1-2. Ano nga mga topiko an nakakapainteres ha mga Saksi ni Jehova?

MAY gin-aatubang kita nga importante gud nga mga isyu​—an soberanya ngan an bindikasyon. Sugad nga mga Saksi ni Jehova, karuyag gud naton hisgotan ito nga mga topiko. Kondi, magkaiba ba nga isyu an pagkasoberano han Dios ngan an pagbaraan han iya ngaran? Diri.

² Nahibaroan na naton nga an ngaran han Dios kinahanglan malimpyohan tikang ha pasipara. Nahibaroan liwat naton nga an pagkasoberano, o an paagi han pagmando, ni Jehova kinahanglan mapamatud-an nga pinakamaopay. Salit inin duha nga isyu pariho importante.

3. Ano an nahiuupod ha ngaran nga Jehova?

³ Ha pagkamatuod, an ngaran nga Jehova nag-uupod han tanan nga butang parte ha aton Dios, upod na an iya paagi han pagmando. Salit kon nasiring kita nga an paglimpyo han ngaran ni Jehova tikang ha tanan nga pasipara amo an pinakaimportante nga isyu, iginpapasabot liwat naton nga an paagi han pagmando ni Jehova kinahanglan mapamatud-an nga amo an pinakamaopay. An ngaran ni Jehova konektado gud ha paagi han iya pagmando sugad nga makagarahum-ha-ngatanan nga Soberano.​—Kitaa an kahon nga “ An Nahiuupod ha Importante Gud nga Isyu.”

4. Ano an ginsisiring han Salmo 135:13 mahitungod ha ngaran han Dios, ngan ano nga mga pakiana an aton babatunon hini nga artikulo?

⁴ An ngaran nga Jehova espesyal gud. (Basaha an Salmo 135:13.) Kay ano nga importante gud ito? Paonan-o ito siyahan nga ginpakaraot? Paonan-o ito ginbabaraan han Dios? Ngan paonan-o kita makakabulig ha pagdepensa hito? Babatunon naton ito nga mga pakiana.

5. Ano an bangin naton igpakiana may kalabotan ha pagbaraan ha ngaran han Dios?

⁵ “Baraanon unta an imo ngaran.” (Mat. 6:9) Ito an ginsiring ni  Jesus nga prayoridad ha pag-ampo. Kondi, ano an iginpapasabot han iya ginsiring? An pagbaraan ha usa nga butang nagpapasabot nga ginhihimo ito nga baraan, limpyo, o putli. Pero bangin magpakiana an iba, ‘Diri ba an ngaran ni Jehova baraan, limpyo, ngan putli na nga daan?’ Basi mabaton ito, kinahanglan naton hunahunaon kon ano an nahiuupod ha usa nga ngaran.

6. Ano an nakakahimo ha usa nga ngaran nga magin importante?

⁶ An usa nga ngaran diri la basta mga letra nga maisusurat o maiyayakan. Tigamni an siring han Biblia: “An maopay nga ngaran mas maopay pilion kay han damu nga bahandi.” (Prob. 22:1; Ecles. 7:1) Kay ano nga importante gud an usa nga ngaran? Kay nag-uupod ito hin reputasyon, an ginhuhunahuna han iba mahitungod ha persona nga may-ada hito nga ngaran. Salit an kasurat han usa nga ngaran​—o an kaluwas hito—​diri amo an pinakaimportante, kondi an nahuhunahuna han mga tawo kon nakikita o nababatian nira ito nga ngaran.

7. Paonan-o gin-aatake han mga tawo an ngaran han Dios?

⁷ Kon an mga tawo nagsusumat hin mga buwa parte kan Jehova, gin-aatake nira an iya reputasyon. Kon gin-aatake nira an iya reputasyon, ira gindadaot an iya ngaran. Nahitabo an siyahan nga pag-atake ha ngaran han Dios ngan han iya reputasyon ha garden han Eden. Tagda kon ano an aton mahibabaroan tikang hini nga pag-atake.

8. Ano an hinbabaroan nira Adan ngan Eva, ngan ano nga mga pakiana an nabangon?

⁸ Maaram hira Adan ngan Eva han ngaran ni Jehova, pati na han importante nga mga kamatuoran mahitungod ha Iya. Maaram hira nga hiya an ira Maglalarang nga naghatag han ira kinabuhi, han ira urukyan nga Paraiso, ngan perpekto nga asawa. (Gen. 1:26-28; 2:18) Kondi, padayon ba nira nga gagamiton an ira perpekto nga hunahuna basi pamalandungon an tanan nga ginbuhat ha ira ni Jehova? Padayon ba nira nga papahilarumon an ira gugma ngan apresasyon ha Persona nga ginrirepresentaran hito nga ngaran? Nagin klaro an mga baton hito han ginsulay hira han kaaway han Dios.

9. Sumala ha Genesis 2:16, 17 ngan 3:1-5, ano an ginsiring ni Jehova ha siyahan nga mag-asawa, ngan paonan-o ginbaliko ni Satanas an kamatuoran?

⁹ Basaha an Genesis 2:16, 17 ngan 3:1-5.  Pinaagi hin halas nga sugad hin amo an nagyayakan, hi Satanas nagpakiana kan Eva: “Nagsiring gud ba an Dios nga ayaw kamo pagkaon han bunga han tagsa nga kahoy ha garden?” Ito nga pakiana may-ada diri abat nga buwa nga pariho hin nakatago nga hilo. Ha pagkatinuod, an Dios nagsiring nga puydi hira kumaon tikang ha tagsa nga kahoy, labot la han usa. Hira Adan ngan Eva puydi makakaon tikang ha damu nga klase hin kahoy. (Gen. 2:9) Oo, mahinatagon gud hi Jehova. Kondi, an Dios nagsiring nga may usa nga puno nga diri nira puydi kaunon an bunga. Salit an pakiana ni Satanas nagbaliko han kamatuoran. Sugad hin iginpasabot ni Satanas nga an Dios diri mahinatagon. Bangin naghunahuna hi Eva, ‘May maopay ba nga butang nga nadiri an Dios nga magkaada ako?’

10. Paonan-o direkta nga ginpakaraot ni Satanas an ngaran han Dios, ngan ano an resulta?

¹⁰ Hito nga takna, masinugtanon pa gihapon hi Eva kan Jehova. Ginsumat niya kan Satanas an klaro nga ginsiring han Dios. Nagsiring pa ngani hiya nga diri hira angay kumapot ha kahoy. Maaram hiya han pahamangno han Dios nga mamamatay hira kon diri hira sumugot. Pero hi Satanas binaton: “Diri gud kamo mamamatay.” (Gen. 3:2-4) Diri la niya basta iginpapasabot nga nagbuwa hi Jehova. Direkta na niya nga ginpapakaraot an ngaran han Dios, ngan nasiring hiya kan Eva nga hi Jehova buwaon. Hini nga paagi, hi Satanas nagin yawa, o parapakaraot. Hi Eva bug-os nga nalimbongan; tinoo hiya kan Satanas. (1 Tim. 2:14) Mas sinarig hiya kan Satanas kay ha kan Jehova. Tungod hito, nagin mas masayon kan Eva nga himoon an pinakamaraot nga desisyon​—an diri pagsunod kan Jehova. Ginkaon niya an bunga nga igindiri gud ni Jehova. Katapos, gintagan liwat niya hi Adan.​—Gen. 3:6.

11. Ano unta an ginbuhat han aton siyahan nga mga kag-anak, pero ano an waray nira mabuhat?

¹¹ Hunahunaa hin madaliay kon ano unta an angay nga ginsiring ni Eva kan Satanas. Imadyina nga sugad hini an iya ginsiring: “Diri ko ikaw kilala, pero kilala ko an akon Amay, hi Jehova, ngan nahigugma ngan nasarig ako ha iya. Hiya an naghatag ha amon ni Adan han tanan nga may-ada kami. Kadaku han imo buot nga magyakan hin kabuwaan parte ha iya! Iwas!” Malilipay gud unta hi Jehova nga mabatian an sugad nga mga pulong nga nagpapakita hin pagkamaunungon tikang ha usa nga mahigugmaon nga anak! (Prob. 27:11) Pero hi Eva waray maunungon nga gugma kan Jehova, sugad man hi Adan. Salit waray nira madepensahi an ngaran ni Jehova tikang ha pakaraot.

12. Paonan-o nagtanom hi Satanas hin pagruhaduha ha hunahuna ni Eva, ngan ano an waray mabuhat nira Adan ngan Eva?

¹² Sugad han aton nakita, nagtikang hi Satanas pinaagi ha pagtanom hin pagruhaduha ha hunahuna ni Eva. Naaghat niya hi Eva nga kwestyunon an klase han Persona nga ginrirepresentaran han ngaran nga Jehova. Waray madepensahi nira Adan ngan Eva an ngaran ngan reputasyon ni Jehova. Tungod hito, nagin masayon ha ira nga pamatian hi Satanas ngan magrebelde ha ira Amay. Ginagamit ni Satanas an pariho nga mga taktika yana. Gin-aatake niya an ngaran ni Jehova pinaagi ha pagpakaraot hito. An mga natoo ha buwa ni  Satanas masayon la maimpluwensyahan nga isalikway an matadong nga pagmando ni Jehova.

13. Paonan-o ginpapabug-atan ha Ezekiel 36:23 an nangunguna nga mensahe han Biblia?

¹³ Ginpapabay-an la ba ni Jehova an sugad nga pakaraot nga waray ginhihimo nga pagdepensa? Diri gud! An bug-os nga Biblia nagsusumat kon ano an ginbuhat ni Jehova basi pamatud-an nga diri totoo an ginyakan mahitungod ha iya ha garden han Eden. (Gen. 3:15) Ha tinuod la, maisusumaryo ta hini nga paagi an nangunguna nga mensahe han Biblia: Babaraanon ni Jehova an iya ngaran pinaagi han Ginhadian nga mamandoan han iya Anak ngan igbabalik an katadongan ngan kamurayawan ha tuna. An Biblia may impormasyon nga nabulig ha aton nga masabtan kon paonan-o babaraanon ni Jehova an iya ngaran.​—Basaha an Ezekiel 36:23.

14. Paonan-o an paagi han pag-atubang ni Jehova ha pagrebelde ha Eden nagbaraan han iya ngaran?

¹⁴ Ginbuhat ni Satanas an tanan nga iya mahihimo basi pugngan hi Jehova nga buhaton an Iya kaburut-on. Pero pauroutro nga napakyas hi Satanas. An rekord han Biblia nagpapakita kon ano an ginbuhat ni Jehova, ngan nagpapamatuod ito nga hi Jehova mahigugmaon gud nga Amay ngan an pinakamaopay nga Magmarando. Tinuod, an pagrebelde ni Satanas ngan han tanan nga dinapig ha iya naghatag kan Jehova hin duro nga kasakit. (Sal. 78:40) Bisan pa hito, gin-atubang niya ini nga pag-atake ha iya ngaran nga may kinaadman, pagpailob, ngan hustisya. Iginpapakita liwat niya an iya waray kapariho nga gahum ha damu gud nga paagi. Labaw ha ngatanan, iginpapakita niya an gugma ha tanan nga iya ginbuhat. (1 Juan 4:8) Padayon gud nga nagios hi Jehova ha pagbaraan han iya ngaran.

15. Paonan-o ginpapakaraot ni Satanas an ngaran han Dios yana, ngan ano an mga resulta?

¹⁵ Ginpapakaraot la gihapon ni Satanas an ngaran han Dios yana. Ginlilimbongan niya an mga tawo basi magruhaduha hira nga an Dios gamhanan, makatadunganon, maaramon, ngan mahigugmaon. Pananglitan, ginkukombinse ni Satanas an mga tawo nga hi Jehova diri amo an Maglalarang. Ngan kon tumoo an mga tawo nga may Dios, ginpapatoo hira ni Satanas nga an Dios ngan an Iya mga suruklan istrikto ngan diri  patas. Igintututdo pa ngani niya nga hi Jehova mapintas ngan waray kalooy nga Dios nga nagsusunog ha mga tawo ha naglalaga nga impyerno. Kon tumoo hira ha sugad nga pakaraot, masayon na la nga isalikway nira an matadong nga pagmando ni Jehova. Tubtob nga bungkagon ni Jehova hi Satanas, padayon nga papakarauton niya hi Jehova, ngan pupuntiryahon ka liwat niya. Maglalampos ba hiya?

16. Ano an imo mahihimo nga waray mabuhat nira Adan ngan Eva?

¹⁶ Gintutugotan ni Jehova an diri perpekto nga mga tawo nga bumulig ha pagbaraan han iya ngaran. Salit, mahihimo mo an waray mabuhat nira Adan ngan Eva. Bisan kon damu gud yana an mga nagpapakaraot ngan nagpapasipara han ngaran ni Jehova, may oportunidad ka nga depensahan an iya ngaran ngan sumatan an mga tawo nga baraan, matadong, maopay, ngan mahigugmaon hiya. (Isa. 29:23) Mahimo mo suportaran an iya pagmando. Mahimo mo buligan an mga tawo nga masabtan nga an pagmando la ni Jehova an bug-os nga matadong ngan ito la an makakahatag hin kamurayawan ngan kalipay ha ngatanan.​—Sal. 37:9, 37; 146:5, 6, 10.

17. Paonan-o iginpakilala ni Jesus an ngaran han iya Amay?

¹⁷ Kon gindidepensahan naton an ngaran ni Jehova, ginsusubad naton hi Jesus. (Juan 17:26) Iginpakilala ni Jesus an ngaran han iya Amay diri la pinaagi ha paggamit hito kondi pinaagi liwat ha pagdepensa han reputasyon ni Jehova. Pananglitan, ginkontra ni Jesus an mga Pariseo, nga ha damu nga paagi iginpakilala hi Jehova sugad nga waray konsiderasyon, nagpipirit, makuri madaop, ngan diri maloloy-on. Ginbuligan ni Jesus an mga tawo nga makilala hi Jehova sugad nga makatadunganon, mapailubon, mahigugmaon, ngan mapinasayloon. Ginbuligan liwat niya an mga tawo nga makilala hi Jehova pinaagi han iya perpekto nga pagsubad han mga kalidad han iya Amay ha iya adlaw-adlaw nga pagkinabuhi.​—Juan 14:9.

18. Ano an mahimo naton buhaton basi mapamatud-an nga diri totoo an kabuwaan ngan pakaraot parte kan Jehova?

¹⁸ Pariho kan Jesus, mahimo naton isumat ha mga tawo an aton nahibabaroan parte kan Jehova, pinaagi ha pagtutdo ha ira nga mahigugmaon ngan buotan gud Hiya. Kon ginbubuhat naton ito, ginpapamatud-an naton nga diri totoo an kabuwaan ngan pakaraot parte kan Jehova. Ginbabaraan naton an ngaran ni Jehova pinaagi ha  paghimo hito nga baraan ha hunahuna ngan kasingkasing han mga tawo. Mahimo liwat naton subaron hi Jehova. Posible ito bisan kon diri kita perpekto. (Efe. 5:1, 2) Kon an aton mga pulong ngan buhat nagpapakita kon ano gud nga klase nga Dios hi Jehova, nakakabulig kita ha pagbaraan han iya ngaran. Ginbibindikar naton ito pinaagi ha pagbulig ha mga tawo nga mahibaroan an kamatuoran parte ha Dios. * Ginpapamatud-an liwat naton nga an diri perpekto nga mga tawo makakapabilin nga maunungon ha Dios.​—Job 27:5.

19. Paonan-o an Isaias 63:7 nabulig ha aton nga mahibaroan kon ano an angay magin nangunguna nga tumong han aton pagtutdo?

¹⁹ Tagda an usa pa nga mahihimo naton basi mabaraan an ngaran ni Jehova. Kon nagtututdo kita ha iba han mga kamatuoran han Biblia, kasagaran nga aton ginpapabug-atan an pagkasoberano han Dios, nga hi Jehova may katungod ha pagmando ha uniberso, ngan tama gud ito. Kondi, bisan kon importante nga tutdoan hira han mga balaud han Dios, an aton nangunguna nga tumong amo an pagbulig ha ira nga higugmaon hi Jehova nga aton Amay, ngan magin maunungon ha iya. Salit, kinahanglan naton pabug-atan an makaruruyag nga mga kalidad ni Jehova, ngan kon ano nga klase nga Persona an ginrirepresentaran han ngaran nga Jehova. (Basaha an Isaias 63:7.) Samtang nagtututdo kita ha sugad nga paagi, mabubuligan naton an iba nga higugmaon ngan sundon hi Jehova kay karuyag nira nga magin maunungon ha iya.

20. Ano an aton hihisgotan ha sunod nga artikulo?

²⁰ Kondi paonan-o naton masisiguro nga an aton panggawi ngan paagi han pagtutdo makakabulig ha iba nga magkaada maopay nga impresyon kan Jehova kon mabatian nira an iya ngaran ngan magin duok ha iya? Babatunon ha sunod nga artikulo ito nga pakiana.