1. Kay ano nga hi Satanas pariho hin parapanganop?

USA la an katuyoan han parapanganop​—dakpon o patayon an usa nga hayop. Mahimo pa ngani hiya gumamit hin iba-iba nga bitik o lit-ag, sugad han iginpapakita ha Biblia. (Job 18:8-10) Ano an ginhihimo han parapanganop basi mahilit-ag an usa nga hayop? Gin-oobserbaran niya ito hin maopay. Diin ito napakadto? Ano an mga karuyag hito? Ano an pinakamaopay nga bitik nga iya gagamiton basi madakop ito? Hi Satanas pariho hito nga parapanganop. Gin-oobserbaran kita niya. Nakikita niya kon diin kita napakadto, ngan kon ano an aton mga karuyag. Katapos, nagpipili hiya hin bitik nga ginhuhunahuna niya nga epektibo ha pagdakop ha aton. Pero ginpapasarig kita han Biblia nga kon madakop kita, puydi pa kita makapalagiw. Nagtututdo liwat ito kon paonan-o ta malilikyan ito nga mga bitik.

2. Ano an duha han pinakaepektibo nga bitik nga ginagamit ni Satanas?

² An duha han pinakaepektibo nga bitik nga ginagamit ni Satanas amo an pagpahitaas ngan kahakog. * Ha sulod hin yinukot na ka tuig, malampuson nga ginagamit ni Satanas inin maraot nga mga kalidad. Pariho hiya hin parapanakop hin tamsi nga nagbubutang hin paon basi mahilit-ag an iya bibiktimahon o mahibitik ito ha usa nga pukot. (Sal. 91:3) Pero puydi kita diri madakop ni Satanas. Kay ano? Tungod kay ginsumatan kita ni Jehova han mga taktika ni Satanas.​—2 Cor. 2:11.

3. Kay ano nga iginpasurat ni Jehova ha Biblia an pipira nga ehemplo?

³ Usa nga paagi nga ginpapahamangnoan kita ni Jehova mahitungod ha pagpahitaas ngan kahakog amo an pagdasig ha aton nga mahibaro tikang ha mga eksperyensya han pipira niya nga surugoon.  Mapapansin naton ha mga ehemplo nga aton hihisgotan nga nabitik ni Satanas bisan an maiha na nga mga surugoon ni Jehova. Karuyag sidngon ba hini nga imposible naton malikyan ito nga iya mga bitik? Diri. Iginpasurat ni Jehova ini nga mga ehemplo ha Biblia basi “pahamangnoan kita.” (1 Cor. 10:11) Maaram hiya nga mahibabaro kita tikang hito nga mga ehemplo, ngan mabulig ito ha aton nga makalikay o makapalagiw tikang ha mga bitik han Yawa.

4. Ano an mahitatabo ha aton kon magigin mapahitas-on kita?

⁴ Karuyag ni Satanas nga magin mapahitas-on kita. Maaram hiya nga kon magkakaada kita hito nga kalidad, magigin pariho kita ha iya ngan mawawara ha aton an paglaom nga mabuhi ha waray kataposan. (Prob. 16:18) Salit nagpahamangno hi apostol Pablo nga an usa nga tawo bangin “magpahitaas . . . ngan kumarawat hin paghukom nga pariho han nakarawat han Yawa.” (1 Tim. 3:6, 7) Mahimo ito mahitabo ha bisan hin-o ha aton, bag-ohan man kita o maiha na nga nag-aalagad kan Jehova.

5. Sumala ha Eclesiastes 7:16, 20, paonan-o mahimo ipakita han usa nga nagpapahitaas hiya?

⁵ An usa nga tawo nga mapahitas-on makikalugaringon. Naniningkamot hi Satanas nga impluwensyahan kita nga magin makikalugaringon, nga mas magpokus ha aton kalugaringon kay ha kan Jehova, labi na kon may-ada kita mga problema. Pananglitan, gin-akusaran ka ba nga nagbuhat hin usa nga butang nga waray mo man himoa? O may nagtratar ba ha imo hin maraot? Karuyag ni Satanas nga basulon mo hi Jehova o an imo kabugtoan. Ngan karuyag han Yawa nga hunahunaon mo nga an solusyon la ha imo problema amo an pagbuhat hin mga butang ha imo la kalugaringon nga paagi, imbes nga sundon mo an giya ni Jehova nga aada ha iya Pulong.​—Basaha an Eclesiastes 7:16, 20.

6. Ano an imo nahibaroan ha eksperyensya han usa nga sister nga taga-Netherlands?

⁶ Tagda an eksperyensya han usa nga sister nga taga-Netherlands nga naaringit ha mga kaluyahan han iba. Nagdesisyon hiya nga diri na hiya makikig-upod ha ira. “Nasubo gud ako ngan naghunahuna nga diri ko na mababag-o an akon inaabat ha ira,” siring niya. “Ginsidngan ko an akon  asawa nga bumalhin kami hin kongregasyon.” Katapos, ginkita niya an Marso 2016 nga programa ha JW Broadcasting. Ito nga programa may mga suhestyon kon paonan-o aatubangon an mga kaluyahan han iba. An sister nagsiring: “Nasantop ko nga kinahanglan tangkod ngan mapainubsanon nga kitaon ko an akon mismo mga sayop, imbes nga mangalimbasog ako nga bag-uhon an kabugtoan ha kongregasyon. Ito nga programa nakabulig ha akon nga magpokus kan Jehova ngan ha iya soberanya.” Ano an punto? Kon may problema ka, pagpabilin nga nakapokus kan Jehova. Pangamuyo nga buligan ka niya nga kitaon mo an iba sugad han iya pagkita ha ira. Nakikita han imo langitnon nga Amay an ira mga sayop; pero andam hiya nga pasayloon hira. Ito liwat an karuyag niya nga buhaton mo.​—1 Juan 4:20.

7. Ano an nahitabo kan Hadi Uzias?

⁷ Tungod ha pagpahitaas, hi Hadi Uzias han Juda waray mamati han sagdon, ngan nagbuhat hiya hin usa nga butang nga diri hiya awtorisado. Hi Uzias maabilidad nga tawo. Nagdaog hiya ha damu nga girra, naghimo hin damu nga syudad, ngan nagkaada damu nga kaumhan. “Ginpahinabo han tinuod nga Dios nga mag-uswag hiya.” (2 Cron. 26:3-7, 10) “Kondi han makusog na hiya, nagin mapahitas-on an iya kasingkasing nga nagresulta han iya kadaot,” siring han Biblia. Antes pa hito, iginsugo ni Jehova nga an mga saserdote la an puydi maghalad hin insenso ha templo. Pero nagparagbuot hi Hadi Uzias, kinadto hiya ha templo basi maghalad hin insenso. Waray malipay hi Jehova, salit iya ginsirotan hin liprosi iton mapahitas-on nga tawo. Nagpabilin hi Uzias nga may liprosi tubtob han namatay hiya.​—2 Cron. 26:16-21.

8. Sumala ha 1 Corinto 4:6, 7, paonan-o naton malilikayan nga magin mapahitas-on?

⁸ Mahimo ba liwat kita mahilit-ag han pagpahitaas pariho han nahitabo kan Uzias? Tagda an ehemplo ni José. Malampuson gud hiya nga negosyante, ngan usa hiya nga respetado nga tigurang ha kongregasyon. Nagpapahayag hiya ha mga asembleya ngan mga kombensyon, ngan an mga paramangno han sirkito naaro ha iya hin sagdon. “Pero sinarig ako ha akon abilidad ngan ha akon eksperyensya,” siring niya. “Waray ako sumarig kan Jehova. Naghunahuna ako nga marig-on ako salit waray ako mamati han mga pahamangno ngan sagdon ni Jehova.” Hi José nakabuhat hin seryoso nga sala ngan ginpaiwas ha kongregasyon. Paglabay hin pipira ka tuig, nakabalik hiya. Hiya nagsiring: “Gintutdoan ako ni Jehova nga an importante diri an pagkaada pribilehiyo, kondi an pagbuhat han iginsusugo  niya ha aton.” Hinumdoman naton nga anoman nga abilidad an may-ada kita ngan anoman nga pribilehiyo an aton nakakarawat ha kongregasyon, tikang ito kan Jehova. (Basaha an 1 Corinto 4:6, 7.) Kon mapahitas-on kita, diri kita gagamiton ni Jehova.

9. Tungod ha kahakog, ano an ginbuhat ni Satanas ngan ni Eva?

⁹ Kon nahuhunahuna naton an mahitungod ha kahakog, posible gud nga hi Satanas nga Yawa an aton nahinunumdoman. Sugad nga anghel ni Jehova, sigurado nga damu an iya mag-opay nga pribilehiyo. Pero karuyag niya hin dugang pa. Karuyag niya magkaada han pagsingba nga angayan gud la para kan Jehova. Karuyag ni Satanas nga magin pariho kita ha iya, salit naniniguro hiya nga diri kita makontento ha kon ano an may-ada kita. Siyahan nga ginbuhat niya ito han nakiistorya hiya kan Eva. Mahigugmaon nga igintagana ni Jehova kan Eva ngan ha iya asawa an damu ngan nakakabusog nga pagkaon​—“tikang ha tagsa nga kahoy ha garden” labot la ha usa nga kahoy. (Gen. 2:16) Bisan pa hito, ginlimbongan ni Satanas hi Eva nga maghunahuna nga kinahanglan niya kumaon han bunga han kahoy nga igindidiri. Waray makontento hi Eva ha kon ano an may-ada hiya; karuyag niya hin dugang pa. Maaram kita han nagin resulta hito. Nakasala hi Eva ngan ha urhi namatay.​—Gen. 3:6, 19.

10. Ano an nahitabo han nagin hakog hi Hadi David?

¹⁰ Tungod ha kahakog, nahingalimtan ni Hadi David an mga iginhatag ha iya ni Jehova, upod na an karikohan, pagin prominente, ngan kadaogan kontra ha damu niya nga kaaway. Mapasalamaton nga nagsiring hi David nga an mga regalo han Dios “duro . . . kadamu para isaysay!” (Sal. 40:5) Pero makausa, nahingalimtan ni David an mga iginhatag ha iya ni Jehova. Waray na hiya makontento; karuyag niya hin dugang pa. Bisan kon damu na an asawa ni David, ginhingyap niya an asawa han iba. Ito nga babaye amo hi Bat-seba, ngan an iya asawa amo hi Uria nga Hiteo. Tungod ha kahakog, nakighilawas hi David kan Bat-seba, ngan nagburod hi Bat-seba. Ito nga pag-adulteryo maraot gud, pero may ginbuhat hi David nga mas maraot pa. Ginplano niya nga mamatay hi Uria! (2 Sam. 11:2-15) Ano an nakada ha hunahuna ni David? Naghunahuna ba hiya nga diri nakikita ni Jehova an iya ginbubuhat? Bisan kon hi David maiha na nga nag-aalagad kan Jehova, nagin hakog hiya ngan nag-antos gud hiya tungod hito. Pero maopay na la kay ha urhi, gin-amin ni David an iya sala ngan nagbasol. Mapasalamaton gud  hiya nga ginpasaylo hiya ni Jehova!​—2 Sam. 12:7-13.

11. Sumala ha Efeso 5:3, 4, ano an makakabulig ha aton nga maatohan an kahakog?

¹¹ Ano an aton mahibabaroan ha ehemplo ni David? Nahibaroan naton nga maaatohan ta an kahakog kon padayon kita nga magigin mapasalamaton ha ngatanan nga iginhahatag ha aton ni Jehova. (Basaha an Efeso 5:3, 4.) Kinahanglan magin kontento kita ha kon ano an may-ada kita. Gin-aaghat naton an aton bag-o nga mga Bible study nga maghunahuna hin usa nga espisipiko nga bendisyon ngan magpasalamat hira kan Jehova tungod hito. Kon bubuhaton nira ito kada adlaw ha sulod hin usa ka semana, karuyag sidngon, makakag-ampo hira hin pito nga iba-iba nga topiko. (1 Tes. 5:18) Ginbubuhat mo ba liwat ito? Kon papamalandungon mo an ngatanan nga ginbubuhat ni Jehova para ha imo, makakabulig ito nga magin mapasalamaton ka. Ngan kon mapasalamaton ka, magigin kontento ka. Ngan kon kontento ka, diri ka mabibitik han kahakog.

12. Ano an ginbuhat ni Judas Iscariote tungod ha kahakog?

¹² Tungod ha kahakog, hi Judas Iscariote nagin sobra karaot nga traydor. Pero ha tinikangan, diri hiya sugad hito. (Luc. 6:13, 16) Ginpili hiya ni Jesus sugad nga apostol. Sigurado nga maopay hiya nga tawo ngan masasarigan kay hiya an ginpakapot han kahon han kwarta. Ito nga kwarta gin-gagamit ni Jesus ngan han mga apostol sugad nga panggastos ha ira pagsangyaw. Maipapariho ito ha mga donasyon yana para ha bug-os-kalibotan nga buruhaton. Pero waray pag-iha, nagtikang mangawat hi Judas, bisan pa kon nakabati hiya han pauroutro nga pahamangno ni Jesus mahitungod ha kahakog. (Mar. 7:22, 23; Luc. 11:39; 12:15) Ginbalewaray ni Judas ito nga mga pahamangno.

13. Kakan-o nakita an pagin hakog ni Judas?

¹³ Nakita an pagin hakog ni Judas durante han usa nga panhitabo antes han kamatayon ni Jesus. Hi Jesus ngan an iya mga disipulo, upod na hi Maria ngan an iya bugto nga hi Marta, mga bisita ni Simon nga may liprosi hadto. Han nangangaon hira, binuhat hi Maria ngan ginbuboan an ulo ni Jesus hin mahamot nga lana nga marahalon. Nasina gud hi Judas ngan an iba nga disipulo. An iba nga disipulo posible nga naghunahuna nga an kwarta magagamit unta hin mas maopay ha ministeryo. Pero iba an motibo ni Judas. “Kawatan hiya,“ ngan karuyag niya kawaton an kwarta ha kahon. Ha urhi, tungod han kahakog, gintraydor ni Judas hi Jesus kabalyo hin kantidad nga presyo han usa nga uripon.​—Juan 12:2-6; Mat. 26:6-16; Luc. 22:3-6.

14. Paonan-o igin-aplikar han usa nga mag-asawa an leksyon ha Lucas 16:13?

¹⁴ Ginpahinumdoman ni Jesus an iya mga sumurunod hinin importante nga kamatuoran: “Diri niyo mahimo pagdunganon an pagin uripon han Dios ngan han Karikohan.” (Basaha an Lucas 16:13.) Aplikado pa gihapon ito yana. Tagda kon paonan-o gin-aplikar han usa nga mag-asawa nga taga-Romania an ginsiring ni Jesus. Gintanyagan hira hin temporaryo nga trabaho ha usa nga mas mainuswagon nga nasud. “May-ada kami daku nga utang ha bangko nga ginbabaydan. Salit han una naghunahuna kami nga bendisyon ni Jehova ini nga trabaho,“ siring nira. Pero may-ada problema. Ito nga trabaho makakaulang ha ira pag-alagad kan Jehova. Katapos mabasa an artikulo nga “Bug-os-Kasingkasing nga Magpabilin nga Maunungon” ha Agosto 15, 2008 nga An Barantayan, naghimo hira hin desisyon. Hira nagsiring: “Kon an amon motibo ha pagtrabaho ha iba nga nasud amo an pagkaada mas damu nga kwarta, magigin ikaduha na la an amon relasyon kan Jehova. Sigurado kami nga maaapektohan an amon espirituwalidad.” Salit waray nira karawata an trabaho. Ano an nahitabo? An bana nakabiling hin trabaho ha ira nasud nga nakasustinir han ira panginahanglan.  An asawa nagsiring: “Diri gud halipot an kamot ni Jehova.” Malipayon ini nga mag-asawa kay hi Jehova an ira ginhimo nga Agaron imbes nga an kwarta.

15. Kay ano nga makakasiguro kita nga posible makapalagiw ha mga bitik ni Satanas?

¹⁵ Ano man kon napansin naton nga nahilit-ag na ngay-an kita ha pagpahitaas o kahakog? Mahimo kita makapalagiw! Hi Pablo nagsiring nga adton mga “nadakop nga buhi” han Yawa mahimo la gihapon makapalagiw tikang ha bitik. (2 Tim. 2:26) Ito an nahitabo kan David. Namati hiya ha pagsaway ni Nathan, nagbasol han iya pagin hakog, ngan nangalimbasog nga maibalik an iya maopay nga relasyon kan Jehova. Ayaw gud hingalimti nga mas gamhanan hi Jehova kan Satanas. Salit kon kakarawaton naton an bulig ni Jehova, makakapalagiw kita tikang ha bisan ano nga bitik o lit-ag han Yawa.

16. Ano an makakabulig ha aton nga malikyan an mga bitik ni Satanas?

¹⁶ Bisan kon mahimo kita makapalagiw ha mga bitik o mga lit-ag ni Satanas, mas maopay gud kon bug-os naton ito nga lilikyan. Mahihimo naton ito pinaagi la han bulig han Dios. Pero kinahanglan diri kita magin kampante! Bisan an maiha na nga mga surugoon ni Jehova nagin mapahitas-on o hakog. Salit pakimalooy kan Jehova kada adlaw nga buligan ka niya nga makita kon nakakaimpluwensya na ha imo panhunahuna ngan buhat iton magraot nga kalidad. (Sal. 139:23, 24) Ayaw gud pabay-i nga mahilit-ag ka hito!

17. Ano an hirani na mahitabo ha aton kaaway, an Yawa?

¹⁷ Ha sulod hin yinukot na nga katuigan, hi Satanas pariho gud hin parapanganop. Pero diri mag-iiha, gagapuson hiya ngan ha urhi papatayon. (Pah. 20:1-3, 10) Ginpapamulat gud naton ito nga adlaw. Samtang waray pa ito, magpabilin nga alerto ha mga bitik ni Satanas. Pangalimbasog gud nga diri ka magin mapahitas-on o hakog. Magin determinado nga ‘atohan an Yawa, ngan mapalagiw hiya ha imo.’​—San. 4:7.