1, 2. (a) Ano an importante gud nga isyu nga inaatubang han katawohan? (b) Kay ano nga importante gud nga masabtan naton ito nga isyu?

PARA ha damu nga tawo yana, kwarta an importante. Nakapokus hira ha pagpariko o pagtipig han ira mga panag-iya. Para liwat ha iba, an pamilya, kahimsog, o mga kalamposan ha kinabuhi an importante.

² Pero an katawohan naatubang hin importante gud nga isyu​—an pagbindikar han pagkasoberano ni Jehova. Sadang kita mag-ikmat nga diri mawara ha aton hunahuna inin importante gud nga isyu. Paonan-o ito mahimo mahitabo? Mahimo kita magin sagipo ha adlaw-adlaw nga mga buruhaton nga tungod hito nahingangalimtan na naton kon mationan-o gud kaimportante an pagbindikar han pagkasoberano han Dios. O bangin tugotan naton nga matabonan han aton mga problema inin importante nga isyu. Ha luyo nga bahin, kon mas nasasabtan naton an pagkaimportante han pagbindikar han pagkasoberano ni Jehova, mas masayon naton malamposan an aton adlaw-adlaw nga mga problema. Tungod hito, magigin mas duok kita kan Jehova.

3. Ano an mga akusasyon ni Satanas may kalabotan ha pagmando han Dios?

³ Han nagrebelde hi Satanas nga Yawa, ginkwestyon niya an katungod ni Jehova ha pagmando. Karuyag niya nga hunahunaon han mga tawo  nga maraot an pagmando ni Jehova ngan diri Niya iginhahatag an pinakamaopay para ha Iya mga linarang. Baga hin nasiring an Yawa nga magigin mas malipayon ngan mas maopay an kahimtang han mga tawo kon hira an magmamando ha ira kalugaringon. (Gen. 3:1-5) Baga hin nasiring liwat hi Satanas nga waray tawo nga tinuod nga maunungon ha Dios​—nga kon umatubang hin magkuri nga kahimtang, isasalikway niya an pagmando ni Jehova. (Job 2:4, 5) Tungod hini nga mga akusasyon han Yawa, gintugotan ni Jehova nga lumabay an panahon basi makita mismo han mga tawo an maraot nga resulta han pagin bulag ha matadong nga pagmando han Dios.

4. Kay ano nga importante nga masulbad an isyu han pagkasoberano?

⁴ Syempre, maaram hi Jehova nga buwa an mga akusasyon han Yawa. Kon sugad, kay ano nga gintugotan han Dios nga lumabay an panahon basi mapamatud-an ni Satanas an iya akusasyon? An ngatanan nga intelihente nga linarang may bahin ha pagbaton hinin importante nga pakiana. (Basaha an Salmos 83:18.) Ngani, iginsalikway han siyahan nga mag-asawa an pagmando ni Jehova, ngan damu liwat an nagbuhat hito tikang hadto. Mahimo ini mag-aghat ha pipira nga maghunahuna nga bangin husto an mga akusasyon han Yawa. Samtang diri pa nababaton ha hunahuna han mga tawo o han mga anghel ito nga isyu, padayon nga magkakaada pagkabahin-bahin butnga han mga nasud, lahi, tribo, pamilya, ngan mga indibiduwal. Pero kon mabindikar na an pagkasoberano ni Jehova, magpapasakop na an ngatanan ha iya matadong nga pagmando ha waray kataposan. Maipapahiuli na an kamurayawan ha bug-os nga uniberso.​—Efe. 1:9, 10.

5. Paonan-o naton masusuportaran an pagkasoberano ni Jehova?

⁵ Mabibindikar an pagkasoberano han Dios pero an pagmando ni Satanas ngan han mga tawo sigurado nga mapapakyas ngan mabubungkag. An pagmando han Dios pinaagi han iya Mesianiko nga Ginhadian magpapadayon, ngan mapapamatud-an hadton nagtitipig han ira integridad nga an tawo mahimo magpabilin nga maunungon ha pagmando han Dios. (Isa. 45:23, 24) Karuyag mo ba magin kaupod hadton mga nagtitipig han integridad basi masuportaran an pagkasoberano ni Jehova? Syempre! Basi matipigan an aton integridad, kinahanglan magpokus kita ha importante nga isyu ngan hibaroan naton kon mationan-o gud ito kaimportante.

6. Mationan-o kaimportante an pagbindikar han pagkasoberano ni Jehova?

⁶ Sumala han gin-unabi na, an pagbindikar han pagkasoberano ni Jehova usa nga importante gud nga isyu diin may bahin an mga tawo ha pagbaton hito. Mas importante ito kay han personal nga kalipay han bisan hin-o. Nagpapasabot ba ini nga diri importante an aton katalwasan o diri nagtatagad hi Jehova ha aton? Diri. Kay ano?

7, 8. Kay ano nga kaupod han pagbindikar han pagkasoberano han Dios an pagtuman han iya mga saad?

⁷ Hinigugma ngan ginpapabilhan gud ni Jehova an katawohan. Iginhalad pa ngani niya an iya Anak basi magin posible nga magkaada kita kinabuhi nga waray kataposan. (Juan 3:16; 1 Juan 4:9) Kon diri tumanon ni Jehova an iya mga saad, mapapamatud-an han Yawa nga buwaon an Dios ngan diri Niya iginhahatag an pinakamaopay ha mga tawo, salit masisiring nga diri matadong an Iya pagmando. Mapapamatud-an liwat hito nga husto an mga nagpapakaraot, nga nasiring: “Hain na an iginsaad nga iya presensya? Kay tikang ha adlaw nga an aton kaapoy-apoyan nangaturog ha kamatayon, an ngatanan nga butang nagpapadayon nga amo la gihapon tikang pa ha paghimoa han kalibotan.” (2 Ped. 3:3, 4) Salit sisiguruhon ni Jehova nga kaupod han pagbindikar han iya pagkasoberano an katalwasan han masinugtanon nga katawohan! (Basaha an Isaias 55:10, 11.) Dugang pa, an pagkasoberano ni Jehova iginbasar ha gugma. Salit makakasiguro kita nga padayon niya nga hihigugmaon, papabilhan, ngan aapresyaron an iya maunungon nga mga surugoon.​—Eks. 34:6.

 ⁸ Kon ginkikilala naton nga importante gud nga isyu an pagkasoberano ni Jehova, diri ito nagpapasabot nga diri importante ha aton an aton katalwasan o diri kita ginpapabilhan han Dios. Iginpapakita la naton nga mas importante an pagkasoberano ni Jehova kay han aton katalwasan. Importante an pagkaada han sugad nga panhunahuna kon karuyag naton nga magpokus hinin importante gud nga isyu ngan suportaran an matadong nga pagmando ni Jehova.

9. Ano an akusasyon ni Satanas may kalabotan kan Job? (Kitaa an retrato ha tinikangan hini nga artikulo.)

⁹ An pagkaimportante han pagkaada husto nga panhunahuna may kalabotan ha pagkasoberano ni Jehova iginpapatin-aw ha libro han Job, usa han pinakauna nga iginsurat nga libro ha Biblia. Hibabaroan naton hito nga libro an akusasyon ni Satanas nga kon makaeksperyensya hin duro nga pag-antos an usa, isasalikway niya an Dios. Ginsidngan ni Satanas an Dios nga Hiya mismo an magpahinabo nga mag-antos hi Job. Waray ito buhata ni Jehova, pero gintugotan niya hi Satanas nga sarihan hi Job. Hiya nagsiring: “An ngatanan nga iya aada ha imo kagahum.” (Basaha an Job 1:7-12.) Ha sulod hin halipot la nga panahon, nawara an pakabuhi ni Job, namatay an iya mga surugoon ngan an iya napulo nga hinigugma nga mga anak. Ginbuhat ito ni Satanas ha paagi nga baga hin an Dios mismo an nagpahinabo han mga pag-antos ni Job. (Job 1:13-19) Katapos, ginpaantos ni Satanas hi Job hin maul-ol ngan makangingirhat nga sakit. (Job 2:7) Mas nagduro an kasubo ni Job tungod han makapaluya nga mga ginsiring han iya asawa ngan han tulo nga nagpakunokuno nga kasangkayan.​—Job 2:9; 3:11; 16:2.

10. (a) Ano an ginbuhat ni Job nga nagpapakita nga gintipigan niya an iya integridad ha Dios? (b) Kay ano nga kinahanglan hiya tadungon?

¹⁰ Ano an resulta? Napamatud-an gud nga buwa an akusasyon ni Satanas. Waray gud isalikway ni Job an Dios. (Job 27:5) Pero may panahon nga nagkaada hiya sayop nga panhunahuna. Nagpokus hiya nga mapamatud-an nga matadong hiya, ngan nangaro pa ngani hiya hin hinungdan han ngatanan nga iya pag-antos. (Job 7:20; 13:24) Bangin mahunahuna naton nga makatadunganon ito tungod han ngatanan niya nga gin-antos. Pero nakita han Dios nga kinahanglan tadungon an panhunahuna ni Job. Ano an ginsiring ha iya ni Jehova?

11, 12. Ano an karuyag ni Jehova nga masabtan ni Job, ngan ano an nagin reaksyon ni Job?

¹¹ An ginsiring han Dios kan Job mababasa ha upat nga kapitulo ha libro han Job​—kapitulo 38 tubtob 41. Waray ito mag-unabi nga ginsumatan han Dios hi Job han espisipiko nga rason han iya pag-antos. An katuyoan han mga pulong ni Jehova diri basi isaysay kan Job kon kay ano nga nag-aantos hiya, nga baga hin kinahanglan pakamatadungon han Dios an Iya kalugaringon. Lugod, karuyag ni Jehova nga buligan hi Job nga masantop niya kon mationan-o hiya kagutiay kon ikompara  ha pagkaharangdon han Dios. Ginbuligan liwat niya hi Job nga hibaroan nga may mas importante nga mga isyu nga kinahanglan tagan hin atensyon. (Basaha an Job 38:18-21.) Nakabulig ini kan Job nga magkaada utro husto nga panhunahuna.

¹² Masisiring ba nga waray kalooy hi Jehova kay prangka nga ginsagdonan niya hi Job nga nag-aantos na ngani hinduro? Diri, ngan waray gud ito mahunahuna ni Job. Bisan pa han iya duro nga pag-antos, gin-apresyar niya an sagdon ni Jehova. Nagsiring pa ngani hiya: “Naaawod ako han ngatanan nga akon iginyakan, ngan nagbabasol ako nga nahigda ha tapotapo ngan ha mga agbon.” Ito an nagin epekto kan Job han prangka pero mahigugmaon nga sagdon ni Jehova. (Job 42:1-6, Maupay nga Sumat) Antes hito, ginsagdonan liwat hi Job han mas manghod ha iya nga hi Elihu basi tadungon hiya. (Job 32:5-10) Katapos pamatian ni Job an pagsaway ha iya han Dios ngan tadungon an iya panhunahuna, iginpahayag ni Jehova ha iba an iya pag-uyon kan Job tungod han iya pagin matinumanon bisan pa han mga pagsari.​—Job 42:7, 8.

13. Paonan-o padayon nga nagpahimulos hi Job han sagdon ni Jehova bisan katapos han mga pagsari ha iya?

¹³ Padayon nga nagpahimulos hi Job ha sagdon ni Jehova bisan katapos han mga pagsari ha iya. Paonan-o? Bisan kon ‘ginbendisyonan ni Jehova an urhi nga kinabuhi ni Job labi kay han iya tinikangan,’ an pagpahiuli han ngatanan nga nawara ha iya nagkinahanglan gud hin panahon. Ha urhi ‘nagkaada hiya pito nga anak nga kalalakin-an ngan tulo nga anak nga kababayin-an.’ (Job 42:12-14) Sigurado nga namingaw gud hi Job ha iya mga anak nga nagkamatay tungod han ginbuhat ni Satanas. Posible gud nga usahay, nahinunumdoman pa niya an magraot nga nahitabo ha iya. Bisan kon ha urhi nasabtan niya an hinungdan han iya mga pag-antos, usahay bangin nahuhunahuna niya kon kay ano nga kinahanglan hiya makaeksperyensya hin duro nga pag-antos. Anoman an iya ginhuhunahuna, posible nga ginpamalandong niya an sagdon ha iya han Dios ngan nakabulig ito ha iya nga matipigan an husto nga panhunahuna, ngan nakaliaw gud ito ha iya.​—Sal. 94:19.

14. Ano nga leksyon an aton hibabaroan ha eksperyensya ni Job?

¹⁴ Maliliaw liwat kita ngan matitipigan naton an husto nga panhunahuna may kalabotan ha pagkasoberano ni Jehova pinaagi ha pagpamalandong ha eksperyensya ni Job. Ngani, gintipigan ito ni Jehova nga magin bahin han iya Pulong “ha pagtutdo ha aton, basi pinaagi han aton pagpailob ngan pinaagi han pagliaw tikang ha Kasuratan magkaada kita paglaom.” (Roma 15:4) Nagtututdo ito ha aton nga diri sobra nga maghinunahuna ha aton mga problema nga tungod hito nahingangalimtan na naton inin importante gud nga isyu​—an pagbindikar han pagkasoberano ni Jehova. Pariho kan Job, maipapakita naton an aton bahin hinin importante gud nga isyu pinaagi ha pagpabilin nga matinumanon bisan ha magkuri nga kahimtang.

15. Ano an kapulsanan han aton pagin matinumanon bisan ha mga pagsari?

 ¹⁵ Kay ano nga nakakaliaw an pagpamalandong han kapulsanan han aton pagin matinumanon? Kay iginpapakita hito nga may katuyoan an aton mga pagsari. Diri ito nagpapasabot nga diri kita gin-uuyonan ni Jehova; lugod, naghahatag ito ha aton hin higayon nga ipakita nga ginsusuportaran naton an pagkasoberano han Dios. (Prob. 27:11) An aton pagpailob nagriresulta hin “pagin inuyonan” ngan nagpaparig-on ini han aton paglaom. (Basaha an Roma 5:3-5.) An asoy mahitungod kan Job nagpapakita nga “hi Jehova mapinalanggaon ngan maloloy-on.” (San. 5:11) Salit makakasiguro kita nga babalosan kita ni Jehova ngan an ngatanan nga nasuporta ha iya pagkasoberano. An paghibaro hini nabulig ha aton nga “makaantos gud . . . nga may pagpailob ngan kalipay.”​—Col. 1:11.

16. Kay ano nga kinahanglan naton pahinumdoman an aton kalugaringon han pagkaimportante han pagbindikar han pagkasoberano ni Jehova?

¹⁶ Oo, bangin diri masayon an pagpabilin nga nakapokus ha pagbindikar han pagkasoberano ni Jehova. Usahay bangin nanluluya kita tungod han aton mga problema. Bisan an gudtiay nga problema bangin magin makuri para ha aton kon padayon naton ito nga ginhihinunahuna. Salit maopay nga pirme naton pahinumdoman an aton kalugaringon han pagkaimportante han pagsuporta ha pagkasoberano han Dios kon naatubang kita hin magkuri nga kahimtang.

17. Paonan-o an regular nga pakigbahin ha buruhaton ni Jehova makakabulig ha aton nga makapabilin nga nakapokus ha importante gud nga isyu?

¹⁷ An regular nga pakigbahin ha buruhaton ni Jehova makakabulig ha aton nga makapabilin nga nakapokus ha importante gud nga isyu. Tagda an Saksi nga hi Renee. Naistrok hiya ngan nag-antos hin duro nga kaul-ol ngan may-ada liwat kanser. Samtang nagpapatambal ha hospital, nagsasangyaw hiya ha mga empleyado hito pati na ha mga pasyente ngan bisita. Makausa, han nahospital hiya ha sulod hin duha ngan tunga ka semana, 80 ka oras an iya nagamit ha pagsangyaw. Bisan han hirani na hiya mamatay, waray gud mawara an iya pokus ha pagkasoberano ni Jehova. Nakabulig ito ha iya nga magkaada kamurayawan ha hunahuna.

18. Ano an igintututdo ha aton han eksperyensya han usa nga bugto mahitungod han kapulsanan han pagsuporta ha pagkasoberano ni Jehova?

¹⁸ Syempre, karuyag liwat naton nga magpabilin nga nakapokus ha pagkasoberano ni Jehova bisan ha gudtiay nga mga problema ngan kakurian nga aton inaatubang kada adlaw. Tagda an sister nga hi Jennifer. Tulo ka adlaw na hiya nga naghihinulat ha airport basi makauli ha ira balay; pirme nakakansela an iya biyahe. Tungod han kakapoy ngan kamingaw, may rason unta hiya nga masubo ngan maaringit. Pero imbes nga umabat hin sugad hito, nag-ampo hiya kon paonan-o niya masasangyawan an mga igkasi-pasahero nga bangin nasusubo ngan naaaringit liwat. Ano an resulta? Damu an iya nasangyawan ngan nakapanaltag hiya hin damu nga literatura. Hiya nagsiring: “Inabat ko nga ginbendisyonan ako ni Jehova bisan ha makuri nga kahimtang ngan ginpakusog niya ako basi madayaw an iya ngaran.” Oo, nagpabilin hiya nga nakapokus ha pagsuporta han katuyoan ni Jehova.

19. Ano an ginbubuhat han katawohan ni Jehova may kalabotan ha iya pagkasoberano?

¹⁹ An pagsuporta ha pagkasoberano ni Jehova pangirilal-an han tinuod nga relihiyon. Maiha na nga ginsusuportaran han katawohan han Dios an iya pagkasoberano. Salit sugad nga mga nasuporta ha tinuod nga pagsingba, kinahanglan mangalimbasog an kada tagsa nga magpokus ha importante gud nga isyu nga igintututdo han Kasuratan.

20. Ano an inaabat ni Jehova ha imo mga pangalimbasog nga suportaran an iya pagkasoberano?

²⁰ Sarig nga ginpapabilhan gud ni Jehova an imo mga pangalimbasog nga suportaran an iya pagkasoberano pinaagi han imo pagin matinumanon ngan mapailubon bisan ha mga pagsari. (Sal. 18:25) Hihisgotan han sunod nga artikulo kon kay ano nga angayan gud naton suportaran an pagkasoberano ni Jehova ngan kon paonan-o pa naton ito bug-os nga mahihimo.