1. Ano an ginbuhat ni Jehova para ha tagsa ha aton?

IGINPAHIRANI ni Jehova ha iya an tagsa ha aton. (Juan 6:44) Hunahunaa kon ano an iginpapasabot hini. Samtang gin-uusisa ni Jehova hin maopay an binilyon nga mga tawo hini nga kalibotan, may nakita hiya ha imo nga presyoso​—usa nga sinsero nga kasingkasing nga mahimo maghigugma ha iya. (1 Cron. 28:9) Kilala ka ni Jehova, nasasabtan ka niya, ngan hinigugma ka niya. Nakakaliaw gud ito!

2. Ano nga ilustrasyon an gin-gamit ni Jesus nga nagpapakita nga hinigugma ni Jehova an tagsa niya nga karnero?

² Hinigugma ka ni Jehova, ngan hinigugma liwat niya an ngatanan mo nga kabugtoan. Basi iilustrar ini nga punto, iginpariho ni Jesus hi Jehova ha usa nga paraataman hin karnero. Kon an 1 han 100 nga karnero nahibulag ha panon, ano an bubuhaton han paraataman? Iya “babayaan an 99 ha kabukiran ngan malakat basi bilngon an usa nga nawawara.” Kon nabilngan na han paraataman an karnero, diri niya ito iisgan. Maglilipay hiya. Ano an punto? Importante kan Jehova an tagsa nga karnero. Hi Jesus nagsiring: “Diri karuyag han akon Amay nga aadto ha langit nga mawara an bisan usa hini nga mga ubos.”​—Mat. 18:12-14.

3. Ano an aton hihisgotan hini nga artikulo?

³ Diri gud naton karuyag nga magin hinungdan kita nga manluya an bisan hin-o han aton kabugtoan. Paonan-o naton malilikyan nga makapakdol ha iba? Ngan ano an mahimo naton buhaton kon may nakasakit ha aton? Babatunon hini nga artikulo ito nga mga pakiana. Pero dugang nga pag-adman anay naton an mahitungod “hini nga mga ubos” nga gin-uunabi ha Mateo kapitulo 18.

4. Hin-o ‘ini nga mga ubos’?

⁴ ‘Ini nga mga ubos’ amo an mga disipulo ni Jesus nga iba-iba an pangidaron. Anoman an ira edad, pariho hira hin “kabataan” kay andam hira magpatutdo kan Jesus. (Mat. 18:3) Bisan kon iba-iba an ira gintikangan, kultura, panhunahuna, ngan personalidad, nagpapakita hira ngatanan hin pagtoo ha Kristo. Tungod hito, hinigugma gud niya hira.​—Mat. 18:6; Juan 1:12.

5. Ano an inaabat ni Jehova kon may usa nga nakakapakdol o nakakasakit ha usa han Iya katawohan?

⁵ ‘Ini nga mga ubos’ presyoso gud kan Jehova. Basi masabtan kon ano an iya inaabat, hunahunaa an aton inaabat ha kabataan. Presyoso gud hira ha aton. Karuyag naton proteksyonan hira kay waray hira han kusog, eksperyensya, ngan kinaadman nga pariho han mga adulto. Ngani, diri naton karuyag nga may makita nga bisan hin-o nga ginpapasakitan; labi na nga nasusubo kita​—nasisina pa ngani​—kon may ginpapasakitan nga usa nga bata. Sugad man, karuyag ni Jehova nga proteksyonan kita. Nasusubo hiya​—nasisina pa ngani​—kon may usa nga nakakapakdol o nakakasakit ha usa han Iya katawohan!​—Isa. 63:9; Mar. 9:42.

6. Sumala ha 1 Corinto 1:26-29, ano an pagkita han kalibotan ha mga disipulo ni Jesus?

⁶ Ha ano pa nga paagi nga an mga disipulo ni Jesus pariho hin “mga ubos”? Bueno, ha kalibotan, hin-o an ginkukonsiderar nga importante? An mga riko, an mga sikat, ngan an mga gamhanan. Ha kabaliktaran, an mga disipulo ni Jesus baga hin diri importante ngan minos nga mga tawo. (Basaha an 1 Corinto 1:26-29.) Pero diri sugad hito an pagkita ni Jehova ha ira.

7. Ano an karuyag ni Jehova nga abaton naton ha aton kabugtoan?

⁷ Hinigugma ni Jehova an ngatanan niya nga surugoon, bag-ohan man hira o maiha na nga nag-aalagad ha iya. Importante kan Jehova an ngatanan naton nga kabugtoan, salit dapat magin importante liwat hira ha aton. Karuyag naton ‘higugmaon an ngatanan nga kabugtoan,’ diri la an pipira ha ira. (1 Ped. 2:17) Dapat kita magin andam ha pagbuhat han aton mahihimo basi proteksyonan ngan atamanon hira. Kon nahibaroan naton nga may nasakitan kita, dapat diri naton ito basta na la nga ibalewaray, nga ginhuhunahuna nga sobra la kasensitibo ito nga tawo ngan kinahanglan niya kalimtan ito. Kay ano nga bangin an iba nasasakitan? Bangin tungod han ira gindak-an, an iba nga kabugtoan minos an pagkita ha ira kalugaringon. An iba bag-ohan ha kamatuoran; diri pa hira maaram kon paonan-o aatubangon an mga kaluyahan han mga tawo. Anoman an rason, dapat naton buhaton an aton mahihimo basi magin murayaw utro an aton relasyon. Pero kinahanglan liwat kilalahon han usa nga agsob masakitan han ginyayakan o ginbubuhat han iba nga ito nga personalidad diri maopay ngan kinahanglan niya ito bag-uhon. Kinahanglan niya ito buhaton basi magkaada hiya murayaw nga hunahuna, ngan para liwat ha kaopayan han iba.

8. Ano nga panhunahuna an nakaimpluwensya ha mga disipulo ni Jesus?

⁸ Kay ano nga hi Jesus nag-istorya mahitungod “hini nga mga ubos”? An iya mga disipulo nagpakiana ha iya: “Hin-o gud an pinakalabaw ha Ginhadian han langit?” (Mat. 18:1) Importante gud para ha damu nga Judio hito nga panahon an posisyon ngan ranggo. Usa nga eskolar an nagsiring: “An pakakarawat hin dungog tikang ha iba ngan an pagin bantogan amo an pinakaimportante ha ira kinabuhi.”

9. Ano an kinahanglan buhaton han mga disipulo ni Jesus?

⁹ Maaram hi Jesus nga an iya mga disipulo kinahanglan mangalimbasog gud nga wad-on ha ira kasingkasing an espiritu han pakigkompetensya nga komon ha kultura han mga  Judio. Nagsiring hiya ha ira: “An pinakalabaw ha iyo magin sugad han pinakamanghod, ngan an nangunguna magin sugad han nagsiserbi.” (Luc. 22:26) Nagawi kita sugad nga “pinakamanghod” kon ‘gintatagad [naton] an iba nga labaw’ ha aton. (Fil. 2:3) Samtang ginkukultibar naton ito nga disposisyon, mas gutiay an posibilidad nga makapakdol kita ha iba.

10. Ano nga sagdon ni Pablo an kinahanglan naton iaplikar?

¹⁰ An ngatanan nga aton kabugtoan mas labaw ha aton ha iba-iba nga paagi. Masayon la ini makita kon nagpupokus kita ha ira maopay nga mga kalidad. Dapat naton iaplikar an sagdon ni apostol Pablo ha mga taga-Corinto: “Hin-o ba an naghimo ha imo nga labaw kay ha iba? Ngan ano ba an aada ha imo nga waray mo karawata? Ha pagkamatuod, kon nakarawat mo ito, kay ano nga naghahambog ka nga baga hin waray mo ito makarawat?” (1 Cor. 4:7) Salit diri gud naton dapat hingyapon nga bumilib ha aton an iba o hunahunaon naton an aton kalugaringon nga mas labaw ha iba. Kon an usa nga brother maopay gud magpahayag o kon an usa nga sister masayon la makagtikang hin mga Bible study, kinahanglan ihatag pirme niya kan Jehova an kadayawan tungod han iya mga nahihimo.

11. Ano an igintututdo ha aton han ilustrasyon ni Jesus mahitungod ha usa nga hadi ngan han iya uripon?

¹¹ Waray pag-iha katapos pahamangnoan ni Jesus an iya mga sumurunod nga likyan nga makapakdol ha iba, naghatag hiya hin ilustrasyon mahitungod ha usa nga hadi ngan han iya uripon. Ginkansela han hadi an daku gud nga utang nga diri kaya baydan han uripon. Katapos, ito nga uripon nadiri pagkansela han mas gutiay gud nga utang ha iya han iya igkasi-uripon. Ha urhi, iginpapriso han hadi iton waray kalooy nga uripon. Ano an leksyon? Hi Jesus nagsiring: “Sugad liwat hito an bubuhaton ha iyo han akon Amay ha langit kon diri pasayloon han tagsa ha iyo an iyo bugto tikang ha iyo kasingkasing.”​—Mat. 18:21-35.

12. Kon diri kita nagpapasaylo, paonan-o naton nasasakitan an iba?

¹² An ginbuhat han uripon nakasakit, diri la ha iya kondi pati ha iba. Siyahan, waray hiya magpakita hin kalooy ha iya igkasi-uripon pinaagi ha ‘pagpapriso ha iya tubtob han pakabayad han utang.’ Ikaduha, nakasakit hiya ha iba pa nga mga uripon nga nakakita han iya ginbuhat. “Han nakita han iya mga igkasi-uripon an nahitabo, nasubo gud hira.” Sugad man, nakakaapekto ha iba an aton mga ginbubuhat. Kon may nagtratar ha aton hin maraot ngan diri naton hiya ginpapasaylo, ano an mahimo mahitabo? Siyahan, nasasakitan naton hiya tungod kay diri naton hiya ginpapasaylo ngan bangin diri naton hiya ginpapansin ngan diri naton ginpapakitaan hin gugma. Ikaduha, nagigin diri komportable an iba ha kongregasyon kon napapansin nira nga diri maopay an aton relasyon hito nga tawo.

13. Ano an imo nahibaroan ha eksperyensya han usa nga payunir?

¹³ Kon nagpapasaylo kita ha aton kabugtoan, nagpapahimulos kita pati an iba. Ito an naeksperyensyahan han usa nga payunir nga tatawagon naton nga Crystal. Nasakitan hiya han usa nga sister ha kongregasyon. Hi Crystal nagsiring: “Danay nakakasakit an iya mga ginyayakan ngan pariho ito hin kutsilyo nga nakakasamad ha akon. Nadiri ngani ako nga makaupod hiya ha sarakyan kon nagsasangyaw kami. Hinay-hinay nga nawara an akon kadasig ngan kalipay.” Ginhunahuna ni Crystal nga may rason hiya nga masina. Pero waray niya pabay-i nga magpadayon an iya kasina o magpokus ha iya kalugaringon ngan ha iya inaabat. Mapainubsanon nga gin-aplikar niya an sagdon han Kasuratan nga mababasa ha artikulo nga “Magpasaylo Tikang ha Imo Kasingkasing” ha  Oktubre 15, 1999 nga An Barantayan. Ginpasaylo niya an sister. Hi Crystal nagsiring: “Yana nasantop ko nga kita ngatanan nangangalimbasog ha pagsul-ot han bag-o nga personalidad ngan hura nga ginpapasaylo kita ni Jehova kada adlaw. Inabat ko nga baga hin nawara an akon mabug-at gud nga pinas-an. Nagin malipayon ako utro.”

14. Sumala ha Mateo 18:21, 22, ano an posible nga nagin problema ni apostol Pedro, ngan ano an imo nahibaroan ha baton ni Jesus?

¹⁴ Maaram kita nga kinahanglan kita magpasaylo; ito an husto buhaton. Pero bangin nakukurian kita ha pagbuhat hito. Posible nga may mga panahon nga ito an inabat ni apostol Pedro. (Basaha an Mateo 18:21, 22.) Ano an makakabulig? Siyahan, pamalandonga an damu ka beses na nga pagpasaylo ha imo ni Jehova. (Mat. 18:32, 33) Diri kita angayan han iya pagpasaylo, pero hura nga iginhahatag niya ito ha aton. (Sal. 103:8-10) Sugad man, “obligado liwat kita nga higugmaon an usa kag usa.” Salit an pagpasaylo diri opsyonal. Responsabilidad naton nga pasayloon an aton kabugtoan. (1 Juan 4:11) Ikaduha, pamalandonga kon ano an nahitatabo kon nagpapasaylo kita. Mabubuligan naton an nakasayop ha aton, magkakaurosa an kongregasyon, mapuproteksyonan an aton pakigsangkay kan Jehova, ngan mawawara an aton mabug-at nga pinas-an. (2 Cor. 2:7; Col. 3:14) Katapos, pag-ampo ha Iya nga nagsusugo ha aton nga magpasaylo. Ayaw pabay-i hi Satanas nga dauton an imo murayaw nga relasyon ha imo kabugtoan. (Efe. 4:26, 27) Kinahanglan naton an bulig ni Jehova basi diri kita mabiktima han lit-ag ni Satanas.

15. Uyon ha Colosas 3:13, ano an mahimo naton buhaton kon naaaringit kita han ginbuhat han usa nga bugto?

¹⁵ Pero ano man kon an imo igkasi-tumuroo may nabuhat nga nakapaaringit gud ha imo? Ano an dapat mo himoon? Buhata an tanan nga imo mahihimo basi matipigan an kamurayawan.  Sinsero gud nga mag-ampo kan Jehova. Hangyoa hiya nga bendisyonan an bugto nga nakasakit ha imo ngan buligan ka nga makita an mag-opay nga kalidad hito nga bugto​—an mga kalidad mismo nga naruyagan gud ha iya ni Jehova. (Luc. 6:28) Kon diri mo mapapalabay an ginbuhat han bugto, hunahunaa kon ano an pinakamaopay nga paagi ha pakiistorya ha iya. Maopay gud hunahunaon pirme nga waray tuyoa han bugto nga masakitan ka. (Mat. 5:23, 24; 1 Cor. 13:7) Kon nakikiistorya ka ha iya, hunahunaa nga may maopay hiya nga intensyon. Ano man kon nadiri hiya pakigmurayaw? “Padayon nga magpailob” ha iya. Ayaw undang. (Basaha an Colosas 3:13.) An pinakaimportante, ayaw gud pagpabilin nga nasisina ha iya kay makakadaot ito han imo pakigsangkay kan Jehova. Ayaw gud tuguti an bisan ano nga makapakdol ha imo. Kon bubuhaton mo ito, iginpapakita mo nga mas hinigugma mo hi Jehova kay ha bisan ano.​—Sal. 119:165.

16. Ano an responsabilidad han kada tagsa ha aton?

¹⁶ Mapasalamaton gud kita ha pribilehiyo nga urosa nga makag-alagad kan Jehova sugad nga “usa nga panon nga may usa nga paraataman”! (Juan 10:16) An libro nga Organisado ha Pagbuhat han Kaburut-on ni Jehova, pahina 165, nasiring: “Yana nga nagpapahimulos ka na hito nga pagkaurosa, may responsabilidad ka ha pagbulig basi matipigan ito.” Salit, kinahanglan mangalimbasog kita nga “kitaon an aton kabugtoan sugad han pagkita ha ira ni Jehova.” Para kan Jehova, kita ngatanan presyoso nga “mga ubos.” Ito ba an imo pagkita ha imo kabugtoan? Nakikita ngan gin-aapresyar ni Jehova an ngatanan nga imo ginbubuhat ha pagbulig ngan pag-ataman ha ira.​—Mat. 10:42.

17. Ano an aton determinasyon?

¹⁷ Hinigugma naton an aton mga igkasi-magsiringba. Salit “determinado [kita] nga diri magbutang hin hiparakdolan o hin ulang ha atubangan han usa nga bugto.” (Roma 14:13) Ginhuhunahuna naton nga mas labaw ha aton an aton kabugtoan, ngan karuyag naton nga pasayloon hira tikang ha aton kasingkasing. Diri naton tugotan nga mahipakdol kita ha iba. Lugod, “pangalimbasogan naton pirme an mga butang nga nag-aaghat hin kamurayawan ngan an mga butang nga nagpaparig-on ha usa kag usa.”​—Roma 14:19.