadi han Ginhadian han Dios. Hi Juan nagpahamangno nga damu nga paralimbong an manlilimbong hadton diri marig-on an pagtoo ha kamatuoran mahitungod kan Jehova ngan kan Jesus. (2 Juan 7-11) Hi Juan nagsurat: “Hin-o an buwaon, diri ba hiya nga nagninigar nga hi Jesus an Kristo?” (1 Juan 2:22) An paagi la basi diri kita malimbongan amo an pag-aram han Pulong han Dios. Kon bubuhaton naton ito, makikilala naton hi Jehova ngan hi Jesus. (Juan 17:3) Ngan magigin kombinsido kita nga an aton gintotoohan amo an kamatuoran.

6. Ano an usa nga ulang nga gin-aatubang han batan-on nga mga Kristiano?

⁶ An ngatanan nga Kristiano kinahanglan magbantay nga diri malimbongan han pilosopiya han tawo. (1 Juan 2:26) An batan-on nga mga Kristiano labi nga kinahanglan maghirot hini nga lit-ag. Hi Alexia * nga 25 anyos nga sister nga taga-France, nagsiring: “Han burobata pa ako, nagruhaduha ako han kamatuoran tungod han katutdoan han kalibotan, sugad han teoriya han  ebolusyon, ngan pilosopiya han tawo. May mga panahon nga nainteres ako hito nga mga katutdoan. Pero nahunahuna ko nga sayop nga igbalewaray an igintututdo han Biblia ngan basta na la tumuod ha ngatanan nga ginsisiring han akon mga titser.” Gin-adman ni Alexia an libro nga Life​—How Did It Get Here? By Evolution or by Creation? Paglabay hin pipira ka semana, nawara an iya mga pagruhaduha. Hi Alexia nagsiring: “Napamatud-an ko ha akon kalugaringon nga kamatuoran an sulod han Biblia ngan nasabtan ko nga an pagkinabuhi uyon ha mga suruklan hito maghahatag ha akon hin kalipay ngan kamurayawan.”

7. Ano an kinahanglan naton likyan, ngan kay ano?

⁷ Kinahanglan likyan han ngatanan nga Kristiano, batan-on man o edaran, an doble nga pagkinabuhi. Ginpabug-atan ni Juan nga diri kita makakaglakat ha kamatuoran ngan ha pariho nga panahon magkikinabuhi hin imoral. (1 Juan 1:6) Kon karuyag naton an pag-uyon han Dios yana ngan ha maabot nga panahon, kinahanglan hinumdoman naton nga may nagkikita han ngatanan naton nga ginbubuhat. Salit waray sala nga maitatago kay ngatanan nga aton ginbubuhat nakikita ni Jehova.​—Heb. 4:13.

8. Ano an kinahanglan naton isalikway?

⁸ Kinahanglan isalikway naton an panhunahuna han kalibotan mahitungod ha sala. Hi apostol Juan nagsurat: “Kon magsiring kita, ‘Waray kita sala,’ ginlilimbongan naton an aton kalugaringon.” (1 Juan 1:8) Ha panahon ni Juan, an mga apostata nagsiring nga an usa mahimo magbuhat hin sala ngan magin sangkay la gihapon han Dios. Yana, damu nga tawo an may sugad hito nga panhunahuna. Damu an nasiring nga natoo hira ha Dios pero diri hira nauyon ha panhunahuna ni Jehova mahitungod ha sala, labi na kon may kalabotan ha sex. An mga buhat nga sala para kan Jehova ginhuhunahuna hini nga mga tawo nga puydi nira himoon basta karuyag nira.

9. Paonan-o nagpapahimulos an mga batan-on kon ginsusunod nira hin marig-on an ira hinbabaroan ha Biblia?

⁹ An batan-on nga mga Kristiano mahimo mapresyur  nga kopyahon an panhunahuna han ira mga kaklase o katrabaho may kalabotan ha imoral nga mga buhat. Ito an nahitabo kan Aleksandar. Hiya nagsiring: “May kababayin-an ha amon eskwelahan nga ginpipresyur ako nga makig-sex ha ira. Nagsiring hira nga bayot kuno ako kay waray ako uyab.” Kon nakakaeksperyensya ka hin puropariho hito, hinumdumi nga kon susundon mo hin marig-on an imo hinbabaroan ha Biblia, mapuproteksyonan mo an imo respeto ha kalugaringon, an imo kahimsog, an imo emosyon, ngan an imo relasyon kan Jehova. Ngan ha kada panahon nga gin-aatohan mo an pagsulay, magigin mas masayon ha imo an pagbuhat han tama. Hinumdumi liwat nga an baliko nga panhunahuna han mga tawo mahitungod ha sex nagtikang kan Satanas. Salit kon diri ka nagkukompromiso, ‘gindadaog mo an usa nga maraot.’​—1 Juan 2:14.

10. Paonan-o an 1 Juan 1:9 nabulig ha aton nga makag-alagad kan Jehova nga may limpyo nga konsensya?

¹⁰ Ginkakarawat naton nga hi Jehova an may katungod ha pagsiring kon ano an sala, ngan nangangalimbasog gud kita nga diri makasala. Pero kon nakakasala kita, ginsusumat naton ito kan Jehova ha pag-ampo. (Basaha an 1 Juan 1:9.) Ngan kon nakakahimo kita hin seryoso nga sala, nangangaro kita hin bulig ha mga tigurang, nga ginpili ni Jehova ha pagmangno ha aton. (San. 5:14-16) Pero kinahanglan diri kita padayon nga makonsensya ha mga sala nga nabuhat naton hadto. Kay ano? Kay an aton mahigugmaon nga Amay nagtagana han halad-lukat han iya Anak basi mapasaylo an aton mga sala. Kon nasiring hi Jehova nga papasayloon niya an mga mabinasulon, tutumanon gud niya ito. Salit waray makakaulang ha aton ha pag-alagad kan Jehova nga may limpyo nga konsensya.​—1 Juan 2:1, 2, 12; 3:19, 20.

11. Paonan-o naton mapuproteksyonan an aton hunahuna ha mga katutdoan nga makakapaluya han aton pagtoo?

¹¹ Kinahanglan isalikway naton an mga katutdoan han mga apostata. Tikang han naestablisar  an Kristiano nga kongregasyon, nagamit na an Yawa hin damu nga mga paralimbong basi magtanom hin mga pagruhaduha ha hunahuna han matinumanon nga mga surugoon han Dios. Salit kinahanglan naton hibaroan an kaibahan han kamatuoran ngan buwa. * Mahimo gamiton han aton mga kaaway an Internet o social media basi paluyahon an aton pagtoo kan Jehova ngan an aton gugma ha aton kabugtoan. Hinumdumi kon kan kanay ito nga mga propaganda ngan isalikway ito!​—1 Juan 4:1, 6; Pah. 12:9.

12. Kay ano nga kinahanglan naton pahilarumon an aton apresasyon ha mga kamatuoran nga aton nahibaroan?

¹² Basi maatohan an mga pag-atake ni Satanas, kinahanglan naton pahilarumon an aton pagtoo kan Jesus ngan ha iya papel ha katuyoan han Dios. Kinahanglan liwat naton sumarig ha grupo nga ginagamit ni Jehova yana ha pagpanguna han iya organisasyon. (Mat. 24:45-47) Ginpapahilarom naton an aton pagsarig pinaagi ha regular nga pag-aram han Pulong han Dios. Kon ginbubuhat naton ito, an aton pagtoo magigin pariho hin puno nga nakagamot hin hilarom ha tuna. Puropariho hito an ginsiring ni Pablo han nagsurat hiya ha kongregasyon ha Colosas. Hiya nagsiring: “Sugad la nga ginkarawat niyo an Ginoo nga hi Kristo Jesus, padayon nga maglakat kamo nga kahiusa niya, nga nakagamot hin marig-on ngan nakatukod ha iya ngan marig-on an pagtoo.” (Col. 2:6, 7) Kon mangangalimbasog kita nga parig-unon an aton pagtoo, waray gud mahihimo hi Satanas ngan adton mga nasuporta ha iya basi pahunungon kita ha paglakat ha kamatuoran.​—2 Juan 8, 9.

13. Ano an kinahanglan naton laoman, ngan kay ano?

¹³ Kinahanglan laoman naton nga mangangalas ha aton an kalibotan. (1 Juan 3:13) Ginpapahinumdoman kita ni Juan nga “an bug-os nga kalibotan aada ha gahum han usa nga maraot.” (1 Juan 5:19) Samtang nagtitikahirani an kataposan hini nga sistema, nagtitikaduro an kasina ni Satanas. (Pah. 12:12) Diri la hiya nagamit hin diri abat nga mga pag-atake, sugad han imoralidad ngan kabuwaan han mga apostata, kondi nagamit liwat hiya hin direkta nga mga pag-atake, sugad han brutal nga pagtimaraot. Maaram hi Satanas nga halipot na la an iya panahon basi pahunungon an aton pagsangyaw nga buruhaton o rubaon an aton pagtoo. Salit diri urusahon nga an pipira o an ngatanan nga aton buruhaton igindidiri ha iba nga nasud. Bisan pa hito, padayon nga nag-aalagad an aton kabugtoan hito nga mga nasud. Ginpapamatud-an nira nga anoman an buhaton ni Satanas ha katawohan ni Jehova, makakapabilin kita nga matinumanon!

14. Ano an usa nga paagi nga mabubuligan naton an aton kabugtoan nga magpabilin ha kamatuoran?

¹⁴ Basi mabuligan an aton kabugtoan nga magpabilin ha kamatuoran, kinahanglan naton magpakita hin pagpaid. (1 Juan 3:10, 11, 16-18) Kinahanglan higugmaon naton an usa kag usa, diri la kon maopay an kahimtang, kondi pati liwat kon may mga problema. Pananglitan, may kilala ka ba nga namatayan hin hinigugma ngan nagkikinahanglan hin pagliaw o praktikal nga bulig? O may nahibaroan ka ba nga mga igkasi-tumuroo nga nawad-an hin mga panag-iya tungod hin kalamidad ngan nagkikinahanglan hin bulig basi matukod utro an ira Kingdom Hall o an ira balay? Iginpapakita naton an aton daku nga gugma ngan pagpaid ha aton kabugtoan, diri la ha aton ginsisiring, kondi labi na ha aton ginbubuhat.

15. Sumala ha 1 Juan 4:7, 8, ano an kinahanglan naton buhaton?

¹⁵ Ginkukopya naton an pagin mahigugmaon han aton langitnon nga Amay kon nagpapakita kita hin gugma ha usa kag usa. (Basaha an 1 Juan 4:7, 8.) An usa nga importante nga paagi nga nagpapakita kita hin gugma amo an pagpasaylo ha usa kag usa. Pananglitan, bangin may  nakasakit ha aton pero nangaro hiya hin pasaylo. Nagpapakita kita hin gugma pinaagi ha pagpasaylo ha iya ngan paglimot han iya ginbuhat ha aton. (Col. 3:13) An brother nga hi Aldo inatubang hini nga pagsari han hinbatian niya an usa nga brother nga iya ginrirespeto nga nagyakan hin maraot mahitungod ha iya mga kalahi. Hi Aldo nagsiring, “Pirme ako nag-aampo kan Jehova nga buligan ako nga diri masina hini nga brother.” Pero may iba pa nga ginbuhat hi Aldo. Ginhangyo niya an brother nga updan hiya ha pagsangyaw. Samtang nagsasangyaw hira, iginsaysay ni Aldo nga naapektohan gud hiya ha ginsiring han brother. Hi Aldo nagsiring: “Han hinbatian han brother kon ano an akon inabat mahitungod han iya negatibo nga ginsiring, nangaro hiya hin pasaylo. Ha tono han iya tingog, inabat ko nga nagbasol gud hiya han iya ginsiring. Nagbulag kami nga magsangkay la gihapon ngan ginkalimtan an problema.”

16-17. Ano an angay naton magin determinasyon?

¹⁶ Hinigugma gud ni apostol Juan an iya kabugtoan ngan karuyag niya nga magkaada hira marig-on nga pagtoo. An iya gugma ngan pagpaid klaro nga makikita ha sagdon nga iya iginhatag ha ira ha iya tulo nga surat. Makalilipay gud hibaroan nga an kalalakin-an ngan kababayin-an nga magmamando ha langit kaupod ni Jesus mahigugmaon ngan mapinairon pariho kan Juan!​—1 Juan 2:27.

¹⁷ Hinaot iaplikar naton an sagdon nga aton nahisgotan. Magin determinado kita nga maglakat ha kamatuoran ngan sundon hi Jehova ha ngatanan nga bahin han aton kinabuhi. Admi an iya Pulong ngan sarig hito. Magkaada marig-on nga pagtoo kan Jesus. Isalikway an pilosopiya han mga tawo ngan katutdoan han mga apostata. Likayi an doble nga pagkinabuhi ngan atohi an pagsulay nga magbuhat hin sala. Magkinabuhi ha hitaas nga suruklan ni Jehova ha moral. Ngan buligan naton an aton kabugtoan nga magpabilin nga marig-on pinaagi ha pagpasaylo hadton nakasakit ha aton ngan pagbulig hadton nanginginahanglan. Pinaagi hito, bisan pa han mga pagsari nga aton gin-aatubang, padayon kita nga maglalakat ha kamatuoran.