1-2. Paonan-o an ginsiring ni Jehova ha Isaias 65:16, 17 nabulig ha aton nga padayon nga magpailob?

“AYAW PAG-UNDANG!” Ito an makapainteres nga tema han 2017 nga regional nga kombensyon. Hito nga programa, iginpakita ha aton kon paonan-o kita makakapailob bisan pa ha mga pagsari. Upat ka tuig na an naglabay tikang hito, ngan tubtob yana, nagpapailob la gihapon kita ha pagkinabuhi hinin maraot nga kalibotan.

² Ano nga mga problema an imo naieksperyensyahan yana? Namatyan ka ba hin kapamilya o hin hinigugma nga sangkay? May-ada ka ba grabe nga sakit? Nakakaeksperyensya ka ba hin mga problema tungod ha pagtikalagas? Biktima ka ba hin kalamidad, kamadarahog, o pagtimaraot? Nag-aantos ka ba tungod ha mga epekto han usa nga sakit, sugad han COVID-19 nga pandemya? Ginhihingyap gud naton an adlaw nga ito ngatanan magigin bahin na la han naglabay​—diri na naton mahinunumdoman ngan diri na gud mahitatabo utro!​—Basaha an Isaias 65:16, 17.

3. Ano an kinahanglan naton buhaton yana, ngan kay ano?

³ Makuri an pagkinabuhi hini nga sistema, ngan bangin makaeksperyensya kita hin mas makuri pa nga mga problema ha tiarabot. (Mat. 24:21) Salit kinahanglan padayon naton nga dugangan an aton pagpailob. Kay ano? Kay hi Jesus nagsiring: “Pinaagi han iyo pagpailob matitipigan niyo an iyo kinabuhi.” (Luc. 21:19) Madudugangan an aton pagpailob kon huhunahunaon naton nga an iba liwat nag-iilob hin mga problema nga pariho han aton.

4. Kay ano nga masisiring naton nga hi Jehova an pinakamaopay nga ehemplo han pagpailob?

⁴ Hin-o an pinakamaopay nga ehemplo han pagpailob? Hi Jehova nga Dios. Bangin diri ka makatoo hito. Pero kon huhunahunaon mo an mahitungod hito, masasabtan mo kon kay ano. Ini nga kalibotan kontrolado han Yawa ngan puno hin mga problema. Hi Jehova may gahum nga bungkagon ini nga kalibotan ha bisan  ano nga oras. Pero naghuhulat hiya ha itinanda nga adlaw nga bubuhaton niya ito. (Roma 9:22) Ha pagkayana, an aton Dios padayon nga nagpapailob tubtob nga umabot ito nga adlaw. Hisgotan naton an siyam nga butang nga gin-iilob ni Jehova.

5. Paonan-o ginpapasiparahan an ngaran han Dios, ngan ano an imo inaabat mahitungod hito?

⁵ An pagpasipara ha iya ngaran. Hinigugma ni Jehova an iya ngaran, ngan karuyag niya nga respetuhon ito han ngatanan. (Isa. 42:8) Pero mga 6,000 ka tuig na nga ginpapasiparahan an iya maopay nga ngaran. (Sal. 74:10, 18, 23) Nagtikang ito ha garden han Eden han an Dios gin-akusaran han Yawa (nangangahulogan “Parapakaraot”) nga may hiya diri iginhahatag kanda Adan ngan Eva nga ira ginkikinahanglan basi magin malipayon. (Gen. 3:1-5) Tikang hito, sayop nga gin-aakusaran hi Jehova nga diri hiya naghahatag ha mga tawo han ira gud ginkikinahanglan. Nabaraka hi Jesus hito nga pasipara ha ngaran han iya Amay. Salit gintutdoan niya an iya mga disipulo nga mag-ampo: “Amay namon ha langit, baraanon unta an imo ngaran.”​—Mat. 6:9.

6. Kay ano nga gintugotan ni Jehova nga lumabay anay an hilawig nga panahon antes niya sulbaron an isyu mahitungod han iya pagkasoberano?

⁶ An pagkontra ha iya pagkasoberano. Hi Jehova gud la an may katungod ha pagmando ha langit ngan ha tuna, ngan an paagi han iya pagmando amo an pinakamaopay. (Pah. 4:11) Pero nangangalimbasog an Yawa nga limbongan an mga anghel ngan an mga tawo nga maghunahuna nga an Dios waray hito nga katungod. An isyu may kalabotan han katungod ni Jehova ha pagmando diri masusulbad hin usa la kagab-i. Tungod kay maaramon an Dios, gintugotan niya nga lumabay an hilawig nga panahon basi makita han mga tawo nga diri gud maglalampos kon mamandoan nira an ira kalugaringon nga diri nagpapagiya ha Maglalarang. (Jer. 10:23) Tungod han pagpailob han Dios, bug-os nga masusulbad an isyu, mahibabaroan han ngatanan nga an paagi ni Jehova ha pagmando amo an pinakamaopay, ngan an iya gud la Ginhadian an maghahatag hin tinuod nga kamurayawan ngan seguridad ha tuna.

7. Hin-o an mga nagrebelde kan Jehova, ngan ano an iya bubuhaton ha ira?

⁷ An pagrebelde han pipira niya nga anak. Perpekto nga ginlarang ni Jehova an iya mga anghel ngan an iya tawhanon nga mga anak; waray hira bisan ano nga depekto. Pero ginsulay han rebelde nga anghel nga hi Satanas (nangangahulogan “Parakontra”) an perpekto nga mga tawo nga hira Adan ngan Eva nga magrebelde kan Jehova. Nagrebelde liwat an iba pa nga mga anghel ngan mga tawo. (Jud. 6) Ha urhi, bisan an mga membro han nasud han Israel, nga katawohan nga ginpili han Dios, nagsalikway ha iya ngan nagsingba ha buwa nga mga Dios. (Isa. 63:8, 10) Inabat gud ni Jehova nga gintraydor hiya. Bisan pa hito, nagpailob hiya ngan padayon hiya nga magpapailob tubtob nga umabot an panahon nga bungkagon na niya an ngatanan nga rebelde. Makakapalipay gud ito ha maunungon niya nga mga magsiringba nga nag-iilob liwat pariho ha iya hinin maraot nga kalibotan!

8-9. Ano nga mga kabuwaan an ginsisiring mahitungod kan Jehova, ngan ano an mahimo naton buhaton may kalabotan hito?

⁸ An mga kabuwaan han Yawa. Gin-akusaran ni Satanas an matadong nga surugoon ni Jehova nga hi Job, nga sugad hin nasiring hi Satanas nga an ngatanan nga matinumanon nga magsiringba ni Jehova nag-aalagad la ha Iya tungod ha makikalugaringon nga mga rason. (Job 1:8-11; 2:3-5) Ito la gihapon yana an igin-aakusar han Yawa. (Pah. 12:10) Mahihimo naton an aton bahin ha pagpamatuod nga buwaon hi Satanas pinaagi ha pagpailob bisan pa han mga pagsari ngan pagpabilin nga maunungon kan Jehova tungod han aton gugma ha Iya. Pariho kan Job, bibendisyonan kita kon magpapailob kita.​—San. 5:11.

 ⁹ Ginagamit ni Satanas an mga lider han buwa nga relihiyon basi itutdo ha mga tawo nga madarahog hi Jehova ngan hiya an hinungdan han mga pag-antos. An pipira nasiring pa ngani nga kon may namamatay nga mga bata, ginkuha hira han Dios kay kinahanglan pa niya hin dugang nga anghel ha langit. Kawaray-respeto gud ito ha Dios! Pero maaram kita han kamatuoran. Kon nagkakaada kita grabe nga sakit o kon namatyan kita hin hinigugma, diri gud naton ginbabasol an aton Dios. Lugod, natoo kita nga maabot an panahon nga tatambalon niya an mga may sakit ngan babanhawon an mga patay. An bisan hin-o nga karuyag mamati mahimo naton sumatan nga hi Jehova mahigugmaon gud nga Dios. Kon bubuhaton naton ito, mababaton ni Jehova an usa nga nagpapakaraot ha iya.​—Prob. 27:11.

10. Ano an iginsusumat han Salmo 22:23, 24 mahitungod kan Jehova?

¹⁰ An pag-antos han iya hinigugma nga mga surugoon. Hi Jehova mapinairon nga Dios. Nangangalas hiya kon nababatian niya nga nangangaraba kita tungod han aton mga pag-antos​—pagtimaraot man ito, sakit, o tungod han aton mga kaluyahan. (Basaha an Salmo 22:23, 24.) Inaabat ni Jehova an aton kasakit; karuyag niya wad-on ito, ngan wawad-on niya ito. (Ikompara an Exodo 3:7, 8; Isaias 63:9.) Maabot an panahon nga “papahiron niya an ngatanan nga luha ha [aton] mga mata, ngan mawawara na an kamatayon, pati an kabidoan, pagtangis, ngan kasakit.”​—Pah. 21:4.

11. Ano an inaabat ni Jehova ha iya maunungon nga mga surugoon nga nagkamatay na?

¹¹ Kahibulag tikang ha iya kasangkayan nga nagkamatay na. Ano an inaabat ni Jehova ha iya magtinumanon nga alagad nga nagkamatay na? Karuyag na gud niya makita hira utro! (Job 14:15) Naiimadyin mo ba an duro nga kamingaw ni Jehova ha iya sangkay nga hi Abraham? (San. 2:23) O an iya kamingaw kan Moises, nga nagkaistorya hira nga “magkaatubang”? (Ex. 33:11) Ngan sigurado gud nga ginhihingyap  niya nga mabatian an mag-opay nga kanta han pagdayaw ni David ngan han iba pa nga salmista! (Sal. 104:33) Bisan kon ini nga kasangkayan ni Jehova nagkamatay na, waray niya hira hingalimti. (Isa. 49:15) Nahinunumdoman niya an tagsa nga detalye han ira personalidad. An Biblia nasiring nga “para ha iya hira ngatanan buhi.” (Luc. 20:38) Maabot an adlaw nga babanhawon niya hira, ngan mababatian niya utro an ira sinsero nga mga pag-ampo ngan kakarawaton niya an ira pagsingba. Kon namatyan ka hin hinigugma, hinaot makaliaw ini ha imo.

12. Ano an nakakapasubo gud kan Jehova hinin maraot nga kataposan nga mga adlaw?

¹² An panraugdaog han mga magraot. Han nagtikang an pagrebelde ha Eden, maaram hi Jehova nga magtitikaraot la an kahimtang antes ito magin maopay utro. Nangangalas hi Jehova ha karaotan, kawaray-hustisya, ngan kamadarahog yana ha kalibotan. Pirme hiya nagpapakita hin empatiya labi na gud ha masayon la mabiktima​—an magluya ngan an diri nakakaprotektar ha ira kalugaringon, an mga ilo pati an mga balo. (Zac. 7:9, 10) Nasusubo gud hi Jehova kon nakikita niya nga ginraraugdaog ngan ginpipriso an iya matinumanon nga mga surugoon. Makakasarig ka nga hinigugma ni Jehova an ngatanan nga nagpapailob pariho ha iya.

13. Ano nga mangil-ad nga mga buhat han mga tawo an nakikita han Dios, ngan ano an iya bubuhaton hito?

¹³ An pagtikahamubo han moralidad han tawo. Karuyag gud ni Satanas nga maghamubo an moralidad han tawo, nga ginlarang ha dagway han Dios. Han “nakita ni Jehova nga duro an karaotan han tawo” ha panahon ni Noe, “nagbasol [hiya] nga ginhimo niya an mga tawo ha tuna, ngan inabat hiya hin kasakit ha iya kasingkasing.” (Gen. 6:5, 6, ftn., 11) Tikang hito nga panahon, nagtikaopay ba an kahimtang han kalibotan? Waray gud! Sigurado nga nalilipay an Yawa kon nakikita niya nga komon gud an tanan nga klase hin seksuwal nga imoralidad, upod na an imoral nga mga buhat han mga tawo nga diri pariho an sekso ngan hadton pariho an sekso! (Efe. 4:18, 19) Labi nga nalilipay hi Satanas kon nasusulay niya an mga magsiringba ni Jehova nga magbuhat hin sala. Kon umabot na an tubtoban han pagpailob ni Jehova, ipapakita niya an iya daku nga kasina ha ngatanan nga imoral nga buhat.

14. Ano an ginbubuhat han tawo ha mga linarang han Dios ha tuna?

¹⁴ An pagbungkag ha iya mga linarang. An tawo diri la kay ‘nagmamando ha iya igkasi-tawo ha iya ikakadaot,’ pero diri liwat niya gin-aataman an tuna ngan an mga hayop sugad han iginsusugo ni Jehova ha mga tawo. (Ecles. 8:9; Gen. 1:28) An pipira nga syentista nasiring nga tungod han ginbubuhat han mga tawo, usa ka milyon nga klase hin mga linarang an mahimo mapoo ha sunod nga mga tuig. Salit diri urusahon nga nasiring hira nga namimeligro gud an aton palibot! Maopay na la kay hi Jehova nagsasaad nga ‘bubungkagon [niya] an mga nagbubungkag han tuna,’ ngan hihimoon niya nga paraiso an bug-os nga tuna.​—Pah. 11:18; Isa. 35:1.

15-16. Ano an dapat magpagios ha aton nga magpailob pariho kan Jehova? Iilustrar.

¹⁵ Hunahunaa an ngatanan nga makasurubo nga problema nga gin-iilob han aton langitnon nga Amay ha sulod hin yinukot ka tuig na. (Kitaa an kahon nga “ An mga Gin-iilob ni Jehova.”) Puydi unta bungkagon ni Jehova inin maraot nga sistema ha bisan ano nga oras. Pero nagpapahimulos gud kita ha iya pagpailob! Hunahunaa ini nga ilustrasyon. Usa nga mag-asawa an ginsidngan nga an ira waray pa katatawo nga anak may grabe nga sakit, salit magigin makuri an iya kahimtang ngan bata pa hiya nga mamamatay. Bisan kon magigin makuri an pag-ataman hini nga bata, eksayted na gud an mga kag-anak nga matawo hiya. Tungod han ira gugma ha ira anak, iilubon nira an bisan ano nga kakurian basi  maitagana ha iya an pinakamaopay nga kinabuhi tubtob nga posible.

¹⁶ Sugad man, an ngatanan nga tulin nira Adan ngan Eva diri perpekto han igin-anak hira. Bisan pa hito, hinigugma hira ni Jehova ngan gin-aataman niya hira. (1 Juan 4:19) Ngan diri pariho ha mga kag-anak ha ilustrasyon, kaya solusyonan ni Jehova an mga problema han iya mga anak. May nakaeskedyol na hiya nga petsa kon san-o niya wawad-on an ngatanan nga pag-antos han mga tawo. (Mat. 24:36) Diri ba ini nga iya gugma dapat magpagios ha aton nga magpailob pariho ha iya tubtob nga ginkikinahanglan?

17. Kay ano nga an ginsiring han Hebreo 12:2, 3 mahitungod kan Jesus nakakadasig ha aton nga padayon nga magpailob?

¹⁷ Hi Jehova an perpekto nga susbaranan han pagin mapailubon. Ginsubad ni Jesus an pagin mapailubon han iya Amay. Han nakanhi pa hi Jesus ha tuna, gin-ilob niya an panginsulto, pakaalo, ngan an kamatayon ha pasakitan nga kahoy para ha aton. (Basaha an Hebreo 12:2, 3.) An susbaranan ni Jehova ha pagin mapailubon sigurado nga nagpakusog kan Jesus basi makapailob. Magpapakusog liwat ito ha aton.

18. Paonan-o an 2 Pedro 3:9 nabulig ha aton nga mahibaroan an mag-opay nga resulta han pagpailob ni Jehova?

¹⁸ Basaha an 2 Pedro 3:9. Maaram hi Jehova han pinakamaopay nga panahon kon san-o niya bubungkagon inin maraot nga kalibotan. Tungod han iya pagpailob, natitirok an daku nga grupo nga minilyon na an kadamu, nga nagsisingba ngan nagdadayaw ha iya. Hira ngatanan nalilipay nga nagpapailob hi Jehova hin hilawig na nga panahon salit nagkaada pa higayon nga matawo hira, mahibaro ha paghigugma ha iya, ngan magdedikar han ira kinabuhi ha iya. Mapapamatud-an gud nga husto an desisyon ni Jehova nga magpailob kon balosan na niya an minilyon nga tawo nga nagpailob tubtob ha kataposan!

19. Ano an dapat naton magin determinasyon, ngan ano nga balos an aton makakarawat?

¹⁹ Nahibaro kita kan Jehova kon paonan-o magpapailob nga may kalipay. Bisan pa han ngatanan nga kasakit ngan pag-antos nga ginpapahinabo ni Satanas, hi Jehova nagpapabilin nga “malipayon nga Dios.” (1 Tim. 1:11) Makakapabilin liwat kita nga malipayon samtang mapailubon nga ginhuhulat nga baraanon ni Jehova an iya ngaran, igbindikar an iya soberanya, tapuson an ngatanan nga karaotan, ngan wad-on an ngatanan naton nga problema yana. Magin determinado kita nga magpailob ngan maliaw ha paghibaro nga nagpapailob liwat an aton langitnon nga Amay. Kon bubuhaton naton ito, maieksperyensyahan han tagsa ha aton ini nga mga pulong: “Malipayon an tawo nga padayon nga nag-iilob han pagsari, kay kon uyonan hiya makakarawat niya an korona han kinabuhi nga iginsaad ni Jehova ha mga padayon nga nahigugma ha Iya.”​—San. 1:12.