1. Kay ano nga diri kita ginkukompara ni Jehova ha iba?

NALILIPAY gud hi Jehova ha pagkaiba-iba. Klaro nga makikita ito ha iya urusahon nga mga linarang, upod na an tawo. Waray kapariho an kada tagsa ha aton. Salit diri ka gud ginkukompara ni Jehova ha iba. Iya gin-uusisa an imo kasingkasing, an imo tinuod nga pagkatawo. (1 Sam. 16:7) Maaram liwat hiya han imo mga abilidad, kaluyahan, ngan gindak-an. Ngan diri hiya naghahangyo ha imo hin labaw ha imo makakaya. Kinahanglan kitaon liwat naton an aton kalugaringon pariho han pagkita ha aton ni Jehova. Kon bubuhaton naton ito, magkakaada kita “maopay nga panhunahuna”; diri kita maghuhunahuna hin sobra ha aton kalugaringon ngan diri liwat naton miminuson an aton kalugaringon.​—Roma 12:3.

2. Kay ano nga diri maopay nga ikompara naton an aton kalugaringon ha iba?

² Syempre, mahimo kita magpahimulos ha maopay nga ehemplo han usa nga bugto nga epektibo ha ministeryo. (Heb. 13:7) Mahimo kita mahibaro ha iya hin mga paagi basi magin mas epektibo kita ha aton mismo ministeryo. (Fil. 3:17) Pero may kaibahan an pagsubad han maopay nga ehemplo han usa ngan pagkompara han imo kalugaringon ha iya. Kon ikukompara mo an imo kalugaringon ha iba, mahimo ka maawa, manluya, o umabat pa ngani hin kawaray-pulos. Sugad han aton nahibaroan ha nauna nga artikulo, kon makikigkompetensya kita ha kabugtoan, madadaot liwat an aton espirituwalidad. Salit mahigugmaon nga ginsasagdonan kita ni Jehova: “Usisahon han kada tagsa an iya mga buhat, ngan magkakaada hiya hinungdan nga malipay gud ha iya la kalugaringon,  ngan diri igintatanding an iya kalugaringon ha iba nga tawo.”​—Gal. 6:4.

3. Ano nga mga pag-uswag ha espirituwal nga imo nahimo an nakakapalipay ha imo?

³ Karuyag ni Jehova nga malipay ka ha imo mismo pag-uswag ha espirituwal. Pananglitan, kon bawtismado ka na, dapat ka malipay nga nakab-ot mo ito nga tumong! Ikaw mismo an naghimo hito nga desisyon. Ginbuhat mo ito tungod han imo gugma ha Dios. Hunahunaa an mga pag-uswag nga imo nahimo tikang hito nga panahon. Pananglitan, mas naghilarom ba an imo gugma ha personal nga pagbasa ngan pag-aram han Biblia? Nagin mas sinsero ngan kinasingkasing ba an imo mga pag-ampo? (Sal. 141:2) Nagin mas masayon na ba ha imo nga makagtikang hin pakiistorya samtang nagsasangyaw ka ngan mas epektibo ka na ba ha paggamit han aton mga garamiton para ha ministeryo? Ngan kon pamilyado ka, nagin mas maopay ka ba nga bana, asawa, o kag-anak tungod han bulig ni Jehova? Mahimo ka gud malipay hito nga mga pag-uswag nga imo nahimo.

4. Ano an aton hihisgotan hini nga artikulo?

⁴ Mabubuligan naton an iba nga malipay ha ira mismo pag-uswag ha espirituwal. Mabubuligan liwat naton hira nga diri ikompara an ira kalugaringon ha iba. Hini nga artikulo, mahibabaroan naton kon paonan-o mabubuligan han mga kag-anak an ira mga anak, kon paonan-o mabubuligan han mag-asawa an kada tagsa ha ira, ngan kon paonan-o mabubuligan han mga tigurang ngan han iba an ira kabugtoan. Katapos, hihisgotan naton an pipira nga prinsipyo ha Biblia nga makakabulig ha aton nga maghimo hin mga tumong nga makakaya naton kab-uton uyon ha aton mga abilidad ngan kahimtang.

5. Sumala ha Efeso 6:4, ano an kinahanglan likyan han mga kag-anak?

⁵ Kinahanglan maghirot an mga kag-anak nga diri ikompara an usa nira nga anak ha iba o maghangyo ha iya hin labaw kay ha iya makakaya. Kon bubuhaton ito han mga kag-anak, mahimo manluya an ira anak. (Basaha an Efeso 6:4.) An sister nga hi Sachiko * nagsiring: “Hadto, naglalaom an akon mga titser nga magigin mas maopay ako kay ha akon mga kaklase. Karuyag liwat ni Nanay nga maniguro ako ha eskwelahan basi makaghatag ako hin maopay nga pamatuod ha akon titser ngan ha akon tatay nga diri Saksi. Ngani, karuyag niya nga ma-perfect ko an akon mga eksam, pero imposible ito. Bisan kon damu ka tuig na nga nahuman ako pag-eskwela, danay inaabat ko la gihapon nga diri nalilipay hi Jehova ha akon bisan kon ginbubuhat ko an akon pinakamaopay.”

6. Ano an mahibabaroan han mga kag-anak ha Salmo 131:1, 2?

 ⁶ An usa nga importante nga leksyon para ha mga kag-anak mababasa ha Salmo 131:1, 2. (Basaha.) Hi Hadi David nagsiring nga waray hiya ‘magtinguha hin dagku hinduro nga mga butang’ o hin mga butang nga diri niya maaakos. An iya pagin mapainubsanon ngan pagkilala han iya mga limitasyon ‘nagpakalma ngan nagpahilom’ ha iya. Ano an mahibabaroan han mga kag-anak tikang ha ginsiring ni David? Maipapakita han mga kag-anak nga mapainubsanon hira ngan ginkikilala nira nga an kada tagsa may mga limitasyon kon diri hira maglalaom hin sobra ha ira kalugaringon ngan pati ha ira mga anak. Mapapasarig han mga kag-anak an ira anak nga presyoso hiya pinaagi ha pagkilala han iya mga abilidad ngan kaluyahan kon ginbubuligan nira hiya nga maghimo hin mga tumong nga kaya niya kab-uton. An sister nga hi Marina nagsiring: “Waray gud ako ikompara ni Nanay ha akon tulo nga kabugtoan o ha iba nga kabataan. Gintutdoan niya ako nga an kada tagsa may iba-iba nga abilidad ngan presyoso kan Jehova an kada usa ha aton. Tungod ha iya, talagsa ko gud la ikompara an akon kalugaringon ha iba.”

7-8. Paonan-o mapapasidunggan han usa nga bana an iya asawa?

⁷ Kinahanglan pasidunggan han Kristiano nga bana an iya asawa. (1 Ped. 3:7) An pagpasidungog nag-uupod ha paghatag hin espesyal nga atensyon ngan respeto ha iba. Pananglitan, ginpapasidunggan han bana an iya asawa pinaagi ha pagtratar ha iya nga may respeto. Diri hiya naghahangyo ha iya hin labaw kay ha iya makakaya. Diri gud liwat niya ginkukompara hiya ha iba nga babaye. Kon bubuhaton niya ito, ano an mahimo magin epekto han sugad nga pagkompara? An sister nga hi Rosa agsob ikompara han iya diri Saksi nga bana ha iba nga babaye. Tungod han iya masakit nga panyakan, diri la kay nawara an kan Rosa kompyansa ha kalugaringon, kondi nagruhaduha liwat hiya kon may-ada gud ba nahigugma ha iya. Hiya nagsiring, “Kinahanglan pirme ako pasarigon nga importante ako kan Jehova.” Ha kabaliktaran, ginpapasidunggan han usa nga Kristiano nga bana an iya asawa. Maaram hiya nga an pagbuhat hito may maopay nga epekto ha iya relasyon ha iya asawa ngan ha iya relasyon kan Jehova. *

⁸ An bana nga nagpapasidungog ha iya asawa nagdadayaw ha iya, nagpapasarig ha iya han iya gugma, ngan naghahatag ha iya hin kumendasyon. (Prob. 31:28) Ito an ginbubuhat han bana ni Katerina, nga gin-unabi ha nauna nga artikulo, basi buligan hiya nga maatohan an iya minos nga pagkita ha iya kalugaringon. Han bata pa hiya, pirme hiya ginmiminos han iya nanay ngan agsob hiya ikompara ha iba nga kabataan pati na ha iya kasangkayan. Sugad nga resulta, an nagin basihan na ni Katerina basi makita an iya importansya amo an pagkompara han iya kalugaringon ha iba​—bisan han nagin Saksi na hiya! Pero ginbuligan hiya han iya Kristiano nga bana nga maatohan ito nga tendensya ngan magkaada timbang nga pagkita ha iya kalugaringon. Hiya nagsiring: “Hinigugma niya ako, ginkukumendasyonan niya ako ha mag-opay ko nga ginbubuhat, ngan iya ako igin-aampo. Iya liwat iginpapahinumdom ha akon an mag-opay nga kalidad ni Jehova ngan ginbubuligan niya ako nga tadungon an akon negatibo nga panhunahuna.”

9-10. Paonan-o ginbuligan han mahigugmaon nga mga tigurang an usa nga sister nga diri ikompara an iya kalugaringon ha iba?

⁹ Paonan-o mabubuligan han mga tigurang adton may-ada tendensya nga ikompara an ira kalugaringon ha iba? Tagda an eksperyensya han sister nga hi Hanuni, nga talagsa la kumendasyonan han bata pa hiya. Hiya nagsiring: “Awdanon ako ngan inabat ko nga mas maopay kay ha akon an iba nga kabataan. Bata pa ako ginkukompara ko  na an akon kalugaringon ha iba.” Bisan han Saksi na hi Hanuni, iginkukompara la gihapon niya an iya kalugaringon ha iba, salit inabat niya nga diri hiya importante ha kongregasyon. Pero yana malipayon na hiya nga payunir. Ano an nakabulig ha iya nga mabag-o an iya panhunahuna?

¹⁰ Hi Hanuni nagsiring nga nabuligan hiya han mahigugmaon nga mga tigurang. Nagsiring hira nga importante hiya ha kongregasyon ngan ginkumendasyonan hiya ha iya maopay nga susbaranan. Hiya nagsurat: “Pipira ka beses nga ginhangyo ako han mga tigurang nga dasigon an pipira nga sister nga nanginginahanglan hin bulig. Tungod hito nga toka, inabat ko nga importante ako. Nahinunumdoman ko han ginpasalamatan ako han mahigugmaon nga mga tigurang tungod han akon pagdasig ha pipira nga burobata nga sister. Katapos, ginbasa nira ha akon an 1 Tesalonica 1:2, 3. Nabantad gud ako hito! Tungod hiton mahigugmaon nga mga tigurang, ginpapabilhan ko na yana an akon papel ha organisasyon ni Jehova.”

11. Paonan-o naton mabubuligan an ‘mga gintatalumpigos ngan mapainubsanon an espiritu,’ sugad han gin-uunabi ha Isaias 57:15?

¹¹ Basaha an Isaias 57:15. Hinigugma gud ni Jehova an ‘mga gintatalumpigos ngan mga mapainubsanon an espiritu.’ Kita ngatanan, diri la an mga tigurang, mahimo makabulig ha pagdasig hinin hinigugma nga kabugtoan. An usa nga paagi nga madadasig naton hira amo an pagpakita ha ira hin sinsero nga interes. Karuyag ni Jehova nga ipaabat naton ha ira an iya gugma ha iya presyoso nga mga karnero. (Prob. 19:17) Mabubuligan liwat naton an aton kabugtoan pinaagi ha pagin mapainubsanon ngan pagkilala han aton mga limitasyon. Diri naton karuyag nga magpaimpres kay mahimo ito magresulta nga maawa an iba ha aton. Lugod, karuyag naton gamiton an aton mga abilidad ngan kahibaro basi dasigon an usa kag usa.​—1 Ped. 4:10, 11.

12. Kay ano nga karuyag gud han ordinaryo nga mga tawo hi Jesus? (Kitaa an retrato ha kobre.)

¹² Damu an aton mahibabaroan mahitungod ha kon paonan-o tatrataron an iba pinaagi ha pagkonsiderar kon paonan-o gintratar ni Jesus an iya mga sumurunod. Hiya an pinakabantogan nga tawo nga nabuhi. Pero “malumo [hiya] ngan mapainubsanon an kasingkasing.” (Mat. 11:28-30) Bisan kon baltok gud hiya ngan may hilarom nga kahibaro, waray niya ito ighambog. Nagtutdo hiya gamit an simple nga linggwahe ngan masayon masabtan nga mga ilustrasyon nga nakabantad han kasingkasing han ordinaryo nga mga tawo. (Luc. 10:21) Hi Jesus diri pariho ha mapahitas-on nga mga lider han relihiyon. Pirme niya iginpapaabat ha mga tawo nga presyoso hira ha Dios. (Juan 6:37) Iya gintratar nga may dignidad an ordinaryo nga mga tawo.

13. Paonan-o iginpakita ni Jesus ha paagi han iya pagtratar ha iya mga disipulo nga buotan hiya ngan mahigugmaon?

¹³ Makikita ha pagtratar ni Jesus ha iya mga disipulo nga buotan hiya ngan mahigugmaon. Maaram hiya nga iba-iba an ira abilidad ngan kahimtang. Salit diri hira makakabuhat hin parapriho nga mga responsabilidad; diri liwat parapriho an ira mahihimo ha ministeryo. Pero gin-apresyar niya an bug-os-kalag nga pangalimbasog han kada tagsa. An pagin masinabuton ni Jesus makikita ha parabola mahitungod han mga talanton. Hito nga ilustrasyon, gintagan han agaron an tagsa nga uripon hin buruhaton “sumala han iya abilidad.” An usa han duha nga maduruto nga uripon nakaganansya hin mas daku kay ha usa. Pero pariho an kumendasyon ha ira han agaron: “Maopay an imo ginbuhat, maopay ngan matinumanon nga uripon!”​—Mat. 25:14-23.

14. Paonan-o naton masusubad an paagi han pagtratar ni Jesus ha iba?

¹⁴ Buotan ngan mahigugmaon an pagtratar ni Jesus ha aton. Maaram hiya nga iba-iba an aton abilidad ngan kahimtang, ngan nalilipay hiya kon ginbubuhat naton an aton pinakamaopay. Kinahanglan subaron naton hi Jesus ha aton pagtratar ha iba. Diri gud naton karuyag nga paabaton an aton igkasi-magsiringba nga waray hiya pulos o maawod hiya kay gutiay la an iya nahihimo kay  ha iba. Lugod, mamiling kita hin mga higayon nga kumendasyonan an aton kabugtoan tungod han ira pagbuhat han ira pinakamaopay ha pag-alagad kan Jehova.

15-16. Paonan-o nagpahimulos an usa nga sister ha paghimo hin mga tumong nga kaya niya kab-uton?

¹⁵ Kon may mga tumong kita ha pag-alagad, may direksyon ngan may katuyoan an aton kinabuhi. Pero kinahanglan maghimo kita hin mga tumong uyon ha aton mga abilidad ngan kahimtang. Diri kita angay magsubad han mga tumong han iba. Kon bubuhaton ta ito, bangin mapakyas la kita ngan manluya. (Luc. 14:28) Tagda an ehemplo han payunir nga sister nga hi Midori.

¹⁶ Han bata pa hi Midori, ginpapakaalohan hiya han iya tatay nga diri Saksi pinaagi ha pagkompara ha iya ha iya kabugtoan ngan mga kaklase. “Inabat ko nga waray ako pulos,” siring ni Midori. Pero samtang nagtutubo hiya, nagkaada hiya kompyansa ha kalugaringon. Hiya nagsiring, “Ginbabasa ko an Biblia kada adlaw basi magkaada ako kamurayawan ha akon kasingkasing ngan abaton ko nga hinigugma ako ni Jehova.” Dugang pa, naghimo hiya hin mga tumong nga kaya niya kab-uton, ngan espisipiko nga nag-ampo hiya nga buligan hiya nga makab-ot ito nga mga tumong. Nakabulig ito kan Midori nga malipay ha iya mga nahihimo para kan Jehova.

17. Paonan-o naton ‘padayon nga mababag-o an aton paagi han paghunahuna,’ ngan ano an resulta?

¹⁷ Diri mawawara ha usa la kagab-i an negatibo nga mga pagbati ngan panhunahuna. Salit gin-aaghat kita ni Jehova: “Padayon nga bag-oha an iyo paagi han paghunahuna.” (Efe. 4:23, 24) Syempre, basi mabuhat ito, kinahanglan naton mag-ampo, mag-aram han Pulong han Dios, ngan mamalandong. Padayon ito nga buhata, ngan pangaro kan Jehova hin kusog. Bubuligan ka han iya baraan nga espiritu nga maatohan an bisan ano nga tendensya nga ikompara an imo  kalugaringon ha iba. Bubuligan ka liwat ni Jehova nga mahibaroan kon nagtitikang na tumubo ha imo kasingkasing an kaawa o pagpahitaas, ngan bubuligan ka niya nga maghimo dayon hin mga pagbag-o.

18. Kay ano nga makakaliaw ha imo an ginsisiring han 2 Cronicas 6:29, 30?

¹⁸ Basaha an 2 Cronicas 6:29, 30. Maaram hi Jehova han aada ha aton kasingkasing. Maaram liwat hiya han aton mga pangalimbasog nga atohan an espiritu han kalibotan ngan an aton mga kaluyahan. Samtang nakikita ni Jehova an aton mga paniguro nga maatohan ito, mas ginhihigugma kita niya.

19. Ano nga ehemplo an gin-gamit ni Jehova basi ipakita kon ano an iya inaabat ha aton?

¹⁹ Basi ipakita kon ano an inaabat ni Jehova ha aton, gin-gamit niya nga ehemplo an gugma han usa nga nanay ngan han iya minasus-an. (Isa. 49:15) Tagda an ehemplo han nanay nga hi Rachel. Hiya nagsurat: “An akon anak nga hi Stephanie natawo nga kulang ha bulan. Han siyahan ko hiya nga nakita, gutiay gud hiya ngan maluya. Pero gintugotan ako han hospital nga makugos hiya kada adlaw ha siyahan nga bulan samtang naka-incubator hiya. Ito nga mga higayon nakabulig nga magin duok gud kami ha usa kag usa. Yana, sais anyos na hiya, ngan mas gutiay hiya kay ha iya mga kaedad. Pero hinigugma ko gud hiya kay naniguro hiya nga mabuhi, ngan nakakapalipay gud hiya ha akon!” Nakakaliaw gud hibaroan nga sugad liwat hito nga klase hin hilarom nga gugma an inaabat ni Jehova ha aton kon nakikita niya nga naniniguro kita nga buhaton an aton pinakamaopay ha pag-alagad ha iya!

20. Sugad nga dedikado nga surugoon ni Jehova, ano an imo rason nga malipay?

²⁰ Sugad nga surugoon ni Jehova, importante ka nga membro han iya pamilya ngan waray ka kapariho. Iginpahirani ka ni Jehova ha iya diri tungod kay mas maopay ka kay ha iba, kondi tungod kay ginkita niya an imo kasingkasing ngan nakita niya nga mapainubsanon ka ngan andam magpatutdo ngan magpamolde ha iya. (Sal. 25:9) Makakasiguro ka nga gin-aapresyar niya kon ginbubuhat mo an imo pinakamaopay ha pag-alagad ha iya. An imo pagpailob ngan pagkamatinumanon ebidensya han imo “sinsero ngan maopay nga kasingkasing.” (Luc. 8:15) Salit padayon nga ihatag kan Jehova an imo pinakamaopay. Kon bubuhaton mo ito, magkakaada ka rason nga malipay gud “ha [imo] la kalugaringon.”